Hɔ kʊ Pol a ba Tesaloniki ʊ
2
Ʊ danyɩnɔ,
awɔɔ dɔ a zim a ʊ,
ta kʊ wɔɔ ʊ awɔɔ zi bɩ,
a n bɔ vam y.
2 Awɔɔ dɔ sɔ a ʊ,
fɩr kʊ ŋ y'a ka wɔɔ ma,
ŋnɩ wɔɔ sʊnsɔ wʊ Filipii ʊ bɩ wɔɔ ʊ hʊr ma lɛɛ m,
ʊ bʊr awɔɔ zi.
Bɩ Woso heerkoodəbaa ka wɔɔ ʊ,
baa kʊ jɩnnɔ nyɩnta ʊ gʊta bɩ,
wɔɔ ʊ da ma,
ʊ lemim nyɩnta k'a a to zi bɩ pa da awɔɔ m.
3 Nyʊnnyɔɔrɛ pa bɛɛ wɔɔ n'a darɛ y,
gɩnga bʊnyaa bɛɛ wɔɔ n ta m sɔ ʊ nɩ pa bɩ darɛ y,
wɔɔ bɩr ʊ kam ma sɔ k'ʊ ŋʊaar ba gʊɔɔ nɩ y.
4 Bɩ,
kʊ Woso wɔɔ ka lɛɛ an dɩga wɔɔ ma,
an a dɔ a ʊ,
wɔɔ ʊ ga m bɩ,
an a lemim nyɩnta bɩ da wɔɔ wɔ ʊ.
Naa y'a ka kʊ wɔɔ ɩ meer bam,
wɔɔ bɩr ʊ kam ma kʊ gʊɔɔ nɔ n yɩ ʊ ra y,
ʊ ka wɔɔ nawʊm ma kʊ Woso nɔ n yɩ ʊ ra,
bala,
a mɩŋŋa nɩ hɔ k'a nɩ wɔɔ heer ʊ yɩm.
5 Awɔɔ dɔ mɩŋŋa a ʊ,
wɔɔ n yɛ fɩɩgaa k'ʊ bra bɩmba gʊɔɔ nɩ y,
wɔɔ n meer ba ʊ n'a gɩngam k'awɔɔ m hɔ ka wɔɔ ʊ y,
naa woo… naa,
Woso m wɔɔ kasɛtɩzaa.
6 Wɔɔ n'ʊ ka ma fɩɩgaa kʊ gʊɔɔ m wɔɔ da ʊ y,
wɔɔ n'ʊ ka ma awɔɔ zi,
wɔɔ n'ʊ ka ma gʊɔɔ vantɔɔ zi sɔ y.
7 A n bɔkarɛ,
a ga k'a ʊ m kʊ wɔɔ m daʊrɛ kʊ Krista zibəəzannɔ a ga m,
ŋn'a yɩ bɩ yɩ bɩ,
wɔɔ n ʊ ka ma k'an yɩ ncɩnaaʊ awɔɔ gʊr zi y.
Bɩ,
nyɩntabaa wɔɔ ba awɔɔ m gʊta,
amba nyɩnɔ da tɩr nyasʊrɛ a nyɩnɔ m nyɩnta bɩ m.
8 Awɔɔ ŋʊa kʊ wɔɔ ʊ bɩ minto bɩ,
wɔɔ n a ŋʊa k'an bɩr yɩrɛ ɩ ʊ,
lemim nyɩnta bɩ wɔɔ ka awɔɔ ʊ a minto y,
wɔɔ ŋʊa sɔ k'ʊ mɩsɩrbaa ka awɔɔ tɔ ma.
Bala,
wɔɔ awɔɔ ŋʊa maam-maam.
9 Ʊ danyɩnɔ,
ziro kʊ wɔɔ ŋ ba,
ʊ kɔrɛ yɩ bɩ,
ŋ tɔ y'awɔɔ nɔ ʊ,
wɔɔ zi ba sinuu ʊ kan gunuu ʊ kɩ,
k'awɔɔ gɔsɩ bɩ kɔ wɔɔ hɔbɩrɛ mim tɔ ma y,
a ba wɔɔ ʊ ncɩnaaʊ,
ʊ Woso lemim nyɩnta bɩ pa da awɔɔ m.
10 Awɔɔ wɔɔ kasɛtɩ bɩ kan Woso kɩ sɔ,
a dɔ a ʊ,
nyɩnta kʊ wɔɔ ʊ kan awɔɔ kɩ bɩ,
awɔɔ k'a m sɩrakarɛzannɔ wɔɔ,
mɩsɩrbaa kʊ wɔɔ ba awɔɔ zi bɩ,
nyɩnta a ʊ mɩŋŋabaa kan tɩrgabaa kɩ nɔ ʊ,
mim n nyɩnta wɔɔ gʊr zi y.
