Lambaw Yesu
2
Ata vah maa əy mbawaza Yuhana aza ca,
bay Agustus mala hayak Rawma,
kágwarzamha ma ma ata ŋter zlam hejəye tewtew ma ŋ hayak.
2 Ara leŋter zlam ma mpar ŋ hayak Rawma.
Leŋter zlam anta ca,
a laha ata vah maa Kəyrəynəyus,
ara bay mala hayak Səyrəya.
3 Hejəye tewtew əy kánda ŋ ŋterha zlam kaw vayay ŋ uzam maa cen a mbawha a ŋma.
4 Aya,
Yusufu a gwarzam ŋ uzam Nasaratu ŋ hayak Galəyləy,
a nda ŋ uzam Baytəylama ŋ hayak Yahudəya ata la maa Dawuda a mbawha,
mavəday Yusufu ara ŋseŋ Dawuda.
5 Maa a nda a təwse ca,
a nda zlaɓa səbe anta Marəyama ŋ ŋterha zlam tata ege.
Marəyama mbəy a dəmas.
6 Aya,
maa əy ŋ Baytəylama ca,
pes Marəyama ma ata mbaw hwas.
7 A mbawha Gwenje anta.
A dap ka a rəgwac,
a wanza ka ata lazam səkan ma ŋ bezle ege,
mavəday əy kélem la a ujek ma ata wan mbəlakw ege askwaw.
Malaɓ Bay Gazlavay a ndaha ara uzəye njəwen ege
8 Ŋ hayak anta a təwse ca,
uzəye njəwen ege aka,
əy kénjeye ata damaw ŋ həbar ŋtəməye tata ege a zaɗaw.
9 Aya,
kəɗe ca,
əy gəre malaɓ Gazlavay kédeŋeye a həzlar tata.
A dəwze anta,
zəwet Gazlavay a weɗ la ata tata.
A təwse ca,
lalak əy lalak tata dakala mambaza.
10 Cemey,
malaɓ wese a zlepetene,
a ŋgaya:
«Hune lalak səkwaw,
mavəday sa ndaha ca,
sa dahune labara ma taŋtaŋ ma kanasasamzata hejəye tewtew dakala.
11 A zaɗaw ŋgha,
ɗala ma kenerehzata hejəye,
kámbawaha aza ŋ uzam maa bay Dawuda a mbawha zlezle a təwse.
Ara Kərəystu Bay Madakal,
ɗala maa Gazlavay a laɓaza ŋ rehzata hejəye.
12 Ŋghe səkan ma kanaghwalzahune ŋ san mba anta.
Hune nendewzene a mba kédepeye a rəgwac,
kéweneye ata lazam səkan ma kadamha ŋ bezle ege.»
13 A təwse a təwse,
malaɓ Gazlavay ege vedəye vəram əy ndaha,
əy təwlek malaɓ Gazlavay wese.
Əy kahəmanza Gazlavay,
əy ŋgaya:
14 «A ɗaw hejəye,
əy mahəmanza Gazlavay ma mgba ata uzlaf,
a zeney,
a ɗaw zəhay anta mandaha ata hayak ata hejəye maa a kaɗawata ege!»
Uzəye njəwen ege əy nda ŋ Baytəylama
15 A təwse ca,
malaɓ ege wese,
əy yakzata aka,
əy zen tata mgba ata uzlaf.
Aya,
uzəye njəwen ege əy zlap ŋ taba tata,
əy ŋgaya:
«Kazakwaw hwas ŋ Baytəylama ŋ saraza səkan ma laha maa Bay Gazlavay Madakal a ghwalzaheje.»
16 Əy nda kəcaŋ a təwse.
Əy ndewzetene ata Marəyama ey Yusufu leŋ mba kéweneye ata lazam səkan ma ŋ bezle ege.
17 Aya,
maa əy gəre mba anta ca,
əy kaslap ma maa malaɓ Gazlavay a zlepetene ata mba wese.
18 Hejəye tewtew ma zləme ma mala uzəye njəwen ege maa əy slap wese ca,
əy kedeŋ ŋkwaɓ ata ma anta,
kaw əy kasan səkan maa əy kanala səkwaw.
