Yahudu ege əy ŋkəɗaw Pawl ara Feləykus, mambal hayak
24
Wan jaɓan a dəwze anta, Ananəyas, madakal mala kwakwas, a nda ŋ uzam Kaysarəya. A nda zlaɓa madakal dakal ege ma a tama leŋ Tertulus, ɗala ma kasan ma maŋkanaŋkan mala hayak Rawma. Aya, əy hwasha ara Feləykus, mambal hayak, əy ŋkəɗaw Pawl. 2 A təwse, əy yaɓa Pawl, aya, Tertulus a mar ŋ ŋkəɗawaw, a ŋgaya: «Madakal naka, nene kénjeye ŋ zəhay mavəday hwa, hwa kálamza hayak ŋtakwaw ka kadak kadak a kəleŋ ŋkwa, səkan ma ŋma ege əy kanda a heɗe a heɗe. 3 Madakal naka, Feləykus, kaw vepey, kaw a katay, nene kalahwaw wasay dakala. Nene kalamza səkan ege maa hwa kalata tewtew. 4 Sa kaɗaw ŋ ŋkəraŋzahwaw ka a zlap ege dakala səkwaw, cemey, sa kajahwaw mbahw, tehzeney zlam cekuɗe ende ŋghe, mavəday taŋtaŋ ey hahar ŋkwa. 5 Nene ndewzene ŋ heje ŋghe ca, ara ɗala dadawar mambaza, a kagwarzamza səbakw ŋ taba Yahudu ege tewtew ma ŋ manhayak. Ara madakal lajav hejəye ma kasəbar taf ma kadak səkwaw mala hejəye ma ŋ Nasaratu ege. 6 Mbe zeney, kála səkan dadawar ege ma ata keɓene ujek kwakwas ŋcene ka, amba, nene mbalaw. [Nene ɗaw ŋ jene guma ana maa ma maŋkanaŋkan ŋcene a kaɗawaw. 7 Cemey, Ləysəyas, madakal sawje ege, a ndaha, a pəraslza ara nene ata gwaya. 8 Aya, a zlepeney ŋ ndaha ŋ ŋkəɗawaw a tama ŋkwa.] Hwa kula ŋ ɗawza heje ŋghe anta aza a ha ŋkwa, mada hwa káɗawza kadak kadak ca, hwa nasanaw, laŋkəɗawaw ŋcene ca, mbəy a heɗe a heɗe.» 9 A təwse ca, Yahudu ege tewtew, əy ŋgaya: «Ma maa Tertulus a zlap ŋghe ca, njenjəwen,» əy ya.Pawl a ghwalza ma ata ha anta a tama Feləykus
10 Aya, Feləykus, mambal hayak wese, a lene ra ŋ Pawl ŋ zlap. A təwse, Pawl, a ŋgaya: «Sa kasanaw, a la va vəram, hwa ana maja guma ata hayak ŋtakwaw, mavəday anta, sa kasasam ŋ ghwalza ma ata ha naka a tama ŋkwa,» a ya. 11 Hwa kula ŋ njenza aza a ha ŋkwa, maa sa nda kəɗa mgba ŋ Urusaləyma ŋ həmanza Gazlavay ca, kádayza wan wam aha gbak səkwaw. 12 Kaw ɗala kéndewzekey, sa kaja səbakw a ɗala ujek kwakwas, askwaw, kaw sa kagwarzamzata hejəye ŋ ɓam pakam ujek ma ata rak Gazlavay ege leŋ ŋ uzam, askwaw. 13 Kaw ɗala ma kula ŋ taba tata ŋ ghwalzahwaw ma ege maa əy ŋkəɗewekey a heɗe ŋghe ege, əy a heɗe a heɗe ca, askwaw. 14 Ŋghe, səkan ma sa kaghwalza a tama ŋkwa: Sa ca, sa kelene zlan ŋ Gazlavay mala jeje ŋtakwaw ege ta ŋ lasəbar taf Bay Madakal. Ŋ tata ca, əy kedeŋza ca, ara taf ma kadak səkwaw. Cemey, sa ca, sa kálamza ma maŋkanaŋkan mala Musa aza ey ma meŋtereŋter ŋ ɗerewel mala uzəye ma zlap ma a Gazlavay ege aza tewtew. 15 Sa ca, sa káca aka ŋ ŋkwaɓ, Gazlavay a nagwarzamata hejəye ma taŋtaŋ ege ey hejəye dadawar ege aza ata lamac. Kaw hejəye ma ŋkəɗewekey ŋghe anta ege yam, ŋkwaɓ tata mbəy a heɗe. 16 Mavəday anta, sa yam, sa katal ŋ nja a unaf kadak kadak maa kaw gay a heɗe askwaw a tama Gazlavay ey a tama hejəye.