11 Awɔɔ a ya a dɔ sɔ a ʊ,
wɔɔ nyasʊ awɔɔ gʊaa biyəə m,
amba nyɩnɔ zɩ tɩr nyasʊ ŋ nɩ bɩ m:
12 Ʊ a dʊndɔ,
ʊ awɔɔ heer yo,
ʊ a hɩ awɔɔ m karɛ,
paan… ʊ ʊ,
a mɩsɩrbaa k'a Woso nɔ yɩ bɩ ba,
a y'awɔɔ bir k'awɔɔ n nyɩnta kan a kɩ a cirbəə kan a lɛbɔʊrɛ kɩ nɔ ʊ.
13 Wɔɔ ɩ yaa dam Woso m barka sɔ dɔmɩm haay,
bala,
Woso lemim kʊ wɔɔ pa da awɔɔ m bɩ,
awɔɔ si a dɔ a ʊ,
Woso lemim m,
gʊaa lemim bɛɛ y,
bɩ Woso lemim m denter paan…,
an n'a zi bam awɔɔ gʊɔɔ k'a sɩra ka rɔ wɔɔ heer ʊ.
14 Ʊ danyɩnɔ,
mim kʊ Woso gʊɔɔ sokʊmarɔ kʊ ŋ nɩ Krista Yeezuu nɔ ʊ,
Zidee kʊrɔ wɔɔ ʊ rɔ wɔɔ a yɩ bɩ,
awɔɔ yɩ sɔ.
Bala,
awɔɔ danyɩnɔ fɩr ka awɔɔ ma sɔ,
amba brɔɔ danyɩnɔ kʊ ŋ nɩ zɩɩfʊrɔ fɩr ka ŋ ma rɔ wɔɔ m.
15 Zɩɩfʊrɔ wɔɔ duro ɩ Zuuba Yeezuu zɛ gər,
ŋ yɩ wosolɛsinnɩsorazannɔ wɔɔ zɩnzɛ,
ŋ yɩ fɩr ka wɔɔ ma sɔ.
Woso heer bɩ nyɩnta kan ŋ kɩ y,
gʊɔɔ haay jɩnnɔ n ŋ mɩ.
16 Ŋ y'a tam wɔɔ m toore,
kʊ wɔɔ bɩ lemim nyɩnta pa da do vantɔɔ gʊɔɔ m kʊ ŋ n bʊmbɔrɛ yɩ y,
a ba kʊ ŋ nawʊrɛ ncɩnaaʊ naa,
a mimbʊnyaa ŋn'a dam la tee… bɩ naa haay jɛ ʊ,
Woso a nɔmaa kərgu ŋ la.
Pol lɛ taa k'a a ya, a Tesaloniki zannɔ yɩ
17 Bɩ,
m danyɩnɔ,
kʊ wɔɔ nɩ,
wɔɔ ʊ ba awɔɔ ma laatʊ,
a maasɩrɛ ba poore.
Ʊ n ʊ ya,
ʊ n nɩ kʊ yɩrɛ y.
Bɩ wɔɔ heer gɔɔta an nɩ kan awɔɔ kɩ,
wɔɔ ŋʊa paan… k'ʊ ʊ ya,
ʊ awɔɔ yɩ,
naa tɔ ma bɩ,
wɔɔ ʊ tʊntɔ ʊ gʊta k'ʊ ʊ da ma,
ʊ awɔɔ yɩ.
18 Ncɩnaaʊ nɩ,
wɔɔ n a ŋʊa k'ʊ ʊ wusigə ʊ ta awɔɔ zi.
Mɔɔ mɩŋŋa Pol,
mɔɔ m tɔ ʊ gallɛm hɔka kʊ m ta awɔɔ zi,
bɩ Sʊtaana wɔɔ zaa tii,
wɔɔ n'ʊ da ma y.
19 Sɩra nɔ ʊ,
awɔɔ sɔ,
awɔɔ n'a kam wɔɔ nɩ taaheerlɛ m,
awɔɔ tɔ ma m wɔɔ nɩ zɛm bɩ heernyɔɔ yɩ,
ʊ ʊ da ma ʊ lɛbɔʊrɛ yɩ wɔɔ Zuuba Yeezuu taa,
a zɛrɛ hinni ʊ.
20 Denter m,
awɔɔ m wɔɔ lɛbɔʊrɛ kan wɔɔ heernyɔɔ kɩ.