Pəyer a ghwelzene zlap Gazlavay ŋ Kawrneləyus
10
Heje wende ŋ uzam Kaysarəya aka, zlam anta Kawrneləyus. Heje anta ca, ara madakal sawje ege temere, ŋ taba sawje ege mala Rawma maa əy kayaɓa sawje ege ma ndaha aka ŋ hayak Əytaləya. 2 A kasəbar taf Gazlavay a heɗe a heɗe, mbe, zlaɓa hejəye ma a wata anta ege tewtew, əy kewenzene ha ŋ Gazlavay. A kecekzetene dakala ŋ metetekw ege ma ŋ taba Yahudu ege, a karak Gazlavay ata pes ata pes. 3 A pes wende aka, a la anta ler mahkaɗ mala mackwahw, malaɓ Gazlavay a ghwelene kusam ŋ Kawrneləyus, aya, a gəre malaɓ anta kadak kadak. A təwse, a dam ara mbe, a yaɓa, a ŋgaya: «Kawrneləyus!» 4 A təwse ca, a sarza malaɓ wese, kálalak anta, aya, a zlepene, a ŋgaya: «Ma laha vemey, Bay Madakal?» Aya, malaɓ wese a zenene, a ŋgaya: «Gazlavay kézləme larak ŋkwa ey maa hwa kécekzetene ŋ metetekw ege aza, kéheseŋzahwaw askwaw. 5 Laɓzata hejəye na na ŋgha ŋ uzam Jawpe, ŋ yaɓa heje wende a təwse aka, zlam anta Səymawn, maa əy kayaɓa Pəyer. 6 Mbəy a wata Səymawn, mala zlan bukəla, ujek anta mbəy mbermber a ma ŋtele.» 7 A dəwze maa malaɓ Gazlavay ma zlepene wese ɗak ca, Kawrneləyus a yahata mala zlan anta ege gbak leŋ sawje teŋguleŋ ŋ taba sawje anta ege, ma kelene zlan zlezle. Sawje anta ca, ara ɗala ma kasəbar taf Gazlavay a unaf teŋguleŋ. 8 A təwse, a ŋgeɗetene ma ege maa malaɓ Gazlavay a zlepene wese ege tewtew. A dəwze anta, a laɓzata ŋ uzam Jawpe ara Pəyer.9 A mpat anta, hejəye maa Kawrneləyus a laɓzata ege wese, əy kanda ata taf, əy slaɓ ŋ hwas ŋ uzam Jawpe anta. A la anta pes wereywerey, Pəyer a tev mgba ata debeber ujek ŋ rak Gazlavay. 10 Aya, maa a karak Gazlavay wese ca, metes a kajaw, a kaɗaw uda ŋ zamaw. Maa əy kempemene səkan ŋ zam wese ca, a lene ana seŋseŋ, a gəre Gazlavay a keghwelzene səkan ege. 11 A gəre la ma mgba ata uzlaf kézlereye, səkan ana gwadawre ma dakal a katadakwha ata hayak, mazlam anta ege ŋfaɗ tata əy kéveɗeye. 12 Ŋ gwadawre anta ca, ŋseŋ səkan ma kanda ŋgas ŋfaɗ ege tewtew, ŋseŋ ma kenjew dəmas ata hayak tewtew leŋ ŋseŋ vəgem ege tewtew. 13 A təwse, ula a jaha ŋma, a zlepene, a ŋgaya: «Pəyer! Gwarzam, fatata səkan ŋghe ege, zamata!» 14 Cemey, Pəyer a zenene, a ŋgaya: «Kay, Bay Madakal, nja naka, kaw sa kázamha səkan maa kwakwas ŋcene a tak ka ŋ zam leŋ səkan ma kadak səkwaw, askwaw.» 15 Ula wese, a jaha zeney, a zlepene, a ŋgaya: «Səkan maa Gazlavay a bawza aza tuwah ca, hwa ɗaw ŋ zlap ara səkan ma kadak səkwaw, səkwaw.» 16 A laha ana ebe ŋghe, gas mahkaɗ. Aya, a təwse a təwse, səkan wese zen a zen anta mgba ata uzlaf ata la anta. 17 Pəyer a kedeŋza səkan maa Gazlavay a ghwelzene wese, a ɗawza ha anta, a ŋgaya: «Səkan ma laha ŋgha anta ca, a ɗaw ŋ ghwelzekey ca, ma vekey»? Aya, a təwse ca, hejəye maa Kawrneləyus a laɓata ege wese, əy kaɗawza wata Səymawn, kəɗe ca, ŋ njəkeɗe, əy kégereye ca, a mejəkeɗ anta. 18 Əy ɗaf ma a mazlazlay, əy ɗawzata hejəye, əy ŋgaya: «Səymawn Pəyer ca, a nja ete ŋghe vaw?» 19 Pəyer ca, a kedeŋza səkan maa Gazlavay a ghwelzene wese war. Cemey, Zəwet Gazlavay, a zlepene, a ŋgaya: «Ŋghe, hejəye vedəye mahkaɗ əy kampamahwaw. 20 Gwarzam, tadakw ara tata, hune nda na na ŋgha tewtew, kaw hwa ɗaw ŋ deŋ ŋkwaɓ səkwaw, mavəday ara sa ma laɓata!»
