Ma ata lazla mandulay ŋ Antakəya
15
Hejəye vedəye əy ndaha aka ŋ hayak Yahudəya, əy nda ŋ uzam Antakəya, əy sesərekzetene zlap ŋ zlaŋgan tata ege, əy ŋgaya: «Mada hune kálamza ŋ zla mandulay ŋkune aza ana ma maŋkanaŋkan mala Musa a zlap askwaw ca, hune kanala kula ŋ reh səkwaw,» əy ya. 2 A təwse ca, ata Pawl ey Barnabas əy kálamza ma ata səkwaw, əy ja səbakw dakala mambaza a tata ata ma anta. Aya, əy zen zlap ŋ taba tata, ata Pawl, Barnabas leŋ hejəye vedəye ma ŋ Antakəya ege, əy manda ŋ Urusaləyma ara malaɓ ege ey madakal dakal ma a tama ege, ŋ zlap ata ma anta a tata.3 Aya, lajav hejəye ma lamza ma mala Gazlavay ege aza ma ŋ Antakəya a veletene səkan ege ŋ cekzetene ata taf Urusaləyma. Əy nda ta ŋ Fəynəykəya ey Samarəya, əy kaghwalza ma ara ata hejəye vedəye, maa əy ja mbahw aza a tama Bay Gazlavay. A təwse, labara anta kásasamzata zlaŋgan tata ege aza tewtew dakala mambaza. 4 Maa əy gwarha ŋ Urusaləyma wese ca, lajav hejəye ma lamza ma mala Gazlavay ege aza leŋ malaɓ ege ey madakal dakal ma a tama ege, əy lamzata. A təwse əy ghwelzetene səkan ege tewtew maa Gazlavay a lata a tata.
Lajav ma dakal ŋ Urusaləyma
5 Cemey, Farəysa ege vedəye ma ŋ taba hejəye ma lamza ma mala Gazlavay ege aza, əy gwarzam, əy zlap, əy ŋgaya: «Səy, hejəye ma tata Yahudu ege səkwaw əy mazla mandulay tata ege aza, heje zlepetene əy malamza ma maŋkanaŋkan mala Musa aza,» əy ya. 6 Malaɓ ege ey madakal dakal ma a tama ege əy jav ŋ sarza ma anta.
7 Aya, maa əy kaja səbakw dakala ata ma anta wese ca, Pəyer a gwarzam a zlepetene, a ŋgaya: «Zlana ege, hune kasanaw, Gazlavay kémeyekey aza ŋ taba ŋkune a nuna anta ŋ ghwelzetene Ma Mewe ma Taŋtaŋ ŋ hejəye vedəye ndar əy zləme, əy lamza zlap anta. 8 Gazlavay ma kasan səkan ma a unaf hejəye tewtew, maa a veletene Zəwet ma keweɗ ana maa a valaheje ca, kághwalzaheje ca, kálamzata aza yam. 9 Kaw Gazlavay kázla ghala ka ŋ taba kwakaw a tata askwaw. Kébenetene unaf tata ege aza mavəday maa əy lamza ma anta. 10 Ca, na ŋgha hune ɗaw ŋ slanza Gazlavay ca, ŋ vay? Hune tewetene səkan ma ndeɓndeɓ maa kaw vana ŋtakwaw ege, kaw heje, heje kula ŋ tew səkwaw ata hejəye ma lamza ma mala Gazlavay aza ca, ŋ vay? 11 Heje kasanaw, Gazlavay a rehzaheje ca, ta ŋ taŋtaŋ mala Bay Madakal Yesu, ana maa a rehzata hejəye vedəye yam.»
12 Aya, hejəye ma ɓecha ege tewtew a təwse, əy nja aka tete, ŋ keteh zlam ata ata Barnabas ey Pawl maa əy keghwelzetene səkan ma kaŋga ŋkwaɓ ege leŋ zaɓəla ege tewtew maa Gazlavay a veletene ɓarɓar ŋ law, ŋ taba hejəye vedəye.
13 Maa əy maɗza zlap tata aza ca, Yakuba a gwarzam, a zlap, a ŋgaya: «Zlana ege, hune tehzekey zlam! 14 Səymawn kághwalzaheje maa mar aka ata lamar, Gazlavay a ha anta kámay hejəye ŋ taba hejəye maa tata Yahudu ege səkwaw ŋ la ŋ hejəye anta ege. 15 Zlap anta ege əy nja ana zlap mala uzəye ma zlap ma a Gazlavay ege, ma kéŋtereye ŋ ɗerewel anta, a ŋgaya:
16 “Bay Madakal a zlap, a ŋgaya:
A dəwze, sa nezenha
ŋ lam ujek Dawuda ma ghwaram anta wese aka,
sa nagarza ka ata la anta.
17 Aya, hejəye vedəye memenemen ege tewtew əy nampam Bay Madakal,
njenjəwen, zlaɓa hejəye vedəye tewtew ma kaya zlam naka ege.
Bay Madakal a ŋgaya, a lata zlan anta ege ana ebe ŋghe,
18 zlan anta ege ma késeneye zlezle,” a ya.»
19 Yakuba a zlap zeney, a ŋgaya: «Sa kazlapahune, heje ɗaw ŋ letene ma ŋ hejəye maa tata Yahudu ege səkwaw ma bawza lanja tata ege aza kəɗa ara Gazlavay səkwaw. 20 Cemey, zukwan ca, heje ŋteretene ɗerewel, əy ɗaw ŋ zam zley kule səkwaw, əy ɗaw ŋ ŋta kusam a bəza səkwaw ey laca weləye ma ata taf anta kwaw, səkwaw, əy ɗaw ŋ zam zley səkan ma ɓərataɓərat səkwaw, əy ɗaw ŋ zam mbambaz səkwaw. 21 Mavəday zlezle ca, əy kaghwalza ma ata ma maŋkanaŋkan ma mala Musa ŋ uzam ege tewtew, a zeney, əy kejəŋge laŋkan ma anta ŋ ujek ma ata rak Gazlavay kaw vepey a pes ma ata zazak,» a ya.
