Bay Həyrudus a ŋgwavata hejəye ma lamza ma mala Yesu ege aza
12
Ata vah wese ca, bay Həyrudus a mar ŋ ŋgwavata hejəye vedəye ma ata lajav hejəye ma lamza ma mala Yesu ege aza. 2 A təwse, a laɓ ɗala ŋ ja Yakuba, zlaŋgan Yuhana aza, a ŋgezle masalam. 3 Aya, maa a gəre Yahudu ege əy kasasam mavəday, maa a ja Yakuba aza wese ca, a mbal Pəyer zeney. A mbal ca, ata vah mala gwaygwaya maa əy kayaɓa «Gwaygwaya mala peŋ maa səkan ma ata hafza ŋma askwaw.» 4 A dəwze maa a mbal Pəyer aza wese ca, a nahza ŋ daŋgay, a cata sawje ege aka ŋfaɗ ŋfaɗ dəla ŋfaɗ, ŋ həbar ka kadak kadak. Cemey, bay Həyrudus a ɗaw ŋ jene guma ŋ Pəyer anta ca, a tama hejəye a dəwze gwaygwaya Paska mala Yahudu ege. 5 A təwse ca, sawje ege əy kahəbar Pəyer wese ka kadak kadak ŋ daŋgay wese. Cemey, hejəye ma lamza ma mala Yesu ege aza əy karak Gazlavay a unaf teŋguleŋ ata pes ata pes mavəday anta.Malaɓ Gazlavay a palaza Pəyer aza ŋ daŋgay
6 A zaɗaw ma a mpat anta maa Həyrudus a kenejene guma ŋ Pəyer a tama hejəye wese, Pəyer kéjeweye a calalaw ege gbak, a kawan ŋ taba sawje ege gbak. Sawje ege vedəye əy kahəbar ma ujek daŋgay wese zeney yam. 7 A təwse a təwse, malaɓ Bay Madakal a ghwala kusam, la ma ŋ daŋgay wese a weɗ. Aya, a ca ra anta ata ŋgala Pəyer, a fəɗahza, a zlepene, a ŋgaya: «Gwarzam kəcaŋ!» Kəɗe ca, calalaw ege wese, əy pal tata ata ra anta. 8 Malaɓ wese a zlepene, a ŋgaya: «Jaw kanda, ca ŋte ata ŋgas.» Aya, Pəyer a la ana maa malaɓ Gazlavay a zlepene wese. A zlepene zeney, a ŋgaya: «Ca rəgwac ata kusam, səberekey.»
9 Pəyer a damha aza ŋ daŋgay, a səbar malaɓ wese. A təwse, Pəyer ca, kásan səkan maa malaɓ Gazlavay a lene wese, ara səkan ma njenjəwen ca, askwaw, a cakza ca, ara seŋseŋ ma jaw. 10 Aya, əy yakzata dəla sawje ege ma mpar ey dəla sawje ege magbak aka, əy hwasha a ma ujek daŋgay mampakampak a ɓarzlam ma ata nda kəɗe ŋ uzam. Ma ujek anta a zlar teŋguleŋ anta a tama tata, əy damha aza a bəza. Əy nda cekuɗe ende ŋghe ata taf ca, a təwse a təwse, malaɓ Gazlavay wese, a yakza Pəyer aka teŋguleŋ anta.
11 A təwse, Pəyer kásan səkan ma ndewzene wese aza, a ŋgaya: «Na ŋgha ca, sa kegəre njenjəwen, Bay Madakal ma laɓaza malaɓ anta ŋ rehzekey ata ɓardakw bay Həyrudus leŋ ata dadawar maa hejəye Yahudu ege əy deŋza ŋ lekey.»
