Lamar zlap
1
1-2 Ɗala naka,
Tawfəylus,
Hejəye vəram əy kégəre səkan ege maa Gazlavay a lata ŋ taba ŋcene a nje tata ege,
mar aka ata lamar.
A dəwze anta,
əy kághwalza zlap anta.
Ca,
əy késlepeney ma anta ege tewtew,
aya,
hejəye vəram əy kátal ŋ ŋterata səkan anta ege.
3 A təwse ca,
sa kénjenza ma anta kadak kadak ata səkan anta ege tewtew ma laha ata lamar wese,
sa kédeŋza kadak ŋ ŋterahwaw ma anta ege a meɗeɗe a meɗeɗe ŋ hwa yam,
Tawfəylus,
ɗala naka ma taŋtaŋ.
4 Ayaw,
sa ŋterahwaw ca,
ndar hwa san ma ege maa əy sasərakzahwaw wese ege ca,
ara ma ege ma taŋtaŋ njenjəwen.
Malaɓ Bay Gazlavay a ghwalza lambaw Yuhana
5 Ata vah maa Həyrudus,
mbəy bay mala hayak Yahudəya,
heje wende aka,
zlam anta Zekarəya,
ara ɗala ma ŋ taba lajav mala kwakwas Gazlavay ege maa əy kayaɓa Abəya.
Wala anta yam,
zlam anta Eləyzabet,
ara ŋseŋ Haruna,
ɗala ma dakal ma zlezle ma la kwakwas Gazlavay.
6 Ata Zekarəya ey wala anta anta,
əy tuwah a tama Gazlavay,
əy kasəbar ma maŋkanaŋkan a heɗe a heɗe tuwah ana maa Bay Madakal a kaɗawaw.
7 Cemey,
əy kámbawaha uzəye askwaw,
mavəday Eləyzabet ca,
ara ndel.
Tata gbak tata,
tata msəra ege dəydey.
8 A pes wende aka,
Zekarəya a kala zlan a mala kwakwas anta a tama Gazlavay a ujek kwakwas,
mavəday ara vah mala lajav Abəya ma ata la zlan.
9 A pes wese ca,
Zekarəya a lem zlan ma ata ɗəbesene səkan ma kenjef ŋ Gazlavay a ujek kwakwas.
A ɗəbesene səkan a pes wese ca,
mavəday mala kwakwas Gazlavay ege əy kala ghərew ŋ taba tata ana ma a mpat a mpat ŋ ŋtez zlan maa əy kanalaw.
10 Maa a keɗəbesene səkan wese ca,
hejəye vəram əy bəza,
əy karak Gazlavay yam.
11 Aya,
a təwse a təwse ca,
malaɓ Gazlavay a ghwelene kusam ŋ Zekarəya.
Malaɓ Gazlavay anta kédeŋeye ata kəva zam səkan ma kaɗəbas wese.
12 Maa Zekarəya a gəre malaɓ Gazlavay wese ca,
kálalak anta mambaza a heɗe,
kéŋgene ŋkwaɓ aza.
13 Cemey,
malaɓ Gazlavay wese,
a zlepene,
a ŋgaya:
«Hwa lalak səkwaw Zekarəya,
mavəday Gazlavay kézləme larak ŋkwa aza.
Eləyzabet,
wala ŋkwa,
a nambawahwaw mba mawal,
hwa nayaɓa zlam anta Yuhana.
14 Hwa nasasam dakala mambaza,
hejəye vəram əy nasasam ata lambaw mba anta yam,
15 mavəday a nala ŋ ɗala ma dakal a tama Bay Madakal.
A kanasa mavaw askwaw,
kaw a kanasa səkan vedəye ma kaŋhwazaheje ege askwaw.
Mar aka a pes maa maman a nala a dəmas a mbe ca,
Zəwet Gazlavay a nanja a heɗe.
16 A nezenata hejəye Əysərayəyla ege vəram ara Gazlavay tata.
17 A nandaha a zəwet ey ɓarɓar mala Eləya,
mba ma zlap ma a Gazlavay.
A najavata unaf ata uzəye ey cen tata ege ŋ la anta.
Hejəye ma kaɗaw ŋ lamza zlap Gazlavay ege səkwaw ca,
a nebewzetene unaf tata ege aza,
aya,
əy nedeŋ ŋkwaɓ kadak ana hejəye ma kala zlan a heɗe a heɗe ege.
Ana ebe ŋghe,
a naslata hejəye aka ŋ lamza Bay Madakal.»
18 Aya,
Zekarəya a zenzene ŋ malaɓ Gazlavay wese,
a ŋgaya:
«Sa,
sa msəra tew,
wala naka yam,
msəra tew zeney.
