Sawl kálamza ma Yesu aza
9
Ata vah wese ca, Sawl a kavas ŋ setene gef ŋ hejəye ma lamza ma mala Bay Madakal ege aza, a zlepetene, a ŋgaya, a najata aza. Aya, a nda ara madakal mala kwakwas, 2 a ɗawza, meŋterene ɗerewel ege ŋ veletene ŋ madakal dakal a ujek ma ata rak Gazlavay ma ŋ Damas ege, ŋ ghwelzetene ca, mada Sawl kéndew ata hejəye ma kasəbar Taf Bay Madakal ege, mawal ege ey weləye tewtew ca, a mbalata, a jawata, a jeɓzata ŋ Urusaləyma.3 Maa Sawl mbəy ata taf, mbəy slaɓ ŋ hwas ŋ Damas ca, a təwse a təwse, leweɗ a ndaha aka a mgba ata uzlaf, a weɗ a heɗe. 4 A təwse, a ndav ata hayak, aya, a zləme ula ɗala a kayaɓa, a kezlepene, a ŋgaya: «Sawl, Sawl, hwa sekey gef ana ebe ŋghe ca, ŋ vay?» 5 Sawl wese, a ɗawza, a ŋgaya: «Hwa vayay, Bay Madakal?» Aya, ula wese a zenene, a ŋgaya: «Ara sa, Yesu, maa hwa kesene gef wese. 6 Cemey, gwarzam, nda ŋ uzam Damas, a təwse, əy naghwalzahwaw səkan maa hwa kanalaw.» 7 A təwse, hejəye maa əy nda tewtew ege əy ata Sawl wese, əy gar aka, kaw əy kula ŋ zlap səkwaw. Əy kezləme ula ɗala a kazlap, cemey, kaw əy kegəre ɗala askwaw. 8 Aya, Sawl a gwarzam ata hayak, a zlarza nje anta ca, kaw kula ŋ gəre la səkwaw. Hejəye anta ege, əy mbelene ra anta, əy jeɓza ŋ uzam Damas. 9 A təwse, wan mahkaɗ kaw a kegəre la askwaw, a kazam uda askwaw, a kasa yam askwaw.
10 Ŋ uzam Damas anta ca, heje ma lamza ma mala Yesu aza a təwse aka, zlam anta Ananəyas. Bay Madakal a ghwelene kusam, a yaɓa a ŋgaya: «Ananəyas!» A təwse, a zenene, a ŋgaya: «Away, Bay Madakal, sa cakwa.» 11 Aya, Bay Madakal a zlepene, a ŋgaya: «Gwarzam, nda na ŋgha ta ŋ taf maa əy kayaɓa “taf Ma Gbar”, dam a wata Yahuda, ɗawza heje wende a təwse aka zlam anta Sawl ma ŋ uzam Tarsus, a kerekekey. 12 Cemey, maa a kerekekey wese ca, a gəre heje wende aka, zlam anta Ananəyas kádamha aza, káca ra anta aka a heɗe, ndar a lem ŋ gəre la zeney.»
13 Ananəyas a zenene, a ŋgaya: «Bay Madakal, hejəye vəram əy kézlepekey ma ege ata heje ŋghe anta. Əy ŋgaya, késetene gef mambaza ŋ hejəye ma lamza ma ŋkwa ege aza ŋ Urusaləyma. 14 A ndaha ete ŋghe ca, ara madakal dakal mala kwakwas ege əy ma pelzene taf ŋ mbalata hejəye tewtew ma kaya zlam ŋkwa ege.» 15 Cemey, Bay Madakal a zlepene ŋ Ananəyas wese, a ŋgaya: «Gwarzam, nda, mavəday sa kámay heje ŋghe anta aza, ndar a la zlan naka, a ghwelzetene ŋ hejəye maa tata Yahudu ege səkwaw, ŋ bay tata ege leŋ ŋ hejəye Əysərayəyla ege, əy mesenekey. 16 Sa, a ha naka, sa neghwelzene gef maa a kanasa tewtew, ŋ zlan anta, mavəday zlam naka.»