12 Maa Pəyer a san səkan ma ndewzene wese aza ca, a nda a wata Marəyama, man Yuhana maa əy kayaɓa Markus. Hejəye vəram əy kéɓeceye a təwse, əy karak Gazlavay. 13 Pəyer a ja ma ujek. Haldəma wende aka, a kala zlan a təwse, zlam anta Rawde, a nda ŋ saraza heje ma kaja ma ujek anta. 14 Kəɗe a teh zlam ca, ara Pəyer ma kazlap, kásan ula anta aza, a sasam dakala, mavəday anta, kézlerzene ma ujek askwaw, a zen anta ara hejəye ma a ujek ege wese, a zlepetene, a ŋgaya: «Pəyer mbəy a bəza.» 15 Əy zlepene, əy ŋgaya: «Hwa kawak vaw!» Cemey, haldəma wese, a vas ŋ zlepetene war, a ŋgaya: «Njenjəwen, ara mbe.» Əy zenene, əy ŋgaya: «Wese ca, ara malaɓ anta.» 16 Cemey, Pəyer a kavas ŋ ja ma ujek. Aya, əy ndaha, əy zlarza ma ujek wese ca, əy gəre ca, ara Pəyer. A təwse, ŋkwaɓ kéŋgetene aza mambaza. 17 Aya, Pəyer a letene ra anta ŋ nja ka tete. A təwse, a ŋgeɗetene səkan maa Gazlavay Madakal a lene ŋ damaza ŋ daŋgay. A zlepetene zeney, a ŋgaya: «Hune nda ŋ ghwelzene ma anta ŋ Yakuba leŋ ŋ hejəye vedəye ma lamza ma mala Yesu ege aza.» A dəwze anta, a damha aza a bəza, a nda anta ata la matakan. 18 Maa mapat a la anta ca, sawje ege wese əy zlar ma, əy kasan səkan maa əy kanala səkwaw, əy ŋgaya: «Pəyer anta kábaw anta ŋ vemey?» 19 A təwse ca, bay Həyrudus a zlepetene ŋ hejəye ŋ mpam Pəyer. Cemey, əy kéndewzene askwaw. A təwse, a ɗawza ma anta ara sawje ege ma həbar Pəyer wese, aya, a zlap ŋ jata aza. A dəwze anta, a gwarzam ŋ Yahudəya, a nda anta ŋ Kaysarəya, a nja a təwse walaŋ cekuɗe.
Lamac bay Həyrudus
20 Bay Həyrudus kághwaɗ anta mambaza ata hejəye ma ŋ uzam Təyrus ege ey hejəye ma ŋ uzam Səydaŋw ege. A təwse, əy jav ma tata aka, ŋ nda ara mbe. Mavəday anta, əy velene səlay ŋ Balastus, mala zlan madakal ma həbar ujek bay Həyrudus. A dəwze anta, əy nda ara bay Həyrudus, ŋ jene mbahw, mavəday, səkan ta zam tata ca, a ndaha aka ta ŋ hayak bay Həyrudus anta. 21 Aya, pes maa əy slaŋgal ma wese káhwasha aza, bay Həyrudus a ca rəgwac bay anta, a nda, a nja ka ata lanja bay, a zlepetene ŋ hejəye. 22 Cemey, maa a kazlap wese ca, hejəye əy ja ula, əy ŋgaya: «Ma kazlap ŋghe ca, ara kule, səkwaw ca, ɗala səkwaw!» 23 A təwse a təwse, malaɓ Bay Madakal a nehzene dawar ata bay Həyrudus wese, mavəday káɗaw ŋ pərasl ɓardakw Gazlavay aza. Aya, gwaŋkwaɗ ma a dəmas anta ege əy zamaw, a dəwze anta, a mac anta. 24 Cemey, zlap Gazlavay a kavas ŋ ŋtez a tama a tama. 25 Maa ata Barnabas ey Sawl, əy kámaɗza zlan tata aza ŋ Urusaləyma ca, əy zen tata, əy ŋta Yuhana maa əy kayaɓa Markus ara.