Əy laɓzata ata Sawl, əy laɓzata
13
Ata lajav hejəye ma lamza ma mala Yesu ege aza ma ŋ Antakəya ca, uzəye ma zlap ma a Gazlavay ege leŋ masasərak ege aka: Ara ata Barnabas, Səymeyawn maa əy kayaɓa Meɗekwɗekw, Lusəyus ɗala ma ŋ Səyrene, Manahen maa əy gal ŋ la anta a bay Həyrudus maa əy kayaɓa Antəypas, leŋ Sawl. 2 A pes wende aka əy karak Bay Madakal, əy kala sumay, Zəwet ma keweɗ a zlepetene, a ŋgaya: «Hune cekey ata Barnabas ey Sawl parpar ŋ la zlan maa sa yata ŋ law,» a ya. 3 Aya, a dəwze maa əy kala sumay, maa əy kárak Gazlavay aza ca, əy ca ra tata ata ata Barnabas ey Sawl wese, əy geɓzata aka əy manah ma.Ata Barnabas ey Sawl əy ŋ Kəypərus
4 Aya maa Zəwet ma keweɗ a laɓzata ata Barnabas ey Sawl wese ca, əy nda ŋ uzam Selewkəya, əy dam ŋ kwambawal əy zlaŋ hayak ma ŋ taba ŋtele, əy hwas ŋ Kəypərus. 5 Maa əy hwas ŋ uzam Salaməys ca, əy ghwal zlap a Gazlavay ŋ ujek ma ata rak Gazlavay a Yahudu ege. Yuhana Markus mbəy ara tata ŋ cekzetene.
6 Əy zlaŋ hayak Kəypərus wese tewtew, ha hwas ŋ Pafaws. Əy ndewzene ŋ ɗala Yahudu wende aka a təwse, zlam anta Bar Yesu. Heje anta ca, a kala zaɓəla ege. Káca ha anta aza ŋ mba ma zlap ma a Gazlavay. 7 Bar Yesu anta, ara madarlaŋw a Sergəyus Pawl, ɗala mambal hayak, ɗala ma ŋkwaɓ ŋ ha. Mambal hayak anta a yahata ata Barnabas ey Sawl a wata anta, mavəday a kaɗaw ŋ zləme zlap a Gazlavay. 8 Cemey, Eləymas ana zlap ca, ɗala mala zaɓəla wese ca, a kaɗaw ma mala ata Barnabas ey Sawl səkwaw. A mpam taf ŋ tak mambal hayak ŋ lamza zlap a Gazlavay. 9 A təwse ca, Sawl, maa əy kayaɓa Pawl, ɗala ma ghef a Zəwet ma keweɗ, a sarza mala zaɓəla wese mgbezlzle, 10 a zlepene, a ŋgaya: «Hwa ɗala mala metəwle! Hwa ɗala ma kabaɗzata hejəye tewtew! Hwa Mba Malula! Hwa kaɗaw səkan ma taŋtaŋ səkwaw. Zlan maa Bay Madakal a kala ca, a heɗe a heɗe, cemey, ŋ ŋkwa ca, hwa kagayza ka a zlan ma kadak səkwaw. Ca, hwa negeɓza ŋ la səkan ŋghe ca, vepey? 11 Na ŋgha ca, zləme ka: “Bay Madakal a nagayzahwaw, hwa nulaf ŋkwa, hwa kenegəre pes kwagwa askwaw”!» A təwse a təwse, la a jaɓ, kuzle gbek ata nje Eləymas. A təwse, a baw ata la anta, ata la anta, a mpam ɗala ŋ njewew. 12 Maa mambal hayak a gəre səkan ma laha wese ca, kálamza zlap a Gazlavay aza, lasasərak a Bay Madakal anta kéŋgene ŋkwaɓ aza mambaza.
Ata Pawl ey Barnabas əy ŋ uzam Antakəya, ma ŋ hayak Pəysəydəya
13 Ata Pawl ey hejəye maa əy ndaha tewtew ege, əy dam ŋ kwambawal ŋ Pafaws, əy nda kəɗe uzam Perge ma ŋ hayak Pamfəyləya. Aya, Yuhana Markus a yakzata aka, a zen anta ŋ Urusaləyma. 14 A dəwze anta ca, ata Pawl ey Barnabas əy gwarzam aka ŋ Perge wese, əy nda kəɗa ŋ uzam Antakəya ma ŋ hayak Pəysəydəya. A pes ma ata zazak mala Yahudu ege, əy dam a ujek ma ata rak Gazlavay mala Yahudu ege, əy nja ka ŋma. 15 A dəwze maa əy kéjəŋge ma maŋkanaŋkan ma ŋ ɗerewel mala Musa leŋ mala uzəye ma zlap ma a Gazlavay ege aza ca, madakal dakal mala ujek ma ata rak Gazlavay mala Yahudu ege, əy veletene zlap ŋ ata Pawl ey Barnabas wese, əy ŋgaya: «Zlana ege, mada zlap ma ata veletene ɓarɓar ŋ hejəye aka ca, hune kula aza ŋ zlap,» əy ya.
