Zlan malaɓ ege 5

Ananəyas ey wala anta Safəyra

Cemey, heje wende aka, zlam anta Ananəyas, əy jav ma tata ey wala anta Safəyra ŋ səkam la tata aza. 2 A təwse, a ɓez səlay anta ka ŋ gbak. Wende, a ɓahza ka, wende yam a jeɓza, a veletene ŋ malaɓ Yesu ege. Wala anta a kasan səkan maa mawal anta a law. 3 Aya, Pəyer a zlepene, a ŋgaya: «Ananəyas, hwa pelzene taf aka ŋ Sayɗanu ŋ zam bay ata unaf ŋkwa, ŋ vay? Hwa kézlene metəwle ŋ Zəwet ma keweɗ, hwa káɓahza kəva səlay wende maa hune səkam la ŋkune aza wese aka ŋ hwa. 4 Cemey, la ca, mala ŋkwa. Kaw hwa kásəkamza ana ebe ŋghe, səlay anta mala ŋkwa war. Ca, hwa san ŋ deŋza ŋ la səkan ma da ebe ŋghe ca, ŋ vay? Hwa zlene metəwle ca, ŋ Gazlavay səkwaw ca, ŋ hejəye səkwaw.» 5 Aya, maa Ananəyas a zləme ma ŋgha ege ca, a ndav ata hayak, a mac anta. Hejəye tewtew ma zləme ma ŋgha anta ege, əy kálalak tata mambaza. 6 A təwse, darlaŋw ege əy ndaha əy mbahw mce anta, əy jeɓza ŋ mpas aza aka.

7 A la anta ler mahkaɗ ege a dəwze anta, wala Ananəyas a ndaha. Cemey, kásan səkan ma ndewzene ŋ mawal anta səkwaw. 8 Aya, Pəyer a ɗawza, a ŋgaya: «Ghwelzekey, hune səkam la ŋkune ca, səlay anta ana ebe ŋghe tew vaw?» Aya, a zenene ŋ Pəyer, a ŋgaya: «Ayaw, nene səkam la anta ca, ana ebe ŋghe anta.» 9 A təwse, Pəyer a zlepene, a ŋgaya: «Hune jav ma ŋkune aka a mawal ŋkwa ŋ slanza Zəwet Bay Madakal ca, mavəday vemey? Teh zlam, darlaŋw ma mpas aza mawal ŋkwa ege əy a ma ujek, əy netewahwaw ŋ mpasahwaw yam.» 10 A təwse a təwse, wala wese a ndav a tama Pəyer, a mac anta. Darlaŋw ege ma mpas aza mawal anta wese əy damha, əy ndewzene kámac anta. A təwse, əy jeɓza ŋ mpas aza a həzlar mawal anta. 11 Cemey, lajav hejəye ma lamza ma mala Yesu ege aza tewtew, zlaɓa hejəye tewtew ma zləme səkan ma laha ŋgha ege, əy kálalak tata mambaza.

Malaɓ Yesu ege əy la zaɓəla ege vəram

12 Malaɓ Yesu ege əy la zaɓəla ege leŋ səkan ma kaŋga ŋkwaɓ ege vəram ŋ taba hejəye. Hejəye ma lamza ma mala Yesu ege aza əy kajav tewtew a unaf teŋguleŋ asa Galaɓ Suleymanu, 13 hejəye vedəye əy kajav ara tata askwaw, mavəday əy kalalak. Cemey, hejəye tewtew əy kazlap ma ma tuwah ata tata. 14 Ata pes ata pes, hejəye vəram, mawal ege ey weləye əy kalamza ma mala Bay Madakal, əy kafalha ata lajav anta. 15 Ana ebe ŋghe, hejəye əy tewata hejəye ma kadawar ege aka a ma taf, əy wanzata aka ata lawan, askwaw ca, ata gədegəde tata ege, ndar, mada Pəyer a kanda ta a təwse ca, ketegəre kaw seŋseŋ anta a hwasha aza ata hejəye tata ege vedəye ka vaw. 16 Hejəye vəram əy ndaha aka ŋ uzam ege ma mbermber a Urusaləyma, əy data hejəye tata ege ma kadawar leŋ maa zəwet malula kámbalata aza ege. A təwse ca, hejəye anta ege tewtew əy kéreh tata ŋ dawar tata anta ege.

