Təymawte a cetene ma ŋ ata Pawl ey Səylas
16
A dəwze anta, Pawl a nda ŋ uzam Derbe leŋ ŋ uzam Ləystəyra. A təwse ca, madarlaŋw wende aka, zlam anta, Təymawte. Maman ca, ara hal Yahudu ma lamza ma mala Yesu aza, cemey, cen ca, ara ɗala Yunanəyŋkaw. 2 Zlaŋgan ege ma ŋ Ləystəyra leŋ ma ŋ Əykawnəya əy kahəmanza dakala. 3 Pawl a kaɗaw Təymawte a cene ma. Aya, a ŋta aza, ara mbe, a zlene mandulay aza, mavəday Yahudu ma a təwse anta ege tewtew, əy kasan cen ca, ara ɗala Yunanəyŋkaw. 4 Aya, ŋ uzam ege kaw vekey maa əy kanda ca, əy keghwelzetene ma maa malaɓ Yesu ege leŋ madakal dakal ma a tama ma ŋ Urusaləyma ege, maa əy ŋkana aza ŋ hejəye. Əy zlepetene, əy malaw, ana mbe. 5 Ana ebe ŋghe, Lajav ege mala hejəye ma lamza ma mala Yesu ege aza əy kavas ŋ lem ɓarɓar ŋ lalam, əy kafal ata pes ata pes.Gazlavay a yaɓa Pawl ŋ Makedawnəya
6 Zəwet ma keweɗ képelzetene taf ŋ ata Pawl ey Səylas ŋ ghwalza zlap Gazlavay ŋ hayak Asəya askwaw. Aya, əy nda ta ŋ hayak Fəyrəygəya leŋ ŋ hayak Galatəya. 7 Maa əy hwas mbermber ara uzam Məysəya ca, əy mpam taf ŋ nda kəɗa ŋ hayak Bəytəynəya, cemey, Zəwet Yesu képelzetene taf askwaw. 8 Aya, əy nda ta ŋ Məysəya, əy hwas ata la kwambawal ma dakal dakal ege, əy gar ŋ Tawrawas. 9 A zaɗaw wende aka, səkan wende a ghwelene a Pawl, a gəre ɗala Makedawnəya wende aka, kégereye a tama anta, a rakaw, a ŋgaya: «Ndaha ta ŋ ete ŋghe ŋ Makedawnəya, ndaha ŋ cekzeney!» a ya. 10 A dəwze səkan ma ghwelene a Pawl wese ca, a təwse a təwse, nene mpam taf ma ata nda ŋ Makedawnəya, mavəday nene kásanza njenjəwen, ara Gazlavay ma yeney ŋ nda a təwse ŋ ghwelzetene Ma Mewe ma Taŋtaŋ ŋ hejəye.
Ləydəya a lamza zlap Bay Madakal ŋ uzam Fəyləypəy
11 Nene ŋta kwambawal ma dakal ŋ uzam Tawrawas, nene nda delele ŋ hayak ma ŋ taba yam mala Samawtaras. Aya a mapat anta, nene nda ŋ Neyapawləys. 12 Nene gwarzam aka a təwse, nene nda kəɗe ŋ Fəyləypəy, uzam ma dakal ma ŋ hayak Makedawnəya ma asa ra Rawma ege. Nene kála a təwse wan ege vəram cekuɗe 13 A pes ma ata zazak mala Yahudu ege, nene gwarzam ŋcene ŋ uzam wese, nene nda kəɗe a ma zlazlar wende aka ata la maa nene kédeŋza njenjəwen, la ma ata rak Gazlavay mala Yahudu ege a təwse aka. Aya, nene nja, nene zlepetene ŋ weləye ma əy kéɓeceye a təwse ege.
