Pawl mbəy ŋ hayak ma ŋ taba ŋtele maa əy kayaɓa Malta
28
A dəwze maa nene kéreh ŋcene ca, nene zləme, əy yaɓa hayak ma ŋ taba ŋtele anta ca, Malta. 2 Hejəye ma a təwse ege əy lemzeney tewtew ŋcene kadak kadak a sasam. Əy beseney kwahwaw ma dakal, mavəday van a kaɗa, tatəɗam a kamaɗ. 3 A təwse, Pawl a cama cemcelem, a tamza ata kwahwaw, kəɗe ca, ŋkursla mbəy cemcelem anta. Aya, maa zezekw wese, a zləme lunek kwahwaw ca, a damha, a ŋca Pawl ŋ ra, a təpasl aka ata ra anta. 4 Maa hejəye ma ŋ hayak ma ŋ taba ŋtele wese ege, əy gəre zezekw ma kézeŋeye ata ra Pawl ca, əy zlap ŋ taba tata, əy ŋgaya: «Njenjəwen, heje ŋghe ca, ara maja ɗala. Kaw kéreh aza ŋ ŋtele cemey, taŋtaŋ Gazlavay ŋtakwaw képelzene taf ŋ nja ka a nje, askwaw.» 5 Cemey, Pawl a kwec zezekw ma ata ra anta wese ŋ kwahwaw, kaw kézləme lambal ma laŋca zezekw wese cekuɗe ende ŋghe askwaw. 6 A təwse ca, hejəye anta ege əy cakza ca, ra Pawl a nahaf, askwaw ma, a namac a təwse a təwse. Cemey, a dəwze maa əy nja səpek, maa kaw əy kégəre səkan wende kéndewzene askwaw ca, əy zen ŋ deŋza zeney, əy ŋgaya: «Heje ŋghe ca, ara kule,» əy ya.7 Pubələyus, madakal ma tama Bay hayak ma ŋ taba ŋtele, a lemzeney kadak kadak a wata, nene la wan mahkaɗ a təwse. La anta mbermber a təwse. 8 Cen Pubələyus anta kéweneye, mbəy werwer askwaw, a kadawar. Kwahwaw ata kusam anta kwak kwak, dəmas a kakwaghaw, mbambaz mbambaz. Pawl a nda ŋ saraza, a ca ra anta a heɗe, a rak Gazlavay, a rehza aza ŋ dawar anta wese. 9 A dəwze anta, hejəye ma kadawar ege vedəye tewtew ma ŋ hayak ma ŋ taba ŋtele wese, əy ndaha ara Pawl anta, aya, a rehzata aza ŋ dawar tata ege yam. 10 A təwse ca, hejəye ma ŋ hayak anta ege, əy wenzeney ha dakala. Aya, maa nene kanda ŋcene ca, əy veleney səkan ege vedəye vedəye tewtew, ma ata cekzeney ata taf.
Pawl a hwas ŋ hayak Rawma
11 A dəwze ŋtəra mahkaɗ, nene nah ma a kwambawal ma dakal ma ndaha aka ŋ Aleksandərəya. Kwambawal ma dakal anta, əy yaɓa a «Kule musa ege», kánja ata ŋtəra tatəɗam ŋ Malta, hayak ma ŋ taba ŋtele. 12 Nene hwas ŋ uzam Səyrakus, nene nja wan mahkaɗ a təwse. 13 Nene gwarzam a təwse, nene nda mazlam mazlam ŋtele hwas ŋ Regəyaŋw. A mapat anta, tatəɗam a jaha aka ta uza asa ndaŋw, aya, nene hwas ŋ uzam Pawtəyawləy, ata wan ma gbak anta. 14 Ŋ uzam wese, nene kéndew ata hejəye ma lamza ma mala Yesu ege aza. Əy rekeney ŋ nja ara tata luma pal. Ana ebe ŋghe, ana maa nene nda ŋ hayak Rawma. 15 Hejəye ma lamza ma mala Yesu ege aza ma ŋ Rawma, maa əy zləme nene hwas a təwse ca, əy ndaha ŋ ŋgeleney ma a luma Appəyus leŋ ŋ Ujek ege Mahkaɗ ma ata lam mbəlakw ege. A təwse, maa Pawl a gəreta, a lene wasay ŋ Gazlavay, aya, a lem ɓarɓar. 16 Maa nene hwas ŋ Rawma wese ca, əy velene taf ŋ Pawl ŋ nja a ujek anta parpar, a sawje teŋguleŋ ŋ həbaraw.