Sa nasan njəwen ca,
ata vemey?»
a ya.
19 A təwse,
malaɓ wese,
a zenene,
a ŋgaya:
«Sa,
sa Jəybəyrəyla mala zlan ara Gazlavay.
Ara mbe ma leɓekey ŋ zlapahwaw,
ŋ ghwalzahwaw ma mewe ma taŋtaŋ ŋghe.
20 Cemey,
hwa kálamza ma naka ege maa sa zlapahwaw ata səkan ege ma kanala ata vah maa Gazlavay a kaɗawaw,
askwaw.
Mavəday anta,
hwa nala ŋkwa ŋ ɓaɓa,
hwa nezen ŋ zlar zlap ca,
səy ata vah maa səkan anta ege əy kála tata.»
21 Ata vah maa Zekarəya,
mbəy a ujek kwakwas wese ca,
hejəye vəram əy kaŋkapaw,
a bəza.
Əy kédeŋ ŋkwaɓ dakala mavəday Zekarəya kánja ka səpek a ujek kwakwas Gazlavay.
22 A dəwze anta,
a damha aza a bəza,
mbəy kula ŋ zlepetene zeney səkwaw.
A təwse ca,
hejəye əy deŋza ca,
zaɓəla kéndewzene a ujek kwakwas Gazlavay anta.
Mbəy kula ŋ zlap səkwaw,
cemey,
a zlepetene ca,
a ra gagaha.
23 Aya,
maa Zekarəya a ŋtakwza zlan anta aza a ujek kwakwas Gazlavay ca,
tel a nda anta a wata anta.
24 Ata wan ege cekuɗe maa a nda anta a wata wese ca,
wala anta Eləyzabet la a la anta a dəmas.
Ŋtəra jaɓan ɓah a ɓah aka.
A zlap ŋ ha anta,
a ŋgaya:
25 «Sarza,
səkan maa Gazlavay a lekey.
Kéŋtekey hawa mala ndel naka aza a tama hejəye.»
Malaɓ Bay Gazlavay a ghwalza lambaw Yesu
26 Aya,
ata ŋtəra maŋkwah maa Eləyzabet mbəy a dəmas ca,
Gazlavay a laɓaza malaɓ anta Jəybəyrəyla ŋ uzam Nasaratu ŋ hayak Galəyləy.
27 A laɓaza ara haldəma dalay,
səbe heje wende aka,
zlam anta Yusufu,
ara ŋseŋ Dawuda.
Zlam haldəma anta yam,
Marəyama.
28 Malaɓ Gazlavay wese,
a ndaha ara mbe,
a zlepene,
a ŋgaya:
«Sa kazlapzahwaw,
Marəyama.
Hwa,
hwa kélem bəzla Gazlavay aza.
Bay Madakal mbəy a hwa.»
29 Maa Marəyama a zləme maa malaɓ Gazlavay a zlepzene wese ca,
ma anta,
kéŋgene ŋkwaɓ aza mambaza.
Kédeŋ ŋkwaɓ a heɗe dakala,
a ɗawza ha anta,
a ŋgaya:
«Lazlap ŋghe ca,
a ɗaw ŋ zlap ca,
vaŋgay?»
30 Aya,
a zlepene,
a ŋgaya:
«Hwa lalak səkwaw Marəyama,
mavəday hwa kélem bəzla aza ara Gazlavay.
31 Hwa nala a dəmas,
hwa nambawha mba mawal,
hwa nayaɓa zlam mba anta Yesu.
32 A nala ŋ ɗala ma dakal,
əy nayaɓa a mba Gazlavay ma mgba ata uzlaf.
Bay Gazlavay Madakal a nevelene bay a jeje anta Dawuda.
33 A nazam bay ata hejəye Əysrayəyla ege,
kaw vepey.
Lazam bay anta a kanaŋtakw askwaw.»
34 Ca,
Marəyama a zlepene ŋ malaɓ Gazlavay,
a ŋgaya:
«Sa kasan mawal səkwaw aza ca,
a nasan ŋ la vaŋgay!»
a ya.
35 Aya,
malaɓ wese,
a ŋgaya:
«Zəwet Gazlavay ma keweɗ a nandaha ata hwa,
ɓarɓar Gazlavay ma mgba a nadapahwaw a seŋseŋ anta.
Mavəday anta eze,
mba maa hwa kanambawaza ŋgha ca,
kaw gay a heɗe askwaw.
Aya,
əy nayaɓa a mba Gazlavay.
