Pawl a nda ŋ mgba ŋ Urusaləyma
21
Aya, maa nene yakzata madakal dakal ma a tama hejəye ma ŋ Efesus ege wese aka ca, nene ŋta kwambawal ma dakal, nene nda delele a Kaws. A mapat anta, nene gwarzam, nene hwas ŋ Rawdaws, aya, a təwse, nene nda ŋ Patara. 2 A təwse ca, nene ndew ata kwambawal ma dakal matakan ma kanda kəɗa ŋ Fəynəykəya, nene dam ŋma, nene nda ŋcene. 3 Ma nene kegere Kəypərus mbəy mbermber ca, nene kégeɓza ka ata kəva ra gula ŋcene, nene nda kəɗa ŋ hayak Səyrəya. Aya, nene tadakwha aza ŋ uzam Təyrus, a təwse, əy tadakwata səkan ege ma ŋ kwambawal ma dakal wese aza. 4 A təwse, nene ndew ata hejəye ma lamza ma mala Yesu ege aza, nene nja ara tata luma teŋguleŋ. Zəwet Gazlavay a ŋcakwzata ŋ zlepene ŋ Pawl, a ɗaw ŋ nda ŋ mgba ŋ Urusaləyma anta səkwaw. 5 Cemey, a dəwze luma teŋguleŋ, nene ŋta taf ŋcene ma ŋcəne anta, nene nda ŋcene. Aya, tata tewtew tata, weləye zlaɓa uzəye tata ege əy ceney ma pa ata taf. Aya, nene gəleɓ tewtew, nene rak Gazlavay a ma zlazlar. 6 A dəwze maa nene kárak Gazlavay aza ca, nene ɓez kusam, aya, nene dam ŋcene ŋ kwambawal ma dakal. Tata yam, əy zen tata a wata.7 Aya, nene gwarzam a Təyrus ŋ nda uzam Pawtawlemayəys. A təwse ca, nene zlepzetene ara ŋ zlana ŋcene ege ma lamza ma mala Yesu ege aza, nene vah tewtew a pes wese. 8 Aya, a mapat anta ca, nene ŋta taf, nene nda hwas ŋ Kaysarəya. A təwse, nene dam a wata Fəyləyp, ɗala ma ghwal Ma Mewe ma Taŋtaŋ, nene nja a wata anta. Cemey, Fəyləyp anta ca, ara ɗala ma teŋguleŋ ŋ taba hejəye ma ŋsəleɗ ege maaª əy mayata ŋ Urusaləyma ŋ la zlan ma ata ɓez uda wese. 9 Heldəməye anta ege ŋfaɗ aka, əy káɗa wala kwagwa səkwaw, əy zlap ana mazlap ma Gazlavay ege. 10 Maa nene nja a təwse wan vəram wese ca, heje wende aka zlam anta Agabus, ara mba ma zlap ma a Gazlavay, a ndaha aka ŋ hayak Yahudəya. 11 Aya, a hwasha ara nene, a ŋta serek ma ata jaw gaŋ mala Pawl. A jawata ŋgas anta ege ey ra anta ege ka tewtew, aya, a ŋgaya: «Ŋghe maa Zəwet ma keweɗ a ghwalza, a ŋgaya: “Heje serek ŋghe ca, Yahudu ma ŋ Urusaləyma ege əy najaw ana ebe ŋghe. A dəwze anta, əy navalza asa ra hejəye ma tata Yahudu ege səkwaw,”» a ya. 12 Maa nene zləme ma ŋghe anta ege ca, nene zlaɓa hejəye ma lamza ma mala Yesu ege aza ma ŋ Kaysarəya, nene jene mbahw ŋ Pawl, a ɗaw ŋ nda ŋ Urusaləyma səkwaw. 13 Cemey, Pawl a zeneney, a ŋgaya: «Hune han ca, mavəday vemey? Hune zlekey unaf aka ŋ vay? Sa ca, kaw əy nejewekey, kaw əy nejekey aza ŋ Urusaləyma anta ca, sa kásla ha naka aza ŋ mac mavəday zlam Bay Madakal Yesu.» 14 Ana ebe ŋghe, nene kála kula ŋ bawza ledeŋ ŋkwaɓ anta səkwaw. A təwse, nene kézen ŋ zlepene zeney ca, askwaw, aya, nene zlap, neney: «Səkan maa Bay Madakal a kaɗaw ca, mala!»
