Ata Pəyer ey Yuhana əy a tama laja guma mala Yahudu ege
4
Cemey, maa ata Pəyer ey Yuhana əy kezlepetene ŋ hejəye meɓeceɓec ege wese ca, mala kwakwas ege, madakal mahəbar ujek kwakwas ege leŋ hejəye Sadukəy ege, əy ndaha ara tata. 2 A təwse, əy kághwaɗ tata mambaza ata ata Pəyer ey Yuhana wese mavəday maa əy kasasərakzata hejəye, əy zlepetene, əy ŋgaya: «Gazlavay kágwarzamaza Yesu aza ata lamac. Mavəday anta, hejəye ma mac tata ege, əy nagwarzamha aza ata lamac.» 3 Əy mbalata ata Pəyer ey Yuhana wese, əy mpakata ka ŋ daŋgay ha a mapat, mavəday mackwahw kála anta tew. 4 Cemey, ŋ taba hejəye ma zləme zlap ege wese, hejəye vəram əy kálamza ma mala Yesu aza, a təwse ca, əy la tata bəlakw jaɓan ege.5 A mpat anta, madakal dakal Yahudu ege, madakal dakal ma a tama ege leŋ maghwal ma maŋkanaŋkan ege, əy jav ŋ Urusaləyma. 6 Ata Anas, madakal mala mala kwakwas ege, Kayafas, Yuhana, Aleksandəyre leŋ hejəye ma wata madakal mala kwakwas ege wese tewtew, əy ŋ taba hejəye ma jav anta ege wese. 7 Aya, əy data ata Pəyer ey Yuhana wese a tama tata, əy ɗawzata, əy ŋgaya: «Hune rehza heje ma halɓaya ŋghe ca, a ɓarɓar vekey? Hune rehza ca, a zlam vecey?» 8 A təwse, Pəyer, mbəy ghef a Zəwet ma keweɗ, a zlepetene a ŋgaya: «Hune madakal dakal Yahudu ege, hune madakal dakal ma a tama ege, 9 əy ŋkəɗewekey a tambaca ata taŋtaŋ maa nene lene ŋ heje ma halɓaya ŋghe. Huney, “Heje anta a san ŋ reh ca, vaŋgay?” 10 Kadak! Hune tewtew zlaɓa hejəye Əysərayəyla ege tewtew, hune san ka: Heje ma halɓaya ŋghe a gar a tama ŋkune, mbəy werwer mavəday zlam Yesu Almasəyhu, ɗala Nasaratu, maa hune dar aka ata mpe gafaŋgal. Cemey, Gazlavay kágwarzamaza aza ata lamac. 11 Mbe ca,
“Ara ŋkəɗaŋ maa hune malam ujek ege, hune nahza aza wese,
ara mbe ma baw anta ŋ darakw.”
12 Cemey, heje nelem lereh ca, səy ara Yesu, mavəday, Gazlavay kévelene ɓardakw kaw ŋ ɗala wende ŋ manhayak ŋgha, ŋ rehzaheje aza ca, askwaw.» 13 A təwse ca, hejəye ma ata lajav ma dakal dakal ma ata ja guma ege wese, əy káŋga ŋkwaɓ mambaza, mavəday ata Pəyer ey Yuhana anta ca, əy zlap a heɗe a heɗe, kaw a lalak səkwaw. A zeney, əy sarzata ca, əy nja ana hejəye vedəye, kaw əy kéjəŋgeha askwaw. Əy kásanata aza, ara hejəye ma tawarha ata Yesu ege. 14 Aya, əy gəre heje ma halɓaya wese kégereye a həzlar tata, mbəy werwer. A təwse ca, kaw əy kula ŋ zenetene zlap ŋ ma anta səkwaw. 15 A təwse, əy zlap ŋ damata ata Pəyer ey Yuhana aza kəɗe a bəza kwagwa, aya, ka əy nja ka ŋ zenza zlap anta ŋ taba tata. 16 Aya, əy ŋgaya: «Heje neletene ŋ hejəye ŋghe anta ege ca, vaŋgay? Mavəday hejəye ma ŋ Urusaləyma ege tewtew əy kasan njenjəwen, hejəye ŋghe anta ege ca, ege əy kála zaɓəla, heje kula ŋ ja səbakw a heɗe səkwaw. 17 Cemey, mada ma anta a ɗaw ŋ ŋtez a tama a tama ŋ taba hejəye səkwaw ca, səy heje gulakzata, əy ɗaw ŋ zlepene ŋ kaw vayay ata zlam Yesu zeney səkwaw.» 18 Aya, əy yahata zeney, əy gulakzata, əy ŋgaya: «Kaw hune ɗaw ŋ zlepetene leŋ kaw hune ɗaw ŋ sesərekzetene zlam Yesu ŋ hejəye zeney səkwaw!» 19 Cemey, ata Pəyer ey Yuhana wese əy zenetene, əy ŋgaya: «Səkan ma pa ma tuwah a tama Gazlavay ca, nene tehzahune zlam vaw? Nene tehzene zlam vaw? Hune a ha ŋkune, hune zla ma anta. 20 A ŋcene ca, nene kula ŋ geɓza zlap aka ata səkan maa nene gəreta a nje ŋcene ege ey maa nene zləmeta a zlam ŋcene ege səkwaw.» 21 Hejəye ma ata lajav ma dakal ma ata ja guma ege wese əy gulakzata zeney, aya, əy palzata aka, mavəday kaw əy kéndew ma ma tete ma ata veletene ghem askwaw, mavəday hejəye tewtew əy kahəmanza Gazlavay ata səkan ma laha anta. 22 Heje ma halɓaya maa əy rehza aza a zaɓəla wese ca, va anta day aha raŋfaɗ.
