O Yeesu von mí nín-yání nì-kenínia
5
Wizonle ɓúi ká a Yeesu wi ho Zenɛzarɛɛtea vũ-beenì ɲii á ɓa zã̀amáa kĩ́nía yi wee ɲàa mín,
lé bìo ɓa wi ɓa ɲí le Dónbeenì bíonì,
ó o mɔn hã wonna bìo ɲun ká hã dĩ̀n mín nìsã́a mu ɲumu ɲii.
2 Ɓa ce-pawà na zon hã ɓuararáa ɓúenɓúen ló lée dĩ̀n wee sɛɛ mí zùánwà.
3 Hã wonna mu ɓàn dà-kéní lé o Simɔn te ho,
á hón lé hìa ó o Yeesu fìora zon,
ò o bía nɔn wo yi le o ɲàa zo mu ɲumu yi cĩ́inú,
bṹn mɔ́n ó o lií kará ò o wee kàrán ɓa zã̀amáa na dĩ̀n bĩ́n.
4 Pã̀ahṹ na ó o bía vó yi,
ó o khíi wee bío là a Simɔn:
«Wã́a vá zo mu ɲumu na boo yi,
à ũnɛ́n lè mí ninzàwa na páanía wee sá à yénní mí zùánwà kúee mu ɲumu yi à mi wìika ɓa cewà.»
5 Ó o Simɔn bía làa wo:
«Éee!
Ũnɛ́n!
Loń!
Wa púia mu ɲumu yi cãana à wa yí fò hàrí ceza.
Ɛ̀ɛ ká ũ bíonì ɲii wán,
á ĩ yénní hã á à kúee.»
6 Á ɓa yénnía hã kúaa mu ɲumu yi á hã lií vũn ɓa cewà cɛ̀rɛ̀ɛ,
lée cĩ́inú ká hã zùánwà hũni lá à fáa.
7 Á ɓa von mí ninzàwa ce-pawà na wi ho won-veere yi le ɓa ɓuee séení mí.
Á bán ɓuara ɓueé séenía ɓa á hã wonna mí bìo ɲun sú lè ɓa cewà fúaa hã wi hã lii lí mu ɲumu yi.
8 Bìo ó o Simɔn Piɛre mɔn mu kà síi,
ó o lií ɓúrá a Yeesu tá ò o bía nɔn wo yi:
«Ɓúi!
Ɲúhṹso,
ĩ yàá ɓɛ̀ntĩ́n lá yí ko à ĩ sùará foǹ lé bìo á ĩ lé o bè-kora wéro.»
9 O Simɔn wee bío kà síi lé bìo ɓa ce-kuii na ɓa vũn kà bìo zã́nía wo dàkhĩína,
orɛ́n làa bìa páanía wi ho woohṹ yi làa wo.
10 Hàrí o Zebedee nùwã Zaaki làa Zãn na mún lé ɓa ce-pawà,
bán mún zã́na lè ɓa bìo síi.
Ó o Yeesu bía nɔn o Simɔn mu yi:
«Áyì!
Yí zɔ̃́n dɛ̀ɛ woon.
Lii hĩ́ní.
À lá ho zuia ɲii wán,
á ɓa nùpua lé bìa fo wé è yí á à ɓua à ɓuennáa ĩ cɔ̃́n.»
11 Bṹn mɔ́n á ɓa vá mí wonna ɓueé dĩ̀nía mu ɲumu ɲii,
à ɓa kúará mí bìo ɓúenɓúen bĩ́n,
à ɓa bò là a Yeesu wà.
O Yeesu wɛɛ́ra a ɓùeré nìi
12 Wizonle ɓúi ká a Yeesu wi ho lóhó ɓúi yi,
ó o fò mín là a *ɓùeré nìi ɓúi.
Bìo ó o mɔn o Yeesu ó o dɛ̀ɛnía lií ɓúrá à yahó á ɓuure ɓó ho tá yi.
Ò o fìora a yi kà:
«Ɲúhṹso!
Fo dà à wɛɛ́ mi ká fo tà.»
13 Ó o Yeesu lií bò mi níi o wán ò o bía nɔn wo yi:
«Ĩ tà mu,
wã́a wa.»