15 A dəwze maa nene nja wan ege cekuɗe ende ŋghe ŋ Kaysarəya wese, maa nene kásla kusam aza ca, nene nda kəɗa mgba a Urusaləyma. 16 Hejəye ma lamza ma mala Yesu ege aza vedəye ma ŋ uzam Kaysarəya ege əy ceney ma. Əy jeɓzeney hwas a wata heje wende aka, zlam anta Manasaŋw. Ara ɗala ma lamza ma mala Yesu aza zlezle ma ndaha aka ŋ hayak Kəypərus. Nene wan a wata anta.
Pawl a nda ara Yakuba
17 Maa nene hwas ŋ Urusaləyma ca, hejəye ma lamza ma mala Yesu ege aza əy lemzeney a sasam. 18 Aya, a mapat anta ca, Pawl a cene ma, nene nda a wata Yakuba. Madakal dakal ma a tama hejəye ma lamza ma mala Yesu ege aza tewtew, əy kéɓeceye a təwse. 19 Pawl a zlepzetene, aya, a dəwze anta ca, a ŋgeɗetene səkan ege tewtew maa Gazlavay a lata ŋ taba hejəye ma tata Yahudu ege səkwaw ta ŋ lala zlan anta. 20 A dəwze maa əy zləme zlap ŋghe ege wese ca, əy həmanza Gazlavay. Aya, əy zlepene ŋ Pawl, əy ŋgaya: «Zlana, hwa kegəre Yahudu ege bəlakw vəram əy kálamza ma mala Yesu aza, tata tewtew tata, kaw əy kayakza ma maŋkanaŋkan mala Musa aka askwaw. 21 Əy kézləme hwa kezlepetene ŋ Yahudu ma ŋ hayak mbəlam ege, hwa ya, “Hune yakza ma maŋkanaŋkan mala Musa aka.” A zeney, hwa kezlepetene, əy ɗaw ŋ zletene mandulay aza ŋ uzəye tata ege səkwaw, əy ɗaw ŋ səbar kwakwas mala Yahudu ege zeney səkwaw. 22 Njenjəwen, əy nezləme hwa kándaha aza hwas ete ŋghe. Ca, heje nala na ŋgha ca, vaŋgay? 23 Cemey, la səkan maa nene kanazlapahwaw. Ŋghe, hejəye ŋfaɗ ete ŋghe aka, əy kémeɗene ma aza ŋ Gazlavay. 24 Ŋtata ara, hune lene kwakwas ŋ Gazlavay ndar hune baw ŋkune ŋ hejəye makaɓakaɓ ege zeney səkwaw. Hwa səkemetene səkan ege tewtew ma ata la kwakwas anta a səlay ŋkwa, aya, əy faɗ ha tata ege aza. Ana ebe ŋghe, hejəye tewtew əy nasan ca, ma ege maa əy zləme ata hwa ca, ara metəwle. Karba əy nasan ca, hwa a ha ŋkwa yam, hwa kasəbar ma maŋkanaŋkan ma mala Musa. 25 Cemey, ŋ hejəye ma tata Yahudu ege səkwaw ma lamza ma mala Yesu ege aza ca, nene kéŋteretene ma maa nene ŋkanaw ata lajav ŋtakwaw, neney: “Hune ɗaw ŋ zam zley ma ndaha aka ata kule səkwaw, hune ɗaw ŋ zam mbambaz səkwaw, hune ɗaw ŋ zam zley səkan maa əy kézlene ula askwaw səkwaw, hune ɗaw ŋ ŋta kusam a bəza səkwaw.”»
26 Aya, a mpat anta, Pawl a ŋtata hejəye ege wese ara, əy lene kwakwas ŋ Gazlavay, ndar əy baw tata ŋ hejəye makaɓakaɓ ege zeney səkwaw. Aya əy nda a ujek kwakwas, ŋ ghwal lamaɗ pes ma ata ban kusam tata ege aza leŋ ŋ lene kwakwas mala kaw vayay ŋ Gazlavay.