21 Aya, Pəyer a tadakw, a nda ara hejəye wese ege, a zlepetene, a ŋgaya: «Ara sa, heje maa hune kampam wese. Ca, ma dahune ca, vemey?» 22 A təwse, əy zenene, əy ŋgaya: «Nene ndaha ca, ara Kawrneləyus, madakal sawje ege ma leɓeney. Heje anta mbəy tuwah, a ketehzene zlam ŋ Gazlavay kadak kadak. Yahudu ege tewtew əy kaghwalza ma anta, ara ɗala ma taŋtaŋ. Malaɓ Gazlavay kándaha ara mbe, a kézlepene ŋ yahwaw a wata anta, ndar a zləme ma maa hwa kenezlepene.» 23 Aya, Pəyer a lamzata, a damzata a ujek, a veletene la ŋ wan a zaɗaw wese.
Pəyer a nda a wata Kawrneləyus
A mpat anta, a gwarzam, əy nda tewtew əy ata hejəye ma mahkaɗ ege wese. Hejəye vedəye ma lamza ma mala Yesu ege aza ma ŋ uzam Jawpe ege əy cetene ma. 24 A vagumtaɗ anta, a gwar ŋ Kaysarəya. A təwse ca, Kawrneləyus káyahata van anta ege ey ŋgama anta ege ma njenjəwen ege aka, əy kahəbarata. 25 Aya, maa Pəyer a gwarha ca, Kawrneləyus a ndaha a ŋgelene ma, a gəleɓene aka a tama ŋ həmanza dakala. 26 Cemey, Pəyer a gwarzamza, a zlepene, a ŋgaya: «Gar aka, sa ca, sa heje dakənak ana hwa yam.» 27 Aya, a kezlepene ara ŋ Kwarneləyus wese, a dam a ujek ata la maa a ndew ata hejəye vəram, əy kéɓeceye. 28 Pəyer a zlepetene, a ŋgaya: «Njenjəwen, hune kasan ca, kawkwas mala Yahudu ege ca, képelzetene taf ŋ Yahudu ege ŋ mbal ŋgama leŋ ŋ dam a wata mbəlam ege ca, askwaw. Cemey, Gazlavay kéghwelzekey aza, sa ɗaw ŋ sar kaw vayay ana ɗala ma kadak səkwaw səkwaw, ma dama a heɗe səkwaw. 29 Mavəday anta, kaw sa kédeŋ ŋkwaɓ ata maa hwa yekey ca, askwaw. Ca, na ŋgha ca, sa ɗaw ŋ san, hune yekey ca, ŋ vay?»
30 A təwse, Kawrneləyus a zenene, a ŋgaya: «Kála anta wan mahkaɗ, a ler mahkaɗ mala mackwahw ana ebe ŋghe, sa karak Gazlavay a wata naka. A təwse a təwse, sa gəre heje wende aka a tama naka, rəgwac ma ata kusam anta, tezlezle, 31 a zlepekey, a ŋgaya: “Kawrneləyus, Gazlavay kézləme larak ŋkwa aza, kéheseŋza taŋtaŋ ŋkwa maa hwa letene ŋ metetekw ege askwaw. 32 Laɓzata hejəye ŋ Jawpe, ŋ yaɓa Səymawn, maa əy kayaɓa Pəyer, mandaha ete ŋghe. Mbəy a wata Səymawn, ma kala zlan bukəla. Wata Səymawn anta ca, mbəy a ma ŋtele.” 33 Sa laɓzata hejəye kəcaŋ ata hwa ŋ yahwaw ca, mavəday anta. Hwa yam, hwa kálamza aza, hwa kándaha aza. Na ŋgha ca, nene kéɓeceye tewtew ete ŋghe a tama Gazlavay ŋ teh zlap ege maa Bay Madakal a gwarzamahwaw ŋ zlepeney tewtew,» a ya.