16 Aya, Pawl a gwarzam, a kafza ra anta, a ŋgaya: «Hune hejəye Əysərayəyla ege leŋ hune ma karak Gazlavay ege, hune tehzekey zlam! 17 Gazlavay mala hejəye ŋtakwaw ege Əysərayəyla ege, kámay jeje ŋtakwaw ege aza. Kágalzata aza maa əy ŋ hayak Məysəra. A dəwze anta, kádamata aza ŋ hayak Məysəra wese a ɓarɓar anta ma dakal. 18 A la anta va raŋfaɗ ege, a kesewata səkan ege maa əy kalata ata darzlam. 19 Késlereta ŋseŋ hejəye aza ŋsəleɗ ŋ hayak Kanana, kéveletene hayak tata aza ŋ tata, ndar a la ŋ hayak tata. 20 Səkan ŋghe ege tewtew kála va temere ŋfaɗ aha rajaɓan va wan ma la ŋghe anta ege tewtew.
«A dəwze anta, Gazlavay a veletene hejəye ma ja guma ege ata ha tata, ha hwas ata vah maa mba ma zlap ma a Gazlavay, Samuyəyla a ndaha. 21 A dəwze anta, əy ɗawza Gazlavay ŋ veletene bay maa a kananja aka ata ha tata ŋ zam bay. A təwse, a veletene Sawl, mba Kəys, ma ndaha aka ta ata ŋseŋ Benyaməyn, a zam bay ata tata va raŋfaɗ. 22 A dəwze maa kácakw Sawl aza ŋ bay ca, a cetene Dawuda ŋ uley anta. Ŋghe, a zlap ata mbe, a ŋgaya: “Sa kéndew aza ata ɗala maa sa kaɗawaw, ara Dawuda mba Yesa. A nala zlan tewtew ana maa sa kaɗawaw.” 23 Gazlavay kéveletene Yesu, ɗala ma ata ŋseŋ Dawuda aza ŋ rehzata hejəye Əysərayəyla ege ana maa a zlap. 24 Cemey, maa kándaha kwagwa səkwaw ca, Yuhana kéghwelzetene aza ŋ hejəye Əysərayəyla ege tewtew, a ŋgaya: “Hune bawza lanja ŋkune ege aza, hune lem laban aza a yam baptəysma!” a ya. 25 Aya, maa Yuhana slaɓ ŋ tuwaɗza zlan anta ca, a zlap, a ŋgaya: “Hune deŋza ca, sa ca, sa vayay? Sa ca, sa ɗala maa hune kahəbar wese səkwaw. Cemey, ɗala a kanadaha a dəwze naka aka, kaw ŋ pal serek ŋte anta ca, sa kula səkwaw,” a ya.»
26 Aya, Pawl a zlepetene zeney, a ŋgaya: «Zlana ege, hune hejəye ma ata ŋseŋ Əybərahəyma leŋ hune hejəye vedəye ma kahəmanza Gazlavay ege, Gazlavay a laɓaza ma ma ata rehzaheje ŋghe ca, ŋ kwakaw tewtew ŋtakwaw. 27 Ca, hejəye ma ŋ Urusaləyma ege leŋ bay tata ege ca, əy kasan Yesu səkwaw. Əy kézləme zlap mala uzəye ma zlap ma a Gazlavay ege maa əy kejəŋgeta ata pes ata pes, a pes ma ata zazak Yahudu ege səkwaw. Cemey, əy ghemew, əy law, ana maa uzəye mazlap ma a Gazlavay ege, əy zlap. 28 Kaw əy kéndew ma a heɗe ma ata ja aza askwaw, cemey, əy zlepene Pəylatu ŋ ja aza. 29 A dəwze maa əy kákəɗaŋza aza ŋ lata səkan ege tewtew a heɗe ana maa kéŋtereye ŋ ɗerewel a Gazlavay ca, əy tadakwaza ata mpe gafaŋgal, əy mpasaw, ŋ jeɓ. 30 Cemey, Gazlavay a gwarzamaza aza ata lamac. 31 A təwse, a ghwelzetene kusam anta ŋ wan vəram, ŋ hejəye maa əy nda tewtew ege mar aka ŋ Galəyləy, ha hwas ŋ Urusaləyma. Na ŋgha, əy kála tata ŋ hejəye ma kazlap ma ata Yesu ege a tama hejəye. 32 Nene yam, nene ghwalzahune Ma Mewe ma Taŋtaŋ ana zlap ca, ma maa Gazlavay a zlepetene ŋ jeje ŋtakwaw ege, a neletene wese. 33 Na ŋgha, kála səkan aza tewtew maa a gwarzamaza Yesu aza ata lamac ŋ heje uzəye tata ege. Ana maa kéŋtereye ŋ ɗerewel Jabura, leŋter madakal gbak maa a ŋgaya:
“Hwa ca, hwa Mba naka,
a tambaca, sa kámbawahwaw aza,” a ya.