Mí lahó yi ó o nìi dɛ̀ɛnía wan.
14 Bṹn mɔ́n ó o Yeesu henía bìo kà làa sòobɛ́ɛ nɔn wo yi:
«Bìo wo foǹ á ũ yí bío le nùpue ɲí.
Ká ũ màhã́ vaa zéení ũten lè le *Dónbeenì yankaro.
À ũ mún wé mu hãmu bìo na ó o *Mɔyiize bò le ɓa wé wé mu dã́ní yi à ɓa ɓúenɓúen zũń ká ũ wan bìo bon.»
15 Ká bṹn yí hò bìo ɓa wíokaa wee bío o Yeesu bìo hã lùa ɓúenɓúen yi.
Á ɓa nùpua cɛ̀rɛ̀ɛ wee vá kúee mín wán à ɲínáa o bíoní à mún ɓua mí vánvárowà lè mí sìíwà à ɓuennáa ó cɔ̃́n le o wɛɛ́.
16 Ká a Yeesu wón màhã́ wee wé wé ká a lɛ́n mí dòn vaa fìo le lùe ɓúi na wan ɓúirín yi ká a bĩní ɓuen.
O Yeesu wɛɛ́ra a mùamúa
17 Wizonle ɓúi ò o Yeesu wee kàrán ɓa nùpua.
Mu nɔ̀nzoǹ ká ɓa *Farizĩɛwa lè ho *làndá bìo zéenílowa wi bĩ́n á kará ɓó a yi.
Ɓa ló ho Kalilee lè ho *Zudee lórá cɛ̀rɛ̀ɛ yi.
Ɓa ɓúi yàá pá ló ho Zeruzalɛɛmu lóhó yi.
O Ɲúhṹso Dónbeenì pànká na wi o Yeesu yi lé hìa nɔn ó o wee wɛɛ́ráa ɓa vánvárowà.
18 Yìo ɓuee tĩ,
à nùpua ɓúi sò mí mùamúa luaráa ká a wi mí dãmu dɛ̀ɛ wán.
Bìo ɓa ɓueé dɔ̃n á ɓa wi ɓa zo le zĩi yi làa wó à zoó bàrá a Yeesu yahó.
19 Á ɓa wó fúuu san lé bìo ɓa nùpua boo dà.
Á ɓa día ɓa yòora làa wó le zĩi mu lòho,
á yòó kara ho sɔ̃́n-kéní à ɓa can hã hũni o mùamúa mu dãmu dɛ̀ɛ yi á liinía làa wó lií bàrá a Yeesu yahó bìa wi bĩ́n ɓúenɓúen tĩ́ahṹ.
20 Bìo ó o Yeesu mɔn bìo ɓa dóráa mí sĩa wo yi,
ó o bía nɔn o mùamúa yi:
«Wàn bɔ̃́nlo,
ũ bè-kora sɛ́ra día.»
21 Bìo ó o bía bṹn kà á ho làndá bìo zéenílowa lè ɓa Farizĩɛwa á wee bío mí yiwa:
«O nùpue mu lée wée á wee màní míten lè le Dónbeenì kà síi?
Lé wée dà a sɛ́n mu bè-kora á à día ká yínɔń le Dónbeenì mí dòn.»
22 Ká a Yeesu màhã́ zũna ɓa yilera ó o bía nɔn ɓa yi:
«Lée webio nɔn á hã yilera na kà síi wiráa mia?
23 Lé mu yɛ́n bíoró wayi?
Lé à bío le o bè-kora sɛ́ra día lée tàá lé à bío le o hĩ́ní varáka?
24 Ká ĩ màhã́ wi á mi zũń le o *Nùpue Za yú ho pànká ho tá wán à sɛ́nnáa mu bè-kora día.»
Ò o wã́a bía bìo kà nɔn o mùamúa yi:
«Le ĩ bío mu na foǹ,
lii hĩ́ní,
lá ũ dãmu dɛ̀ɛ á ũ khíɓo.»
25 Ó o nìi mu dɛ̀ɛnía hĩ́nɔn yòó dĩ̀n bṹn wán ɓa ɓúenɓúen yìo yi á lií lá mí dãmu dɛ̀ɛ ò o wee ɓùaaní le Dónbeenì ká a wà ɲɔn mí zĩi.
