Lamar lajav hejəye ma lamza ma mala Yesu aza ŋ uzam Kawrəyntu
18
A dəwze anta Pawl a gwarzam ŋ uzam Atena, a nda ŋ Kawrəyntu. 2 A təwse, a ndewzene ŋ ɗala Yahudu wende aka, zlam anta Akəylas, a mbawha ŋ hayak Pawŋtus. A ndaha aka təlam ŋ hayak Əytaləya ey wala anta Pəyrəyskəyla, mavəday Kalawdəyus, bay ma dakal hayak kágamata Yahudu ege ma ŋ hayak Rawma aza tewtew. Pawl a nda ara ata Akəylas ey Pəyrəyskəyla anta. 3 Zlan tata ma teŋguleŋ, zlan tata ca, ma ata ba guɗakwª ege, mavəday anta Pawl a nja ara ata, əy la zlan ŋ la anta. 4 Ata pes ata pes, a pes ma ata zazak mala Yahudu ege ca, Pawl a kanda a ujek ma ata rak Gazlavay mala Yahudu ege ma a təwse, a keghwelzetene zlap ata Gazlavay ŋ hejəye Yahudu ege leŋ Yunanəyŋkaw ege, ndar əy lamza ma anta.5 Maa ata Səylas ey Təymawte əy ndaha aka ŋ hayak Makedawnəya ca, Pawl a valza ha anta ŋ ghwal zlap Gazlavay. A zlepetene ŋ Yahudu ege a ŋgaya: «Yesu ca, ara Almasəyhu,» a ya. 6 Cemey, Yahudu ege əy kaɗaw ma anta səkwaw, əy raɓa. Aya, Pawl a ŋtewetene berdeberde ma ata rəgwac anta ka, a zlepetene, a ŋgaya: «Mbambaz ŋkune mezen ata ha ŋkune! Ma naka səkwaw, na ŋgha ca, sa nda naka kəɗa ara hejəye maa tata Yahudu ege səkwaw,» a ya. 7 Aya, a gwarzam anta a təwse, a nda a wata heje wende aka, zlam anta Təytus Yustus, ara ɗala ma kahəmanza Gazlavay. Wata anta mbəy a həzlar ujek ma ata rak Gazlavay mala Yahudu ege. 8 A təwse ca, Kəyrəyspus, madakal ujek ma ata rak Gazlavay mala Yahudu ege, a lamza ma Bay Madakal zlaɓa hejəye ma a wata anta ege tewtew. Hejəye Kawrəyntu ege vəram yam ma ketehzene zlam ŋ Pawl, əy lamza zlap Gazlavay, əy lem laban aza a yam baptəysma.
9 A zaɗaw wende aka, Bay Madakal a ghwelene ha anta ŋ Pawl, a zlepene, a ŋgaya: «Hwa lalak səkwaw, cemey, hwa ɗaw ŋ nja ka tete səkwaw, zlepetene war. 10 Sa kénjeye a hwa. Kaw ɗala ma kanala aza kula ŋ mbalahwaw, ŋ sahwaw gef ca, askwaw, mavəday hejəye naka ege vəram aka ŋ uzam ŋgha anta.» 11 Aya, Pawl a nja ŋ uzam Kawrəyntu va pal a ŋtəra ŋkwah, a kesesərekzetene zlap Gazlavay ŋ hejəye.
Pawl mbəy a tama mambal hayak maa əy kayaɓa Galəyaŋw
12 Ata vah maa Galəyaŋw ara mambal hayak Akaya ca, Yahudu ege tewtew əy jav ma tata ata Pawl, əy mbalaw, əy jeɓza ata laja guma. 13 Aya, əy ŋgaya: «Heje ŋghe, a kaŋcakwzata hejəye ŋ səbar Gazlavay ta ŋ taf matakan ana ma maŋkanaŋkan a kazlap səkwaw,» əy ya. 14 Kəɗe Pawl a ɗaw ŋ zlap, cemey, Galəyaŋw a zlepetene ŋ Yahudu ege, a ŋgaya: «Hune Yahudu ege, mada heje ŋghe anta kála gay ma dakal aka, askwaw ca, kála səkan ma dadawar ma dakal wende aka ca, sa netehzahune zlam, 15 cemey, hune ja səbakw ca, ata lasasərak kwakwas ege, ata zlam leŋ ata ma maŋkanaŋkan ŋkune ege. Hune a ha ŋkune, hune ja guma anta. Sa kalamza ŋ ja guma ata ŋseŋ ma ma da ebe ŋghe ege səkwaw!» 16 A təwse, a gamata aza ata laja guma. 17 Aya, hejəye tewtew əy mbal Sawstenes, madakal ujek ma ata rak Gazlavay mala Yahudu ege, əy gazl ka a tama hejəye ata laja guma. Cemey, kaw Galəyaŋw kececefza ma anta askwaw.