Pawl a ghwal zlap a bay mala Gazlavay ŋ hayak Rawma
17 A dəwze wan mahkaɗ, Pawl a yahata madakal dakal ma a tama a Yahudu ege ma ŋ hayak Rawma a wata anta. Aya, maa əy kájamha aza, a zlepetene a ŋgaya: «Zlana ege, sa kasan ca, kaw sa kála səkan dadawar ata hejəye ŋtakwaw ege askwaw, kaw ata kwakwas jeje ŋtakwaw ege, askwaw. Cemey, əy kémbelekey aza ŋ Urusaləyma, əy kévelzekey aza asa ra Rawma ege. 18 A dəwze maa əy kénjenza ma anta aza ca, əy ɗaw ŋ pelzekey aka, mavəday, əy kéndew kaw ata gay ma ata jekey aza ca, askwaw. 19 Cemey, a Yahudu ege ca, əy kalamza ŋ pelzekey aka səkwaw. Amba kulakw, sa ɗaw taf ŋ ndaha ŋ gar a tama bay mala hayak Rawma, kaw sa kampam a ŋkəɗawata hejəye naka ege askwaw. 20 Ŋghe, sa yahune ca, heje ŋgelakwaw ma, ndar sa zlapahune. Cemey, əy jewekey a sesele ŋghe ca, mavəday heje ma a Əysərayəyla ege, əy kaca ŋkwaɓ tata aka a heɗe.»
21 A təwse, madakal dakal ma ata tama Yahudu ege əy zenene, əy ŋgaya: «Kaw nene kélem ɗerewel ara Yahudu ege ma ŋ hayak Yahudəya, ata hwa, askwaw. A zeney, kaw ɗala teŋguleŋ ŋ taba zlana ŋtakwaw ege ma ndaha aka a təwse, ma deney ma, askwaw ma, ma zlepeney ma ma dadawar ata hwa ca, askwaw. 22 Cemey, nene ɗaw ca, hwa a ha ŋkwa, hwa ghwelzeney səkan maa hwa kedeŋza, mavəday nene kasanaw, hejəye vəram əy kazlap ma ma dadawar kaw a katay ata hejəye ma ata lajav ŋkwa ege.»
23 Madakal dakal ma a tama a Yahudu ege ey ata Pawl, əy ca pes maa əy kanajav zeney. Aya, maa pes anta hwas ca, əy ndaha vəram day aha ma a mbarna a wata Pawl. A təwse, mar aka mala mapat, ha pes a ndav, Pawl a keghwelzetene zlap ata lazam bay a Gazlavay ata hejəye. A katal ŋ zlepetene ata Yesu ta ŋ ma maŋkanaŋkan mala Musa leŋ ŋ ɗerewel mala uzəye ma zlap ma a Gazlavay ege, ndar əy lamza. 24 Hejəye vedəye əy kálamza ma anta aza, cemey, vedəye ca, əy kalamza səkwaw. 25 Aya, maa əy kananda tata ca, əy kaja səbakw ŋ taba tata war. A təwse, Pawl a zlepetene ma teŋguleŋ, a ŋgaya: «Ma maa Zəwet ma keweɗ a zlepetene ŋ jeje ŋkune ege ta ŋ ma mala Esaya, mba ma zlap ma a Gazlavay wese ca, njenjəwen, 26 a ŋgaya:
“Nda ara hejəye ŋghe ege, zlepetene:
Hune keteh zlam kadak kadak, cemey, hune kezləme səkwaw.
Hune kasar la kadak kadak, cemey, hune kegəre la səkwaw.
27 Cemey, hejəye ŋghe anta ege, əy kalam ma səkwaw.
Əy kának zlam tata ege aka,
Əy kámpak nje tata ege aka,
Ndar əy ɗaw ŋ gəre la səkwaw,
Əy ɗaw ŋ zləme səkwaw, əy ɗaw ŋ lamza a unaf tata səkwaw,
Mavəday anta, əy kanabawza lanja tata ege aza a tama naka ndar sa rehzata aza ca, askwaw.”»
28 Pawl a zlepetene zeney, a ŋgaya: «Hune san ka, Gazlavay a laɓaza ma ma ata rehzaheje ca, ŋ hejəye vedəye. A tata ca, əy nalamza.» 29 [A dəwze zlap ŋghe ege ca, Yahudu ege əy nda tata, əy kaja səbakw ara a mazlazlay ŋ taba tata.] 30 Pawl a nja va gbak a ujek maa a kaŋtaraw, a kalamzata hejəye tewtew ma kandaha ŋ sarza ege. 31 A kaghwal lazam bay a Gazlavay ata hejəye, a kasasərakzata hejəye ata Bay Madakal Yesu Almasəyhu, ɗala maa Gazlavay a laɓaza ŋ rehzata hejəye, kaw a lalak askwaw, kaw ɗala a katak askwaw.