Əy laɓza Pawl ŋ hayak Rawma
27
Maa əy káŋkan ma aza, ŋ jeɓzeney ŋ hayak Əytaləya a kwambawal ma dakal ca, əy valza Pawl leŋ hejəye ma ŋ daŋgay ege vedəye aka asa ra heje maa əy kayaɓa Yuləyus, madakal ata ha sawje ege temere, ma ata lajav sawje ege mala bay Rawma. 2 Aya, nene dam ŋ kwambawal ma dakal ma ndaha aka ŋ uzam Adaraməytenus, ma kanda ata la gar ege ma a ma ŋtele ma ŋ hayak Asəya. Tel nene nah ma, nene ata Arəystarkus, ɗala Makedawnəya, ma ŋ uzam Tesalawnəykəy. 3 A mapat anta, nene hwas ŋ uzam Səydaŋw, nene gar a təwse. Yuləyus a lene taŋtaŋ ŋ Pawl, a pelzene taf ŋ nda ara ŋgama anta ege ŋ uzam wese, ndar əy cekzene. 4 A dəwze anta, nene tev ŋ kwambawal ma dakal zeney, nene nda ta ŋ hayak ma ŋ taba ŋtele maa əy kayaɓa Kəypərus, ata la maa tatəɗam a təwse askwaw, mavəday tatəɗam anta, a kezeneney a dəwze a dəwze. 5 Nene zlaŋ ŋtele ma a həzlar Səyləykəya ey Pamfəyləya, nene hwas ŋ uzam Məyra ŋ hayak Ləysəya. 6 A təwse ca, madakal sawje Rawma, ma ata ha sawje ege temere wese, a ndew ata kwambawal ma dakal ma ndaha aka ŋ Aleksandərəya, ma kanda kəɗe ŋ Əytaləya, aya, a tevzeney ŋma.7 Wan vəram, nene nda zaya zaya, nene hwas a gef dakala a mazlam uzam Kəynəydus, mavəday tatəɗam a kepereney ma. Aya, nene təwlek ta asa bar hayak ma həzlar ŋtele maa əy kayaɓa Salmawnəy, nene hwas ŋ hayak ma ŋ taba ŋtele maa əy kayaɓa a Kereta, la maa tatəɗam a təwse askwaw. 8 Nene nda a gef ta ata bar hayak wese, nene hwasha ata la wende aka, maa əy kayaɓa a «Lagar ma taŋtaŋ ege,» mbermber a uzam Laseya.
9 Nene kála wan dakala, landa anta kábaw anta kadak səkwaw, mavəday wan ma ata ŋta sumay mala mesəfe kéleye aza. Aya, Pawl a ŋgazata hejəye, 10 a ŋgaya: «Ŋgama naka ege, sa kegəre ca, landa ŋtakwaw ŋghe, a kanala kadak səkwaw. Kwambawal ma dakal zlaɓa səkan ma ŋma ege, əy ma kanagay gagaha səkwaw, kaw heje yam, heje nefətek ŋtakwaw.» 11 Cemey, a madakal sawje ma ata ha sawje temere ege ca, a lam ma mala heje ma keheɓza kwambawal ma dakal ey ma mala heje kwambawal day aha ma mala Pawl. 12 A zeney, lagar kwambawal anta, a mesəfe ca, kadak ŋ nja a təwse səkwaw. Mavəday anta, radakal hejəye ca, əy ɗaw ŋ nda tata. Mada əy kula ca, əy ɗaw ŋ nda hwas ata la gar kwambawal ma ŋ Fenəykəys, ŋ hayak Kereta, ndar əy la mesəfe a təwse. Fenəykəys anta ca, ara la gar kwambawal maa mada hwa sar la kəɗa ata landav pes ca, mbəy ata ra zam, mada hwa sar la kəɗe uza ca, mbəy ata ra gula.