26 Á ɓa ɓúenɓúen wó coon mu bìo yi.
Á ɓa zã́na à ɓa pá wee khòoní le Dónbeenì kà síi:
«Wa ɓɛ̀ntĩ́n mɔn yéréké bè-bárákáwá zuia.»
O Yeesu von o Levii le o bè mí yi
27 Bṹn mɔ́n ó o Yeesu ló lée wà.
O vaá wee khĩí ó o mɔn o lànpó fé ɓúi na ɓa le Levii ká a kará mí tonló lùe yi.
Ó o bía nɔn wo yi:
«Hĩ́ní bè miì.»
28 Ó o Levii dɛ̀ɛnía hĩ́nɔn día mí tonló lè mí bìo ɓúenɓúen,
ò o bò a Yeesu yi.
29 O Levii sá ho dĩ́nló o Yeesu bìo yi,
ò o von wo mí zĩi.
O mún von ɓa nùpua ɓúi ɓa ɓueé páanía kará wee dí.
Ɓa cɛ̀rɛ̀ɛ lé ɓa ninzàwa *lànpó féwá.
30 Á bìo ɓa Farizĩɛwa lè ho làndá bìo zéenílowa na bìo sã̀ ɓa yi mɔn mu á ɓa wee khí mí kío yi.
Á ɓa tùara a Yeesu nì-kenínia yi:
«Lée webio nɔn á mi pá tà wee dí ká mi ì ɲu lè ɓa lànpó féwá lè ɓa nì-kora na kà?»
31 Ó o Yeesu bía nɔn ɓa yi:
«Héyìi!
Minɛ́n!
Nùpua na lò hereka so wee wé cà tĩni ɓànso dã́ní le?
Ɓùeé,
ɓa vánvárowà lé bìa wee wé cà a dã́ní.
32 Ĩnɛ́n yí ɓuara bìa wee leéka le mí térénna bìo yi dɛ́.
Bìa zũ le mí lé ɓa bè-kora wérowà lé bìa á ĩ ɓuara bìo yi,
bèra a na à ɓa khí mu bè-kora wéro yi.»
O Yeesu bía le ɲii lìró bìo
33 Bṹn mɔ́n á ɓa nùpua ɓúi tùara a Yeesu yi:
«O Zãn nì-kenínia wee wé lì mí ɲiní à mún wé mí fìoró,
á ɓa Farizĩɛwa nì-kenínia mún wee wé kà síi.
À ũnɛ́n nùpua bán ɓɛ̀n wee dí ká ɓa a ɲu lée webio?»
34 Ó o Yeesu bía nɔn ɓa yi:
«Mi yí mɔn le:
Pã̀ahṹ na ɓa nùpua wi mu yaamu sã́nú díró yi là a hã́-fĩa ɓàn báa á ɓa so dà à bío le ɓa lì mí ɲiní le?
35 Ho pã̀ahṹ ɓúi khíi dã ó o hã́-fĩa ɓàn báa ɓa a lén ɓa tĩ́ahṹ,
bṹn ká ɓa màhã́ wé è lì mí ɲiní.»
36 Ó o mún bĩnía wà le wàhiire na kà nɔn ɓa yi:
«Nùpue na a lá mí báká fĩnle á à kúii bìo ɓúi á à la lè mí báká kĩ́nle na lɛ̀ɛra wón mía.
Lé bìo ká a wó mu,
á ho dà-fĩnle á à yáa.
Á bìo lan mín yi mún máa wìi mín.
37 Làa bṹn síi,
nùpue máa kúee *dìvɛ̃́n fĩa sṹmàni-kĩ́a yi.
Lé bìo ká a kúaa ho bĩ́n ká ho hĩ́a wee za,
á hã à nàma,
á ho dìvɛ̃́n á à kúia,
á hã sṹmàniwa mún ǹ yáa.
38 Ho dìvɛ̃́n fĩa ko ho kúee hã sṹmàni-fĩa yi.
39 Á nùpue mún máa día dìvɛ̃́n kĩ́a ká a máa ɲu dìvɛ̃́n fĩa.
Lé bìo á ɓa wee bío le ho dìvɛ̃́n kĩ́a lé hìa sĩ.»