Sulumaꞌ wat danduꞌ tebalu dan hakim
18
1 Pongo gino Yesus maraꞌ sulumaꞌ No intok ngatun daꞌ murit-murit No wat sembayang, supayaꞌ iro turus sembayang dangan maꞌ polok-polok sembayang. 2 Dagu kon Yesus, “Sino hakim daꞌ dondo kutaꞌ an lop alaꞌ daꞌ Allah dangan oyo lop ngormat si so pon ulun. 3 Daꞌ kutaꞌ ino sino singkiring danduꞌ tebalu an sarok matong daꞌ hakim ino. Dagu kon danduꞌ tebalu ino, ‘Tulung nincup mu aku intad ulun an lop adil daꞌ dakon.’ 4 Tutukuraꞌ surung pongo buwoi no, hakim ino totop lop guang nulung daꞌ danduꞌ tebalu ino, tapiꞌ bangun no hakim ino mendagu dalom kadaꞌ, ‘Boi pon aku lop alaꞌ daꞌ Allah dangan lop ngormat si so pon ulun, 5 tapiꞌ karnaꞌ danduꞌ tebalu itu ngasou dakon, labiꞌ piliꞌ aku ngincup so, intok no lop matong ngasou dakon ondo.’ ” 6 Giri dagu kon Tuhan, “Ningog muyun piliꞌ-piliꞌ kon dagu hakim an lop adil ino. 7 Gaꞌ hakim ino kalap ngincup danduꞌ tebalu ino, sinino po Allah pastiꞌ guang nulung ulun an piniliꞌ No an sembayang turus daꞌ Allah. Oyo lop nundaꞌ woktuꞌ intok nulung siro. 8 Aku maraꞌ daꞌ dimuyun, Allah pastiꞌ ligou ngincup siro. Tapiꞌ, gaꞌ Anak Minisiaꞌ matong mino, sino kiꞌ daꞌ diniaꞌ itu ulun an sayaꞌ daꞌ So?”Sulumaꞌ wat ulun Farisi dan tukang tagi pajak
9 Sino ulun-ulun an matong daꞌ dino an ngerasaꞌ iro tu bonor, sobob ino iro mukuwau daꞌ ulun bokon. Jadiꞌ Yesus maraꞌ sulumaꞌ No sinitu, 10 “Sino dungaiꞌ kiring ulun makou mai Baloi Allah intok sembayang. Singkiring ulun Farisi, singkiring tukang tagi pajak. 11 Ulun Farisi ino ngkiriyod ginoi sembayang dalom kadaꞌ no sinitu, ‘Allah, aku bitirimo kasiꞌ daꞌ Diyun sobob aku lop nggirad ulun an bokon, aku lop ntakou, lop munculukon, lop majou, dangan lop nggirad tukang tagi pajak ino. 12 Aku puasaꞌ ngunduo surung simingguꞌ, dangan aku makan persembahan perpuluhan intad asil an alap ku.’ 13 Tapiꞌ tukang tagi pajak ino ngkiriyod alud intad ulun-ulun an bokon. Oyo lop berani gilong mai kuanan, dangan oyo bosoncol mabal kiring no, ginoi mendagu, ‘Allah masiꞌ Kou dakon ulun an budusaꞌ itu.’ 14 Aku maraꞌ daꞌ dimuyun: Togol niro duo muliꞌ mai baloi, Allah ngampun dusaꞌ tukang tagi pajak ino, tapiꞌ lop yo ulun Farisi ino. Sobob si an sawat kadaꞌ no, oyo mino punuruiꞌ dangan si an ruiꞌ kadaꞌ no, oyo mino penasawat.”a
Yesus mborokot anak-anak
15 Sino tutukuraꞌ ulun ngibit anak-anak rumot niro mai Yesus supayaꞌ Oyo petampak longon No daꞌ kiring anak-anak ino, dangan Oyo mborokot daꞌ siro. Tapiꞌ togol murit-murit No gilong angeno iro siyog dangan nyungkang daꞌ tutukuraꞌ ulun ino. 16 Tapiꞌ Yesus nimau anak-anak jano, giri mendagu daꞌ murit-murit No, “Waiꞌ anak-anak ino matong mai Dakon, maꞌ kau nyungkang siro, sobob nggirad sinino nyo ulun-ulun an nirimo Allah mirintaꞌ sebagai Rajaꞌ daꞌ dalom buyag niro. 17 Aku maraꞌ daꞌ dimuyun, ulun an lop nirimo Allah mirintaꞌ sebagai rajaꞌ dalom buyag niro nggirad anak rumot ino, pastiꞌ lop kalap mumpos daꞌ Kerajaan Allah.”
