Ata Pawl ey Barnabas əy ghwalza zlap Bay Gazlavay ŋ uzam Əykawnəya
14
Ata Pawl ey Barnabas əy hwasha ŋ uzam Əykawnəya. A təwse, əy dam ŋ ujek ma ata rak Gazlavay mala Yahudu ege ana ma ŋ Antakəya. Əy ghwelzetene zlap a Gazlavay ŋ hejəye. Aya, Yahudu ege leŋ Yunanəyŋkaw ege vəram əy baw tata ŋ hejəye ma lamza ma mala Gazlavay ege aza. 2 Cemey, Yahudu ege vedəye ca, əy kálamza zlap anta askwaw. A təwse, əy ŋcakwzata hejəye vedəye ŋ deŋ ŋkwaɓ ma dadawar ata ata Pawl ey Barnabas wese. 3 A mbe anta tewtew ca, ata Pawl ey Barnabas əy kánja dakala ŋ Əykawnəya. Əy kaghwalza zlap ata Bay Madakal kaw a lalak askwaw. Əy ghwalza zlap ata taŋtaŋ Gazlavay. Gazlavay yam a kaghwalza ma tata ca, ara ma ma njenjəwen, a veletene ɓarɓar ŋ la səkan ma kaŋga ŋkwaɓ ege leŋ zaɓəla ege ta ŋ səkan ege vedəye vedəye. 4 Aya, hejəye ma a təwse ege, əy ɓez kusam aka dəla gbak. Hejəye vedəye əy səbar ma mala Yahudu ege, vedəye yam, əy səbar ma mala malaɓ ege.5 A təwse ca, Yahudu ege leŋ hejəye maa tata Yahudu ege səkwaw wese zlaɓa bay tata ege əy jav ma tata aka ŋ setene gef ŋ ata Pawl ey Barnabas wese, əy ɗaw ŋ kwapata a ŋkəɗaŋ ŋ jata aza. 6 Cemey, maa əy zləme ma anta ca, əy hey tata kəɗa ŋ Ləystəyra ey Derbe, uzam ege ma ŋ hayak Ləykawnəya leŋ ŋ uzam ma a həzlar tata ege. 7 A təwse anta yam, əy kaghwalza Ma Mewe ma Taŋtaŋ.
Ata Pawl ey Barnabas əy ghwalza zlap a Gazlavay ŋ Ləystəyra
8 Heje wende ŋ uzam Ləystəyra aka, mbawa anta a dəmas maman, ŋgas anta ege əy kémeceye. Mbəy halɓaya, kaw kágwarzam ŋ nda askwaw. 9 A keteh zlam ata ma maa Pawl a kazlap. Pawl a sarza kadak kadak, a gəre ca, lalam ŋ mbe aka ŋ reh aza ŋ dawar anta. 10 Aya, Pawl a zlepene a mazlazlay a ŋgaya: «Gwarzam, deŋ aka gbar ata ŋgas ŋkwa ege!» A təwse ca, heje wese a mber, a mar ŋ nda a ŋgas anta.
