Ata Pawl ey Səylas əy ŋ uzam Tesalawnəykəy
17
Ata Pawl ey Səylas, əy nda ta ŋ Amfəypawləys leŋ Apawlawnəya, əy hwas ŋ Tesalawnəykəy ata la maa ujek ma ata rak Gazlavay mala Yahudu ege a təwse aka. 2 Pes ma ata zazak mala Yahudu ege mahkaɗ, Pawl a kanda a ujek wese ana ma a mpat a mpat, a kendewzetene ŋ Yahudu ege, əy kezenza zlap ata ma ma ŋ ɗerewel ma keweɗ. 3 A keghwelzetene ɗerewel ma keweɗ kadak kadak ŋ hejəye, a ŋgaya: «Kulakw, Almasəyhu ca, a nasa gef, a dəwze anta, a nagwarzamha aza ata lamac.» A zlepetene, zeney, a ŋgaya: «Yesu maa sa kaghwalzahune ŋghe ca, mbe ca, ara Almasəyhu,» a ya. 4 Yahudu ege vedəye ma a təwse ege əy lamza ma anta, əy səbarata ata Pawl ey Səylas. Hejəye Yunanəyŋkaw ege vəram ma kahəmanza Gazlavay ege leŋ weləye ma ata ŋseŋ hejəye madakal dakal ege vəram, əy lamza ma anta yam.5 Cemey, sərah a jata Yahudu ege vedəye mambaza. Aya, əy javata masulah ege ata taf, əy nda, əy ɓecata hejəye, əy ŋcakwzata hejəye ŋ ɓam pakam mambaza ŋ uzam. Əy nda a wata Yasaŋw, əy mpamata ata Pawl ey Səylas ŋ jeɓzata a tama hejəye ŋ jetene guma. 6 Cemey əy kéndewzetene a təwse, askwaw. Aya, əy njew aza Yasaŋw leŋ hejəye vedəye ma lamza ma mala Yesu ege aza a tama madakal dakal ma ja guma ma ŋ uzam ege, əy ja ula, əy ŋgaya: «Hejəye ŋghe anta ege ca, əy kágaɓ manhayak aza tewtew. Na ŋgha əy káhwasha aza ete ŋghe. 7 Yasaŋw kálamzata aza ŋ a wata anta. Hejəye ŋghe anta ege tewtew əy kececefza laŋkan ma ege mala bay madakal mala Rawma səkwaw, əy kazlap, əy ŋgaya: “Bay matakan aka, zlam anta Yesu,”» əy ya. 8 Maa əy zləme ana ebe ŋghe wese ca, hejəye ma ɓecha ege tewtew leŋ madakal dakal ma ja guma ma a uzam anta ege, əy kégeyzetene unaf tata ege aza. 9 Aya, ata Yasaŋw ey hejəye vedəye maa əy mbalata ege wese, əy letene kulakw ŋ ŋtar səlay ŋ madakal dakal ma ja guma ege wese, a dəwze anta, pal əy palzata aka.
Ata Pawl ey Səylas əy nda ŋ uzam Bereya
10 Maa zaɗaw a la anta ca, hejəye ma lamza ma mala Yesu ege aza, əy laɓzata ata Pawl əy Səylas ŋ Bereya. Aya, maa əy hwas a təwse ca, əy nda ŋ ujek ma ata rak Gazlavay mala Yahudu ege. 11 Hejəye ma ŋ uzam Bereya anta ege ca, tata hejəye maa unaf tata ege tuwah, əy nja ana hejəye ma ŋ Tesalawnəykəy ege səkwaw. Əy kálamza zlap a Gazlavay aza kadak kadak ŋ unaf tata. Ata pes ata pes, əy kejəŋge ɗerewel ma keweɗ, əy ɗaw ŋ san ca, ma maa Pawl a zlap ŋghe ca, ara ma ma njenjəwen vaw? 12 Hejəye vəram ŋ taba tata əy kálamza zlap Gazlavay aza. Weləye Yunanəyŋkaw ege vəram ma ata ŋseŋ hejəye madakal dakal ege leŋ hejəye Yunanəyŋkaw ege vəram əy kálamza zlap Gazlavay aza yam.
13 Cemey, maa Yahudu ege ma ŋ Tesalawnəykəy əy zləme Pawl a kaghwal zlap Gazlavay ŋ uzam Bereya zeney ca, əy ndaha, əy baɗzata hejəye, əy ŋkurafza unaf tata ege. 14 Aya, a təwse a təwse, hejəye ma lamza ma mala Gazlavay ege aza, əy cene ma a Pawl ama ŋtele ma dakal, cemey, ata Səylas ey Təymawte ca, əy kánja ka ŋ uzam wese. 15 Hejəye ma cene ma a Pawl wese ege, əy nda zlaɓa mbe hwas ŋ uzam Atena. A dəwze anta, əy zenha aza ŋ uzam Bereya. A təwse, Pawl a laɓzata ara, a ŋgaya: «Hune zlepetene ŋ ata Səylas ey Təymawte, əy mandaha ŋ ndewzekey kəcaŋ ete ŋghe.»