19 Cemey,
a Marəyama ca,
kámbal ma anta ka a unaf anta,
a kedeŋza kaw vepey.
20 Aya,
uzəye njəwen ege wese,
əy zen tata ara ŋtəməye tata ege,
əy kahəmanza Gazlavay ara ata səkan ege maa əy zləme ey maa əy gəre,
mavəday səkan anta ege tewtew əy laha ana maa malaɓ Gazlavay a zlepetene wese.
Əy cene zlam ŋ Yesu
21 Aya,
wan majamahkaɗ anta,
a dəwze maa mba a mbawha aza ca,
ara pes ma ata zlene mandulay aza,
a pes wese,
əy cene zlam anta Yesu ana maa malaɓ Gazlavay a ghwelzene a Marəyama mar a nala a dəmas.
22 A dəwze anta,
vah kwakwas maɗas Marəyama ŋtakw ana laŋkan ma mala Musa.
Ata Yusufu ey Marəyama əy la kwakwas ŋ nja a zəhay a tama Gazlavay.
Əy jeɓza mba tata a ujek kwakwas ŋ Urusaləyma ŋ ghwelzene ŋ Bay Madakal.
23 Cemey,
kéŋtereye ŋ laŋkan ma mala Gazlavay,
a ŋgaya:
«Gwenje mba mawal a kaw vayay ca,
a Bay Gazlavay Madakal.»
24 Ca,
əy ndaha,
əy lene kwakwas zeney yam,
a magudaguda gbak,
askwaw ca,
məyɗanak gbak,
ana laŋkan ma maa Gazlavay a zlap.
Səymeyawn a həmanza Bay Gazlavay mavəday Yesu
25 Aya,
heje wende aka ŋ Urusaləyma,
zlam anta Səymeyawn.
Heje anta tuwah a tama Gazlavay,
a kasəbar taf Gazlavay a unaf anta teŋguleŋ.
A kahəbar ɗala ma kanandaha ŋ rehzata hejəye Əysrayəyla ege.
Zəwet Gazlavay ma keweɗ mbəy a heɗe.
26 Zəwet anta kéghwelzene aza,
a ŋgaya,
a kanamac askwaw,
səy mbəy ma gəre Kərəystu,
ɗala maa Bay Gazlavay Madakal a laɓaza ŋ rehzata hejəye aza,
a nje anta.
27 A dəwze anta,
Zəwet wese a jeɓza Səymeyawn a ujek kwakwas,
lec maa ata Yusufu ey Marəyama əy daza Yesu a ujek wese ndar əy lene kwakwas ana maa ma maŋkanaŋkan a zlap.
28 Aya,
Səymeyawn a gəre mba wese,
a ŋta asa ra anta,
a həmanza Gazlavay,
a lene wasay,
a ŋgaya:
29 «Gazlavay,
hwa kála səkan maa hwa zlap wese aza na ŋgha kəɗaŋ.
Hwa kula ŋ yakza mala zlan ŋkwa ka mamac a zəhay.
30 Mavəday a nje naka,
sa kégəre lereh ŋkwa aza,
31 lereh maa hwa slaza ka a tama hejəye ŋkwa ege tewtew.
32 Ara leweɗ ma kanaghwalza ha ŋkwa ŋ hejəye ma ŋ manhayak ege tewtew
leŋ a neveletene ɓardakw ŋ hejəye ŋkwa ege Əysrayəyla.»
33 Ata cen Yesu ey maman,
əy kédeŋ ŋkwaɓ dakala ata ma maa Səymeyawn a zlap ata mba anta.
34 Aya,
Səymeyawn wese,
a bəzletene.
A dəwze anta,
a zlepene a Marəyama,
man Yesu wese,
a ŋgaya:
«Gazlavay a may mba ŋgha ca,
hejəye vəram ŋ Əysrayəyla əy nandav ŋ gay,
aya,
hejəye vedəye yam,
əy nereh tata mavəday anta.
Mbe ca,
ara ɗala ma keghwelzetene ŋ hejəye,
ara Gazlavay,
ma kaɗaw ŋ rehzata aza ŋ gay tata ege,
cemey,
əy kanaɗaw ma anta səkwaw.
