8
Maa əy ja Etəyen aza ca, a ndəremzene aza ŋ Sawl.Sawl a setene gef ŋ hejəye ma lamza ma mala Yesu ege aza
A pes wese ca, əy mar ŋ sene gef mambaza ŋ lajav mala hejəye ma lamza ma mala Yesu ege aza, ŋ Urusaləyma. Hejəye anta ege tewtew, əy kéweɗ tata kəɗe ŋ hayak Yahudəya ey ŋ hayak Samarəya. Ma menha a təwse ca, malaɓ Yesu ege gagaha. 2 Aya, hejəye ma kasəbar taf Gazlavay ege a unaf ma teŋguleŋ əy mpas Etəyen wese, əy han mce anta dakala.
3 Cemey, a Sawl ca, a kampam taf ata gwaya ŋ kuɗapza lajav hejəye ma lamza ma mala Yesu ege aza. A nda ata ujek ata ujek, a mbalata mawal ege ey weləye, a nahzata ŋ daŋgay. 4 Hejəye ma lamza ma mala Yesu ege aza ma weɗ tata ege wese, əy kaghwalza Ma Mewe ma Taŋtaŋ kaw a katay, ata la maa əy kanda.
Fəyləyp a ghwalza Ma Mewe ma Taŋtaŋ ŋ Samarəya
5 Aya, Fəyləyp a nda ŋ uzam wende aka, ŋ hayak Samarəya, a ghwelzetene Ma Mewe ma Taŋtaŋ ata Almasəyhu ŋ hejəye ma a təwse ege. 6 Maa hejəye əy kezləme ma maa Fəyləyp a keghwelzetene leŋ əy kegəre zaɓəla ege vedəye maa a kalata ata nje tata ca, əy tehzene zlam kadak kadak tewtew tata a unaf ma teŋguleŋ. 7 Aya, zəwet malula ege vəram əy damha aza ŋ hejəye ma kadawar ege, əy ja ula a mazlazlay. Hejəye ma halɓaya ege leŋ ma ŋgas gwesleleŋ ege vəram, əy kéreh tata ŋ dawar tata ege. 8 Hejəye ma ŋ uzam anta ege əy kasasam dakala mambaza.
9 Cemey, heje wende ŋ uzam anta a təwse aka, zlam anta Səymawn, a kala zaɓəla ege. Zaɓəla anta ege əy keŋgetene ŋkwaɓ dakala mambaza ŋ hejəye ma ŋ Samarəya ege. Heje anta ca, káca ha anta aza ŋ ɗala ma dakal. 10 Mavəday anta, hejəye tewtew, uzəye ey madakal ege əy ketehzene zlam kadak kadak. A təwse, əy ŋgaya: «Heje ŋghe ca, ara ɓarɓar Gazlavay maa əy kayaɓa “Ɓarɓar ma Dakal.”» 11 Hejəye anta ege, əy tehzene zlam ca, mavəday va vəram a keŋgetene ŋkwaɓ ta ŋ zaɓəla ege maa a kalata. 12 Cemey, maa Fəyləyp a ghwelzetene Ma Mewe ma Taŋtaŋ a lazam bay a Gazlavay ata hejəye leŋ ata zlam Yesu Almasəyhu ca, mawal ege ey weləye ma lamza ma anta ege aza, əy lem laban a yam baptəysma. 13 Kaw Səymawn wese yam, kálamza ma anta aza ŋ unaf anta, kában aza a yam baptəysma. Aya, a səbar Fəyləyp wese, kaw a kayakza səkwaw. A təwse ca, ŋkwaɓ kéŋgene aza mambaza ata zaɓəla ege leŋ ata səkan ma kaŋga ŋkwaɓ ege maa Fəyləyp a kalata.
14 Malaɓ Yesu ma ŋ Urusaləyma ege, əy zləme ca, hejəye ma ŋ Samarəya ege, əy kálamza zlap Gazlavay aza, aya əy leɓzetene ata Pəyer ey Yuhana. 15 Maa əy hwas ŋ Samarəya wese ca, əy rak Gazlavay ata hejəye wese ege, ndar əy lem Zəwet ma keweɗ. 16 Mavəday Zəwet ma keweɗ kátadakwha kaw ata ɗala teŋguleŋ ŋ taba tata kwagwa askwaw. Cemey, səkan maa əy lem ca, ara laban a yam baptəysma gagaha a zlam Bay Madakal Yesu. 17 A təwse, ata Pəyer ey Yuhana wese, əy ca ra tata ege ata ha hejəye wese ege, amba əy lem Zəwet ma keweɗ.