Lajav madakal ŋ ŋteretene ɗerewel ŋ hejəye maa tata Yahudu ege səkwaw
22 Aya, malaɓ ege əy madakal dakal ma a tama ege, zlaɓa hejəye ma ata lajav hejəye ma lamza Gazlavay ege aza tewtew, əy may hejəye vedəye ŋ taba tata ŋ laɓzata ŋ Antakəya zlaɓa ata Pawl ey Barnabas. A təwse, əy may Yahuda, maa əy kayaɓa Barsabas, ey Səylas. Tata gbak tata, əy kewenzetene ha. 23 Əy laɓzata a ɗerewel asa ra kéŋtereye ende ŋghe:
«Nene malaɓ ege leŋ madakal dakal ma a tama ege, zlanahw ŋkune ege, nene kezlepzetene ŋ hejəye maa tata Yahudu ege səkwaw ege ma lamza ma mala Yesu ege aza, ma ŋ Antakəya, ŋ Səyrəya leŋ ŋ Səyləykəya.
24 Nene kézləme, hejəye vedəye ŋ taba ŋcene, əy kánda ŋ ŋgaɗahune ŋkwaɓ, əy lalakzahune a zlap tata ege. Cemey, nene ca, nene kálaɓzata askwaw. 25 Mavəday anta, nene kájav ma ŋcene ka ma teŋguleŋ ŋ may hejəye ŋ laɓzata ara hune. Hejəye anta ege, əy nanda tewtew əy ata Barnabas ey Pawl, maa nene kaɗawata kadak kadak. 26 Ata Pawl ey Barnabas anta ca, ara hejəye ma valza ha tata ege aza ŋ la zlan Bay Madakal ŋtakwaw Yesu Almasəyhu. 27 Mavəday anta, nene laɓzahune ata Yahuda ey Səylas ŋ ghwalzahune ma anta ma teŋguleŋ ana maa nene ŋter ŋ ɗerewel ŋghe. 28 Zəwet ma keweɗ ey nene, nene káŋkan ma aza, ŋ cahune səkan wende a heɗe zeney ca, askwaw. Cemey, maaŋkanaŋkan ma ege maa nene kalaɓzahune ŋghe ege ca, əy cakwa: 29 Hune ɗaw ŋ zam zley kule səkwaw, hune ɗaw ŋ zam mbambaz səkwaw, hune ɗaw ŋ zam zley səkan maa əy kézlene ula askwaw səkwaw, hune ɗaw ŋta kusam a bəza səkwaw. Hune kala kadak mada hune katakata kusam ŋkune ege aka ŋ lata səkan anta ege. Hune nja kadak kadak.»
30 Aya, əy geɓzata hejəye maa əy mayata ŋ laɓzata wese, əy nda tata ŋ Antakəya. Maa əy hwas a təwse ca, əy javata hejəye ma lamza ma mala Gazlavay ege aza, əy veletene ɗerewel wese. 31 A təwse, əy jəŋge ɗerewel anta, əy sasam dakala ata ɓarɓar maa ma anta a keveletene. 32 Ata Yahuda ey Səylas ca, tata uzəye ma zlap ma ege. Əy zlepetene ma ege dakala ŋ Zlaŋgan tata ege, əy veletene ɓarɓar ŋ nja kadak kadak ŋ lalam. 33 Ata Yahuda ey Səylas əy nja a təwse, walaŋ cekuɗe. A dəwze anta, əy ɗaw ŋ zenha aza ara hejəye ma laɓzata ege. Aya, hejəye ma lamza ma mala Yesu ma a təwse ege, əy zlepetene əy ŋgaya: «Hune nda a zəhay,» a ya. 34 [Cemey, Səylas ca, kánja ka a təwse.] 35 Ata Pawl ey Barnabas əy kánja dakala ŋ Antakəya. Tata ey hejəye vedəye vəram, əy kasasərakzata hejəye, əy keghwelzetene Ma mala Bay Madakal.
Ata Pawl ey Barnabas əy ɓez kusam
36 Ata wan ege cekuɗe a dəwze anta ca, Pawl a zlepene a Barnabas, a ŋgaya: «Maza ŋ zen ŋ sarata zlana ŋtakwaw ege ma ŋ uzam ege tewtew maa mama ghwelzetene zlap a Bay Madakal, ŋ sarza lanja tata ege, əy nja ca, vaŋgay,» a ya. 37 Barnabas ca, a ɗaw ŋ ŋta Yuhana maa əy kayaɓa Markus ara, a həzlar tata. 38 Cemey, Pawl kálamza askwaw, mavəday Yuhana anta kégeɓzata aka ŋ hayak Pamfəyləya, kégeɓza zlan aka. 39 A təwse ca, əy ja səbakw dakala, əy ɓez kusam aza, kaw vayay a ŋtaɓa taf anta. Barnabas a ŋta Markus, əy dam ŋ kwambawal ma dakal, əy nda tata ŋ Kəypərus. 40 Pawl yam, a ŋta Səylas. Zlaŋgan tata ege əy palzata aka ŋ taŋtaŋ Bay Madakal, tel əy nda tata. 41 Pawl a nda ŋ hayak Səyrəya ey Səyləykəya, a keveletene ɓarɓar ara ŋ lajav hejəye ma lamza ma mala Yesu ege aza.