Zlap ata
Ma Mewe ma Taŋtaŋ maa Luka a ŋtərew
Luka a ghwalza Yesu Kərəystu ca, ana Mba Ɗala ma ndaha ŋ mpam leŋ ŋ rehazata hejəye ma fətek tata ege (Luka 19.10). Luka anta a ghwalza laɗaw mala Yesu ŋ hejəye maa ɓarɓar tata ege parham, ana: metetekw ege, weləye leŋ uzəye. A ghwalza zlan mala Zəwet Bay Gazlavay ma keweɗ ŋ səkan ege tewtew maa Yesu a lata.
Heje ma ŋter zlap anta ca, ara mbəlam ma val menjevek ma ata reh hejəye. A ŋteraza ca, ŋ ghwelzetene Ma Mewe ma Taŋtaŋ ŋ hejəye maa tata Yahudu ege səkwaw ndar əy lem lereh ta ŋ Yesu Kərəystu, ɗala maa Bay Gazlavay a laɓaza ŋ rehzata hejəye. Luka anta ca, ara mbe ma ŋteraza ɗerewel mala «Zlan Malaɓ ege» zeney. A ŋterata ɗerewel anta ege gbak tata ca, ŋ heje wende aka, zlam anta Tawfəylus, ɗala Yahudu səkwaw. Luka anta a ha anta, kásan Yesu askwaw, cemey, kámpam ma ege dakala ara hejəye ma njaha tewtew ata Yesu anta, ŋ san lanja anta.
Ɗerewel ŋghe anta ca, ara ɗerewel ma pa ma jem aha ɗerewel ege tewtew ŋ «Laŋkan Mewe mala Bay Gazlavay a hejəye». Luka a mar ŋ ghwalza zlap anta ca, ta ŋ səkan ege vedəye vedəye ata lambaw Yesu (Luka 1-2) leŋ ata jeje anta ege (Luka 3.23-38). Káŋgaɗaza maa Yesu a lem baptəysma (Luka 3.21), maa Sayɗanu a mpam taf ŋ slanza (Luka 4.1-13), zlan anta (Luka 4-21), ladar anta ata mpe gafaŋgal (Luka 22-23) leŋ ata lagwarzamha anta aza ata lamac (Luka 24). Ata laŋtakw ɗerewel ŋghe anta ca, Luka a ghwalza zlap ata Yesu maa əy ŋgel ma a madarlaŋw anta ege gas vəram a dəwze maa a gwarzamha aza ata lamac, a zeney, ata maa a slata ka ŋ nda ŋ ghwalza Ma Mewe ma Taŋtaŋ ŋ hejəye vedəye.
A dəwze anta, a zlap ata maa Bay Gazlavay a ŋta Yesu aza mgba ata uzlaf.
Laghwal ma ege cekuɗe mavəday ɗala ma kenejəŋge:
Heje káca ha zlap ege a həzlar ŋ fasləwal kaw vekey, ŋ cekzetene ŋ hejəye ŋ ndewzene kəcaŋ ŋ lamar lazla zlap ege. Əy kaval ledeŋ ŋkwaɓ ata səkan ege ma ŋ ha zlap ege, askwaw ca, ma ŋ ha bay zlap anta.
Heje nendewzetene ŋ laghwal ma ege ata səkan ege vedəye ma heje kasanata a vah ŋtakwaw ŋgha səkwaw. Heje nendewzetene a manjəraf zlap ege. Əy nacakzaheje ŋ zləme zlap ege.
Səkan ŋgha […] a kaghwalza ca, ayare ŋghe anta, a kendew ŋ leŋter ege vedəye ma zlezle mala Yunanəyŋkaw ege səkwaw.
Ma Mewe ma Taŋtaŋ maa
Luka
a ŋtərew