Pəyer a ghwal zlap a wata Kwarneləyus
34 Aya, Pəyer, a ŋgaya: «Na ŋgha ca, sa kasan njenjəwen, Gazlavay a kaŋtar ma aha ɗala askwaw. 35 Kaw vayay ma wenzene ha aka ŋ Gazlavay, ma la səkan ma tuwah, kaw heje anta ara ŋseŋ vekey ca, Gazlavay a nalamza. 36 Gazlavay kálaɓaza zlap anta ŋ hejəye Əysərayəyla ege. Zlap anta ca, ara Ma Mewe ma Taŋtaŋ mala lanja ŋ zəhay. A laɓaza ta ara Yesu Almasəyhu, Bay Madakal a hejəye tewtew. 37 Hune kasan səkan ma laha ŋ hayak Galəyləy, a dəwze anta, ŋ hayak Yahudəya tewtew, a dəwze maa Yuhana a ghwelzetene zlap anta ata laban a yam baptəysma. 38 Hune kasan ca, Gazlavay káca Yesu ɗala Nasaratu aza ŋ bay, kévelene Zəwet ma keweɗ leŋ ɓarɓar anta aza. Yesu anta kánda kaw a katay, kéletene taŋtaŋ ŋ hejəye, kérehzata hejəye maa malula a mbalata aza ege tewtew, mavəday Gazlavay mbəy a mbe.
39 «Nene ca, nene kégəre səkan ege tewtew maa a lata ata nje ŋcene ege ŋ hayak Yahudu ege leŋ ŋ Urusaləyma, əy kádar ka ata mpe gafaŋgal, əy kája aza. 40 Cemey, ata wan ma mahkaɗ anta ca, Gazlavay kágwarzamaza aza ata lamac, képelzene taf ŋ ghwalza kusam anta. 41 A ghwalza kusam anta ca, ŋ hejəye tewtew səkwaw, cemey, ŋ nene maa Gazlavay a meyeney ka zlezle ŋ ghwal səkan maa nene gəre a nje ŋcene ege. A dəwze maa Gazlavay a gwarzamaza aza ata lamac ca, nene kázam səkan leŋ nene kása səkan ŋ la anta. 42 A zeney, Yesu anta kézlepeney ŋ ghwelzetene Ma Mewe ma Taŋtaŋ ŋ hejəye leŋ ŋ ghwelzetene ca, njenjəwen, Gazlavay káca aza ŋ jetene guma ŋ hejəye ma a nje ege ey ŋ hejəye ma mac tata ege. 43 Uzəye ma zlap ma Gazlavay ege tewtew əy kazlap a heɗe, əy ŋgaya: “Kaw vayay ma lamza ma anta aza ca, Gazlavay a nepelzene gay anta ege aza ta ŋ ɓarɓar zlam anta.”»
Zəwet ma keweɗ a tadakwha ata hejəye ma tata Yahudu ege səkwaw
44 Maa Pəyer a kazlap kwagwa ca, Zəwet ma keweɗ a tadakwha ata hejəye tewtew ma keteh zlap ege anta wese. 45 A təwse ca, Yahudu ege ma lamza ma mala Yesu aza ege, maa əy ndaha tewtew əy ata Pəyer wese, əy káŋga ŋkwaɓ dakala, mavəday maa əy gəre Gazlavay a tamza Zəwet ma keweɗ ata hejəye ma tata Yahudu ege səkwaw wese yam. 46 Yahudu ege wese əy zləme ca, hejəye ma tata Yahudu ege səkwaw wese, əy kazlap a ma ege vedəye vedəye, əy kahəmanza madakal mala Gazlavay. Aya, Pəyer, a ŋgaya: 47 «Na ŋgha ca, hejəye ŋghe anta ege əy kélem Zəwet ma keweɗ aza, ana maa heje lem yam. Ca, ma kanatakata aka ŋ lem laban aza a yam baptəysma ca, vayay?» 48 A təwse ca, Pəyer a zlepetene, əy mabanata aza ŋ yam baptəysma a zlam Yesu Almasəyhu. Aya, hejəye ma tata Yahudu ege səkwaw wese, əy rak Pəyer ŋ nja ka ara tata wan ege cekuɗe.