Pawl a ghwal zlap Gazlavay ŋ uzam Efesus
19
Maa Apawlaws mbəy ŋ uzam Kawrəyntu ca, Pawl a nda ta ŋ taf ma ŋ barla ege, a hwas ŋ uzam Efesus. A ndewzetene ŋ madarlaŋw mala Yesu ege cekuɗe a təwse. 2 Aya, a ɗawzata, a ŋgaya: «Hune kélem Zəwet ma keweɗ aza a vah maa hune lamza ma mala Gazlavay vaw?» A təwse, əy zenene, əy ŋgaya: «Kaw nene kézləme əy kazlap ata Zəwet ma keweɗ aka ca, askwaw!» əy ya. 3 Pawl a ɗawzata, a ŋgaya: «Hune lem laban a yam baptəysma ca, vekey?» Əy zenene, əy ŋgaya: «Nene lem laban a yam baptəysma ca, mala Yuhana.» 4 Aya, Pawl a zlepetene zeney, a ŋgaya: «Yuhana a banata a yam baptəysma ca, hejəye ma kaɗaw ŋ bawza lanja tata ege aza. A zlepetene ŋ hejəye Əysərayəyla ege ŋ lamza ɗala ma kanandaha a dəwze anta, ana zlap ca, ara Yesu.» 5 Aya, a dəwze maa əy zləme ma ŋghe ege wese aza ca, əy lem laban a yam baptəysma a zlam Bay Madakal Yesu. 6 Pawl a cetene ra ata ha tata, aya, Zəwet ma keweɗ a tadakwha ata tata. A təwse, əy zlap a ma ege maa əy kasan səkwaw, əy zlap ma maa Gazlavay a zlepetene. 7 Hejəye anta ege tewtew ca, əy la tata wam aha gbak ege.Pawl a ghwal zlap Gazlavay ŋ Efesus
8 Ŋtəra mahkaɗ, Pawl a kanda a ujek ma ata rak Gazlavay mala Yahudu ege. A təwse ca, a kezlepetene ŋ hejəye kaw a lalak askwaw. Əy kezen zlap a Yahudu ege, a keghwelzetene Bay mala Gazlavay, a katal ŋ zlepetene ndar əy zləme. 9 Cemey, hejəye vedəye ca, unaf tata ege ɓarɓar əy kalamza ma anta səkwaw, əy zlap ma ma kadak səkwaw ata Taf Bay Madakal a tama hejəye tewtew. Aya, Pawl a geɓzata ka, a ŋta hejəye ma lamza ma mala Yesu ege aza, əy nda tata. Ata pes ata pes, a keghwelzetene zlap Gazlavay ŋ hejəye ŋ lekwal mala heje wende aka, zlam anta Təyranus. 10 A la ana ebe ŋghe va gbak. Ana ebe ŋghe, hejəye ma ŋ hayak Asəya ege, Yahudu ege ey hejəye ma tata Yahudu ege səkwaw, əy lem ŋ zləme zlap mala Bay Madakal.
Ma ata uzəye Səykewas ege
11 Gazlavay a la zaɓəla ma keŋgetene ŋkwaɓ ege ŋ hejəye ta ŋ ra Pawl. 12 Aya, əy da rəgwac ey maslaga ma ata tukwaɗ nje ma ges ata kusam Pawl ege, əy cetene ata hejəye ma kadawar ege. A təwse ca, əy kéreh tata ŋ dawar tata ege, leŋ zəwet malula ege əy damha aza ŋ tata.