36 Ŋghe,
van ŋkwa Eləyzabet,
kaw mbəy msəra mambaza ca,
mbəy a dəmas na ŋgha yam.
A nambawha mba mawal.
Kaw hejəye əy ŋgaya:
“Ara ndel,”
əy ca,
cemey,
na ŋgha mbəy a dəmas ŋtəra anta ŋkwah,
37 mavəday səkan maa Gazlavay kula ŋ la səkwaw ca,
askwaw.»
38 A təwse ca,
Marəyama wese,
a ŋgaya:
«Sa,
sa mala zlan Gazlavay,
melekey ana maa hwa zlap anta,».
Aya,
malaɓ Gazlavay wese yak a yakza aka,
tel,
a nda anta.
Marəyama a nda a wata Eləyzabet
39 Aya,
wan ege cekuɗe a dəwze anta ca,
Marəyama a gwarzam,
a nda kəcaŋ ŋ uzam ma ŋ barla ma ŋ hayak Yahudəya.
40 A hwasha a təwse,
a dam a wata Zekarəya,
a zlepzene ŋ Eləyzabet.
41 A təwse,
maa Eləyzabet a zləme maa Marəyama a zlepzene wese ca,
mba a həɓal a dəmas anta.
Eləyzabet mbəy ghef a Zəwet Gazlavay ma keweɗ.
42 Aya,
a ja ula a mazlazlay,
a zlepene a Marəyama,
a ŋgaya:
«Gazlavay káca bəzla anta aka ata hwa day aha ma ata weləye vedəye tewtew.
Bəzla anta mbəy ata mba maa hwa kanambawaza ŋgha!
43 Sa ca,
sa yam vayay,
ha man Bay Madakal naka a ndaha ara sa ŋgha!
44 Ayaw,
maa sa zləme lazlap maa hwa zlepzekey ŋghe ca,
mba a həɓal a dəmas naka a sasam.
45 Bəzla Gazlavay,
mbəy ata hwa,
mavəday hwa kálamza ma Gazlavay maa a zlapahwaw wese aza,
səkan anta a nala njenjəwen!»
Marəyama a həmanza Bay Gazlavay a dəraf
46 A dəwze anta,
Marəyama,
a ŋgaya:
«Sa kahəmanza Bay Gazlavay Madakal a unaf naka tewtew,
47 sa kasasam dakala,
mavəday Gazlavay,
mereh sa,
48 kaw sa ɗala ma dakal a tama hejəye səkwaw ca,
késenzekey hahar aza ŋ sa mala zlan anta.
Njəwen,
mar aka ma na ŋgha,
hejəye tewtew ma kanambawha ege,
əy nazlap ca,
bəzla mbəy ata sa.
49 Əy nazlap ana ebe ŋghe ca,
mavəday Gazlavay Mawacawaca,
kélekey səkan ege ma tuwah tuwah.
Ara Gazlavay ma keweɗ.
50 A nala taŋtaŋ anta kaw vepey,
ata hejəye ma kewenzene ha ege.
51 Kála zlan ma ɓarɓar ege a ɓarɓar ra anta.
Kéweɗzata hejəye ma kala ghav ege aza.
52 Kátadakwata bay ege aza ata lanja ma ŋ bay tata ege,
kákafzata hejəye ma kawanza ha tata ege aza mgba.
53 Káhəraɗzata hejəye metes ege aza a səkan ma tuwah tuwah ege mambaza.
Kágamata maŋcaɗaŋcaɗ ege aza,
əy nda a ra bəse.
54 A ndaha ŋ cekzeney,
nene hejəye Əysrayəyla,
mala zlan anta ege,
kaw kéheseŋza ŋ lene taŋtaŋ anta,
55 ŋ Əybərahəyma leŋ ŋ nene uzəye dəmas anta ege,
kaw vepey askwaw,
ana maa Gazlavay a ghwelzetene ŋ jeje ŋtakwaw ege.»
56 Marəyama a nja ara Eləyzabet ŋtəra mahkaɗ,
a dəwze anta,
tel a nda anta a wata.
Lambaw Yuhana mala baptəysma
57 Aya,
ŋtəra Eləyzabet ma ata mbaw hwas,
a mbawaha mba mawal.
58 Mesleje anta ege ey van anta ege əy zləme taŋtaŋ maa Gazlavay a lene ca,
əy kasasam ŋ la anta əy ata Eləyzabet.
59 Ata wan majamahkaɗ,
a dəwze lambaw mba anta ca,
mesleje anta ege ey van anta ege,
əy ndaha ŋ zlene mandulay aza,
əy ɗaw ŋ cene zlam anta Zekarəya ana cen.
