Pawl mbəy a tama Festus, mambal hayak
25
A dəwze wan mahkaɗ maa Festus a hwasha ŋ hayak wese ca, a gwarzam ŋ Kaysarəya, a nda kəɗa mgba ŋ Urusaləyma. 2 A təwse, madakal dakal mala kwakwas ege ey madakal dakal ma a tama a Yahudu ege, əy ndaha, əy ŋkəɗaw Pawl ara Festus, əy jene mbahw, 3 mada kálamza aza ca, madaza Pawl ŋ Urusaləyma. Əy ɗawza ana ebe ŋghe ca, mavəday əy kájav ma tata aza, ŋ ja Pawl aza ata taf. 4 Cemey, Festus a zenetene, a ŋgaya: «Pawl ca, mbəy ŋ daŋgay ŋ Kaysarəya, sa yam, sa nezen naka kəcaŋ a təwse. 5 Madakal dakal ma ŋ taba ŋkune ege, əy mesəberekey ara ŋ Kaysarəya. Mada heje ŋghe anta kálaha gay aka ca, əy maŋkəɗawaw a təwse,» a ya.6 Festus a nja ŋ Urusaləyma wan jamahkaɗ, askwaw ca, wan wam, a dəwze anta a zen anta ŋ Kaysarəya. A mpat anta, a nja ata laja guma, a pal taf ŋ daza Pawl. 7 Aya, maa Pawl a hwasha ca, Yahudu ege ma ndaha aka ta ŋ Urusaləyma, əy dərezlew, əy zlene metəwle a laŋkəɗawaw ma dadawar ege vəram, cemey, əy kula ŋ ghwalza ma anta ege, a heɗe a heɗe səkwaw. 8 Pawl a ghwal ma ata ha anta, a ŋgaya: «Sa kála gay, kaw ata ma maŋkanaŋkan a Yahudu ege askwaw, kaw ata ujek kwakwas, kaw ata bay mala hayak Rawma, askwaw.»
9 Aya, Festus a ɗaw ŋ sasamzata Yahudu ege, a ɗawza Pawl, a ŋgaya: «Hwa lamza aza ŋ nda ŋ Urusaləyma ndar əy jahwaw guma ata laŋkəɗaw ŋghe anta ege a tama naka vaw?» a ya. 10 Cemey, Pawl a zenene, a ŋgaya: «Na ŋgha ca, sa kégereye ata laja guma mala bay madakal mala hayak Rawma, hune jekey guma naka anta ete ŋghe. Sa kéletene dadawar ŋ Yahudu ege askwaw, hwa a ha ŋkwa, hwa kasan kadak kadak. 11 Mada ara ghem naka, sa kála gay ma tete ma ata jekey aza ca, sa kalamza, əy mejekey. Cemey, mada ma ma njenjəwen ŋ laŋkəɗaw tata ŋghe anta ege askwaw ca, ɗala ma kula ŋ velzekey aza asa ra tata askwaw. Ana ebe ŋghe sa kaɗaw taf hwa jeɓza guma naka a tama bay madakal mala hayak Rawma.» 12 A dəwze maa Festus əy zenza ma anta a hejəye anta ege ca, a zlepene ŋ Pawl wese, a ŋgaya: «Hwa káɗaw taf ŋ nda ara bay madakal mala hayak Rawma, hwa nanda a tama anta,» a ya.