Pawl mbəy ŋ uzam Atena
16 Maa Pawl a kahəbar ata Səylas ey Təymawte ŋ uzam Atena ca, unaf anta kághwaɗ anta mambaza mavəday maa a gəre kule ege vəram ŋ uzam anta. 17 Ata Pawl ey Yahudu ege leŋ hejəye vedəye ma kahəmanza Gazlavay ege, əy kezenza zlap a ujek ma ata rak Gazlavay Yahudu ege. A zeney, ata pes ata pes, əy kezenza zlap a hejəye tewtew maa a kendewzetene ŋ hubakw ege. 18 A təwse ca, hejəye vedəye ma kasəbar lasasərak madakal ma san səkan mala Epəykurəy ege leŋ mala Səytawəykaw ege, əy kezenza zlap a mbe. Hejəye vedəye əy ŋgaya: «Heje ma pakam dəydey ŋghe a ɗaw ŋ zlap ca, vaŋgay?» Vedəye yam, əy ŋgaya: «Andala a zlap ma mala kule maa heje kasan səkwaw ege.» Əy zlap ana ebe ŋghe ca, mavəday Pawl a kaghwalza Ma Mewe ma Taŋtaŋ ata Yesu leŋ ata lagwarzamha hejəye aza ata lamac. 19 Aya, əy ŋta Pawl, əy jeɓza ata lajav ma dakal ma ata ja guma mala Areyawpagus, əy zlepene, əy ŋgaya: «Ma mewe maa hwa kesesərekzeney ŋghe ca, nene kaɗaw hwa ghwelzeney. 20 Cemey, laghwal zlap ŋkwa ŋgha anta ca, ara ma mewe ara nene. Nene kaɗaw hwa ghwelzeney ma anta a ɗaw ŋ zlap ca, vaŋgay,» əy ya. 21 Ana ebe ŋghe, hejəye ma ŋ uzam Atena ege tewtew zlaɓa mbəlam ma ŋ taba tata ege, radakal vah tata, əy keteh zlam ata lasasərak ege mewe parpar parpar, əy kazlap ata ma anta.
22 Aya, Pawl a gwarzam a tama lajav ma dakal ma ata ja guma mala Areyawpagus wese, a zlepetene, a ŋgaya: «Hune Atena ege, sa kegəre ŋ səkan ege tewtew ca, hune kasəbar taf mala kwakwas kule ŋkune ege a heɗe a heɗe. 23 Maa sa katawar ŋ uzam ŋkune ca, sa kégəre səkan ege maa hune kahəmanzata malamalam ege leŋ sa kégəre la ma ata la kwakwas ŋkune zeney, kéŋtereye a heɗe: “Ŋ Kule maa heje kasan səkwaw”. Maa hune həmanza, hune kasan səkwaw ca, sa ndaha ŋ ghwalzahune. 24 Gazlavay ma baza manhayak ey zlaɓa səkan ma ŋma ege tewtew ca, mbe, ara Bay Madakal ma mgba ata uzlaf ey ma ata hayak. Mbe ca, a kanja a ujek malamalam ata ra hejəye səkwaw. 25 A kaɗaw hejəye əy lene səkan kaw vemey səkwaw mavəday səkan ma ara mbe səkwaw ca, askwaw, ara mbe ma kavalza ŋ səkan ege tewtew, lanja, səfan leŋ səkan ege vedəye tewtew. 26 A bahata hejəye tewtew ata ŋseŋ tata ege tewtew ca, ta ŋ ɗala teŋguleŋ ma a baza wese, ndar əy nja ata hayak tewtew. Kácata wan ege ata aka ata dəla ata dəla anta, kácata ghala mala hayak tata ege aka. 27 A laza aka ana ebe ŋghe ca, ndar hejəye əy mpamaw. Ayaw, kaw əy nededer ŋ mpama ca, ketegəre əy ndewzene aza ka vaw. Cemey, njenjəwen ca, Gazlavay mbəy gədak a kaw vayay ŋtakwaw askwaw, 28 mavəday a ŋgaya:
“Heje səfan, heje həɓal kusam leŋ heje nja ca, mavəday mbe.”
Ana maa hejəye ŋkune ege vedəye ma keŋter ege, əy kazlap, əy ŋgaya:
“Heje ca, heje uzəye anta ege yam,” a ya.
29 Mada heje uzəye anta ege ca, heje ɗaw ŋ deŋza Gazlavay ca, a nja ana kule malamalam a bənaɓ, a səlay səkwaw, askwaw ca, ana kule malamalam a ŋkəɗaŋ, ana maa hejəye əy lamata ŋ ledeŋ ŋkwaɓ tata ege səkwaw. 30 Cemey, Gazlavay kececefza vah maa əy kasan səkan səkwaw, askwaw. Na ŋgha ca, a kayata hejəye tewtew kaw a katay, əy mabawza lanja tata ege aza. 31 Cemey, káca vah maa ata jene guma a heɗe a heɗe ŋ manhayak tewtew aza ta ŋ ɗala teŋguleŋ maa a mayaw. Kéghwelzetene aza ŋ hejəye tewtew njenjəwen ta ŋ lagwarzamha heje ŋghe wese ŋ taba hejəye mamacamac ege,» a ya.
32 Maa hejəye əy zləme, Pawl a kazlap ata lagwarzamha aza ata lamac ca, hejəye vedəye əy ɓas a heɗe. Cemey, vedəye əy ŋgaya: «Nene ɗaw hwa ndaha ŋ ghwelzeney ma ŋgha anta a pes matakan zeney,» əy ya. 33 A təwse ca, Pawl yak a yakzata ka, tel a nda anta. 34 Cemey, hejəye vedəye ma ŋ taba tata ege, əy səbaraw əy lamza ma Gazlavay. Ara ata Dəyawnəysəyus, ɗala ma dakal maja guma mala Areyawpagus zlaɓa wala maa əy kayaɓa Damarəys leŋ hejəye vedəye zeney.