Pəyer a zlap a tama lajav hejəye ma lamza ma mala Yesu ege aza ŋ Urusaləyma
11
Malaɓ Yesu ege leŋ hejəye ma lamza ma mala Yesu ege aza ma ŋ hayak Yahudəya ege, əy zləme ca, hejəye ma tata Yahudu ege səkwaw, əy kálamza zlap Gazlavay aza yam. 2 Aya, maa Pəyer a zenha aza ŋ Urusaləyma ca, Yahudu ege ma lamza ma mala Yesu ege aza, əy zen ma a heɗe, 3 əy zlepene, əy ŋgaya: «Hwa dam a wata hejəye ma mandulay tata ege əy kézleye askwaw leŋ hune zam səkan ŋ la anta ca, ŋ vay!» 4 A təwse ca, Pəyer a ŋgeɗetene səkan ma laha ege tewtew teŋguleŋ teŋguleŋ, a zlepetene, a ŋgaya: 5 «Sa ŋ uzam Jawpe, sa karak Gazlavay. A təwse, a lekey ana seŋseŋ, sa gəre səkan wende aka, a nja ana gwadawre ma dakal, mazlam anta ege ŋfaɗ tata əy kéveɗeye, a tadakwaha ka mgba ata uzlaf, kəɗe ata hayak hwas ara sa. 6 Kəɗe, sa sar la kadak kadak ŋma, sa gəre səkan ma kanda ŋgas ŋfaɗ ege, səkan damaw ege, ma kenjew dəmas ata hayak ege leŋ vəgem ege. 7 A təwse, sa zləme ula a jaha, a zlepekey: “Pəyer, gwarzam, fatata səkan ŋghe ege, zamata!” 8 Cemey, sa zenene, sa ya: “Andəwse səkwaw! Bay Madakal, nja naka, kaw sa kázam səkan maa kwakwas ŋcene a tak ka ŋ zam leŋ səkan ma kadak səkwaw ca, askwaw.” 9 Ula wese, a jaha mgba ata uzlaf zeney, a zlepekey, a ŋgaya: “Səkan maa Gazlavay a bawza aza tuwah ca, hwa ɗaw ŋ zlap ara səkan ma kadak səkwaw, səkwaw.” 10 Cemey, səkan anta, a laha ana ebe ŋghe, gas mahkaɗ. A dəwze anta, səkan ma da gwadawre wese, a zen anta mgba ata uzlaf ata la anta. 11 A təwse a təwse, hejəye mahkaɗ əy hwasha a wata heje maa nene ŋma wese. Ara ɗala ma ŋ Kaysarəya ma laɓata ara sa. 12 Zəwet ma keweɗ, a zlepekey, a ŋgaya: “Hune nda na na ŋgha a hejəye ŋghe anta ege, kaw hwa ɗaw ŋ deŋ ŋkwaɓ səkwaw.” Tel nene nda ŋcene tewtew zlaɓa hejəye ma ŋkwah ma lamza ma mala Yesu aza ŋghe ege, nene hwas tewtew ŋcəne, nene dam a wata Kwarneləyus, heje ma yekey wese. 13 A təwse, Kwarneləyus a ŋgeɗeney maa a gəre malaɓ Gazlavay kégereye a wata anta, a zlepene, a ŋgaya: “Laɓ ɗala ŋ Jawpe ŋ yaɓa Səymawn, maa əy kayaɓa Pəyer. 14 A naghwalzahwaw taf ma ata rehzahwaw, hwa zlaɓa hejəye ma a wata ŋkwa ege tewtew.” 15 Aya, maa sa kamar ŋ zlap ca, Zəwet ma keweɗ a tadakwha ata tata tewtew, ana maa a mar ŋ tadakwha ata heje. 16 A təwse ca, sa senzene ata zlap Bay Madakal, maa, a ŋgaya: “Yuhana ca, kábanata hejəye a yam baptəysma, cemey, hune ca, əy nabanahune a Zəwet ma keweɗ.” 