14 Wala wende teŋguleŋ ŋ taba tata ma kahəmanza Gazlavay aka, zlam anta Ləydəya, a ndaha aka ŋ uzam Təyatəyra. Wala anta ca, ara masəkam rəgwac ma vəre vəre ma tuwah tuwah ege, a kahəmanza Gazlavay. A ketehzeney zlam kadak kadak, mavəday Bay Madakal a kézlerzene ŋkwaɓ aka ŋ teh zlam ata zlap mala Pawl. 15 Wala wese leŋ hejəye ma a wata tata ege tewtew əy kélem laban aza a yam baptəysma. A dəwze anta, a yeney a wata anta, a zlepeney, a ŋgaya: «Mada hune kedeŋza, sa ca, sa kálamza ma mala Bay Madakal aza njenjəwen ca, hune ndaha ŋ nja a wata naka,» a ya. A təwse ca, a leney kulakw ŋ lamza ma anta.
Ata Pawl ey Səylas əy a ujek daŋgay ŋ uzam Fəyləypəy
16 A pes wende aka, maa nene kanda kəɗe ata la ma ata rak Gazlavay ca, nene ŋgel ma a haldəma wende aka, ara mava. Zəwet ma keghwelzene səkan ma kanalaha a mpat a tama ŋ mbe aka. Ta ŋ zlan maa a kalata ege wese ca, təwjek anta ege, əy kelem səlay dakala. 17 Haldəma wese a səbereney, nene ata Pawl, a kaja ula ara, a ŋgaya: «Hejəye ŋghe ege ca, ara mala zlan Gazlavay ma gədak ma mgba ata uzlaf ege! Əy kaghwalzahune taf ma ata reh.» 18 Haldəma anta a law, ana ebe ŋghe, wan ege vəram, ha unaf Pawl a ghwaɗ. Aya, Pawl a bawha tama, a zlepene ŋ zəwet wese, a ŋgaya: «Sa kazlapahwaw, a zlam Yesu Almasəyhu, damha aza ŋ wala ŋgha!» A təwse a təwse, zəwet malula wese, dam a damha aza. 19 Aya, maa təwjek anta ege əy gəre əy kelem səlay ara mbe zeney askwaw ca, əy mbalata ata Pawl ey Səylas wese ŋ hubakw, əy njewata a tama madakal dakal ma ja guma ege. 20 Əy jeɓzata a tama madakal dakal ma ja guma ege, əy zlepetene, əy ŋgaya: «Hejəye ŋghe ege ca, ara Yahudu ege, əy kagayzaheje uzam ŋtakwaw aza. 21 Əy kesesərekzetene taf kwakwas matakan ŋ hejəye, maa heje Rawma ege, heje kalamza səkwaw, kaw heje kasəbar səkwaw.»
22 Hejəye tewtew ma a təwse ege əy ghwaɗ tata ata ata Pawl ey Səylas. Aya, madakal dakal ma ja guma ege, əy zlepetene ŋ hejəye əy mecekwetene rəgwac ma ata kusam tata ege aza, əy maŋtawata a lakwatay. 23 A dəwze maa əy káŋtawata aza kadak kadak ca, əy nahzata ŋ daŋgay. Əy zlepene ŋ sawje ma həbar daŋgay wese, ŋ həbarata ka kadak kadak. 24 Maa sawje wese a zləme ana ebe ŋghe ca, a jeɓzata ata Pawl ey Səylas wese a ujek ma ŋ taba daŋgay. A təwse ca, a jewetene ŋgas tata ege aka ŋ taba mpe madaradar ege.