17 Aya, Ananəyas a gwarzam, a nda. A hwas a wata wese, a ndewzene ŋ Sawl. A təwse, a ca ra anta ata ha anta, a zlepene, a ŋgaya: «Sawl, zlana, ara Bay Madakal Yesu ma leɓekey ara hwa. Ara mbe ma ghwalahwaw kusam anta ata taf maa hwa kandaha ete ŋghe wese. A leɓekey ca, ndar hwa zen ŋ gəre la zeney, ndar Gazlavay a ghefzahwaw a Zəwet ma keweɗ.» 18 Kəɗe ca, səkan ege ana dawan ŋkəlef a nahha aka ŋ nje Sawl, a təwse a təwse, nje anta a zlar anta. A gwarzam, a lem laban a yam baptəysma. 19 A dəwze anta, a zam uda, a lem ɓarɓar anta zeney.
Sawl a ghwal zlap Gazlavay ŋ uzam Damas
Sawl kánja wan ege cekuɗe ara hejəye ma lamza ma mala Yesu ege aza, ŋ uzam Damas. 20 Kəcaŋ, a nja ŋ ujek ma ata rak Gazlavay ege, a ghwalza Yesu ca, ara Mba Gazlavay. 21 Hejəye tewtew ma kezləme zlap anta ege, əy káŋga ŋkwaɓ, əy ŋgaya: «Heje ŋghe ca, ara heje ma kuɗapzata hejəye ma kaya zlam Yesu ege ŋ Urusaləyma wese askwaw aza vaw? A ndaha ete ŋghe ca, ŋ mbalata, ŋ jeɓzata ara madakal mala kwakwas ege askwaw aza vaw?» 22 Cemey, ata pes ata pes, Sawl a kavas ŋ ghwal zlap Gazlavay a ɓarɓar, a kaghwalza ca, «Yesu ara Almasəyhu.» Ana ebe ŋghe, Yahudu ege ma uzam Damas, əy kasan ma maa əy kenezene səkwaw.
23 A dəwze wan ege vəram, Yahudu wese ege, əy jav ma tata, ŋ ja Sawl aza. 24 Zaɗaw ey pes, əy kahəbar ma ujek ege mala uzam, ŋ mbal Sawl, ndar əy jaza. Cemey, Sawl anta ca, kézləme səkan maa əy kaɗaw ŋ lene aza. 25 Aya, a zaɗaw wende aka, madarlaŋw anta ege, əy ca ŋ ujam, əy damza ta ŋ uley ma ata mahwal ma dərezl uzam Damas anta, əy tadakwaza a serek kəɗe ata hayak ta ŋ kəva wende.
Sawl a zenha ŋ Urusaləyma
26 Sawl a zenha ŋ Urusaləyma, a mpam taf ŋ jav a hejəye ma lamza ma mala Yesu ege aza. Cemey, hejəye anta ege tewtew tata əy kalalak tata a heɗe, əy deŋza ca, Sawl anta kála anta ŋ ɗala ma kálamza ma mala Yesu aza njenjəwen ca, askwaw. 27 Aya, Barnabas a ŋta Sawl, a jeɓza ara malaɓ Yesu ege. A təwse, a ghwelzetene ma ma ata Sawl maa a gəre Bay Madakal ata taf Damas, maa Bay Madakal a zlepene leŋ maa a ghwalza ma mala Yesu ŋ hejəye ma ŋ uzam Damas ege, kaw a lalak askwaw. 28 Mar aka a pes wese, Sawl kénjeye ara malaɓ Yesu ege, əy katawar tewtew ŋ Urusaləyma. Sawl anta a kazlap a zlam Bay madakal Yesu, kaw a lalak askwaw. 29 A zeney, a kezlepetene ŋ Yahudu ege ma kazlap ma Yunanəyŋkaw ege, a kaja səbakw a tata. Cemey, a hejəye anta ege ca, əy kampam taf ŋ ja aza. 30 Aya, hejəye ma lamza ma mala Yesu ege aza, əy zləme maa əy kaɗaw ŋ jaza wese ca, əy jeɓza ŋ uzam Kaysarəya, əy zlaŋza kəɗa ŋ uzam Tarsus.
