O Yeesu wɛɛ́ra a ɓùeré ɓúi
8
O Yeesu yòó ló le ɓúee wán lion,
á ɓa zã̀amá-kúii bò a yi.
2 Ó o *ɓùeré ɓúi vá ɓueé ɓó a yi,
á lií fárá mí nɔnkóɲúná wán o yahó,
ò o bía:
«Ɲúhṹso,
fo dà à wɛɛ́ mi ká fo tà.»
3 Ó o Yeesu lií bò mi níi o wán ò o bía nɔn wo yi:
«Ĩ tà mu,
wã́a wa.»
Mí lahó yi,
ó o nìi dɛ̀ɛnía wan.
4 Bṹn mɔ́n ó o Yeesu bía nɔn wo yi:
«Bìo wó foǹ á ũ yí bío le nùpue ɲí.
Ká ũ màhã́ vaa zéení ũten lè le *Dónbeenì yankaro.
À ũ mún wé mu hãmu bìo na ó o *Mɔyiize bò le ɓa wé wé mu dã́ní yi,
à ɓa ɓúenɓúen zũń ká ũ wan bìo bon.»
O Yeesu wɛɛ́ra ɓa dásíwá ɲúhṹso ton-sá
5 Bìo ó o Yeesu vaá wee zo ho *Kapɛɛnayuumu lóhó yi,
á ho Oroomu dásíwá ɲúhṹso ɓúi vá ɓueé ɓó a yi,
á fìora a le o séení mí.
6 O bía:
«Ɲúhṹso,
ĩ ton-sá dũmaná le zĩi yi.
O lé o mùamúa,
á lò wee be dàkhĩína.»
7 Ó o Yeesu bía nɔn wo yi:
«Ĩ ɓueé wɛɛ́ wo.»
8 Á ɓa dásíwá ɲúhṹso bía nɔn wo yi:
«Ɲúhṹso,
ũ ɓuenló ĩ zĩi lée bìo na á ĩ yí koráa.
Na le ɲii mí dòn,
á ĩ ton-sá pá à wa.
9 Ĩnɛ́n ĩ bɛɛre ɲúnása wi á ĩ wee bè bíoní yi.
Á ĩnɛ́n mún wi ɓa ɓúi ɲúhṹ wán,
á bán mún wee ɲí ĩ cɔ̃́n.
Ĩ le yìa va hen à wón va bĩ́n.
Ĩ le o ɓúi ɓuen ò o dɛ̀ɛní ɓuen.
Ĩ le ĩ ton-sá wé bìo na,
ò o dɛ̀ɛní wé mu mí lahó yi.»
10 Bìo ó o Yeesu ɲá hɔ̃́n bíoní so,
ó o wó coon,
ò o bía nɔn bìa bò a yi:
«Le ĩ mì ho tũ̀iá na mia:
O *Isirayɛɛle nìpomu ɓúenɓúen yi á ĩ dĩǹ yí fò mín làa nùpue na sĩidéró miì yú yìa kà yi.
11 Nùpua cɛ̀rɛ̀ɛ khíi lé lè le wii hɛ̀ɛníi lè le tèeníi,
á ɓueé kɛɛní ká ɓa à dí ho sã́nú le *Dónbeenì bɛ́ɛnì díiníi là a *Abarahaamu,
là a *Izaaki,
là a *Zakoobu.
12 Ká bìa lá ko à ɓa níní kɛń le Dónbeenì bɛ́ɛnì yi,
bán ɓa à ɲa lée kúia ho khũuhũ le tíbírí yi,
á ɓa lée wá á yiwa à vá bĩ́n.»
13 Bṹn mɔ́n ó o Yeesu wã́a bía nɔn ɓa dásíwá ɲúhṹso yi:
«Lɛ́n khíɓo,
bìo fo fìora á à wé,
lé bìo fo dó ũ sĩi miì.»
Lé hón pɔ̃̀n-kéní so yi,
á ɓa dásíwá ɲúhṹso ton-sá á wan yi.
O Piɛre ɓàn hio hã́a lè ɓa vánvárowà ɓúi wɛɛ́ró bìo
14 O Yeesu van o Piɛre zĩi.
O vaá yú a Piɛre mu ɓàn hio hã́a le dãmu dɛ̀ɛ yi à le tɛ̀ɛnì wee zɛ̀ɛ́ wo.
15 Ó o Yeesu ɓuan o níi yi á le tɛ̀ɛnì khĩína.
Ó o hã́a mu dɛ̀ɛnía hĩ́nɔn nɔn ho dĩ́nló wo yi.
16 Ho tá yuuní,
á ɓa ɓuan ɓa nùpua cɛ̀rɛ̀ɛ na ɓa cĩ́náwa wi yi á ɓuararáa o Yeesu cɔ̃́n,
ó o wee bío à ɲa ɓa cĩ́náwa lén ɓa yi.
O mún wɛɛ́ra ɓa vánvárowà ɓúenɓúen na ɓa ɓuan ɓuararáa o cɔ̃́n.
