Zəwet ma keweɗ a ndaha ata hejəye ma lamza ma mala Yesu ege aza
2
Aya, maa pes gwaygwaya maa əy kayaɓa Pantekwasta a hwasha ca, hejəye ma lamza ma mala Yesu ege aza, əy kéɓeceye tewtew ata la ma teŋguleŋ. 2 Kəɗe ca, əy zləme səkan a laha aka mgba ata uzlaf ana bargadaŋ ma kababar. Səkan anta, a ghefza ujek maa əy kénjeye ŋma. 3 Aya, əy gəre ganana ege ana kwahwaw, əy ŋtez, əy nja ata tata teŋguleŋ teŋguleŋ tewtew. 4 Tewtew tata, əy ghef a Zəwet ma keweɗ. A təwse, əy mar ŋ zlap a ma mbəlam ege vedəye vedəye ana maa Zəwet wese a veletene ɓarɓar ŋ zlap. 5 Cemey, ŋ Urusaləyma ca, Yahudu ege ma kasəbar taf a Gazlavay a unaf teŋguleŋ ege aka. Əy ndaha aka ta ŋ hayak ege tewtew ma ŋ manhayak. 6 Aya, maa əy zləme pakam ma kaɓam wese ca, əy ɓecha vəram a təwse. Ŋkwaɓ kéŋgetene aza dakala mavəday kaw vayay ŋ taba tata a kezləme ma maa hejəye ma lamza ma mala Yesu ege aza wese, əy kazlap ma tata ege. 7 Cemey, ŋkwaɓ kéŋgetene aza mambaza, əy ɗawza ha tata, əy ŋgaya: «Hejəye ma kazlap ŋghe ege ca, tewtew tata, ara Galəyləy ege askwaw aza vaw? 8 Ca, kaw vayay ŋtakwaw a kezləme əy kazlap a ma ŋtakwaw ege ŋghe ca, a san ŋ la vaŋgay? 9 Ŋ taba ŋtakwaw ca, hejəye ma ndaha aka ŋ hayak Partəya, ŋ Medəya leŋ ŋ Elam aka. Hejəye vedəye əy ndaha aka ŋ hayak Mesawpawtaməya, ŋ Yahudəya ey ŋ Kapadawsəya, ŋ Pawŋtus ey ŋ Asəya, 10 ŋ Fəyrəygəya ey ŋ Pamfəyləya, ŋ Məysəra leŋ ŋ hayak Ləybəya ma mbermber uzam Səyrene. A zeney, ŋ taba ŋtakwaw, hejəye vedəye əy ndaha aka ŋ Rawma, 11 ŋ Kereta ey Arabəya. Ŋ taba ŋtakwaw, hejəye vedəye, ara ŋseŋ Yahudu ege, vedəye yam, ara hejəye ma lamza ŋ səbar kwakwas Yahudu ege. Cemey, heje tewtew ŋtakwaw, heje kezləme, əy kazlap a ma ŋtakwaw ege ata zlan ege ma dakal dakal maa Gazlavay a lata!» 12 A təwse ca, hejəye anta ege tewtew əy káŋga ŋkwaɓ mambaza. Aya, kaw əy kasan səkan maa əy kanala səkwaw, əy zlap ŋ taba tata, əy ŋgaya: «Ara ma vekey?» 13 Cemey, hejəye vedəye əy ɓas ata hejəye ma lamza ma mala Yesu ege aza wese, əy ŋgaya: «Tewtew tata əy kása mavaw aza, əy káŋhwaz!» əy ya.
Pəyer a ghwelzetene zlap ŋ hejəye
14 Aya, Pəyer a gwarzam zlaɓa malaɓ ege vedəye ma wam aha teŋguleŋ wese. A təwse, a zlepetene ŋ hejəye meɓeceɓec ege wese a mazlazlay, a ŋgaya: «Hune Yahudu ege leŋ hune hejəye tewtew ma ŋ Urusaləyma ege, hune teh zlam kadak kadak, sa ghwalzahune ma ŋgha anta. 15 Hejəye ŋghe ege cemey, əy kaŋhwaz ana maa hune deŋza səkwaw, mavəday na ŋgha ca, ler jafaɗ, mapat, ule kwagwa. 16 Cemey, səkan anta a laha na ŋgha ca, ana maa Yawel, mba ma zlap ma a Gazlavay, a ŋgaya:
17 “Gazlavay, a ŋgaya: Ata vah ege ma manhayak slaɓ ŋtakw ca,
sa neveletene Zəwet naka ŋ hejəye tewtew.
