Pawl a ghwalza ma ata ha anta a tama bay Agarəypa
26
Bay Agarəypa, a zlepene ŋ Pawl, a ŋgaya: «Sa kápalzahwaw taf aza, ghwalza ma ma ata ha ŋkwa.» Aya, Pawl a kafza ra anta, a ghwalza ma ma ata ha anta, a ŋgaya: 2 «Bay Agarəypa, sa kasasam dakala a tambaca a tama ŋkwa ŋ ghwalza ma ma ata ha naka, ata ma maa Yahudu ege əy ŋkəɗewekey tewtew, 3 mavəday hwa ca, hwa kasan kwakwas Yahudu ege kadak kadak leŋ laja səbakw tata ege. Mbahw, sa karakahwaw, tehzekey zlam kadak kadak.4 «Yahudu ege tewtew əy kasan lanja naka, mar aka maa sa mbaw ŋ taba hejəye naka ege leŋ ŋ Urusaləyma. 5 Əy kesenekey zlezle. Mada əy kaɗaw ca, əy kula ŋ ghwalza ma ma ata sa aza, sa kásəbar taf kwakwas ŋcene Farəysa ege, taf kwakwas ma pa ŋ ɓarɓar. 6 Əy ŋkəɗewekey na ŋgha ca, mavəday sa káca ŋkwaɓ naka aka ata ma maa Gazlavay a ŋkenetene ŋ jeje ŋcene ege ma zlezle. 7 Ŋseŋ ŋcene ege wam aha gbak tata, əy káca ŋkwaɓ tata ege aka ata ma maa Gazlavay a zlap ŋ veletene ŋ jeje ŋcene ma a nuna anta ege wese yam. Əy kahəmanza Gazlavay zaɗaw ey pes, kaw bəlew anta askwaw. Bay naka Agarəypa, Yahudu ege əy ŋkəɗewekey ca, mavəday sa yam, sa káca ŋkwaɓ naka aka ata ma anta. 8 Hune Yahudu ege, Gazlavay a gwarzamata hejəye aza ata lamac. Ca, hune lamza ma anta səkwaw ca, mavəday vemey?
9 «Sa, a ha naka, sa kédeŋza ŋ gayza zlam Yesu, ɗala Nasaratu a werwer ege vedəye vedəye. 10 Ara səkan ŋghe, ana maa sa la aza ŋ Urusaləyma. Madakal dakal mala kwakwas ege əy képelzekey taf ŋ nahzata hejəye ma lamza ma mala Gazlavay ege aza vəram ŋ daŋgay. Mada əy kéjetene guma ma ata jata aza ca, sa kalamza yam. 11 Sa kanda a ujek ma ata rak Gazlavay mala Yahudu ege tewtew ŋ setene gef ŋ hejəye ma lamza ma mala Gazlavay ege aza, ŋ letene kulakw əy maraɓa zlam Yesu. Cemey, unaf kéghweɗekey aza mambaza ata tata, sa kásəbarata hwas ŋ uzam ma ata mbəlam ege vedəye vedəye.»
Pawl a ghwalza maa a lamza ma mala Bay Madakal
12 «Ana ebe ŋghe, a pes wende aka, sa kanda ŋ uzam Damas. Ara madakal dakal mala kwakwas ege əy ma leɓzekey zlaɓa ɗerewel asa ra ma ata pelzekey taf ŋ mbalata hejəye ma lamza ma mala Gazlavay ege aza. 13 Bay naka Agarəypa, maa sa ata taf tete pes wereywerey ca, sa gəre leweɗ a weɗha aka mgba ata uzlaf day aha leweɗ mala pes, a weɗ ata sa zlaɓa hejəye ma kesəberekey ege. 14 A təwse, nene ndav tewtew ŋcene ata hayak. Kəɗe ca, sa zləme ula ɗala a kezlepekey a ma Əybəranəyŋkaw ege, a ŋgaya: “Sawl, Sawl hwa sekey gef ŋ vay? Hwa kaŋgwav ha ŋkwa ka bəse ana zla ma kasləkar zlambay mala mba njəwen.” 15 Sa ɗawza, sa ya: “Hwa vayay, Bay Madakal?” Aya Bay Madakal wese a zenekey, a ŋgaya: “Sa ca, sa Yesu maa hwa kesene gef wese. 16 Cemey, gwarzam, gar aka. Sa ghwalahwaw kusam ca, mavəday sa kámayahwaw aza ŋ la a mala zlan naka. Hwa neghwelzetene maa hwa gərekey a tambaca ŋgha ŋ hejəye leŋ səkan maa sa kanaghwalzahwaw ege zeney. 17 Sa nalaɓzahwaw kəɗe ara hejəye ŋkwa ege leŋ ara hejəye vedəye, sa nerehzahwaw aza ata səkan dadawar ege maa əy kanalahwaw. 18 Hwa nezlerzetene nje tata ege aza, hwa nadamata aza ŋ kuzle kəɗe ata la ma keweɗ. Hwa nerehzata aza asa ra Sayɗanu kəɗe ara Gazlavay, ndar əy lemzekey ŋ unaf tata ege, əy lem lapal gay tata ege aza leŋ lanja ŋ taba hejəye mala Gazlavay ege.”
