Ci lɛɛkarɛ hɔ kʊ Pol a ba
TESALONIKI ZANNƆ
ma
Pol ɩ yaa dam Tesaloniki kristagʊɔɔ m
1
Mɔɔ mɩŋŋa Pol,
kan Silas kɩ Timote kɩ,
wɔɔ nɩ ci naa do barɛ awɔɔ ma.
Awɔɔ k'a m Tesaloniki kristagʊɔɔ wɔɔ,
Zɩ Woso kan Zuuba Yeezuu Krista kɩ n'a so awɔɔ ʊ rɔ wɔɔ,
a yɛ wɔɔ nawʊm kʊ Woso m barka,
kan laafɩɩ kɩ ka awɔɔ ʊ.
Tesaloniki gʊɔɔ sɩra ka Woso ʊ kasɛtɩ
2 Wɔɔ yaa darɛ nɔ ʊ haay,
wɔɔ ɩ yaa dam awɔɔ tɔ ma,
ʊ nɩ Woso barka dam dɔmɩm haay awɔɔ minto.
3 Wɔɔ y'awɔɔ sɩrakarɛ zibəə tɔ darɛ ʊ nɔ ʊ tee… wɔɔ Zɩ Woso lɛɛ,
kan ŋʊarɛ k'awɔɔ n ta m bɩ tʊntɔʊrɛ zibəə kɩ,
kan taaheerlɛ k'awɔɔ n ta m kɔɔkɔɔ wɔɔ Zuuba Yeezuu Krista nɔ ʊ bɩ kɩ.
4 Ʊ danyɩnɔ,
wɔɔ dɔ wɔɔ ʊ Woso awɔɔ ŋʊa,
an awɔɔ bɔ ʊ k'a a so awɔɔ ʊ.
5 Bala,
kʊ wɔɔ bɩ lemim nyɩnta pa da awɔɔ m bɩ,
a n yɩ lɛ meerbaa m bala y,
yɩ a ʊ,
kan *Sɛnt-Ɛspri paŋŋa kɩ wɔɔ n'a kasɛtɩ m ʊ heer ʊ,
ʊ ʊ sɩra lemim m.
Awɔɔ mɩsɩrbaa kʊ wɔɔ ba awɔɔ bire ʊ awɔɔ daahan minto bɩ dɔ.
6 Awɔɔ wɔɔ hɔbaa sa,
wɔɔ kan Zuuba kɩ,
bala,
awɔɔ nyɩnta fɩryɩrɛ gʊta nɔ ʊ,
a a gu a Woso lemim bɩ si heernyɔɔ kʊ Sɛnt-Ɛspri n'a kam bɩ nɔ ʊ.
7 Ncɩnaaʊ nɩ,
Masedʊan kan Akayii kɩ sɩrakarɛzannɔ wɔɔ haay n a ba awɔɔ hɔbaa dɩndarɛ zannɔ.
8 Bala,
Zuuba lemim b'a to awɔɔ zi an ta Masedʊan kan Akayii kɩ kʊrɔ ʊ,
bɩ,
kʊrɔ wɔɔ duro bɛɛ m bala y,
sɩra k'awɔɔ ka Woso ʊ bɩ mim ta lɛɛ haay ʊ,
an nɩ yɩrɛ ɩ ʊ,
pakra bɛɛ m dɔ kʊ wɔɔ n'ʊ ya ʊ a dɩnda ŋ nɩ y.
9 Bala,
ta kʊ wɔɔ ʊ awɔɔ zi awɔɔ m wɔɔ si mɩŋŋa bɩ,
gʊaa haay ɩ bɩ mim dɩndam,
a bɔ k'awɔɔ ʊ *wosobaawɔnnɔ yaadarɛ ʊ,
a a bɔ a taam k'a zu Woso k'a m mɩsɩr a m sɩra b'ʊ bɩ,
n yɩ bɩ mim dɩndam sɔ.
10 A n nɩ dɔrɛ a Nyɩ Yeezuu kʊ Woso mɩŋŋa a mɩm bɔ ʊ gəəno bire ʊ,
an n'a tom brama k'a bʊr bɩ ma,
an nɩ wɔɔ yɔm Woso nɔmaa k'a nɩ zɛm bɩ wɔ ʊ.