17 Gazlavay kéveletene Zəwet anta ma keweɗ aza, ana maa a valaheje ŋ heje hejəye ma lamza ma mala Bay Madakal Yesu Almasəyhu ege aza. Ca, sa ca, sa kula ŋ tak Gazlavay ka ŋ la səkan maa a kaɗaw vaw?» 18 A dəwze maa əy kézləme zlap ŋghe ege aza ca, unaf tata ege əy deɓ, əy mar ŋ həmanza Gazlavay, əy ŋgaya: «Enjekeɗe Gazlavay kéveletene taf ŋ hejəye ma tata Yahudu ege səkwaw ŋ bawza lanja tata aza a tama anta leŋ ŋ lem lanja ma taŋtaŋ yam!» əy ya.Lajav hejəye ma lamza ma mala Yesu ege aza ŋ Antakəya
19 A dəwze maa əy kája Etəyen aza ca, əy mar ŋ ŋgwavata hejəye ma lamza ma mala Yesu ege aza. A təwse ca, əy kéweɗ tata mavəday anta. Hejəye vedəye əy nda kəɗe ŋ Fəynəykəya, ŋ Kəypərus leŋ ŋ Antakəya. A təwse ca, əy ghwelzetene zlap Gazlavay ca, ŋ Yahudu ege gagaha. 20 Cemey, vedəye, ma ŋ Kəypərus ey ŋ Səyrene, əy hwas ŋ Antakəya ca, əy ghwelzetene Ma Mewe ma Taŋtaŋ a Bay Madakal Yesu ŋ hejəye ma tata Yahudu ege səkwaw. 21 Ɓarɓar Gazlavay Madakal mbəy ata tata. Mavəday anta, hejəye vəram əy lamza zlap anta, əy zenha aza ara Bay Madakal.
22 Maa lajav mala hejəye ma lamza ma mala Yesu ege aza ma ŋ Urusaləyma əy zləme ma anta ca, əy laɓza Barnabas ŋ Antakəya. 23 Maa a hwas a təwse ca, a gəre Gazlavay kécetene bəzla ka ata hejəye ma lamza ma mala Yesu ege aza. A təwse, a sasam dakala, a veletene ɓarɓar ŋ tata tewtew tata ŋ nja ka kadak kadak a tama Bay Madakal a unaf teŋguleŋ. 24 Barnabas anta ca, ara ɗala ma taŋtaŋ, ghef a Zəwet ma keweɗ leŋ. Mavəday anta, hejəye vəram əy kálamza ma mala Bay Madakal aza.
25 A dəwze anta ca, Barnabas a nda ŋ uzam Tarsus, ŋ mpam Sawl. 26 Aya, maa a ndewzene aza ca, a daza ŋ uzam Antakəya. A təwse, əy nja va teŋguleŋ ŋ lajav hejəye ma lamza ma mala Yesu ege aza, əy kasasərakzata hejəye vəram. Ŋ uzam Antakəya ana maa əy mar ŋ cetene zlam ŋ hejəye ma lamza ma mala Yesu ege aza, a «hejəye Almasəyhu ege».
27 Ata vah wese ca, uzəye ma zlap ma a Gazlavay ege vedəye əy gwarzamha aka ŋ Urusaləyma kəɗe ŋ Antakəya. 28 Aya, ɗala teŋguleŋ ŋ taba tata, zlam anta Agabus, a gwarzam a zlap a ɓarɓar Zəwet ma keweɗ, a ŋgaya: «Metes ma dakal slaɓ ŋ la ŋ manhayak tewtew.» Njenjəwen, metes anta kála ata vah maa Kalawdəyus ara bay mala hayak Rawma. 29 Aya, hejəye ma lamza ma mala Yesu ege aza əy jav ma tata aka, əy ŋgaya, kaw vayay mavalza səkan maa mbəy kula ŋ valza, ŋ leɓzetene ŋ zlaŋgan tata ege ma ŋ Yahudəya. 30 A təwse, əy law, ana mbe, əy leɓzetene səkan ma cakha anta ŋ madakal dakal ma a tama ege, ta ŋ ra ata Barnabas ey Sawl.