22
«Vana ege, zlana ege, hune teh zlam ata ma maa sa kanazlapahune na ŋgha ata ma ma ata ha naka.»2 Aya, maa əy zləme Pawl a kezlepetene a ma Əybəranəyŋkaw ege ca, əy vas ŋ nja ka tete. A təwse, Pawl a zen ŋ ŋta zlap, a ŋgaya:3 «Sa ca, sa ɗala Yahudu, sa mbawha ŋ Tarsus ma ŋ Səyləykəya. Cemey, sa gal ete ŋghe ŋ Urusaləyma. Gamaləyel ca, ara masasərak naka, mbəy ma ghwelzekey ma maŋkanaŋkan mala jeje ŋtakwaw ege a heɗe a heɗe. Sa kasəbar Gazlavay a ɓarɓar ana maa hune tewtew hune kasəbaraw, a tambaca yam.4 Sa késetene gef ŋ hejəye vedəye ma kasəbar Taf Bay Madakal ege ha hejəye anta ege əy kámac tata. Sa kámbalata mawal ege leŋ weləye, sa kánahzata ŋ daŋgay.5 Madakal mala kwakwas ey lajav mala madakal dakal ege ma a tama hejəye əy kasan ca, zlap naka ŋghe ca, ara metəwle səkwaw. Ara tata ma velekey ɗerewel, ndar sa jeɓzetene ŋ zlana ŋtakwaw ege ma ŋ Damas. Sa kánda təwse ŋ mbalata hejəye ma lamza ma mala Yesu ege aza ŋ jawata, ŋ data ŋ Urusaləyma ete ŋghe ŋ setene gef,» a ya.
Pawl a zlap ata pes maa a lamza Yesu aza
6 «Maa sa kanda ata taf, sa slaɓ ŋ hwas ŋ Damas, pes slaɓ ŋ la wereywerey, a təwse a təwse, leweɗ ma dakal a tadakwha ka mgba ata uzlaf, a weɗ ata sa. 7 Aya, sa ndav ata hayak, sa zləme ula a kezlepekey, a ŋgaya: “Sawl, Sawl, hwa sekey gef ca, ŋ vay?” 8 Sa ɗawza, sa ya: “Hwa vayay, Bay Madakal?” Aya, ula wese, a zenekey, a ŋgaya: “Sa ca, sa Yesu ɗala Nasaratu, maa hwa kesene gef wese.” 9 Hejəye maa nene tewtew ege, əy kégəre leweɗ anta, cemey, əy kézləme ula ɗala ma kezlepekey anta askwaw. 10 Sa ɗawza, sa ya: “Ca, sa nala na ŋgha ca, vaŋgay, Bay Madakal?” Bay Madakal, a zlepekey, a ŋgaya: “Gwarzam, nda ŋ Damas, a təwse, əy naghwalzahwaw səkan ege tewtew maa hwa kanalata.” 11 Leweɗ ma dakal wese, kúlefekey nje aza. A təwse ca, hejəye maa nene tewtew ege wese, əy mbelekey ra, əy njewekey hwas ŋ Damas.
12 «Heje wende a təwse aka, zlam anta Ananəyas, ara ɗala ma kasəbar Gazlavay ey kwakwas ŋtakwaw a heɗe a heɗe. Yahudu ege ma ŋ Damas tewtew, əy həmanza. 13 A ndaha ŋ ndewzekey, a deŋ aka ara sa, a zlepekey, a ŋgaya: “Sawl, zlana, nje ŋkwa mazlar anta!” A təwse a təwse nje naka zlar a zlar anta, aya sa kegəre Ananəyas anta kadak kadak. 14 A zlepekey zeney, a ŋgaya: “Gazlavay a jeje ŋtakwaw ege kámayahwaw aza, ndar hwa san laɗaw anta, hwa gəre Ɗala anta ma Taŋtaŋ, hwa zləme zlap ma ŋ pakam anta. 15 Hwa nala ŋ maghwal ma anta a tama a hejəye tewtew ŋ ghwelzetene səkan ege tewtew maa hwa gəreta ey maa hwa zləmeta. 16 Na ŋgha ca, hwa teh zeney vemey? Gwarzam, lem laban aza a yam baptəysma, ya zlam mala Gazlavay ndar a palzahwaw gay ŋkwa ege aza.”»