31 Ata vah wese ca, lajav hejəye ma lamza ma mala Yesu ege aza, ma ŋ hayak Yahudəya, ŋ hayak Galəyləy leŋ ma ŋ hayak Samarəya tewtew, əy kénjeye a zəhay. Ata pes ata pes, əy kelem ɓarɓar, əy kewenzene ha aka ŋ Bay Madakal ata lanja tata. Əy kafal a tama a tama, mavəday Zəwet ma keweɗ a kecekzetene.
Pəyer a rehza Ayneyas aza ŋ dawar anta
32 Pəyer a katawar ŋ hayak ege tewtew. A pes wende aka, a nda ŋ sarata hejəye ma lamza ma mala Yesu ege aza ŋ uzam Ləyda. 33 A təwse, a ndewzene ŋ heje wende aka, zlam anta Ayneyas, mbəy halɓaya, va jamahkaɗ, kéweneye ata lawan anta. 34 Pəyer a zlepene, a ŋgaya: «Ayneyas, Yesu Almasəyhu kérehzahwaw aza. Gwarzam, ŋta lawan ŋkwa a ha ŋkwa.» A təwse a təwse, heje wese, perce a gwarzam. 35 Hejəye tewtew ma ŋ uzam Ləyda ege ey ma ŋ Sarawn ege, maa əy gəre heje wese ca, əy zenha aza ara Bay Madakal.
Pəyer a gwarzamaza Tabəyta aza ata lamac
36 Wala wende aka ŋ uzam Jawpe, zlam anta Tabəyta, əy yaɓa a ma Yunanəyŋkaw ege ca, Dawrkas, ana zlap ca, meŋ. Ara wala ma lamza ma mala Yesu aza. Ata pes ata pes, a kala zlan ma taŋtaŋ, a kecekzetene ŋ hejəye metetekw ege. 37 Cemey, ata vah wese ca, dawar kánahza ata hayak, kámac anta. A dəwze maa əy banza ca, əy wanza ka a ujek ma mgba ata ha a ujek. 38 Hejəye ma lamza ma mala Yesu ege aza ma ŋ uzam Jawpe ege əy zləme ca, Pəyer mbəy Ləyda. Uzam Ləyda anta mbermber a uzam Jawpe anta. Aya, əy laɓ hejəye gbak a heɗe ŋ yaɓa, əy zlepene, əy ŋgaya: «Pəyer, mbahw ndaha kəcaŋ a wata ŋcene» 39 A təwse a təwse, Pəyer tel əy nda a hejəye wese ege. Maa a hwas a təwse ca, əy jeɓza delele a ujek ma mgba ata ha wese. Weləye mce ma a təwse ege tewtew əy ndaha ara mbe, əy kahanha ara. A təwse ca, əy ghwelzene rəgwac ege maa Tabəyta anta a jata ata vah maa mbəy a həzlar tata ule. 40 A təwse ca, Pəyer a damata hejəye aza tewtew a bəza. Aya, a gəleɓ, a rak Gazlavay. A dəwze anta, a bawha tama kəɗe aha mce wese, a ŋgaya: «Tabəyta, gwarzam.» Tabəyta a zlar nje, aya, maa a gəre Pəyer ca, a gwarzam, a nja aka. 41 Pəyer a mbal ŋ ra, a gwarzamza. A dəwze anta a yahata hejəye ma lamza ma mala Yesu ege aza leŋ weləye mce ege wese, a ghwelzetene Tabəyta wese, mbəy nje. 42 Hejəye ma ŋ Jawpe ege tewtew əy zləme ma anta, aya, hejəye vəram əy lamza ma mala Bay Madakal. 43 Pəyer kánja wan dakala ŋ Jawpe a wata heje wende aka, zlam anta Səymawn, ara ɗala ma la zlan bukəla.