Pawl a zen a uzam Antakəya ŋ hayak Səyrəya
18 Pawl a nja walaŋ cekuɗe zeney ŋ Kawrəyntu. A dəwze anta, a geɓzata hejəye ma lamza ma mala ma mala Yesu ege ka, a dam ŋ kwambawal ma dakal əy ata Pəyrəyskəyla ey Akəylas, əy nda ŋ Səyrəya. Mar Pawl a nadam ŋ kwambawal wese ca, káfaɗ ha anta aza ŋ uzam Keŋkereya, mavəday kévelzene ma anta aza ŋ Gazlavay. 19 Aya, əy hwas ŋ uzam Efesus, a təwse ca, Pawl a geɓzata ata Pəyrəyskəyla ey Akəylas aka. Tel a nda a ujek ma ata rak Gazlavay mala Yahudu ege, ŋ zenza zlap a Yahudu ege. 20 A təwse, əy ɗawza manja ka walaŋ cekuɗe ara tata, cemey, kálamza səkwaw. 21 Cemey, maa a kaɗaw ŋ nda anta ca, a zlepetene a ŋgaya: «Sa nezenha ara hune, mada Gazlavay kálamza aza.» Aya, a gwarzam a uzam Efesus, a dam ŋ kwambawal ma dakal, a nah ma. 22 Aya, maa a hwas ŋ Kaysarəya ca, a tadakwha aza, a tev ŋ Urusaləyma ŋ zlepezetene ŋ hejəye ma ata lajav hejəye ma lamza ma mala Yesu ege aza a təwse. A dəwze anta, a tadakwha aza ŋ uzam Antakəya ŋ hayak Səyrəya. 23 A dəwze maa a nja walaŋ cekuɗe a təwse, a nah ma, a zlaŋ ta ŋ hayak Galatəya ey Fəyrəygəya, a veletene ɓarɓar ŋ hejəye ma lamza ma mala Yesu ege aza tewtew.
Apawlaws a ghwal zlap Gazlavay ŋ Efesus ey ŋ Kawrəyntu
24 Yahudu wende aka, zlam anta Apawlaws, a mbawaha a Aleksandərəya, a nda ŋ uzam Efesus. Ara ɗala ma kasan zlap tuwah, a zeney, a kasan ɗerewel ma keweɗ kadak kadak. 25 Kásasərak aza taf mala Bay Madakal aza a heɗe a heɗe. Kávalza ha anta aza tewtew, a kaghwalza ma mala Yesu a heɗe a heɗe. Cemey, a sanɓa ca, laban a yam baptəysma mala Yuhana gagaha. 26 A mar ŋ ghwal zlap a ujek ma ata rak Gazlavay mala Yahudu ege, kaw lalak ŋ nje askwaw. Aya, maa ata Pəyrəyskəyla ey Akəylas əy zləme zlap anta wese ca, əy ŋta aza ara tata, əy ghwelzene taf Gazlavay a heɗe a heɗe. 27 Apawlaws a ɗaw ŋ nda ŋ hayak Akaya. Hejəye ma lamza ma mala Yesu ege aza ma ŋ Efesus, əy velene ɓarɓar ŋ nda leŋ əy ŋteretene ɗerewel ŋ madarlaŋw ma a təwse ege, ndar əy lamza kadak kadak. Maa mbəy hwas a təwse ca, a zəhay maa Gazlavay a velene, kécekzetene dakala ŋ hejəye ma lamza ma mala Gazlavay ege aza. 28 A təwse, Apawlaws, a ghwelzetene zlap a ɓarɓar ŋ Yahudu ege ata nje hejəye tewtew, a ghwelzetene ta ŋ ɗerewel ma keweɗ, njenjəwen Yesu ca, ara Almasəyhu, kaw əy kula ŋ jene səbakw səkwaw.