Bargadaŋ a ja ata ŋtele
13 A dəwze anta, tatəɗam a jaha cekuɗe cekuɗe ta a uza asa ndaŋw. Hejəye əy deŋza ca, əy kélem taf aza ŋ hwas ŋ Fenəykəys ana maa əy kaɗawaw. Əy daɗaza səkan ma ndeɓndeɓ ma ata deŋza kwambawal, əy nahza aka ŋma, aya, əy nda mazlam mazlam hayak Kereta. 14 Cemey, a dəwze anta cekuɗe, bargadaŋ maa əy kayaɓa Erakəylaŋw a ndaha aka ta ŋ ata dawan hayak ma ŋ ŋtele maa ey kayaɓa Kereta kəɗa ata nene. 15 A təwse ca, bargadaŋ wese kátak kwambawal aka, mbəy kula ŋ nda a tama səkwaw, mavəday mbəy pa ma ɓarɓar aha mbe. Aya, nene yakza bargadaŋ anta ma heɓzeney. 16 Ana ebe ŋghe, nene təwlek ta ata bar hayak wende pəzekw ende ŋghe ma ŋ taba ŋtele maa əy kayaɓa Kawda. Aya, maa hayak wese a tak bargadaŋ aka ca, nene lem taf ŋ tevenza kwambawal ma pəzekw ata madakal a gef. 17 A dəwze maa hejəye meheɓ kwambawal ege əy kétevenza kwambawal ma pəzekw aza ata madakal wese ca, əy vərew kwambawal ma dakal aka a mbarla. Əy kalalak mavəday vakw ma ŋ hayak Ləybəya wese a ɗaw ŋ garzata ka səkwaw. A təwse əy nahza səkan ma ndeɓndeɓ ma ata deŋza kwambawal ma dakal aka aha yam, aya, əy geɓza kwambawal ma dakal aka, bargadaŋ a heɓza. 18 Bargadaŋ anta, a kavas ŋ həɓalza kwambawal ma dakal a mazlazlay war, ana ebe ŋghe a mapat anta, əy kwekweɗzata səkan ege ma ata səkam ma ŋ kwambawal ma dakal wese aza ŋ yam. 19 Ata wan ma mahkaɗ anta, hejəye ma keheɓ kwambawal ma dakal ege, əy kwekweɗzata səkan mala kwambawal ma dakal ege aza a ra tata ŋ yam, ana: mbarla ege leŋ səkan ege vedəye tewtew. 20 Wan vəram, nene kegəre pes askwaw, nene gəre gamzla ege askwaw. Bargadaŋ a kavas ŋ babar a mazlazlay, ha nene kédeŋza nene nereh ŋcene ca, askwaw.
21 Wan vəram, kaw hejəye ma ŋ kwambawal ege wese əy kazam səkan askwaw, aya, Pawl a deŋ a tama tata tewtew, a zlepetene, a ŋgaya: «Hune hejəye, keɗe hune kálamza ma naka ca, heje kanagwarzam aza ŋ hayak Kereta askwaw, səkan ŋtakwaw ege əy kanagay tata askwaw, əy kanakuɗap tata askwaw. 22 Na ŋgha cemey, kaw vayay mambal unaf anta ka, kaw ɗala teŋguleŋ ŋ taba ŋkune a kenefətek askwaw, səy kwambawal ma dakal gagaha ma kenefətek. 23 Ŋcəne a zaɗaw ŋgha, Gazlavay maa sa asa ra anta ey maa sa kelene zlan kálaɓaza malaɓ anta ara sa. 24 A zlepekey, a ŋgaya: “Pawl, hwa lalak səkwaw! Səy hwa magar aza a tama bay madakal mala hayak Rawma ŋ jahwaw guma, aya, Gazlavay a taŋtaŋ anta a nerehzata hejəye ma tewtew ŋ kwambawal ma dakal ŋghe ege aza, mavəday hwa.” 25 Ana ebe ŋghe, hune hejəye, hune mbal unaf aka, sa kálamza unaf naka, səkan maa Gazlavay a zlepekey ca, a nala ana mbe njenjəwen. 26 Cemey, bargadaŋ a nejeɓzaheje kəɗe ata hayak ma ŋ taba ŋtele wende.»