18 Maa Səymawn a gəre hejəye əy kélem Zəwet ma keweɗ aza, a dəwze maa malaɓ Yesu ege əy ca ra tata ege ata tata ca, a ɗaw ŋ veletene səlay ŋ ata Pəyer ey Yuhana, 19 a zlepetene, a ŋgaya: «Hune velekey ɓarɓar ŋghe anta yam. Ana ebe ŋghe ca, mada sa kaca ra naka ata ha a kaw vayay ca, heje anta a lem Zəwet ma keweɗ.» 20 Cemey, Pəyer a zenene, a ŋgaya: «Gazlavay mefətekza səlay ŋkwa anta aza zlaɓa ha ŋkwa. Mavəday, hwa kédeŋza aza ŋ səkam a səlay səkan maa Gazlavay a keveletene bəse ŋ hejəye anta ege! 21 Ma ŋkwa ŋ zlan ŋgha askwaw, hwa kula ŋ nah ŋma səkwaw, mavəday unaf ŋkwa kadak səkwaw a tama Gazlavay. 22 Bawza lanja ŋkwa aza a tama Bay Madakal, rakaw, ketegəre a napalzahwaw lulak ŋkwaɓ ŋkwa ma kadak səkwaw ŋgha aka ka vaw! 23 Mavəday sa kegəre ca, unaf ŋkwa ghef a sərah, hwa mava gay.» 24 Aya, Səymawn wese a zlepetene ŋ ata Pəyer ey Yuhana, a ŋgaya: «Mbahw! Hune rekekey Bay Madakal, ndar səkan ege maa hune zlapata ŋghe ege ca, əy ɗaw ŋ ndewzekey səkwaw!» 25 A dəwze maa ata Pəyer ey Yuhana əy kághwalza səkan ma laha aza leŋ zlap a Bay Madakal aza ca, əy zen tata ŋ Urusaləyma. Maa əy kanda ata taf ca, əy kaghwalza Ma Mewe ma Taŋtaŋ ara ŋ uzam ege vəram ŋ Samarəya.
Fəyləyp ey ɗala Etəyawpəya
26 Malaɓ Gazlavay Madakal a zlepene ŋ Fəyləyp, a ŋgaya: «Gwarzam, nda ŋta taf ma ata nda ŋ Məysəra, ata taf ma ata nda ŋ Urusaləyma kəɗa ŋ Gaza. Taf anta hejəye əy kanda ta ŋma zeney, askwaw.» 27 Aya, Fəyləyp a gwarzam kəcaŋ, a ŋta taf anta, a ndewzene ŋ ɗala Etəyawpəya mabacabac, ara ɗala madakal ma kasar la ata səkan ma asa ra Kandas, bay wala mala hayak Etəyawpəya. A ndaha aka ŋ Urusaləyma ata la maa a həmanaha Gazlavay, 28 a kezen anta a wata. Kénjeye ŋ mawta dakw anta, a kejəŋge ɗerewel mala Esaya, mba ma zlap ma a Gazlavay. 29 A təwse Zəwet ma keweɗ a zlepene ŋ Fəyləyp, a ŋgaya: «Nda hwas ara mawta dakw wese.» 30 Aya, Fəyləyp a hey a hehey hwas ara heje wese, kəɗe a zləme ca, a kejəŋge ŋ ɗerewel mala Esaya, mba ma zlap ma a Gazlavay. A ɗawza, a ŋgaya: «Hwa kezləme ma maa hwa kejəŋge ŋghe anta vaw?» 31 Heje anta a zenene, a ŋgaya: «Mada ɗala ŋ ghwelzekey ma anta askwaw ca, sa nasan ŋ zləme vaŋgay?» Aya, a rak Fəyləyp wese ŋ tev ŋ nja ka ara mbe ŋ mawta dakw. 32 Leŋter maa a kejəŋge ŋ ɗerewel anta ca, ara ebe ŋghe:
«Ana ŋtəmek maa əy kejeɓza ata lafat səkan ege,
ana mba ŋtəmek maa kénjeye tete mada əy zlene jukwaɗ aza,
káhan askwaw.
33 Əy kécecefza askwaw, əy kélene taŋtaŋ askwaw.
Ma kanazlap ata mba dəmas anta vayay?
Mavəday, əy kája aza ata hayak.»
34 Aya, ɗala Etəyawpəya wese, a ɗawza Fəyləyp, a ŋgaya: «Mbahw, ghwelzekey may, mba ma zlap ma a Gazlavay anta a zlap ca, ata vayay? Ata ha anta vaw, ata ɗala matakan vaw?» 35 A təwse ca, Fəyləyp a ŋta zlap, a ghwelzene Ma Mewe ma Taŋtaŋ mala Yesu ta ŋ Leŋter ŋghe anta. 36 Maa əy kanda ata taf wese ca, əy hwas a ma yam ata la wende aka. Aya, ɗala Etəyawpəya wese, a zlepene ŋ Fəyləyp, a ŋgaya: «Ŋghe, yam cakwa! Ca, ma kenetekey ŋ ban na ŋgha a yam baptəysma ca, vemey» [ 37 A təwse, Fəyləyp a zlepene, a ŋgaya: «Mada hwa kálamza ma Yesu aza a unaf ŋkwa teŋguleŋ ca, hwa kula ŋ lem laban aza a yam baptəysma.» Ɗala Etəyawpəya wese, a zenene, a ŋgaya: «Sa kálamza aza, Yesu Almasəyhu ca, ara mba Gazlavay,» a ya.]
38 A təwse, ɗala Etəyawpəya wese, a zlap ŋ garza mawta dakw anta ka. Əy tadakwha gbak tata, əy nah ŋ yam. Aya, Fəyləyp a banaw, a yam baptəysma. 39 Maa əy damha aza ŋ yam ca, Zəwet Gazlavay Madakal, a ŋta Fəyləyp aza, kaw heje wese a kezen ŋ gəre zeney askwaw. Cemey, ɗala Etəyawpəya wese, a səbar taf anta, a kasasam ara mambaza. 40 Aya, kəɗe Fəyləyp a gəre ca, mbəy ŋ uzam Asdawɗ. A təwse, a kaghwalza Ma Mewe ma Taŋtaŋ mala Yesu ara ta ŋ uzam ege tewtew maa a kanda ta a təwse, hwas ŋ Kaysarəya.