O mahã́a là a cítí-fĩ̀ wàhiire
18
Bìo ó o Yeesu wi ò o zéení lè mí nì-kenínia le ɓa ko ɓa wé fìo fɛ́ɛɛ à bàra yí tè hùúu,
ó o wà le wàhiire na kà nɔn ɓa yi:
2 «Cítí-fĩ̀ ɓúi hĩ́a wi lóhó ɓúi yi.
O yí máa zɔ̃́n Dónbeenì,
á mún yí máa kɔ̃̀nbi nùpue.
3 Mahã́a ɓúi mún hĩ́a wi ho ló-kéní mu yi á wee ɓuen o nìi mu cɔ̃́n fɛ́ɛɛ à ɓuee bío bìo kà na a yi:
‹Mì ĩnɛ́n le ĩ fioso tũ̀iá.›
4 O wó mu míana ò o nìi mu wee pĩ́ a bìo.
Ká mu màhã́ a va à yí,
ò o sã́ san ó o wee bío mí yi:
‹Ĩ yí máa zɔ̃́n le Dónbeenì,
á ĩ mún yí máa kɔ̃̀nbi nùpue bṹn bon,
5 ká a mahã́a na kà ɓɛ̀ntĩ́n lan miì dàkhĩína.
Ĩ ì wé bìo ó o wee cà,
ò o wé yí ɓuee dĩ̀n sɛɛ́ mi.›»
6 Ò o Ɲúhṹso bĩnía bía nɔn ɓa yi:
«Mi loń bìo ó o cítí-fĩ̀-kohó mu na kà wó.
7 Mi wee leéka le le Dónbeenì so máa na ho tũ̀iá sĩni bìa le hueekaa yi na wee ve le pɔ̃́npɔ̃́n le wisoni lè ho tĩ́nàahṹ yi le?
8 Le ĩ bío mu na mia:
Le è na ho tũ̀iá sĩni ɓa yi ho pã̀ahṹ na mu ko yi.
Ɛ̀ɛ ká a *Nùpue Za màhã́ khíi bĩnía ɓuara,
ó o ɓueé yí ɓa nùpua na dó mí sĩa le Dónbeenì yi ho tá wán le?»
O Farizĩɛ là a lànpó fé wàhiire
9 O mún bĩnía wà le wàhiire ɓúi á bò bìa wee leéka le mí térénna à ɓa wee zùań bìa ká yi wán:
10 «Nùpua nùwã ɲun ɓúi hĩ́a wà yòó wé ho fìoró le *Dónbeenì zĩ-beenì yi.
O nì-kéní lée *Farizĩɛ ká yìa so lée *lànpó fé.
11 Ó o Farizĩɛ zoó fárá dĩ̀n ho wáayi á wee fìo mí yi kà:
‹Dónbeenì,
ĩ wee dé ũ bárákà,
lé bìo á ĩ yí ka lè ɓa nùpua na ká bìo.
Ɓa wee tè ɓa nùpua wán,
á wee ɲuaa,
á lé ɓa hã́-féwá,
sɔ̃̀nkú o lànpó fé na kà.
12 Ĩnɛ́n wee lì ĩ ɲii hã cúa-ɲun ho yàwá ɲúhṹ dà-kéní yi,
á bìo á ĩ wee yí ɓàn cúa-pírú níi á ĩ mún wee na foǹ.›
13 Ò o lànpó fé wón vá lií dĩ̀n le kùɛɛ́rè yi á yàá yí wi ò o hóoní mí yahó ho wáayi á wee hiimika ká a bío mí ɲi-kã́a yi kà:
‹Dónbeenì,
màkárí miì,
ĩ lée bè-kora wéro.›»
14 Ó o Yeesu bĩnía bía bìo kà:
«Le ĩ bío mu na mia:
Ɓa nùwã ɲun mu tĩ́ahṹ ó o lànpó fé lé yìa bĩnía van mí zĩi ká a térénna le Dónbeenì yahó.
Lé bìo á yìa wee yòoní míten á le Dónbeenì á à liiní,
ká yìa wee liiní míten á le è yòoní.»
Ɓa ɓuan ɓa háyúwá ɓuararáa o Yeesu cɔ̃́n
15 Hàrí ɓa háyúwá á nùpua ɓúi ɓuan ɓuararáa o Yeesu cɔ̃́n le o bè mí níní ɓa wán.
Bìo ó o nì-kenínia mɔn mu,
á ɓa wee zá làa ba.
16 Ká a Yeesu màhã́ von ɓa,
ò o bía:
«Mi día le ɓa háyúwá wé ɓuen ĩ cɔ̃́n,
mi yí hè ɓa,
lé bìo le *Dónbeenì bɛ́ɛnì bìo sã̀ bìa ka lè ɓa bìo síi yi.
17 Le ĩ mì ho tũ̀iá na mia:
Yìa yí tà le Dónbeenì bɛ́ɛnì bìo là a háyónza bìo síi,
á ɓànso yí dà máa zo le yi hùúu.»
Ho nàfòró ɓànsowà lè le Dónbeenì bɛ́ɛnì bìo
18 Ɓa *zúifùwa ɲúnása nì-kéní ɓúi tùara a Yeesu yi:
«Nì-kàránlo tente,
ĩ ko à ĩ wé mu yɛ́n à yíráa le mukãnì na máa vé.»
19 Ó o Yeesu bía nɔn wo yi:
«Lée webio nɔn á fo wee veráa mi làa nì-tente?
Nì-tente mía ká mu yínɔń le Dónbeenì mí dòn.
