Ɗala ma halɓaya, kéreh anta ŋ dawar anta
3
Aya, a pes wende aka, ler mahkaɗ mala mackwahw, ata Pəyer ey Yuhana əy nda ŋ ujek kwakwas ŋ rak Gazlavay. 2 Heje wende aka, mbawa anta mbəy halɓaya. Cemey, ata pes ata pes, hejəye anta ege əy ketewaza, əy njaza aka mbermber a ma ujek mala ujek kwakwas maa əy kayaɓa, «Ma Ujek ma Tuwah,» ŋ rakɓa səlay ara hejəye ma kadam ŋ ujek kwakwas ege. 3 Aya, maa a gəre ata Pəyer ey Yuhana, əy kadam ŋ ujek kwakwas wese ca, a rak səlay ara tata. 4 A təwse, ata Pəyer ey Yuhana, əy sarza kadak kadak, aya, Pəyer a zlepene, a ŋgaya: «Serzeney!» 5 Cemey, heje wese a sarzata kadak kadak, a ulakza ŋ unaf anta ca, a nelem səkan ara tata. 6 A təwse, Pəyer a zlepene, a ŋgaya: «Kaw səlay ara sa askwaw, kaw bənaɓ ara sa askwaw, cemey, sa navalahwaw səkan ma ara sa aka: “A zlam Yesu Almasəyhu, ɗala Nasaratu, gwarzam, nda!”» 7 Aya, Pəyer a mbal ra zam heje wese, a cekzene ŋ gwarzam. A təwse a təwse, ŋgas heje wese ege əy jar tata kəcaŋ. 8 A təwse a təwse, heje wese perce a gwarzam, a gar aka, a mar ŋ nda. A dam a ujek kwakwas zlaɓa ata Pəyer ey Yuhana, a kanda kadak kadak, a kember, a kahəmanza Gazlavay. 9 Hejəye tewtew əy kegəre a kanda, a kahəmanza Gazlavay. 10 Aya, maa hejəye əy sanza ara heje ma halɓaya, ma kanja a ma ujek mala ujek kwakwas maa əy kayaɓa, «Ma Ujek ma Tuwah» ŋ rak səlay ara hejəye wese ca, ŋgəzleŋ kájata aza mambaza, əy káŋga ŋkwaɓ dakala ata səkan ma ndewzene anta.Pəyer a ghwal zlap a ujek kwakwas
11 Cemey, heje anta kégeɓzata ata Pəyer ey Yuhana askwaw. A təwse, hejəye tewtew ŋkwaɓ kéŋgetene aza mambaza, aya, əy hey kəɗe ara tata asa galaɓ ma dakal maa əy kayaɓa, «Galaɓ Suleymanu». 12 Maa Pəyer a gəre hejəye ma ɓecha ege ara tata wese, a zlepetene, a ŋgaya: «Hune Əysərayəyla ege, hune ŋga ŋkwaɓ ata səkan ma laha ŋgha, ŋ vay? Hune serzeney ana ebe ŋghe ca, ŋ vay? Hune ulakza ca, ara ɓarɓar ŋcene ma jarzata ŋgas heje ŋghe ege ŋ nda vaw? Askwaw ca, mavəday maa nene kasəbar Gazlavay a heɗe a heɗe vaw? Kaw andəwse səkwaw! 13 Cemey, ara Gazlavay mala Əybərahəyma, mala Əysəyaku, mala Yakubu, Gazlavay mala jeje ŋtakwaw ege maa əy həmanza, mbəy ma velene ɓardakw anta ŋ mala zlan anta Yesu. Hune a ha ŋkune, hune ma valza Yesu asa ra madakal dakal ege, hune kécecefza askwaw, hune káyakza ka asa ra Pəylatu ŋ jaw. Pəylatu anta, káɗaw ŋ palza ka keɗe, cemey, hune kálamza ma anta askwaw. 14 Yesu ca, ara ɗala ma keweɗ ma taŋtaŋ ma ndaha aka ara Gazlavay. Cemey, hune kálamza askwaw, hune ɗawza Pəylatu ŋ palahune ɗala ma ja ŋkəɗeh aka. 15 Ana ebe ŋghe, hune kája Bay ma kaval lanja aza, cemey, Gazlavay, kágwarzamaza aza ata lamac. Nene a ha ŋcene, nene kégəre lagwarzamha anta ata lamac. 16 Cemey, heje maa hune kegəre ŋghe ca, hune kasanaw. Ara ɓarɓar lalam a zlam Yesu ma rehza aza ŋ dawar anta ŋgha. Ara lalam a zlam Yesu ma rehza aza ŋ dawar anta tewtew ata nje ŋkune tewtew.
17 «Cemey, na ŋgha ca, zlana ege, sa kasanaw, zlan maa hune zlaɓa madakal ŋkune ege hune lene ŋ Yesu ŋgha ca, hune la ca, mavəday hune kasan səkwaw. 18 Cemey, Gazlavay kághwalaza zlezle ta ŋ ma mala uzəye ma zlap ma anta ege tewtew ata səkan ma laha ŋgha anta, əy ŋgaya, “Səy, Almasəyhu anta wese masa gef aza. 19 Mavəday anta, sa kazlapahune, hune bawza lanja ŋkune ege aza, hune zenha ara Gazlavay, ndar a palzahune gay ŋkune ege aka. 20 Ana ebe ŋghe, Bay Madakal a navalahune vah ma ata zazak. A nalaɓahune Almasəyhu, ɗala maa a may aka zlezle ŋ rehzahune, ana zlap ca, Yesu. 21 Cemey, na ŋgha ca, səy Yesu Almasəyhu manja ka mgba ata uzlaf kwagwa ha hwas a pes maa Gazlavay a nalamzata səkan ege aza tewtew, ana maa a ghwalaza zlezle ta ŋ ma uzəye ma zlap ma anta ma keweɗ ege. 22 Cemey, Musa kázlap zlezle, a ŋgaya: Bay Madakal Gazlavay ŋkune a nambawahune mba ma zlap ma, ŋ taba van ŋkune ege, ana sa. Hune netehzene zlam ata ma maa a kanazlapahune ege tewtew. 23 Kaw vayay ma tehzene zlam ŋ mba ma zlap ma ŋgha anta səkwaw ca, əy nagamaza aza ŋ taba hejəye Gazlavay ege, ŋ ja aza.” 24 Uzəye ma zlap ma ege tewtew əy kázlap zlezle, a mar aka ata Samuyəyla ha hwas ata ma ndaha a dəwze anta ege, kaw vayay tata, kághwalza səkan ma kala ata wan ŋghe anta ege. 25 Səkan maa Gazlavay a zlapaza ta ŋ ma uzəye ma zlap ma wese ca, a zlapaza ŋ hune. Gazlavay kéŋkenetene ma ŋ jeje ŋkune ege, a zlepene ŋ Əybərahəyma, a ŋgaya: “Sa naca bəzla naka ka ata ŋseŋ ma a manhayak ege tewtew ta ŋ mba dəmas ŋkwa.” 26 Ana ebe ŋghe, Gazlavay a ghwalza mala zlan anta Yesu ca, ŋ hune kwagwa. A laɓaza ŋ lahune bəzla, ŋ bawza lanja ma kadak səkwaw mala kaw vayay ŋkune ege aza.»