25 Ŋ taba zaɗaw ca, ata Pawl ey Səylas wese əy rak Gazlavay, əy həmanza a dəraf. Hejəye vedəye ma ŋ daŋgay wese ege, əy ketehzetene zlam. 26 A təwse a təwse, hayak a həɓal mambaza, ndaŋw ujek daŋgay wese a həɓal. Ma ujek daŋgay ege tewtew əy zlar tata, a təwse, sesele ege maa əy jawata hejəye tewtew a tata wese, əy pal tata. 27 Sawje ma həbar daŋgay wese a fəɗaha aka ata lawan, a gəre ca, ma ujek daŋgay ege wese tewtew, əy kézlereye. A təwse, a cakza ca, hejəye ma ŋ daŋgay ege wese, əy kéhey tata. A daɗ aza ŋgezle masalam anta ŋ ja ha anta aza. 28 Cemey, Pawl a ɗefene ma a mazlazlay, a ŋgaya: «Hwa ja ha ŋkwa ka səkwaw, nene ete ŋghe tewtew ŋcene,» a ya. 29 A təwse ca, sawje wese a mpam kwahwaw ŋ sar la, a dam kəcaŋ a ujek daŋgay wese, a kanana ara, mavəday kálalak anta. A nda, a ndav a tama ata Pawl ey Səylas. 30 A dəwze anta, a njewata aza a bəza, a ɗawzata, a ŋgaya: «Bay ege, sa nala ŋ reh ca, vaŋgay?» 31 A təwse, əy zenzene, əy ŋgaya: «Lamza Bay Madakal Yesu, hwa nelem lereh, hwa, zlaɓa hejəye ma a wata ŋkwa ege tewtew.» 32 Aya, əy ghwelzene ma mala Bay Madakal leŋ ŋ hejəye ma a wata anta ege tewtew. 33 Ŋ taba zaɗaw anta wese ca, sawje wese a ŋta ata ata Pawl ey Səylas, a benetene mbəlah tata ege aza. A təwse a təwse, mbe, zlaɓa hejəye ma a wata anta ege tewtew, əy lem laban aza a yam baptəysma. 34 Aya, a jeɓzata a wata anta, a veletene səkan ŋ zam. Mbe, zlaɓa hejəye ma a wata anta ege tewtew əy kasasam dakala, mavəday əy kálamza zlap Gazlavay aza.
35 Aya, maa mapat a la anta ca, madakal dakal ma ja guma ege, əy laɓzata sawje ege ŋ zlepene ŋ sawje ma həbar daŋgay wese, əy ŋgaya: «Palzata hejəye ŋghe ege aka,» əy ya. 36 A təwse ca, sawje ma həbar daŋgay wese, a ndaha, a zlepene ŋ Pawl, a ŋgaya: «Madakal dakal ma ja guma ege, əy kálaɓaha ŋ zlepekey, ŋ palzahune aka. Na ŋgha ca, hune kula ŋ damha aza, hune nda a zəhay,» a ya. 37 Cemey, Pawl a zenetene ŋ sawje ege wese, a ŋgaya: «Əy kéŋteweney ka ata nje hejəye, kaw əy kéjeney guma askwaw, nene ca, nene hejəye ma ŋ hayak Rawma ege yam! A dəwze anta əy kénehzeney aza ŋ daŋgay. Aya, na ŋgha eze ca, əy ɗaw ŋ peleney ka, kaw hejəye əy ɗaw ŋ san səkwaw, vaŋgay? A kala ana ebe ŋghe səkwaw! Əy mandaha a ha tata ŋ pelzeney,» a ya. 38 Aya, sawje ege wese, əy nda əy zenzetene ma ŋgha anta ege tewtew ŋ madakal dakal ma ja guma ege wese. A təwse, maa əy zləme, ata Pawl ey Səylas, tata hejəye Rawma ege ca, əy kálalak tata. 39 A təwse ca, əy nda a ha tata ara tata, əy jetene mbahw. Aya, əy damata aza ŋ daŋgay wese, əy rakata, əy mekesetene aza ŋ uzam tata. 40 Maa ata Pawl ey Səylas əy damha aza ŋ daŋgay wese ca, əy nda a wata Ləydəya. Əy ndewzetene ŋ hejəye ma lamza ma mala Yesu ege aza a təwse, əy veletene ɓarɓar, aya, əy nda tata kəɗe ata la matakan.