Tutukuraꞌ atun Yesus
17
1 Yesus maraꞌ daꞌ murit-murit No, “Sino koyo an mal ulun mangun budusaꞌ, tapiꞌ celakaꞌ nyo ulun an mal ulun bokon budusaꞌ. 2 Gaꞌ sino ulun mal ulun an lop jojoꞌ sayaꞌ daꞌ Dakon, ginoi mal ulun ino mal dusaꞌ, labiꞌ piliꞌ batu tupal ino dunukug daꞌ liyog no ginoi bonobor daꞌ unod laut.a 3 Piliꞌ-piliꞌ bal mu, maꞌ kau mal an sinino, gaꞌ sino dangan mu an sayaꞌ daꞌ Tuhan mal dusaꞌ, piningot mu yo, gaꞌ oyo bosoncol, nampun mu yo.b 4 Gaꞌ oyo mal dusaꞌ daꞌ diyun turuꞌ kali songodou, dangan turuꞌ kali oyo matong daꞌ diyun dangan mendagu, ‘Aku bosoncol,’ nampun mu yo.”c 5 Giri dagu kon rasul-rasul ino daꞌ Tuhan, “Tuhan binal Mu akai intok mai labiꞌ sayaꞌ daꞌ Allah.” 6 Sambung kon Yesus daꞌ siro, “Gaꞌ akau sayaꞌ nggirad umi sesawi an rumot ino koyo, akau kalap mendagu daꞌ taun ara itu, ‘Ntububul nokou ginoi mbalui temanom mai laut,’ pastiꞌ oyo mayaꞌ dagu muyun.”Ripon an nyarung
7 “Sino kiꞌ intad dimuyun mendagu daꞌ singkiring ripon muyun, togol ripon muyun no bagu muliꞌ ngusaꞌ intad umo dangan ngejagaꞌ ruraꞌ bunuyag muyun, su ngakan? 8 Pastiꞌ no lop, akau pastiꞌ mendagu daꞌ ripon muyun, ‘Sinidiaꞌ mu akan ku dan ncalin kurub kou, narung mu aku daꞌ mijaꞌ intok ngakan matong dakon pongo ngakan. Pongo gino, ginoi kou ngakan.’ 9 Sino kiꞌ akau bitirimo kasiꞌ daꞌ ripon ano, sobob ripon ano pongo mal kon an pongo benancuk daꞌ so? 10 Sinino po akau, gaꞌ akau pongo mal sariꞌ an benancuk daꞌ dimuyun, dagu kamuyun sinitu, ‘Akai tu ripon-ripon an lop taman; akai ngusaꞌ kon an benancuk daꞌ damon koyo.’ ”
Puluꞌ kiring ulun an nakan pukung
11 Daꞌ lakou No mai Yerusalem Yesus mayaꞌ alan sapad Samaria dangan Galilea. 12 Togol No munjob mai dondo kampung, sino supuluꞌ kiring ulun an nakan pukung matong namu So. Iro ngkiriyod alud intad So, 13 dangan iro pon rumuat, “Yesus, Guruꞌ, masiꞌ Kou damon!” 14 Giri Yesus gonsolong siro, Oyo mendagu, “Makou nakau, pinilong kiring muyun daꞌ imam-imam.”d Togol niro makou iro pon iga. 15 Kon singkiring intad siro, gilong kiring no pongo iga, giri yo limikad mai Yesus ngumpod Allah dangan dagu an tupal. 16 Giri yo sujud daꞌ tungkuangan Yesus, dangan bitirimo kasiꞌ daꞌ So, ulun ino ulun Samaria. 17 Giri dagu kon Yesus, “Lop kiꞌ sariꞌ supuluꞌ kiring ulun ino pongo iga? Tok janaꞌ an siam kiring ulun ino? 18 Lop kiꞌ sino sariꞌ niro garing ri mikad bitirimo kasiꞌ daꞌ Allah? Ulun Samaria an lop ulun Yahudi itu koyo kiꞌ an mikad bitirimo kasiꞌ?” 19 Giri dagu kon Yesus daꞌ ulun ino, “Ngkiriyod dan makou nokou. Sobob okou sayaꞌ daꞌ Dakon, makaꞌ okou pongo iga.”