13 Cemey, Yahudu ege vedəye aka, əy katawar ŋ gam zəwet malula ege ma ŋ hejəye. Əy mar ŋ gam zəwet malula ege a zlam Bay Madakal Yesu. Əy zlepetene ŋ zəwet malula ege, əy ŋgaya: «A zlam Yesu maa Pawl a kaghwal zlap a heɗe, sa kazlapahune, hune damaha aza!» əy ya. 14 Heje wende aka, zlam anta Səykewas, ara madakal mala kwakwas mala Yahudu ege. Uzəye anta ege ŋsəleɗ aka, tata ma kala andəwse. 15 Cemey, zəwet malula a zenetene, a ŋgaya: «Yesu ca, sa kasanaw, Pawl yam sa kasanaw. Ca, hune eze, hune vayay?» 16 Aya, heje maa zəwet malula a mbalza wese, a ja kusam a tata. Ɓarɓar anta day aha tata tewtew. Aya, a gazlata, əy dam aza a wata anta, əy hey tata a kusam a bəza, mbəlah ata tata.
17 Hejəye ma a uzam Efesus ege tewtew, Yahudu ege ey hejəye ma tata Yahudu ege səkwaw, maa əy zləme ma anta ma laha ŋgha ca, əy tewtew tata əy kálalak tata dakala. Aya, əy həmanza zlam Bay Madakal Yesu dakala.
18 A təwse ca, hejəye vəram ma lamza ma mala Gazlavay ege aza, əy kandaha ŋ ja mbahw a mazlazlay a tama hejəye tewtew ata səkan ma kadak səkwaw ege maa əy lata. 19 Aya, ŋ taba hejəye ma la səkan zaɓəla ege, hejəye vəram əy zlaɗata ɗerewel tata ege, əy ŋkəɗawata aza ata nje hejəye tewtew. Mada əy jav lasəkam ɗerewel anta ege ca, a la anta səlay bəlakw rajaɓan. 20 Ana ebe ŋghe, zlap Gazlavay a kanda a ɓarɓar, a kagal a tama a tama a ɓardakw Bay Madakal.
Ma kágwarzam ŋ uzam Efesus
21 A dəwze maa səkan ŋghe anta ege əy kálatata ca, Pawl a deŋza ŋ nda a Urusaləyma ta ŋ Makedawnəya ey Akaya. A ŋgaya: «Mada sa vaŋ a təwse ca, səy sa manda aza ŋ hayak Rawma yam.» 22 Aya, a laɓazata hejəye gbak maa əy kala zlan tewtew a mbe ege ŋ hayak Makedawnəya. Hejəye anta ege, ara ata Təymawte ey Erastus. Cemey, anta ca, kánja wan ege cekuɗe zeney ŋ hayak Asəya.
23 Ata vah anta wese ca, ma kála dakala ŋ uzam Efesus ata lasəbar Taf Bay Madakal. 24 Heje wende aka, ma kaɓasl səkan ege ma kacaf kusam, zlam anta Demetəyrəyus. A kaɓasl ujek kwakwas mala Arteməys ege a kule wala a ɓarzlam səlay. Zlan anta, a kedetene səlay dakala ŋ ata Demetəyrəyus ey mala zlan anta ege. 25 A pes wende aka, Demetəyrəyus wese, a javata hejəye anta ege zlaɓa hejəye tewtew ma kala zlan ege ana mbe. A zlepetene, a ŋgaya: «Hejəye naka ege, hune kasan ca, heje nja ca, mavəday zlan ŋtakwaw ŋgha. 26 Cemey, hune kegəre, hune kezləme a ha ŋkune səkan maa Pawl a kalaw. A ŋgaya: “Kule ege maa heje kalamata a ra ŋtakwaw ege ca, ara gazlavay ege səkwaw.” Pawl anta káca zlap anta ŋghe aka ŋ ha hejəye tewtew. Zlap anta kébewzetene ŋkwaɓ aza. Ŋ Efesus ete ŋghe gagaha səkwaw, cemey, ŋ hayak Asəya tewtew. 27 Mada, səkan anta a kasəbar ŋ la ende ŋghe ca, hejəye əy naraɓa zlan ŋtakwaw. Əy nara ca, zlan ŋtakwaw gagaha səkwaw, cemey, ghav mala ujek kwakwas kule wala Arteməys madakal a naŋta anta. Karba, ara kule maa hejəye tewtew ma ŋ hayak Asəya ey ma ŋ manhayak tewtew əy kahəmanza,» a ya.