Pawl a zlap ata zlan anta
19 «Ana ebe ŋghe, bay naka Agarəypa, mar aka a pes wese, səkan maa Gazlavay a ghwelekey ta ŋ mgba ata uzlaf wese ca, sa káyakza ka ŋ səbar askwaw. 20 Cemey, sa ghwelzetene zlap Gazlavay mpar ca, ŋ hejəye ma ŋ Damas ege ey hejəye ma ŋ Urusaləyma ege, a dəwze anta, ŋ hejəye ma ŋ hayak Yahudəya ege tewtew, a zeney ŋ hejəye ma tata Yahudu ege səkwaw. Sa zlepetene, sa ya: “Hune jene mbahw ŋ Gazlavay, hune bawza lanja ŋkune ege aza, hune la səkan ma taŋtaŋ ŋ ghwalza ca, hune kábaw ŋkune njenjəwen.” 21 Ana ebe ŋghe, Yahudu ege əy mbelekey a ujek kwakwas mavəday anta, əy ɗaw ŋ jekey aza. 22 Aya, ha hwas a tambaca, Gazlavay a kehəberekey, sa kaghwalza zlap anta a tama hejəye tewtew, kaw ŋ madakal dakal ege, kaw ŋ hejəye vedəye vedəye tewtew. Cemey, sa ghwal ca, səy zlap maa uzəye ma zlap ma a Gazlavay ege ey Musa əy zlap ata səkan ma kanalaha, maa əy ŋgaya: 23 “Almasəyhu a nasa gef, a nagwarzamha aza mpar ŋ taba hejəye ma mac tata ege, ŋ ghwalza leweɗ mala lereh a Gazlavay ŋ Yahudu ege leŋ ŋ hejəye ma tata Yahudu ege səkwaw,”» a ya.
Pawl a zlepene ŋ bay Agarəypa ŋ lamza ma mala Yesu
24 Aya, maa Pawl a kaghwalza ma ma ata ha anta ana ebe ŋghe ca, Festus a ja ula, a ŋgaya: «Pawl, hwa kawak! Lasan səkan ŋkwa ma dakala ŋghe, káŋta ŋkwaɓ aza.»
25 Cemey, Pawl a zenene, a ŋgaya: «Sa kawak askwaw, bay madakal naka Festus! Ma maa sa kazlap ŋghe ca, ara ma ma njenjəwen, ma a heɗe a heɗe. 26 Bay Agarəypa a ha anta, a kasan ma anta, mavəday anta sa kazlap a tama kaw a lalak askwaw. Sa kasan njəwen ca, səkan ŋghe anta ege tewtew, a kasanata. Cemey, səkan anta ege əy laha ca, maɓahaɓah səkwaw, cemey, ata nje hejəye. 27 Bay naka Agarəypa, hwa kalamza ma mala uzəye ma zlap ma a Gazlavay ege vaw? Ayaw, sa kasan njəwen, hwa kalamza ma tata.» 28 Aya, bay Agarəypa a zenene ŋ Pawl, a ŋgaya: «Hwa ulakza ca, hwa kula ŋ bewzekey aza ŋ ɗala Almasəyhu kəcaŋ ende ŋghe tew vaw?» 29 Pawl a zenene, a ŋgaya: «Kaw kəcaŋ ende ŋghe, kaw kəcaŋ ende ŋghe səkwaw, sa karak Gazlavay, ndar hwa zlaɓa hejəye ma ketehzekey zlam a tambaca ege tewtew, hune baw ŋkune ana sa. Cemey, əy ɗaw ŋ jawahune a sesele ana maa əy jewekey ŋghe səkwaw,» a ya.
30 Aya, bay Agarəypa ey mambal hayak leŋ Bernəyke ey hejəye ma ara tata ege tewtew əy gwarzam, 31 əy nda tata. Əy kazlap ara, əy ŋgaya: «Heje ŋghe anta ca, kaw kála gay ma ata ja aza, askwaw ca, ma ata nahza ŋ daŋgay ca, askwaw,» əy ya. 32 A dəwze anta ca, bay Agarəypa a zlepene ŋ Festus, a ŋgaya: «Keɗe heje ŋghe anta káɗaw taf ma ata jene guma ara bay madakal mala hayak Rawma askwaw ca, heje kula aza ŋ palza ka,» a ya.