11 Maa hejəye ma ɓecha ege əy gəre səkan maa Pawl a la ca, əy ja ula a ma tata Ləykawnəya, əy ŋgaya: «Kule ege əy kábaw kusam tata aza ana hejəye, əy kándaha aza ara heje.» 12 Aya, əy yaɓa Barnabas ey Pawl a zlam mala kule tata ege. Əy yaɓa Barnabas «Jewus», a Pawl yam «Hermes» mavəday ara mbəy ma kezlepetene. 13 Ujek kule maa əy kayaɓa Jewus wese ca, mbəy mbermber a ma ujek uzam anta. Aya, mala kwakwas ma kada kule anta, a daha mere zləye macafacaf a fafan maa kézeveye a ma ujek kule anta. Mala kwakwas ey hejəye tewtew əy ɗaw ŋ letene kwakwas ata Barnabas ey Pawl ana kule tata ege. 14 Cemey, maa malaɓ ege, ata Barnabas ey Pawl əy zləme ma ŋghe anta ca, əy slah rəgwac ma ata kusam tata ege aza, əy hey kəɗa ara hejəye, əy kaja ula ara a mazlazlay, əy ŋgaya: 15 «Ŋgama naka ege, hune la ŋghe ca, vemey? Nene ca, nene hejəye dakənak ege ana hune yam. Nene ndaha ete ŋghe ca, ŋ ghwalzahune Ma Mewe ma Taŋtaŋ mala Gazlavay. Hune geɓza ŋ da kule ma kula ŋ cakzahune səkwaw aka. Hune bawha ara Gazlavay ma a kamac səkwaw, ɗala ma ba la ma mgba ata uzlaf, la ma ata hayak, ŋtele yam ey səkan ma ŋma ege tewtew. 16 Zlezle, káyakzata hejəye maa ŋ manhayak ege aka tewtew ŋ səbar taf tata ana maa əy kaɗawaw. 17 A mbe anta tewtew ca, Gazlavay kághwalza taŋtaŋ anta kaw vepey. Káɗahune van ŋ mgba ata uzlaf ata hayak, kávalahune vah ma ata pet səkan, kávalahune səkan ta zam dakala. Kéghefzahune aza a sasam.» 18 Cemey, kaw maa əy kézlepetene aza ca, ata Pawl ey Barnabas, əy takata hejəye a gef ŋ letene kule wese.
19 Yahudu ege ma ndaha aka ta ŋ uzam Antakəya ŋ hayak Pəysəydəya leŋ ŋ uzam Əykawnəya əy jav ma tata a hejəye. Əy ŋcakwzata hejəye əy makwap Pawl a ŋkəɗaŋ. A dəwze anta, əy njew aza ŋ uzam wese, kəɗa a bəza, əy ulakza ca, kámac anta. 20 Cemey, maa hejəye ma lamza ma ege aza əy ɓec a həzlar ca, aya Pawl a gwarzam aza, a zen anta ŋ uzam anta. A mpat anta a nda a Barnabas ŋ Derbe.
Ata Pawl ey Barnabas əy zenha aza ŋ Antakəya ma ŋ Səyrəya
21 Ata Pawl ey Barnabas əy ghwal Ma Mewe ma Taŋtaŋ ŋ uzam Derbe. A təwse, hejəye vəram əy kálamza ma mala Gazlavay aza. A dəwze anta, əy zenha aza ŋ Ləystəyra, ŋ Əykawnəya leŋ ŋ Antakəya ma ŋ hayak Pəysəydəya. 22 A təwse, əy veletene ɓarɓar ŋ hejəye ma lamza ma mala Gazlavay ege aza, əy manja ka kadak kadak a lalam, əy zlepetene, əy ŋgaya: «Heje nadam ŋ lazam bay a Gazlavay ca, a gef ege dakala,» a ya. 23 Ata lajav kaw vekey a hejəye ma lamza ma mala Gazlavay ege aza ca, əy meyetene madakal dakal ma a tama ege, əy la sumay, əy rak Gazlavay mavəday tata. Aya, ata Pawl ey Barnabas əy palzata hejəye wese ege aka asa ra Bay Madakal, ɗala tata maa əy lamza ŋ unaf tata.
24 Aya, ata Pawl ey Barnabas wese əy nda ta ŋ uzam Pəysəydəya, əy hwas ŋ Pamfəyləya. 25 Əy ghwal zlap Gazlavay ŋ Perge, a dəwze anta əy nda ŋ Ataləya. 26 A təwse, əy dam ŋ kwambawal, əy zen tata ŋ Antakəya, uzam maa hejəye ma lamza ma mala Gazlavay ege maa əy palzata aka asa ra Gazlavay tata ŋ la zlan maa na ŋgha, əy kála aza tew. 27 Maa əy hwas ŋ Antakəya ca, əy javata hejəye ma lamza ma mala Gazlavay ege aza, əy ghwelzetene səkan ege tewtew maa Gazlavay a law, a tata leŋ maa a zlerzetene taf ŋ hejəye maa tata Yahudu ege səkwaw ŋ lem lereh yam. 28 Ata Pawl ey Barnabas əy kánja dakala a təwse ey ata hejəye ma lamza ma mala Gazlavay ege aza.