Hejəye ma lamza ma mala Yesu ege aza əy karak Gazlavay
23 Maa əy palzata ata Pəyer ey Yuhana aka ca, əy zen tata ara hejəye tata ege. Aya, əy ŋgeɗetene ma ege tewtew maa madakal dakal mala kwakwas ey madakal dakal ma a tama ege əy zlepetene wese. 24 Maa hejəye tata ege wese, əy zləme ma anta ege ca, tewtew tata əy rak Gazlavay a unaf teŋguleŋ ata la anta, əy ŋgaya: «Bay Madakal, hwa ma baza la ma mgba ata uzlaf ey la ma ata hayak, ŋtele leŋ səkan ma ŋ tata ege tewtew. 25 Hwa ma ca Zəwet ma keweɗ ŋ jeje ŋcene Dawuda mala zlan ŋkwa ndar a zlap:
“Ŋseŋ ma ata hayak ege əy ɓam pakam ca, mavəday vemey?
Əy deŋ ŋkwaɓ ata səkan ege bəse ca, ŋ vay?
26 Bay ma a manhayak ege əy kajav ŋ mpam ma,
madakal dakal ma a tama hejəye əy kajav ma tata ŋ ɗa gham
a Bay Madakal leŋ a Almasəyhu anta.”
27 Ayaw, njenjəwen, ata Həyrudus, Pawntəyus Pəylatu, mbəlam ege leŋ hejəye Əysərayəyla ege tewtew əy kéɓec ŋ uzam ŋgha ata Yesu, mala zlan ŋkwa ma keweɗ maa hwa mayaw. 28 Ana ebe ŋghe, əy kála səkan ege tewtew ana maa hwa slata aka zlezle a ɓarɓar ŋkwa ana maa hwa ɗawaw. 29 Na ŋgha cemey, Bay Madakal, teh zlam maa əy gulekzeney. Law, ndar nene mala zlan ŋkwa ege, nene ghwalza zlap ŋkwa a ɓarɓar ŋgara ŋgara kaw a lalak səkwaw. 30 Cemey, valza ɓarɓar ŋkwa, ndar hejəye əy reh. Zaɓəla ege ey səkan ma kaŋga ŋkwaɓ ege mala ta ŋ zlam Yesu, mala zlan ŋkwa ma keweɗ.»
31 Aya, a dəwze maa əy kárak Gazlavay aza ca, la maa əy kéɓeceye a təwse wese, a həɓal. Tewtew tata əy ghef a Zəwet ma keweɗ, amba əy ghwalza zlap Gazlavay kaw a lalak askwaw.
Hejəye ma lamza ma mala Yesu ege aza əy jav səkan ma asa ra tata ege aka ŋ la anta
32 Hejəye ma lamza ma mala Yesu ege aza tewtew əy kéjeveye ŋ la anta a unaf teŋguleŋ, ŋ ledeŋ ŋkwaɓ teŋguleŋ. Kaw ɗala teŋguleŋ ŋ taba tata maa a kazlap ene, səkan ŋgha mala naka ca, askwaw. Cemey, əy kájav səkan ma asa ra tata ege aka tewtew ŋ la anta. 33 Malaɓ Yesu ege əy kaghwalza njenjəwen Bay Madakal Yesu ca, kágwarzamha aza ata lamac. Əy ghwalza ma anta a ɓarɓar ma dakal. Taŋtaŋ Gazlavay dakala ata tata tewtew. 34 Kaw ɗala teŋguleŋ ŋ taba tata ma kamay səkan askwaw. Ɗala ma la anta aka, ujek anta aka, a səkamza, a daza səlay anta, 35 a veletene ŋ malaɓ Yesu ege wese. A dəwze anta əy ɓezetene səlay anta, kaw vayay a lem tete ŋ mbe.