60 Cemey,
man mba anta,
a ŋgaya:
«Andəwse səkwaw,
zlam anta ca,
Yuhana.»
61 Aya,
əy zenene,
əy ŋgaya:
«Ca,
kaw ɗala teŋguleŋ ŋ taba ŋseŋ ŋkune ma zlam anta ana ebe ŋghe,
askwaw ŋghe eze!»
62 A təwse ca,
əy zlepene ŋ cen mbaw a ra,
ŋ ɗawza zlam maa a kaɗaw ŋ cene a mba anta ca,
vekey?
63 Aya,
a zlepetene ŋ dene papalam,
a ŋter a heɗe:
«Zlam anta ca,
Yuhana.»
Hejəye tewtew əy kédeŋ ŋkwaɓ dakala.
64 A təwse a təwse,
Zekarəya a zen ŋ zlar zlap eze,
a mar ŋ zlap.
Aya,
a həmanza Gazlavay ata taŋtaŋ anta.
65 Cemey,
mesleje anta ege əy kálalak tata dakala mambaza.
Hejəye ma a uzam ma ŋ barla ege ma ŋ hayak Yahudəya ege tewtew əy kazlap ata səkan ma laha ŋghe ege tewtew.
66 Kaw vayay ma zləme ma ŋghe ca,
a mbal ka a unaf,
a deŋ ŋkwaɓ a heɗe,
a ɗawza ha anta,
a ŋgaya:
«Mba anta ca,
a nala ŋ vemey?»
Njenjəwen ca,
ɓardakw Gazlavay mbəy a mbe.
Zekarəya, a həmanza Bay Gazlavay a kəleŋ
67 Aya,
Zəwet Gazlavay ma keweɗ a ndaha ata Zekarəya,
cen mbaw wese.
A dəwze anta,
a zlap a kəleŋ ana mba ma zlap ma a Gazlavay,
a ŋgaya:
68 «Ŋ həmanzakwaw Bay Madakal,
Gazlavay Əysrayəyla,
mavəday kécekzetene ŋ hejəye anta ege,
kérehzata aza.
69 Kálaɓaheje ɗala ma reh heje ma ɓarɓar,
ma ndaha aka ta ata ŋseŋ bay Dawuda,
mala zlan anta.
70 Kághwalaza ma ŋghe zlezle a nuna anta,
ta ŋ ma uzəye ma zlap ma anta ege ma keweɗ,
71 a ŋgaya:
“A nerehzaheje aza asa ra hejəye ma kaɗaw ŋ gəreheje ata nje ege səkwaw
ey hejəye ma kaɗaw ŋ laheje dadawar ege.”
72 Kághwalza laɗaw anta ŋ jeje ŋtakwaw ege,
kéheseŋza laŋkan ma anta ma keweɗ maa a zlap wese askwaw.
73 Mavəday meɗ maa a meɗene ŋ Əybərahəyma jeje ŋtakwaw wese ca,
a nalaheje səkan anta.
74 A nerehzaheje aza asa ra hejəye ma kaɗaw ŋ gəreheje ata nje ege səkwaw,
ndar heje lene zlan a lalak səkwaw,
75 amba heje baw ŋtakwaw ŋ hejəye ma taŋtaŋ ege a tama Gazlavay
leŋ ŋ hejəye ma kala zlan a heɗe a heɗe ege ana maa a kaɗawaw,
ata pes ata pes maa heje a nje.»
76 Zekarəya a zlap zeney,
a ŋgaya:
«Mba naka,
hwa nala ŋ mba ma zlap ma a Gazlavay ma mgba ata uzlaf,
mavəday hwa nanda mpar a tama Bay Madakal ŋ lemzene taf anta ka.
77 Hwa neghwelzetene ŋ hejəye anta ege ca,
Gazlavay ca,
a nerehzata aza mavəday a nepelzetene gay tata ege aza.
78 Gazlavay ŋtakwaw a nerehzaheje ca,
mavəday kásan hahar ata heje,
kálaheje taŋtaŋ anta dakala.
Kálaɓaheje leweɗ ma mgba ata uzlaf ana pes ma kadamha,
79 ŋ weɗ la ata hejəye ma ŋ kuzle ege ey ma ŋ seŋseŋ lamac ege,
ndar a caheje ma ŋ taf zəhay»
80 Mba wese,
a kagal,
a kagal,
ŋkwaɓ anta a keŋger,
kála anta ŋ ɗala ma dakal.
A dəwze anta,
kánda anta,
kánja ka ata darzlam,
ha hwas ata vah maa a ghwalaza ha anta a tama hejəye Əysrayəyla ege.