Hejəye ma ŋ kwambawal ege əy reh
27 Ŋ zaɗaw ma wam aha ŋfaɗ anta, bargadaŋ a keŋcekwzeney ŋ ŋtele Adəyrəya. Aya, ŋ taba zaɗaw, hejəye ma keheɓza kwambawal ege, əy deŋza ca, əy slaɓ ŋ hwas ata hayak. 28 A təwse, əy nahza ɓarzlam majawajaw a serek ata kwambawal ma dakal ŋ ŋtele wese, ŋ slaŋgalza pəɗem yam anta. Əy ndew pəɗem anta, metəyr ramahkaɗ aha ŋseleɗ. Əy nda a tama cekuɗe ende ŋghe, əy nahza zeney, əy ndew pəɗem yam anta, metəyr ragbak aha jamahkaɗ. 29 A təwse, əy kálalak tata, mavəday bargadaŋ a nejeɓza kwambawal kəɗe ata kefe ege. Aya, əy nahzata ɓarzlam ma ndeɓndeɓ ege ŋfaɗ ma ata garza kwambawal ta a dəwze. Əy teh mapat malaha kəcaŋ. 30 Cemey, hejəye ma keheɓ kwambawal ege wese, əy ɗaw ŋ damha aza ŋma ŋ reh tata. A təwse, əy tadakwza kwambawal ma pəzekw ŋ yam, əy la ana maa, əy ɗaw ŋ nah ɓarzlam ma ndeɓndeɓ ege ma ata garza kwambawal ma dakal a tama kwambawal ma dakal. 31 Cemey, Pawl a zlepene ŋ madakal ma ata ha sawje ege temere leŋ ŋ sawje ege, a ŋgaya: «Mada hejəye ŋghe ege əy ŋ kwambawal askwaw ca, hune kenereh askwaw.» 32 Aya, sawje ege əy razl mbarla ma kambal kwambawal ma pəzekw aka ata madakal, əy yakza ka ŋ nda ŋ yam.
33 Mar mapat a zlarha ca, Pawl a yahata hejəye tewtew ŋ zam uda, a zlepetene, a ŋgaya: «Kála anta wan wam aha ŋfaɗ hune kesew gef, kaw hune kazam səkan askwaw. 34 Na ŋgha, sa kazlapahune ŋ zam uda ŋ lem ɓarɓar ŋ reh. Cemey, kaw jukwaɗ ha ɗala ŋkune teŋguleŋ a kenefətek askwaw.» 35 A dəwze zlap ŋghe ege ca, Pawl a ŋta uda peŋ, a lene wasay ŋ Gazlavay a tama hejəye tewtew, aya, a ŋgaw, a mar ŋ zamaw. 36 A təwse, hejəye tewtew əy mbal unaf, əy zam uda peŋ anta yam. 37 Nene tewtew ŋ kwambawal anta temere gbak a reŋsəleɗ aha ŋkwah. 38 Aya, maa əy kázam uda aza həraɗ ca, əy nahza ndərey maa əy kayaɓa alkamarəy aza ŋ yam, ndar kwambawal a la kefkef.
39 Maa mapat a la anta ca, hejəye ma keheɓ kwambawal ege wese, əy kasan la maa əy a təwse səkwaw. Cemey, əy gəre vakw medefedef ata la maa yam a dam ŋ hayak ma ŋ taba ŋtele, əy sa unaf ŋ ŋcakwza kwambawal kəɗe ata la wese, mada a la anta. 40 Ana ebe ŋghe, əy palata ɓarzlam ma ndeɓndeɓ ege ma ata garza kwambawal ma dakal aza, əy yakzata aka ŋ yam. A təwse zeney, əy palata serek ege ma ata mpe ma ata gaɓ kwambawal ege aza, aya, əy kafza maslaga a tama kwambawal, ndar bargadaŋ a ŋcakwza kəɗe mazlam ŋtele. 41 Cemey, kwambawal a nda, a ndew ata la maa yam dakala askwaw, gbar a gar aka, tama anta a dam anta ŋ vakw, kaw kula ŋ həɓal zeney səkwaw. Aya, ɓarɓar latatəŋgwal yam a ŋga kwambawal ta a dəwze. 42 Sawje ege əy ɗaw ŋ jata daŋgay ege aza mavəday əy naŋtaɗ tata asa yam, əy nehey tata. 43 Cemey, madakal ma ata ha sawje ege temere ca, a ɗaw ŋ rehza Pawl, a takata ka ŋ la səkan maa əy deŋza wese. Aya, a zlepetene ŋ hejəye ma kasan ŋ ŋtaɗ ege, əy member tata mpar ŋ yam, əy maŋtaɗ tata hwas ata hayak. 44 Hejəye vedəye əy veɗ ra ata papalam ege, askwaw ca, ata mpe kwambawal ma ŋgaha ege, ŋ səbarata. Ana ebe ŋghe, hejəye tewtew əy hwas ata hayak, kaw səkan wende kéletene askwaw.