35 Cemey,
a naghwalaza ledeŋ ŋkwaɓ hejəye vəram maɓahaɓah ŋ unaf tata ege a bəza.
Hwa maman anta yam,
lambal ma anta a nazlahwaw a unaf ŋkwa ana ŋgezle masalam.»
Ana a lene wasay ŋ Bay Gazlavay
36 Mba ma zlap ma a Gazlavay wende aka,
ara wala,
zlam anta Ana.
Mbe ca,
ara həla Fanuyel,
ŋseŋ Aser.
Mbəy msəra dəydey.
Cemey,
maa mbəy dalay ca,
káŋta mawal,
əy kánja a mbe va ŋsəleɗ.
37 Aya,
maa mawal anta a mecene aza ca,
kénjeye,
kaw káŋta mawal wende askwaw.
Va anta kála anta rajamahkaɗ aha ŋfaɗ.
Mbəy ata pes ata pes a ujek kwakwas,
a kelene zlan ŋ Gazlavay pes ey zaɗaw kaw vepey,
a kazam uda askwaw,
a karak Gazlavay.
38 A ndaha lec maa Səymeyawn káŋtakwza zlap anta aza,
a lene wasay ŋ Gazlavay.
A dəwze anta,
a zlepetene ma mba anta ŋ hejəye tewtew ma kahəbar lereh maa Gazlavay a nerehzata hejəye aza ŋ Urusaləyma.
39 A dəwze maa ata Yusufu ey Marəyama əy kála aza kwakwas aza ana laŋkan ma mala Gazlavay ca,
tel əy zen tata zlaɓa mba tata ŋ uzam tata Nasaratu ŋ hayak Galəyləy.
40 Mba a kagal,
a kelem ɓarɓar,
mbəy a kəleŋ dakala.
Bəzla Gazlavay mbəy a heɗe.
Yesu mbəy a ujek kwakwas, va anta wam aha gbak
41 Ata va kaw vekey ca,
Yusufu,
cen Yesu ey maman Marəyama,
əy kanda ŋ ja gwaygwaya Paska ŋ Urusaləyma.
42 Maa va Yesu a la anta wam aha gbak ca,
əy nda tewtew ana ma a mpat a mpat a təwse ŋ ja gwaygwaya anta.
43 Maa gwaygwaya tuwaɗ ca,
ata Marəyama ey Yusufu əy zenha aza a wata.
Cemey,
a mba tata Yesu ca,
mbəy mgba ka ŋ Urusaləyma a təwse.
Ata cen ey maman əy kasan səkwaw.
44 Əy cakza ca,
Yesu mbəy ara hejəye maa əy nda tewtew ege.
Əy la wan pal ata taf,
amba əy mpam ŋ taba van tata ege ey ŋgama tata ege.
45 Cemey,
əy kéndewzene askwaw.
Aya,
əy zenha ŋ mpamaw,
ŋ Urusaləyma zeney.
46 Ata wan mamahkaɗ anta,
əy ndewzene a mba wese a ujek kwakwas.
Kénjeye ŋ taba maghwal ma maŋkanaŋkan ege,
a ketehzetene zlam ey a keletene laɗaw ege.
47 Hejəye ma ketehzene zlam ege tewtew,
ŋkwaɓ kéŋgetene aza ata laɗaw anta ege ey lezen zlap anta ege a kəleŋ maa a kezenzetene.
48 Aya,
maa ata cen ey maman,
əy ndewzene aza ca,
əy kághar tata dakala a heɗe,
aya maman a zlepene,
a ŋgaya:
«Mba naka,
hwa leney ana ebe ŋghe ca,
mavəday vemey?
Hwa kasan vaw!
Nene gbak ŋcene a cehw,
nene káŋga ŋkwaɓ aza dakala mambaza ata lampamahwaw.»
49 A zenetene,
a ŋgaya:
«Hune mpemekey ca,
ŋ vay?
Hune kasan ca,
kulakw,
sa nanja ka a ujek vana səkwaw vaw?»
50 Cemey,
ma anta a ɗaw ŋ zlap vaŋgay ca,
əy kasan səkwaw.