Pawl mbəy a tama bay Agarəypa ey Bernəyke
13 Aya, wan cekuɗe a dəwze anta, ata bay Agarəypa ey zlaŋgan haldəma, Bernəyke, əy ndaha ŋ Kaysarəya ŋ zlepzene ŋ Festus. 14 Əy kánja a təwse wan vəram. Aya, Festus a ghwelzene ma ma ata Pawl ŋ bay wese, a ŋgaya: «Feləykus káyakza heje wende aka ŋ daŋgay ete ŋghe. 15 Maa sa nda ŋ Urusaləyma ca, madakal dakal mala kwakwas ege ey madakal dakal ma a tama Yahudu ege əy ŋkəɗaw ara sa, əy ɗewzekey ŋ ghemew, ŋ ja aza. 16 Cemey, sa zenzetene sa ya, ma maŋkanaŋkan ma mala Rawma ege a kapal taf ŋ ghem ɗala ŋ ja aza ca, səy əy majav aza a hejəye ma ŋkəɗaw anta ege, ndar a zenza zlap ata ma maa əy ŋkəɗaw anta ege. 17 Aya, əy ndaha tewtew tata ete ŋghe ara sa, sa yam kaw sa kánja ka səpek askwaw. Aya, a mapat anta sa nja ata laja guma, sa pal taf ŋ daza heje anta. 18 Hejəye ma ŋkəɗaw ege əy ndaha, sa cakza ca, əy nazlap ma ma dadawar ege a heɗe, kəɗe ca, kaw askwaw. 19 Səy əy ja səbakw ca, ata kwakwas tata gagaha leŋ ata heje maa əy kayaɓa Yesu. Heje anta kámac anta, cemey, Pawl a ŋgaya: “Mbəy a nje,” a ya. 20 Kaw sa kasan ŋ zla ŋseŋ ma ma da ebe ŋghe səkwaw, aya, sa ɗawza Pawl anta, sa ya: “Hwa lamza aza ŋ nda ŋ Urusaləyma ndar əy jahwaw guma ata laŋkəɗaw ŋghe anta ege vaw?” 21 Cemey, Pawl a zlepekey ŋ jeɓza guma anta a tama Bay Madakal hayak Rawma. Ana ebe ŋghe, amba sa zlepetene əy mahəbar ka ŋ daŋgay kwagwa ha hwas ata pes maa sa kanalaɓza a tama Bay Rawma.» 22 Aya, Agarəypa a zlepene ŋ Festus a ŋgaya: «Sa yam, sa ɗaw ŋ zləme ma heje anta.» A təwse, Festus a zenene a ŋgaya: «Hwa nezləme a mapat,» a ya.
23 Aya, a mapat anta, Agarəypa ey Bernəyke əy ndaha ma bay bay, əy dam a ujek laja guma zlaɓa ma pa ŋ madakal dakal mala sawje ege leŋ madakal dakal ege ma ŋ uzam Kaysarəya. A dəwze anta, Festus a zlap ŋ daza Pawl, aya, əy daza. 24 A təwse ca, Festus a ŋgaya: «Bay Agarəypa ey hune hejəye tewtew ma ete ŋghe ege, heje maa hune kegəre ŋghe ca, ara heje maa Yahudu ege tewtew əy ɓecaha ara sa ŋ ŋkəɗawaw, ŋ Urusaləyma leŋ ete ŋghe zeney. Əy ja ula tewtew tata əy ŋgaya: “Heje anta ata yak aka a nje səkwaw,” əy ya. 25 A naka ca, sa kéndew ata gay anta ma tete ma ata ja aza, askwaw. Karba mbe a ha anta yam, káɗaw taf ŋ nda ara bay madakal hayak Rawma ŋ jene guma anta ca, sa kálamza aza ŋ leɓzene. 26 Cemey, sa kasan ma maa sa keneŋterene ŋ bay madakal ata guma ŋghe anta səkwaw. Mavəday anta, sa kádaza a tama ŋkune, day ca, a tama ŋkwa bay Agarəypa. A dəwze maa hwa kénjenza ma anta aza ca, sa nelem ma ma ata ŋterew. 27 Cemey, ŋ ledeŋ ŋkwaɓ naka ca, ŋ laɓza ɗala maa mbəy a daŋgay ata laja guma, cemey, sa kághwalza ma maa əy ŋkəɗawaw, a heɗe a heɗe askwaw ca, a nda kadak səkwaw.»