Allah matong mirintaꞌ sebagai Rajaꞌ
20 Sino tutukuraꞌ ulun Farisi gantano daꞌ Yesus kiran Allah mirintaꞌ sebagai Rajaꞌ. Sambung kon Yesus, “Allah mirintaꞌ sebagai Rajaꞌ, Oyo matong lop nogom tanduꞌ no an kalap nilong ulun. 21 Makaꞌ ulun lop kalap maraꞌ, ‘Nyu nilong mu, Oyo sino daꞌ ditu, Oyo sino daꞌ dino.’ Sobob sobonor no Allah mirintaꞌ sebagai Rajaꞌ sino daꞌ unod-unod muyun.” 22 Pongo gino Oyo maraꞌ daꞌ murit-murit No, “Sino togol no mino akau kelangu gilong Anak Minisiaꞌ, boi pon songodou koyo, tapiꞌ akau lop kalap gilong So. 23 Mino sino ulun-ulun maraꞌ daꞌ dimuyun sinitu, ‘Nyu nilong mu, Oyo sino daꞌ dino! Nyu nilong mu, Oyo sino daꞌ ditu!’ Tapiꞌ maꞌ kau makou mai dino, maꞌ kau mayaꞌ. 24 Sobob nggirad ayu kirou ganit an petawang kuanan, an tawang no ilong ngaiꞌ, sinino po Anak Minisiaꞌ daꞌ odou No matong. 25 Tapiꞌ Anak Minisiaꞌ arus labiꞌ gulu duol rasaꞌ dangan lop tinirimo daꞌ ulun jomon itu. 26 Nggirad ayu daꞌ togol jomon Nuh,e sinino po mino daꞌ odou Anak Minisiaꞌ matong. 27 Iro ngakan nginum dangan nganduꞌ, iro uyag nggirad biasaꞌ no matong togol Nuh masak mai padau adang, giri matong tempadang adang nyakob dangan iro akaiꞌ ondot.f 28 Sinino po daꞌ togol jomon Lot. Iro ngakan dangan nginum, iro ngolon dangan polon, iro ntanom dangan mal baloi. 29 Tapiꞌ daꞌ togol Lot miduꞌ mujai intad kutaꞌ Sodom, giri tumun dasam apui dangan dasam belerang intad kuanan daꞌ kutaꞌ ino, dangan iro pon akaiꞌ ondot.g 30 Sinino po mino togol Anak Minisiaꞌ matong. 31 Si so daꞌ odou ino katung daꞌ timbou baloi, maꞌ yo tumun mai dalom ngalap barang-barang an sino daꞌ dalom baloi no. Sinino po ulun an daꞌ umo, maꞌ yo muliꞌ mai baloi no.h 32 Ingot kamuyun daꞌ danduꞌ Lot ri.i 33 Si so an kiꞌ nyolomot penyawo no, oyo mino tatak penyawo no dangan si so an tatak penyawo no karnaꞌ mayaꞌ Dakon, oyo mino solomot.j 34 Aku maraꞌ daꞌ dimuyun, daꞌ togol ino mino sino dungaiꞌ ulun daꞌ timbou turugan, an singkiring nibit Allah, an bokon napung. 35 Sino dungaiꞌ danduꞌ katung ngigiling jalai, an singkiring nibit dangan an bokon napung.” [ 36 Gaꞌ sino dungaiꞌ kiring ulun daꞌ umo, an singkiring nibit dangan an bokon napung.] 37 Giri murit-murit No gantano daꞌ Yesus, “Tuhan, tok janaꞌ angeno mino mangun?” Dagu Kono daꞌ siro, “Gaꞌ akau kilong sino panyon pumpulu an ngakan buntung, pastiꞌ akau pandai daꞌ dino sino buntung, sinino po mino togol Anak Minisiaꞌ matong pastiꞌ akau pandai angeno.”