17 «A dəwze va vəram maa sa ŋ Urusaləyma askwaw, sa kézenha aza ŋ detene səlay ŋ hejəye naka ege ŋ cekzetene leŋ ŋ velene səkan ŋ Gazlavay. 18 Əy ndewzekey ŋ ujek kwakwas, sa káŋtakwza ŋ lene kwakwas ŋ Gazlavay, ndar sa nja ana ɗala makaɓakaɓ zeney səkwaw. Kaw hejəye a həzlar sa askwaw, kaw pakam a kaɓam askwaw. 19 Cemey, Yahudu ege vedəye ma ŋ hayak Asəya ana ma a təwse. Mada ma tata ata sa aka ca, ara tata ma kanandaha ŋ ŋkəɗewekey a tama ŋkwa keɗe. 20 Askwaw ca, hejəye ŋghe anta ege, əy maghwalahwaw gay maa sa laza a pes maa əy gerzekey a tama lajav tata ma dakal ma ata ja guma. 21 Əy ŋkəɗewekey a tama ŋkwa ca, mavəday ma teŋguleŋ maa sa gwarzam a tama tata, sa zlap a mazlazlay, sa ya: “Gazlavay a nagwarzamata hejəye ma mac tata ege aza ata lamac.”»
22 Feləykus ca, a kasan ma ata Taf Bay Madakal kadak kadak, a bəlewza guma anta aka, aya a zlepetene, a ŋgaya: «Mada Ləysəyas, madakal sawje ege kándaha aza ca, sa najahune guma ŋkune anta.» 23 A zlepene ŋ madakal ma ata ha sawje ege temere ŋ həbar Pawl ka, mepelzene zəhay aka cekuɗe, mepelzetene taf ŋ ŋgama anta ege əy mandaha ŋ cekzene.
Pawl mbəy ŋ daŋgay
24 A dəwze wan cekuɗe, Feləykus əy ndaha a wala anta, zlam anta Durusəyla, ara həla Yahudu ege. A laɓ ŋ yaɓa Pawl, aya, a teh zlap maa a kaghwalza ata taf ma ata lamza Yesu Almasəyhu. 25 Maa Pawl a kaghwal zlap ata lanja ma tuwah a tama Gazlavay, ata lahəbar ha ata dadawar ege leŋ ata guma maa Gazlavay a kanajaw, ata manhayak ca, Feləykus a lalak. Aya, a zlepene, a ŋgaya: «Ma a tambaca ca, ga kwagwa, hwa kula ŋ nda ŋkwa. Mada sa kélem taf a pes matakan ca, sa nayahwaw zeney.» 26 A ulakza ca, Pawl a nevelene səlay, mavəday anta a yaɓa gas vəram ŋ la labara. 27 A dəwze va gbak, mambal hayak matakan, zlam anta Pawrkəyus Festus a nja a uley Feləykus. Cemey, Feləykus ca, a ɗaw ŋ sasamzata Yahudu ege, mavəday anta, ana maa a yakza Pawl aka ŋ daŋgay.