Ulun an pangkor buyag pagon mumpos daꞌ Kerajaan Allah
18 Sino ulun adang, ulun Yahudi gantano daꞌ Yesus, “Guruꞌ an piliꞌ, kon an arus binal ku intok ku kalap uyag mbayaꞌ dangan Allah matong kububuwoi no?” 19 Sambung kon Yesus daꞌ so, “Kon bal mu maraꞌ Dakon piliꞌ? Lop nogom an piliꞌ, Allah koyo an piliꞌ. 20 Okou tantuꞌ pandai sariꞌ an benancuk Allah: Maꞌ majou, maꞌ ngamatoi, maꞌ ntakou, maꞌ nyaluk wat ulun bokon, nohormat mu yamaꞌ dangan inaꞌ mu.”b 21 Dagu kon ulun ino, “Sariꞌ angeno pongo banayaꞌ ku intad dakon buayoi.” 22 Kidingog dagu ulun ino, Yesus maraꞌ daꞌ so, “Kapung dondo po an arus binal mu: Ponolon mu sariꞌ kon an sino daꞌ diyun dangan tinak mu daꞌ ulun an susaꞌ buyag, dangan sinino okou kalap hartaꞌ mu daꞌ surgaꞌ, pongo gino matong kou dangan mayaꞌ daꞌ Dakon.” 23 Kon ulun ino kidingog dagu Yesus, oyo susaꞌ kadaꞌ, sobob oyo ulun an pangkor buyag. 24 Pongo gino Yesus gilong so dangan mendagu, “Kiliwot pagon ulun pangkor buyag nirimo Allah mirintaꞌ sebagai Rajaꞌ dalom buyag no. 25 Labiꞌ ruwoi ruraꞌ tupal an senabit unta mumpos mai luang lawos, intad ulun an pangkor buyag nirimo Allah mirintaꞌ sebagai Rajaꞌ dalom buyag no.” 26 Iro an kidingog dagu Yesus no, mendagu, “Lop kiꞌ sino ulun an kalap sonolomot?” 27 Dagu kon Yesus, “Kon an lop kalap binal minisiaꞌ, kalap binal Allah.”
Tambar mayaꞌ Yesus
28 Giri Petrus mendagu, “Akai pongo ngiduꞌ kon an sino daꞌ damon, dan mayaꞌ daꞌ Diyun.” 29 Dagu kon Yesus daꞌ siro, “Aku maraꞌ daꞌ dimuyun, si ulun an ngiduꞌ baloi no, danduꞌ no, dangan gariꞌ no, ulun tuo no, atau anak-anak no intok niro nirimo Allah mirintaꞌ sebagai Rajaꞌ dalom buyag no, 30 ulun ino mino nirimo labiꞌ suang daꞌ jomon itu, dangan mino daꞌ jomon bokon oyo nirimo buyag an kububuwoi no mbayaꞌ daꞌ Allah.”
Kutulungaiꞌ surung Yesus maraꞌ wat patoi No
31 Yesus nimung puluꞌ sag dungaiꞌ murit No, giri mendagu daꞌ siro, “Gitutu takau makou mai Yerusalem, daꞌ dino sariꞌ an tunulis nabi-nabi gulu ri mangun daꞌ Anak Minisiaꞌ. 32 Sobob Oyo mino tinak daꞌ ulun-ulun an lop kulig daꞌ Allah, iro mino pejajaꞌ dangan ngiwog So, 33 iro po puduol dangan ngamatoi So, tapiꞌ daꞌ odou kutulungaiꞌ Oyo tumuguliꞌ uyag.” 34 Tapiꞌ murit-murit No lop kelatiꞌ kon an benaraꞌ Yesus daꞌ siro. Latiꞌ dagu Yesus tu lonosok intad siro, dan iro lop pandai kon latiꞌ dagu Yesus tu.
Yesus piga ulun bolou daꞌ amad Yerikho
35 Togol Yesus kiꞌ amad daꞌ kutaꞌ Yerikho, sino ulun bolou katung ntudung kitak-kitak daꞌ ribon alan. 36 Kon ulun ino kidingog liawo ulun suang ncail, oyo gantano, “Kon ino?” 37 Dagu kon ulun daꞌ so, “Yesus ulun Nazaret sino ncail daꞌ alan itu.” 38 Giri yo rumuat, “Yesus, kuturunan rajaꞌ Daud, masiꞌ Kou dakon!” 39 Ulun-ulun an makou daꞌ tungkuangan Yesus, siyog so dan mancuk so mongou. Tapiꞌ magaꞌ yo rumuat labiꞌ tupal, “Yesus, kuturunan rajaꞌ Daud, masiꞌ Kou dakon!” 40 Yesus rumungou, giri mancuk ulun ngibit ulun bolou ino mai So. Atong kon daꞌ Yesus, giri Yesus gantano daꞌ ulun bolou ino, 41 “Kon kuguang mu an binal Ku daꞌ diyun?” Sambung kon ulun bolou ino, “Tuhan, aku guang supayaꞌ aku kalap kilong.” 42 Giri dagu kon Yesus daꞌ so, “Kalap kilong nokou, sobob okou sayaꞌ daꞌ Dakon, okou kalap kilong.” 43 Togol ino po ulun bolou ino kalap kilong, giri mayaꞌ daꞌ Yesus dan ngumpod Allah. Suang ulun an gilong angeno dangan iro po mayaꞌ ngumpod Allah.