Əy mbalata malaɓ Yesu ege

17 Aya, madakal mala kwakwas leŋ hejəye tewtew ma a həzlar ege, ana zlap ca, hejəye ma ŋ lajav Sadukəy ege, əy la sərah mambaza ata malaɓ Yesu ege wese. 18 A təwse, əy mbalata əy nahzata ŋ daŋgay ata nje hejəye tewtew. 19 Cemey, a zaɗaw wese, malaɓ Bay Madakal a zlarza ma ujek daŋgay wese, a palata aza a bəza, a zlepetene, a ŋgaya: 20 «Hune nda ŋ ujek kwakwas, hune ghwelzetene zlap ŋghe ege tewtew mala lanja ŋ hejəye.» 21 Aya, malaɓ Yesu ege wese əy la ana maa malaɓ Bay Madakal a zlepetene. Mala mapat beŋ, əy nda ŋ ujek kwakwas, əy mar ŋ sasərakzata hejəye.

Maa madakal mala kwakwas a hwasha, leŋ hejəye ma a həzlar ege wese ca, əy ɓecata madakal dakal mala Əysərayəyla ege ata lajav ma dakal ma ata ja guma. Aya, əy laɓzata sawje ege ŋ data malaɓ Yesu ege ma ŋ daŋgay wese. 22 Cemey, maa sawje ege əy hwas ŋ daŋgay wese ca, əy kéndewzetene ŋma askwaw. A təwse, əy zen ara madakal dakal tata ege, əy zlepetene, əy ŋgaya: 23 «Nene ndewzene a ma ujek daŋgay anta kémpekeye kadak kadak. Mahəbar ma ujek ege əy kahəbaraw. Cemey, maa nene zlarza ma ujek daŋgay anta ca, kaw nene kéndew ata ɗala teŋguleŋ ŋma askwaw.» 24 Maa madakal mahəbar ujek kwakwas ege leŋ madakal dakal mala kwakwas ege əy zləme ma anta ca, əy káŋga ŋkwaɓ ata malaɓ ege. Aya, əy ɗawza ha tata ege ata səkan ma laha anta. 25 Cemey, heje wende aka a ndaha, a zlepetene, a ŋgaya: «Ŋghe hejəye maa hune nahzata ŋ daŋgay ege wese, əy ŋ ujek kwakwas, əy kasasərakzata hejəye.» 26 Aya, madakal mahəbar ujek kwakwas a nda zlaɓa sawje anta ege. Əy dahata malaɓ Yesu ege wese, cemey, əy dahata ca, ata gwaya səkwaw, mavəday əy kalalak, hejəye əy ɗaw ŋ kwapata a ŋkəɗaŋ səkwaw.

27 A dəwze maa əy dahata aza ca, əy garzata ka a tama lajav ma dakal ma ata ja guma. A təwse, madakal mala kwakwas, a ɗawzata, a ŋgaya: 28 «Nene kátakahune aza, hune ɗaw ŋ sesərekzetene zlam heje ŋghe ŋ hejəye zeney səkwaw. Cemey, hune kesesərekzetene war. Hune kéŋtez lasasərak ŋkune anta aza ŋ Urusaləyma tewtew. Hune ɗaw hejəye əy zlap ca, nene ma ja heje ŋghe anta aza vaw!» 29 A təwse ca, ata Pəyer ey malaɓ ege vedəye, əy zenetene əy ŋgaya: «Səy, nene netehzene zlam ca, ŋ Gazlavay səkwaw ca, ŋ hejəye səkwaw. 30 Hune kája Yesu aza ata mpe gafaŋgal, cemey, Gazlavay jeje ŋtakwaw ege kágwarzamaza aza ata lamac. 31 Gazlavay káŋta Yesu aza mgba ata uzlaf, kánjaza ka ata ra zam anta, káca aka ŋ Bay leŋ Mereh hejəye, ŋ veletene taf ŋ hejəye Əysərayəyla ege ŋ bawza lanja tata ege aza, ndar Gazlavay a pelzetene gay tata ege aka. 32 Nene, zlaɓa Zəwet ma keweɗ maa Gazlavay a veletene ŋ hejəye ma ketehzene zlam ege, nene kaghwalza ma ata səkan ma laha ŋgha anta ege.»