20 Fo zũ le Dónbeenì làndáwá na kà:
Yí wé hã́-fénló tàá bá-fénló,
yí ɓúe nùpue,
yí ɲuaa bìo,
yí fĩ̀ sábéré mi ninza ɲii,
kɔ̃̀nbi mìn maá le mìn nu.a»
21 Ó o nìi bía nɔn wo yi:
«Bṹn ɓúenɓúen á ĩ bò yi hàrí ĩ yàrónzàmu pã̀ahṹ.»
22 Bìo ó o Yeesu ɲá a ɲi-cúa vó,
ó o bía nɔn wo yi:
«Bìo dà-kéní pá fòora foǹ.
Vaa yɛ̀ɛ́ bìo wi ũ cɔ̃́n ɓúenɓúen à sanka ɓàn wárí na ɓa nì-khenia yi,
bṹn ká fo ò yí ho nàfòró ho wáayi.
Bṹn mɔ́n à ũ bĩní ɓuee bè miì.»
23 Ká a nìi mu ɲá hã bíoní mu,
ó o sãnía tò,
lé bìo ó o níi bìo boo dà.
24 Bìo ó o Yeesu mɔn ò o yahó so,
ó o bía bìo kà:
«Ho nàfòró ɓànsowà zoró le Dónbeenì bɛ́ɛnì yi ɓɛ̀ntĩ́n á à wé here.
25 O cón-ɲúmúkũ̀ zoró lè ho mísĩ̀mí kɔ̃hṹ á à wé wayi á à poń o nàfòró ɓànso zoró le Dónbeenì bɛ́ɛnì yi.»
26 Á bìa dĩ̀n wee ɲí a bíoní tùara a yi:
«Éee!
Á yìa wã́a dà à fen lée wée?»
27 Ó o Yeesu bía nɔn ɓa yi:
«Bìo yí dà máa wé ɓa nùpua cɔ̃́n á dà wee wé le Dónbeenì cɔ̃́n.»
28 Bṹn mɔ́n ó o Piɛre bía nɔn wo yi:
«Loń,
warɛ́n ló día bìo lá wi wa cɔ̃́n à wa bò foǹ.»
29 Ó o Yeesu bía nɔn ɓa yi:
«Le ĩ mì ho tũ̀iá na mia:
Yìa ló día mí zĩi,
tàá mín hã́a,
lè mín zàwa,
lè mín nùwã,
lè mí zàwa le Dónbeenì bɛ́ɛnì bìo yi,
30 ó ò yí bìo cɛ̀rɛ̀ɛ á à poń bṹn ho pã̀ahṹ na wa wi yi,
á mún pá à yí le mukãnì na máa vé ho yìró na lua yi.»
O Yeesu wíokaa wee bío mí húmú lè mí vèeró bìo
31 O Yeesu fó mí nì-kenínia pírú ɲun mí ɲúhṹ wán á bía nɔn ɓa yi:
«Mi loń,
wa wee yòo ho Zeruzalɛɛmu,
á bìo ɓúenɓúen na le *Dónbeenì ɲi-cúa fɛɛrowà túara o *Nùpue Za dã́ní yi á ɲii yòó sí bĩ́n.
32 Lé bìo ɓa à dé o bìa yí zũ le Dónbeenì níi yi,
á bán ǹ zùań yi,
á à là,
á à pũ̀iní mí ɲinsãní ì kúee o wán.
33 Ɓa à ha a lè hã làbàaní,
á à ɓúe o.
Ká mu wizooní tĩn zoǹ,
o ò vèe.»
34 Ká a nì-kenínia màhã́ yí zũna dɛ̀ɛ woon mu yi.
Hã bíoní mu ɓàn kúará á sà ɓa yi á ɓa yí zũ bìo ó o Yeesu wi ò o bío ɲúhṹ.
O Yeesu hɛ́ra a muii ɓúi yìo ho Zerikoo yi
35 Bìo ó o Yeesu vaá wee sùará ho Zerikoo yi,
à bṹn ò o muii ɓúi kará ho wɔ̃hṹ nìsã́ní wee fìoka.
36 Bìo ó o ɲá ɓa zã̀amáa na wee khĩí sã,
ó o tùara bìo wee wé.
37 Á ɓa bía nɔn wo yi le lé o Nazarɛɛte nìi Yeesu lé yìa wee khĩí.
38 Ó o wee bío pɔ̃́npɔ̃́n:
«*Daviide Za,
Yeesu,
màkárí miì!»
39 Á bìa wi ho yahó wee nàmaka a yi le o wé tɛ́tɛ́.
Ká a yàá wíokaa wee wãama lè mí sòobɛ́ɛ:
«Daviide Za,
màkárí miì!»
40 Ó o Yeesu dĩ̀n ò o le ɓa ɓua a muii mu ɓuennáa.
Bìo ó o ɓueé dɔ̃n,
ó o tùara a yi:
41 «Lée webio á fo le ĩ wé na foǹ?»
Ó o bía:
«Ɲúhṹso,
wé le ĩ yìo à wé mi.»
42 Ó o Yeesu bía nɔn wo yi:
«Wã́a mi,
bìo fo dó ũ sĩi miì lé bṹn á ĩ wɛɛ́raráa fo.»
43 Mí lahó yi ó o dɛ̀ɛnía wee mi,
á bò a Yeesu yi á wee khòoní le Dónbeenì.
Á ɓa zã̀amáa ɓúenɓúen mɔn mu á ɓa mún wee khòoní le Dónbeenì.