Pawl a nda ŋ hayak Makedawnəya ey ŋ hayak Yunanəyŋkaw
20
A dəwze maa pakam ma ɓam wese kəɗaŋ ca, Pawl a ɓecata hejəye ma lamza ma mala Yesu ege aza, a veletene ɓarɓar. A təwse, a zlepzetene aza, aya tel a nda anta ŋ Makedawnəya. 2 Maa a kanda ta ŋ hayak wese ca, a keveletene ɓarɓar ŋ hejəye ma lamza ma mala Gazlavay ege aza ma a təwse ege ta ŋ laghwal zlap ege vedəye vedəye. A dəwze anta, a hwas ŋ Akaya. 3 Pawl a nja a təwse ŋtəra mahkaɗ. Ata vah maa a kaɗaw ŋ tev ŋ kwambawal ma dakal ŋ nda ŋ Səyrəya, a zləme ca, Yahudu ege əy kájav ma tata aza ŋ jaw aza. Aya a deŋza, a zen ŋ ŋta taf matakan ta ŋ Makedawnəya. 4 Hejəye ma cene ma ŋ Pawl ege ca, ara ata Sawpater mba Pəyrus ma ŋ uzam Bereya, Arəystarkus ey Sekundus, hejəye ma ŋ Tesalawnəykəy ege, Gayus ɗala ma ŋ uzam Derbe, ey Təymawte, leŋ Təykəykus ey Tawrawfəymus, hejəye ma ŋ hayak Asəya ege. 5 Hejəye ŋghe anta ege ca, əy nda mpar aha nene, əy kehəbereney ŋ Tawrawas. 6 A dəwze gwaygwaya mala peŋ maa səkan ma ata hafza ŋma askwaw, nene tev ŋ kwambawal ma dakal ŋ Fəyləypəy. Wan jaɓan a dəwze anta ca, nene hwas ŋ Tawrawas, nene ndewzetene, nene nja a təwse wan ŋsəleɗ.Pawl mbəy ŋ Tawrawas
7 A pes luma Buwal, nene kájav ŋ zam kusam leŋ ŋ sa mbambaz Yesu. Pawl a nanda anta a mapat. Mavəday, anta a keghwelzetene zlap ŋ hejəye, ha hwas ŋ taba zaɗaw. 8 A ujek ma mgba ata ha maa nene ɓec ŋma wese ca, patarla ege vəram əy keweɗ la. 9 Mba darlaŋw wende aka, zlam anta Ewtəykus, kénjeye a ma fenetərə. Pawl a kavas ŋ ghwal zlap war, ha Ewtəykus wese mbəy ŋtəɓal, aya, a wan anta kəlaŋ kəlaŋ. A təwse, a ndavha aka mgba a ujek ma ata ujek gbak. Aya, əy gwarzamza, kəɗe ca, kámac anta. 10 Cemey, Pawl a tadakwha, a ŋteɓ a heɗe, humbaɗ a ŋta asa ra anta, aya, a ŋgaya: «Hune han səkwaw, mbəy a nje!» 11 Aya, Pawl a zen anta mgba a ujek ma ata uzlaf wese, əy zam kusam leŋ əy sa mbambaz Yesu tata tewtew. A vas ŋ ghwal zlap zeney war ha day mapat, aya, tel a nda anta. 12 A dəwze anta, əy daza mba darlaŋw wese, mbəy werwer, a təwse, kédeɓetene unaf tata ege aka mambaza.
Pawl a gwarzam ŋ Tawrawas, a nda ŋ uzam Məyletus
13 Nene dam ŋ kwambawal ma dakal, nene nda mpar aha Pawl ŋ Asaws. A təwse ca, nene naŋta ara. Mavəday, kédeŋza aza ŋ nda hwas a təwse a ŋgas. 14 Aya, maa a ndewzeney aza ŋ Asaws ca, nene tevza ŋ kwambawal ma dakal maa nene ŋma, aya, nene nda tewtew ŋ Məytəylene. 15 Nene gwarzam a təwse a kwambawal ma dakal, nene hwas ŋ Kəyaws a mpat anta. Vagumtaɗ anta, nene hwas ŋ Samaws, aya, vagumtaɗ wende ca, nene hwas ŋ Məyletus. 16 A təwse, Pawl kúlakza ŋ deŋ ŋ uzam Efesus askwaw, mavəday a kaɗaw ŋ nja aka səpek ŋ hayak Asəya səkwaw. A kavas kusam ŋ hwas ŋ uzam Urusaləyma, a pes gwaygwaya Pantekwasta keɗe.