33 Maa hejəye ma ata lajav ma dakal ma ata ja guma əy zləme ma ŋgha anta ca, əy kághwaɗ tata mambaza, aya, əy ɗaw ŋ jata malaɓ wese ege aza. 34 Cemey, heje Farəysa wende ŋ taba tata aka, zlam anta Gamaləyel, ara maghwal ma maŋkanaŋkan maa hejəye tewtew əy kahəmanza. A gwarzam ŋ taba hejəye ma ata lajav ma dakal ma ata ja guma wese, a zlepetene ŋ sawje ege ŋ damata malaɓ ege wese aza a bəza cekuɗe. 35 Aya, a zlepetene ŋ hejəye ma ata lajav ma dakal ma ata ja guma wese ege, a ŋgaya: «Hune hejəye Əysərayəyla ege, hune sla ka kadak kadak ata səkan maa hune kaɗaw ŋ letene ŋ hejəye ŋghe ege. 36 Hune senzene, walaŋ anta askwaw, heje wende aka zlam anta Tewdas, a ndaha, a ghwalza ha anta, ana ɗala ma dakal. Hejəye əy kála tata temere ŋfaɗ ege ma səbar taf anta. Cemey, əy kája aza, hejəye ma səbar ege wese tewtew, əy kéweɗ tata, kaw əy kázlap ma anta zeney askwaw. 37 A dəwze anta, heje Galəyləy wende aka, zlam anta Yahuda, a ndaha ata vah maa bay hayak a gwarzamaza ma, ma ata ŋter zlam hejəye ma ŋ hayak ege tewtew. Hejəye vəram əy kásəbaraw. Cemey, mbe yam, əy kája aza. A təwse, hejəye tewtew ma səbar ege wese, əy kéweɗ tata. 38 Mavəday anta, sa kazlapahune na ŋgha: Hune ŋga ŋkwaɓ ŋkune ege aka ata hejəye ŋghe ege səkwaw, hune palzata aka, əy manda tata. Mada səkan maa əy kedeŋza ey zlan tata, əy ndaha aka ata ledeŋ ŋkwaɓ hejəye ca, əy natuwaɗ tata. 39 Cemey, mada əy ndaha aka ara Gazlavay njenjəwen ca, hune kula ŋ fətekzata aza səkwaw. Hune sla ka, hune ɗaw ŋ ɗa gham a Gazlavay səkwaw!» A təwse ca, hejəye ma ata lajav ma dakal ma ata ja guma ege wese, əy lamza zlap anta. 40 A dəwze anta, əy yahata malaɓ Yesu ege wese, əy ŋtawata, əy zlepetene, kaw əy ɗaw ŋ ya zlam Yesu zeney səkwaw, aya, əy palzata aka. 41 Malaɓ Yesu ege əy gwarzamha aza a təwse, əy nda tata, əy kasasam mavəday Gazlavay kásarzata aza, əy tete ŋ sa gef mavəday zlam Yesu. 42 Aya, ata pes ata pes, əy kavas ŋ sasərakzata hejəye, əy keghwelzetene Ma Mewe ma Taŋtaŋ mala Yesu Almasəyhu, a ujek kwakwas leŋ a wata ege.