34 Gazlavay kágwarzamaza aza ata lamac, ndar a ɗaw ŋ rəɗa səkwaw. Kázlap njenjəwen, a ŋgaya:
“Sa valahune səkan ege ma keweɗ, səkan ege ma njenjəwen, ana maa sa zlepene ŋ Dawuda.”
35 A zeney, kéŋtereye ata la wende zeney, a ŋgaya:
“Hwa kenegeɓza ɗala ma keweɗ aka ŋ rəɗa ca, askwaw.”
36 Dawuda kélene zlan a Gazlavay a heɗe heɗe ana maa a kaɗawaw. A dəwze anta, kámac anta, əy kámpas aza ŋ jeɓ a həzlar jeje anta ege, kárəɗa anta. 37 Cemey, heje maa Gazlavay a gwarzamaza aza ata lamac ca, kárəɗa askwaw. 38 Zlana ege, hune san aka, laghwal zlap ata lapal gay ca, a ndaha ta ara Yesu. Cemey, ma maŋkanaŋkan mala Musa ca, kula ŋ palzahune gay ŋkune ege aza səkwaw. 39 Kaw vayay ma lamza Yesu aza ca, gay anta ege tewtew, əy képeleye aza. 40 Ana ebe ŋghe, hune sla ka kadak kadak ndar ma maa uzəye ma zlap ma mala Gazlavay ege əy zlap wese a ɗaw ŋ ndewzahune səkwaw:
41 “Hune hejəye ma kaŋta ha tata aza ana ma san səkan ege,
hune ŋga ŋkwaɓ,
hune fətek ŋkune!
Sa nala zlan ma dakal ata vah ŋkune ŋghe,
Zlan ma dakal maa kaw ɗala a ghwalzahune ca,
hune kanalamza askwaw.”»
42 Maa ata Pawl ey Barnabas wese, əy damha aza ŋ ujek ma ata rak Gazlavay Yahudu ege ca, hejəye əy zlepetene əy mezenha a pes ma ata zazak ma kandaha ŋ zlap ata ma ŋgha anta zeney. 43 A dəwze maa hejəye əy kéweɗ tata ata leɓec ca, Yahudu ege vəram ey hejəye ma lamza aza ŋ səbar kwakwas Yahudu ege ma karak Gazlavay, əy səbarata ata Pawl ey Barnabas. Malaɓ ege wese əy zlepetene, əy veletene ɓarɓar ŋ nja ka ŋ zəhay Gazlavay kaw vepey.
Ata Sawl ey Barnabas əy baw aha hejəye maa tata Yahudu ege səkwaw
44 Maa pes ma ata zazak wende wese hwas ca, radakal hejəye ma ŋ uzam anta ege tewtew əy ɓecha ŋ zləme zlap mala Bay Madakal. 45 Maa Yahudu ege əy gəre hejəye ma ɓecha ege vəram wese ca, əy la sərah ata Pawl, əy raɓa, əy kaɗaw ma anta səkwaw. 46 Aya, ata Pawl ey Barnabas wese, əy zlepetene kaw a lalak askwaw, əy ŋgaya: «Nene mar ŋ ghwal zlap a Gazlavay ara hune ca, a heɗe a heɗe, cemey, hune kálamza zlap anta səkwaw. Ca, hune kéghem ha ŋkune ege aza, hune káhwas ŋ lem lanja ma kaŋtakw səkwaw səkwaw. Mavəday anta, nene yakzahune aka, nene nda ŋcene kəɗe ara hejəye maa tata Yahudu ege səkwaw. 47 Ŋghe, maa Bay Madakal a zlepeney, a ŋgaya:
“Sa kácahwaw aza ŋ leweɗ hejəye vedəye ege,
ndar hwa detene leweɗ ŋ manhayak tewtew,” a ya.»
48 Maa hejəye vedəye əy zləme zlap ŋgha anta ca, əy sasam, əy həmanza Bay Madakal ata zlap anta. Aya, hejəye maa Gazlavay a mayata ege ŋ lem lanja ma kaŋtakw səkwaw ara mbe, əy kálamza zlap anta aza.
49 Zlap a Bay Madakal a ŋtez ŋ hayak anta tewtew. 50 Cemey, Yahudu ege əy ŋcakwzata weləye maŋcaɗaŋcaɗ ma kahəmanza Gazlavay ege leŋ madakal dakal ma a tama hejəye ma ŋ uzam anta ege, ŋ letene dadawar ŋ ata Pawl ey Barnabas. Əy gamata aza ŋ uzam anta. 51 Ata Pawl ey Barnabas wese, əy ŋtewetene berdeberde ma ata ŋgas tata ege aka, əy nda tata ŋ Əykawnəya. 52 Hejəye ma lamza ma mala Yesu ege aza ma ŋ Antakəya ege cemey, əy ghef a sasam ey a Zəwet ma keweɗ.