Pawl ey madakal dakal ma a tama ma ŋ uzam Efesus ege
17 Maa Pawl mbəy ŋ Məyletus ca, a laɓ ŋ yaha ata madakal dakal ege ma a tama lajav hejəye ma lamza ma mala Yesu ege aza ma ŋ uzam Efesus. 18 Aya, maa əy hwasaha ara mbe ca, a zlepetene, a ŋgaya: «Hune kasan lanja naka ata vah maa sa ŋ taba ŋkune, mar aka a pes maa sa ndaha ŋ hayak Asəya. 19 Sa kélene zlan ŋ Bay Madakal a lawan ha, a lahan ŋ nje, a zeney, sa kása gef dakala mavəday maa Yahudu ege əy mpam taf ŋ jekey aza. 20 Hune kasan ca, sa káɓah səkan ma ata cakzahune, a tama ŋkune askwaw. Sa kághwalzahune zlap a Gazlavay, sa kásasərakzahune a tama hejəye tewtew leŋ a wata ŋkune ege. 21 Sa kézlepetene ŋ Yahudu ege leŋ ŋ hejəye ma tata Yahudu ege səkwaw, əy mabawza lanja tata ege aza a tama Gazlavay leŋ ŋ lamza Bay Madakal ŋtakwaw Yesu. 22 Na ŋgha ca, sa nda kəɗa ŋ Urusaləyma mavəday ara Zəwet ma keŋcekwzekey ŋ nda, sa kasan səkan ma kenendewzekey a təwse səkwaw. 23 Səkan teŋguleŋ maa sa kasan ca, Zəwet ma keweɗ a keghwelzekey ŋ uzam kaw vekey maa sa kanda ca, hejəye əy nesekey gef, əy nenehzekey ŋ daŋgay a təwse. 24 A naka ca, sa kasarza lanja naka ana səkan bəse. Səkan maa sa kaɗaw ca, sa hwasza lehey naka aza tuwah leŋ sa la zlan maa Bay Madakal Yesu a velekey ŋ law, kadak kadak. Zlan anta ca, ara laghwal Ma Mewe ma Taŋtaŋ a zəhay Gazlavay.
25 «Sa kánjaha ŋ taba ŋkune tewtew, sa kághwalzahune zlap bay mala Gazlavay. Cemey, sa kasan na ŋgha ca, hune kenezen ŋ gərekey zeney ca, askwaw. 26 Mavəday anta sa kazlapahune ŋgara ŋgara a tambaca, mada ɗala ŋkune teŋguleŋ kéfətek anta ca, ara ma naka zeney səkwaw. 27 Mavəday sa kághwalzahune aza ana maa Gazlavay a kaɗawaw tewtew, kaw sa káɓahza a tama ŋkune askwaw. 28 Hune sla aka ata ha ŋkune ege kadak kadak, leŋ ata hejəye maa Zəwet ma keweɗ a cahune aka ŋ ma həbar ege. Hune həbar lajav hejəye ma lamza ma mala Gazlavay ege aza aka. Ara hejəye maa Gazlavay a valza mbambaz anta ŋ rehzata aza ege. 29 Sa kasanaw, a dəwze maa sa ɗak ca, hejəye ma kadak səkwaw ege əy nandaha ŋ taba ŋkune, ana menjernjer ma kadak səkwaw ege ŋ weɗzata ŋtəməye. 30 Kaw ŋ taba ŋkune yam, hejəye əy nagwarzam, əy nazlap ma metəwle ege ndar hejəye ma lamza ma mala Gazlavay ege aza əy səbarata. 31 Hune ɗaw ŋ wan səkwaw. Hune senzene, va mahkaɗ, pes ey zaɗaw sa kaŋgazahune teŋguleŋ teŋguleŋ, ha zlaɓa lahan.
32 «Na ŋgha ca, sa kegeɓzahune aka asa ra Gazlavay leŋ ŋ zlap anta ma kaghwalza laɗaw anta. Gazlavay ca, mbəy kula ŋ valahune ɓarɓar ŋ lalam ŋkune, mbəy kula ŋ valahune səkan ma tuwah tuwah ege maa a ɓehzetene aka ŋ hejəye anta ege. 33 Cemey, sa kála nje kaw ata səlay, kaw ata bənaɓ, kaw ata rəgwac ara ɗala askwaw. 34 Hune a ha ŋkune, hune kasan sa ca, sa kála zlan a ra naka ege ŋ lem səkan tete ŋ sa leŋ ŋ hejəye ma kecekey ma ege. 35 Ŋ zlan maa sa lata ege tewtew ca, sa kághwalzahune aza, səy hune la zlan, ndar hune cekzetene ŋ hejəye metetekw ege. Hune senzene ata Bay Madakal Yesu maa a zlap a ma anta, a ŋgaya: “Sasam mala ɗala ma kaval səkan pa ma day aha mala ɗala maa əy kevelene səkan.”»
36 A dəwze maa Pawl káŋtakwza zlap aza ana ebe ŋghe ca, a gəleɓ, a rak Gazlavay zlaɓa hejəye tewtew. 37 Aya, əy han tewtew tata, əy səkaw Pawl. 38 Əy ŋga ŋkwaɓ dakala ana ebe ŋghe ca, mavəday maa Pawl a zlepetene, a ŋgaya: «Hune kenezen ŋ gərekey zeney ca, askwaw» wese. A dəwze anta, əy cene ma hwas ara kwambawal ma dakal.