Aya, uzəye ŋkune ege mawal ege ey heldəməye əy nabawata a uzəye ma zlap ma naka ege.
Ŋ darlaŋw ŋkune ege, sa neghwelzetene səkan ege maa sa kanalata ege,
msəra ŋkune ege yam, seŋseŋ a najata.
18 Ayaw, ata wan anta ege wese ca, sa neveletene Zəwet naka ŋ hejəye mala zlan naka ege, mawal ege ey weləye tewtew,
əy nala tata ŋ uzəye ma zlap ma naka ege.
19 Sa nala səkan ma kaŋga ŋkwaɓ ege mgba ata uzlaf leŋ sa nala zaɓəla ege ata hayak ete ŋghe:
Mbambaz a nehey, kwahwaw a nabas leŋ caŋcah a naɗəbas,
20 pes a naləfat anta, a keneweɗ zeney askwaw,
ŋtəra a nabaw anta vəre ana mbambaz,
mar pes Gazlavay Madakal a nandaha.
Pes anta, ara pes ma pa ma day, ma pa ma tuwah aha vedəye.
21 Aya, kaw vayay ma ɗefene ma ŋ Gazlavay Madakal ŋ rehza aza ca, a nereh,” a ya.»
22 Pəyer a zlepetene zeney, a ŋgaya: «Hune Əysərayəyla ege, hune teh zlam kadak kadak ata ma maa sa kazlapahune ŋgha. Yesu, ɗala Nasaratu ca, ara ɗala maa Gazlavay a ghwalza ɓardakw anta. Mavəday, Gazlavay kála səkan ma kaŋga ŋkwaɓ ege, zaɓəla ege a mbe ŋ taba ŋkune, ana maa hune anta hune kasanaw. 23 Heje ŋghe anta ca, zlezle, Gazlavay káslaza aka, kávalza aka asa ra ŋkune ana maa a ɗawaw. Hune kávalza aza asa ra hejəye ma kasan taf Gazlavay ege səkwaw, hune kájaza ata mpe gafaŋgal. 24 Cemey, Gazlavay kágwarzamaza aza ata lamac, kádamha aza ŋ gef mac, mavəday mac kula ŋ mbal ka a ɓarɓar anta səkwaw. 25 Ŋghe bay Dawuda a zlap ata Yesu zlezle, a ŋgaya:
“Sa kegəre Gazlavay Madakal ara sa ata pes ata pes,
kénjeye ata kəva ra zam naka, ndar sa lalak ata hejəye səkwaw.
26 A təwse, unaf naka ghef a sasam, sa la dəraf a sasam.
Kaw sa kámac naka ca, sa nanja ŋ zəhay ŋ teh səkan maa Gazlavay a kenelekey,
27 mavəday, sa kasan ca, hwa, Gazlavay Madakal, hwa kenegeɓza zəwet naka ka ata lamac askwaw,
hwa kanayakza mala zlan ŋkwa aka ŋ rəɗa ŋ jeɓ askwaw.
28 Hwa kéghwelzekey taf ma taŋtaŋ ma ata nja a nje, sa nasasam dakala mavəday hwa kénjeye a sa,” a ya.»
29 Pəyer a zlap zeney a ŋgaya: «Zlana ege, sa kula ŋ zlapahune ŋgara ŋgara ata jeje ŋtakwaw bay Dawuda. Kámac anta, əy kámpas aza, ha a tambaca, jeɓ anta mbəy ete ŋghe. 30 Cemey, bay Dawuda ca, ara mba ma zlap ma a Gazlavay, a kasan ca, Gazlavay káŋkan ma anta aza a mbe, a zlepene, a ŋgaya: “Sa naca ɗala teŋguleŋ ŋ taba van ŋkwa ege, mba dəmas ŋkwa ŋ nja ŋ bay a dəwze ŋkwa.” 31 Bay Dawuda cemey, kásan səkan maa Gazlavay a kanala aza, amba a zlap ata lagwarzamha Almasəyhu ata lamac anta, maa a ŋgaya:
“Gazlavay kégeɓza zəwet anta aka ata lamac askwaw,
kusam anta yam, kárəɗa ŋ jeɓ askwaw.”»