17 O wó mu bèra a na à le *Dónbeenì ɲi-cúa fɛɛro *Ezayii bìo na ó o bía à wé:
«O lá wa lònbee.
O fó wa vã́mú bò mí wán.»a
Ɓa nùpua nùwã ɲun ɓúi na wi ɓa bè là a Yeesu bìo
18 O Yeesu mɔn ɓa zã̀amáa na kĩ́nía wo yi,
ó o nɔn le ɲii mí nì-kenínia yi le ɓa le mí khí lè ho vũ-beenì mɔ́n.
19 Á ho làndá bìo zéenílo ɓúi ɓueé ɓó a yi,
á bía nɔn wo yi:
«Nì-kàránlo,
ĩ ì bè foǹ á à varáa hã lùa ɓúenɓúen na á ũ wee va yi.»
20 Ó o Yeesu bía nɔn wo yi:
«Ɓa cawanwà yú hã kãna wee zo.
Á ɓa ɲínzàwa mún yú mí lɛnna.
Ká a *Nùpue Za wón màhã́ yí yú ho lahó na ó o dà à vũń yi.»
21 Ó o nì-kenínia nì-kéní ɓúi bía nɔn wo yi:
«Ĩ ì bè foǹ.
Ká ũ màhã́ día le ĩ vaa nùu wàn maá vé.»
22 Ó o Yeesu bía nɔn wo yi:
«Día le ɓa nì-hía à nùu mí nì-hía,
ká ũnɛ́n ɓuee bè miì.»
O Yeesu dĩ̀nía ho pinpi-beenì
23 O Yeesu yòó zon ho woohṹ lè mí nì-kenínia á ɓa wà.
24 Cúa-yɛn à ho pinpi-beenì wee và ho vũ-beenì wán á wee yànbónka mu ɲumu kúee ho woohṹ yi fúaa ho wi ho lí.
Mu wee wé ká a Yeesu dũma.
25 Ó o nì-kenínia vá ɓueé ɓó a yi,
á sĩ̀nía wo,
à ɓa bía nɔn wo yi:
«Ɲúhṹso,
wa à hí.
Kã̀ní wɛn.»
26 Ó o Yeesu bía nɔn ɓa yi:
«Lée webio nɔn á mi zã́nanáa?
Mi sĩ̀a déró miì ɓɛ̀ntĩ́n fòora.»
Ò o wã́a lií hĩ́nɔn,
á yòó nàmakaa ho pinpiró lè mu ɲumu na wee yànbónka yi,
á mu wó tɛ́tɛ́tɛ́.
27 Ɓa ɓúenɓúen á mu wó coon,
á ɓa wee bío mín yi:
«Páa!
O nùpue mu lé o yɛ́n síi kà?
Hàrí ho pinpiró lè mu ɲumu ó o bíaráa,
á mu pá bò a bíonì yi.»
Ɓa nùpua nùwã ɲun cĩ́náwa ɲa lénló bìo
28 Bìo ó o Yeesu khíi dɔ̃n ho Kadaraa kɔ̃hṹ yi,
á nùpua nùwã ɲun ɓúi ló ɓa nì-hía nùuníi wee sĩ́ a yahó.
Ɓa nùpua mu ɓa cĩ́náwa wi yi á ɓa zã́níi wi fúaa nìi woon yí máa khà miten à lá ho wɔ̃hṹ mu.
29 Bìo ɓa mɔn o Yeesu á ɓa wee bío kà pɔ̃́npɔ̃́n:
«Dónbeenì Za,
lée webio fo lon làa wɛn.
Fo ɓuara wà ɓueé beé wa lò ká mu pã̀ahṹ dĩǹ yí dɔ̃n le?»
30 Mu wee wé à nɔ̀nbùɛ-ɓoohṹ ɓúi khɛ̀ra vaá wee dí.
31 Á ɓa cĩ́náwa mu yankaa o Yeesu kà síi:
«Hen ká ũ wi ũ ɲa wɛn,
ũ wã́a bío le wa vaa zo ho nɔ̀nbùɛ-ɓoohṹ na kà yi.»
32 Ó o Yeesu le ɓa vaa zo.
À ɓa cĩ́náwa mu ló ɓa nùpua nùwã ɲun mu yi á vaá zon ɓa nɔ̀nbùɛɛní yi.
Á ɓa ɓúenɓúen yòó lùwa le ɓúee wán á kùenkaa lií zon ho vũ-beenì yi á húrun.
33 Á bìa lá wee pa ɓa á lùwá lion ho lóhó,
á lií lá bìo wó ɓúenɓúen á fɛɛra,
sɔ̃̀nkú bìo wó ɓa nùpua nùwã ɲun na ɓa cĩ́náwa lá wi yi.
34 Á ho lóhó nùpua ɓúenɓúen ló wà lée sĩ́ a Yeesu yahó.
Bìo ɓa lée yú a,
á ɓa yanka wo le o sábéré ò o lé mín kɔ̃hṹ yi à lɛ́n.