28 Maa hejəye əy zləme zlap mala Demetəyrəyus wese ca, əy ghwaɗ tata dakala, aya, əy ja ula a mazlazlay, əy ŋgaya: «Arteməys ca, ara kule wala Efesus ege madakal!» əy ya. 29 Ma ŋgha anta a ŋtez ŋ uzam tewtew, a gwarzamaza unaf a hejəye tewtew, aya, əy nda kəcaŋ ata leɓec ŋ hubakw. Əy mbalata ata Gayus ey Arəystarkus ara, ara hejəye ma gbak ma ŋ hayak Makedawnəya ma cene ma ŋ Pawl ata leŋcəwer anta wese. 30 Pawl a ɗaw ŋ nda ara hejəye wese ege yam, cemey, hejəye ma lamza ma mala Yesu ege aza, əy képelzene ma askwaw. 31 Kaw hejəye madakal dakal ege vedəye ma ŋ hayak Asəya, maa tata ŋgama anta ege yam, əy laɓzata hejəye ara mbe ŋ ŋgazaw, ndar a ɗaw ŋ nda ŋ hubakw səkwaw. 32 A təwse ca, hejəye tewtew əy kakəvaɗ ma anta. Hejəye vedəye, əy ja ula ata səkan wende, hejəye vedəye yam əy ja ula ata səkan matakan. Cemey, radakal hejəye ca, əy kasan səkan ma ɓecata səkwaw. 33 Yahudu ege əy ŋcakwza heje wende aka, zlam anta Aleksandəyre, ŋ gar a tama. Hejəye vedəye ŋ taba tata əy ghwelzene ma anta. Aya, Aleksandəyre a kaf ra anta ŋ zlepetene ŋ hejəye ma ɓecha ege wese. 34 Cemey, maa əy sanza ara ɗala Yahudu ca, a la anta ler ege gbak, əy ja ula a mazlazlay tewtew tata a ula ma teŋguleŋ, əy ŋgaya: «Arteməys ca, ara kule wala mala Efesus ege madakal!» əy ya.
35 Aya, meŋter mala uzam Efesus a zlepetene əy manja ka tete, a ŋgaya: «Hune Efesus ege! Kaw vayay a kasanaw, uzam Efesus ca, ara uzam ma kahəbar ujek kule wala mala Arteməys madakal zlaɓa ŋkəɗaŋ anta ma naha aka mgba ata uzlaf. 36 Kaw ɗala kula ŋ zlap ma parpar a heɗe askwaw. Aya, hune nja ka tete, hune deŋ ŋkwaɓ aza kadak kadak ata səkan maa hune kaɗaw ŋ law. 37 Hejəye maa hune data ete ŋghe ege ca, kaw əy kéŋhel ujek kwakwas ŋtakwaw askwaw, a zeney, kaw əy káraɓa kule wala ŋtakwaw askwaw. 38 Mada Demetəyrəyus ey hejəye anta ege, əy kaɗaw ŋkəɗaw ɗala ca, pes ma ata ja guma ege aka, maja guma ege yam aka, zukwan əy manda ŋ ŋkəɗaw kusam a təwse. 39 Mada ma ŋkune matakan ma ata ɗawza aka zeney ca, hune jeɓza ata lajav madakal, ma sarza ma anta. 40 Cemey, əy naca heje aza ŋ hejəye ma kagwarzamata hejəye ŋ la ma ata lajav ŋtakwaw ma a tambaca ŋgha. Heje kanala aza kula ŋ zlap ma ma ata rehaheje aza ata leɓec ŋtakwaw ŋgha anta səkwaw,» a ya. A dəwze maa káŋtakwza zlap aza ca, a zlepetene ŋ hejəye əy meweɗ.