32 Pəyer a zlepetene zeney, a ŋgaya: «Yesu anta ca, Gazlavay kágwarzamaza aza ata lamac, nene tewtew nene kégəre. 33 A zeney, Gazlavay káŋta aza mgba ata uzlaf, kénjeye ata la ma taŋtaŋ ata ra zam anta. A təwse, Cen kévelene Zəwet anta ma keweɗ ana maa a zlap a nevelene wese. Aya, Yesu kátamaheje Zəwet ma keweɗ ana maa hune kegəre ey maa hune kezləme na ŋgha. 34 Njenjəwen ca, Dawuda kétev mgba ata uzlaf a ha anta ca, askwaw, cemey, a zlap ata Almasəyhu, a ŋgaya:
“Gazlavay Madakal, a zlepene ŋ Bay Madakal naka, a ŋgaya:
Ndaha, nja ka ata kəva zam naka,
35 ha a pes maa sa macata hejəye ma kaɗaw ŋ gərehwaw ata nje ege səkwaw aza,
asa ŋgas ŋkwa.”»
36 Pəyer a zlepetene zeney, a ŋgaya: «Səy hune, hejəye Əysərayəyla ege tewtew, hune san ka njenjəwen ca, Yesu maa hune dar ka ata mpe gafaŋgal ŋghe ca, ara ɗala maa Gazlavay a ca ŋ Bay Madakal leŋ ŋ Almasəyhu.»
37 Aya, maa hejəye meɓeceɓec ege, əy zləme ma ŋgha ca, unaf tata kázla anta mambaza. A təwse, əy ɗawza Pəyer leŋ malaɓ ege vedəye, əy ŋgaya: «Ca, nene nalaɓa vaŋgay, zlana ege?» əy ya.
38 Cemey, Pəyer a zenetene, a ŋgaya: «Hune bawza lanja ŋkune ege aza a tama Gazlavay. Kaw vayay ŋkune maban aza a yam baptəysma a zlam Yesu Almasəyhu, ndar Gazlavay a palzahune gay ŋkune ege ka. A dəwze anta, a navalahune Zəwet ma keweɗ. 39 Mavəday, Gazlavay a ŋgaya, a navalza Zəwet anta ma keweɗ, ŋ hune, ŋ uzəye ŋkune ege leŋ ŋ hejəye ma gədak ege tewtew, ey hejəye tewtew maa Bay Madakal Gazlavay ŋtakwaw a nayahata,» a ya.
40 Aya, Pəyer a zlepetene ma ege vedəye vəram, ndar əy lamza ma wese leŋ əy lem ɓarɓar. Cemey a zlepetene, a ŋgaya: «Hune yakzata hejəye dadawar ege ma a manhayak ŋghe aka, ndar hune lem lereh a tama Gazlavay.» 41 Hejəye vəram ŋ taba tata əy kálamza zlap maa Pəyer a ghwalza wese aza, əy kában aza a yam baptəysma. A pes wese ca, hejəye əy la tata bəlakw mahkaɗ ma ndaha a həzlar lajav hejəye ma lamza ma mala Yesu ege aza.
Lanja hejəye ma lamza ma mala Yesu ege aza
42 Ata pes ata pes, hejəye ma lamza ma mala Yesu aza ege wese, əy kavalza ha tata ŋ teh zlam kadak kadak ata zlap ege maa malaɓ ege əy kesesərekzetene. Əy nja, əy kéɓeceye ana maa əy ata zlaŋgan tata ege, əy zam uda leŋ əy rak Gazlavay ŋ la anta. 43 Malaɓ ege əy kala zaɓəla ege leŋ səkan ma kaŋga ŋkwaɓ ege vəram a ɓardakw Gazlavay, mavəday anta, hejəye tewtew əy kaŋga ŋkwaɓ ata tata. 44 Hejəye ma lamza ma mala Yesu aza ege tewtew, əy kájav ma tata aka, əy kájav səkan ma asa ra tata ege aka ata la anta. 45 Cemey, ana zlap ca, əy səkamata la tata ege aza leŋ səkan tata ege aza, əy ŋtez səlay anta ŋ taba tata tewtew, kaw vayay a lem tete ŋ hwesene ŋ la səkan maa a kaɗawaw. 46 Ata pes ata pes, əy kajav ŋ ujek kwakwas a unaf ma teŋguleŋ. Əy keŋtez uda a wata tata ege, əy kazam uda tata a sasam ey a unaf teŋguleŋ. 47 A təwse, əy kahəmanza Gazlavay, hejəye tewtew əy kaɗawata. Aya, ata pes ata pes, Bay Madakal a kejevetene hejəye vedəye maa a rehzata aza ege, a həzlar tata.