Gazlavay a laɓza Pawl ara ma tata Yahudu ege səkwaw
17 «A pes wende aka, maa sa kézenha aza ŋ Urusaləyma, lec maa sa karak Gazlavay a ujek kwakwas ca, səkan wende kéghwelzekey a ma nje. 18 Aya, sa gəre Bay Madakal, a zlepekey, a ŋgaya: “Kəcaŋ, kese aza ŋ Urusaləyma, mavəday hejəye anta ege, əy kanalamza laghwal ma ŋkwa ata sa askwaw.” 19 Sa zenzene, sa ya: “Bay Madakal, əy kasan njenjəwen ca, sa kanda a ujek ege ma ata rak Gazlavay mala Yahudu ege, sa kambalata hejəye ma lamza ma ŋkwa ege aza, sa kanahzata ŋ daŋgay ŋ gazlata. 20 Maa əy ja Etəyen aza, ɗala ma ghwal ma ata hwa wese ca, sa yam, sa a təwse. Sa kálamza ma tata aza ŋ jaw, sa kéhəberetene rəgwac tata ege aka.” 21 Bay Madakal a zlepekey, a ŋgaya: “Nda, sa nalaɓzahwaw gədak ara hejəye ma tata Yahudu ege səkwaw,”» a ya.
Ata Pawl ey madakal sawje Rawma ege
22 Hejəye əy ketehzene zlam ŋ Pawl ha hwas ata lamaɗ ma. Əy mar ŋ ja ula, əy ŋgaya: «Hune jaza, hune ɗaw ŋ yakza ɗala ma da ebe ŋghe aka a nje səkwaw!» əy ya. 23 Əy ja ula a mazlazlay, əy nahza rəgwac tata ege a unaf ata uzlaf, əy ɗəbas berdeberde. 24 Madakal sawje Rawma ege wese, a zlepetene ŋ hejəye anta ege ŋ damza Pawl ŋ galaŋ tata, əy maŋtawaw, ndar kulakw a ghwalza, Yahudu ege əy ja ula ata mbe ca, mavəday vemey. 25 Cemey, maa əy kájawza ŋ ŋtawaw ca, a zlepene a madakal sawje ege wende ma a həzlar a təwse, a ŋgaya: «Taf ŋkune ŋ ŋtaw ɗala Rawma ma kéghemeye kwagwa səkwaw ca, aka vaw?» a ya. 26 Maa madakal sawje ege wese a zləme ma ŋghe ca, tel a nda ara madakal tata, a ɗawza, a ŋgaya: «Hwa ɗaw ŋ la kəɗe ca vemey? Heje anta, ara ɗala Rawma!» a ya. 27 A təwse, madakal sawje ege wese, a nda ara Pawl, a ɗawza, a ŋgaya: «Zlepekey, hwa ca, hwa ɗala Rawma njenjəwen vaw?» Pawl a zenene, a ŋgaya: «Ayaw, sa ɗala Rawma.» 28 Aya, madakal sawje ege wese, a zlepene, a ŋgaya: «A naka ca, sa káŋtar səlay dakala ŋ la ŋ ɗala Rawma.» Pawl a zlepene, a ŋgaya: «A naka ca, sa mbawha, sa ɗala Rawma.» 29 A təwse ca, sawje ege ma slaza ŋ gazl Pawl wese, əy yakza aka, əy nda tata. Madakal tata wese yam kálalak anta, ata maa a sanza ara ɗala Rawma, a kedeŋ ŋkwaɓ mavəday maa a jaw a sesele wese.
Pawl mbəy a tama lajav ma dakal ma ata ja guma
30 A mpat anta, madakal sawje ege wese, a ɗaw ŋ san njəwen ca, Yahudu ege əy ŋkəɗaw Pawl anta ca, ata vemey. Aya, a pelene sesele ege aza, a yaha madakal dakal mala kwakwas ege ey lajav ma dakal ma ata ja guma tewtew. A dəwze anta, a daza Pawl, a njaza ka a tama tata ŋ tehzene zlam.