Əy mbal Pawl a ujek kwakwas
27 Maa wan ma ŋsəleɗ ma ata tuwaɗza kwakwas wese slaɓ ca, Yahudu ege vedəye ma ndaha aka ŋ hayak Asəya əy gəre Pawl mbəy a ujek kwakwas. A təwse ca, əy ŋcakwzata hejəye tewtew ŋ mbal Pawl. 28 Əy ja ula, əy ŋgaya: «Hejəye Əysərayəyla ege, hune cekzeney! Heje ma kasasərakzata hejəye tewtew kaw a katay a zlap ma kadak səkwaw ata hejəye Əysərayəyla ege, ata ma maŋkanaŋkan mala Musa leŋ ata ujek kwakwas ŋghe wese, mbəy cakwa. Na ŋgha, kádamzata hejəye ma tata Yahudu ege səkwaw aza a ujek kwakwas, əy kákaɓaheje ujek kwakwas ŋtakwaw ma keweɗ aza.» 29 Əy zlap ana ebe ŋghe ca, mavəday əy kégəreta ata Pawl ey Tawrawfəymus ɗala ma ŋ uzam Efesus ŋ uzam Urusaləyma. Əy cakza ca, Pawl kádamza aza a ujek kwakwas. 30 Hejəye əy zləme ma anta, a weɗ ŋ uzam tewtew, əy damaha ta ŋ kəva ege tewtew vəram, əy mbal Pawl, əy njewaza aza a ujek kwakwas. A təwse a təwse, əy mpakata ma ujek mala ujek kwakwas ege aka tewtew. 31 A təwse ca, hejəye tewtew əy ɗaw ŋ ja Pawl aza, aya madakal sawje mala Rawma ege, a zləme ca, ma ŋ Urusaləyma tewtew aka. 32 A təwse a təwse, a ɓecata sawje ege zlaɓa madakal dakal tata ege, əy nda kəcaŋ ara hejəye meɓeceɓec ege wese. Kəɗe maa əy gəre madakal sawje ege zlaɓa sawje ege ca, əy yakza Pawl aka, əy kezen ŋ gazl askwaw.
33 Aya, madakal sawje ege wese, a nda mbermber ara Pawl, a mbalaw, a zlepetene ŋ sawje ege əy majaw ka a sesele ege gbak. A dəwze anta, a ɗawzata hejəye, a ŋgaya: «Heje anta ca, ara vayay? A laha ca, vemey?» 34 Cemey, ŋ taba hejəye meɓeceɓec ege wese, vedəye əy ja ula ata səkan wende, vedəye yam ata səkan matakan. A təwse ca, madakal sawje ege wese kaw kámbalaɓa ma anta ma delele ara askwaw, mavəday pakam a kaɓam dəydey. Aya, a zlepetene ŋ sawje ege ŋ jeɓza Pawl ŋ galaŋ tata. 35 Cemey, əy hwas ata la ma ata təben a ujek ca, sawje ege əy tew Pawl metewetew mavəday hejəye əy kaɗa gham mambaza, 36 a təwse, hejəye tewtew əy kasəbaraw, əy kaja ula ara, əy ŋgaya: «Hune ja aza, hune ja aza,» əy ya.
Pawl a ghwalza ha anta a tama Yahudu ege
37 Maa əy slaɓ ŋ damza Pawl ŋ galaŋ tata wese ca, a zlepene ŋ madakal tata wese, a ŋgaya: «Sa kula ŋ zlapahwaw ma naka aza teŋguleŋ vaw?» Aya, madakal sawje ege wese a zenene, a ŋgaya: «Hwa kasan ŋ zlap a ma Yunanəyŋkaw ege vaw? 38 Hwa ca, hwa ɗala Məysəra ma ŋcakwzata hejəye ata wan ŋghe ege ŋ ɗa gham leŋ ma jeɓzata mesler hejəye bəlakw ŋfaɗ a damaw wese səkwaw aza vaw?» a ya. 39 A təwse ca, Pawl a zenene, a ŋgaya: «Sa ca, sa ɗala Yahudu, sa mbawha a uzam Tarsus ma ŋ Səyləykəya. Sa mba ma ŋ uzam madakal maa hejəye əy kasan tewtew. Mbahw, pelzekey taf ŋ zlepetene ŋ hejəye ŋghe ege.» 40 Aya, madakal sawje ege wese, a pelzene taf ŋ zlap. A təwse ca, Pawl a gar ata la ma ata təben wese, aya, a zlepetene a ra ŋ nja ka tete. Aya, hejəye wese ege tewtew əy nja ka tete, Pawl a zlepetene a ma Əybəranəyŋkaw ege, a ŋgaya: