Zlan malaɓ ege
Gazlavay a neleɓetene Zəwet ma keweɗ ŋ malaɓ Yesu ege
1
Tawfəylus, ɗala naka ma taŋtaŋ, ŋ ɗerewel naka ma mpar ca, sa kéŋterata səkan ege tewtew maa Yesu a lata ey maa a sasərakzata hejəye aka, mar aka ata vah maa a mar ŋ la zlan ŋ manhayak, 2 ha hwas ata vah maa Gazlavay a ŋtaza mgba ata uzlaf. Cemey, mar Gazlavay a naŋta aza mgba ata uzlaf ca, kámay malaɓ anta ege leŋ késesərekzetene səkan ege a ɓarɓar Zəwet ma keweɗ. 3 Aya, a dəwze gef ey lamac anta ca, a keghweletene kusam kadak kadak ta ŋ lala səkan ege vedəye vedəye, ndar əy san njenjəwen ca, mbəy nje. Wan raŋfaɗ, a keghweletene kusam, a kezlepetene ata lazam Bay mala Gazlavay. 4 A pes wende aka, ata Yesu ey malaɓ anta ege əy kazam uda ŋ la anta, a təwse ca, a ŋgazata, a zlepetene, a ŋgaya: «Hune nja ka ŋ Urusaləyma ete ŋghe, hune ŋkap səkan maa Vana Gazlavay a zlap ŋ valahune, ana maa sa ghwalzahune wese. 5 Yuhana ca, kábanata hejəye, a yam baptəysma, cemey, ata wan ege cekuɗe ete ŋghe ca, əy nabanahune a Zəwet ma keweɗ,» a ya.Gazlavay a ŋta Yesu aza mgba ata uzlaf
6 Malaɓ Yesu ege wese əy kéɓeceye a həzlar, aya, əy ɗawza, əy ŋgaya: «Bay Madakal, hwa nezen ŋ lamza bay Əysərayəyla ege ka ca, na ŋgha vaw?» əy ya. 7 Aya, Yesu a zenetene, a ŋgaya: «Ŋ san pes anta ege ey vah anta ege, maa vana Gazlavay teŋguleŋ anta a cata ca, ara zlan ŋkune səkwaw. 8 Cemey, a pes maa Zəwet ma keweɗ a kanatadakwha ata hune ca, hune nelem ɓarɓar anta. Aya, ara hune ma kanazlap ma ata sa ŋ hejəye ma ŋ Urusaləyma ege, ŋ hejəye ma ŋ hayak Yahudəya ege tewtew ey ŋ hejəye ma ŋ Samarəya ege leŋ ŋ hejəye ma a manhayak ege tewtew,» a ya.
9 A dəwze maa káŋtakwza zlap aza ca, Gazlavay ŋta a ŋtaza mgba ata uzlaf. A təwse, malaɓ ma a həzlar ege wese, əy kasarza ha mahwabakw a jaɓza. 10 Maa malaɓ ege wese əy kasar la maa a kanda anta mgba ata uzlaf, kəɗe ca, mawal ege gbak əy kégereye a həzlar tata, rəgwac ma pepeɗek ata kusam tata. 11 Aya, əy zlepetene, əy ŋgaya: «Hune hejəye Galəyləy ege, hune nja ka ŋ sar la mgba ata uzlaf ende ŋghe ca, mavəday vemey? Yesu maa Gazlavay a ŋtaza ŋ taba ŋkune kəɗe mgba ata uzlaf ŋghe ca, a nezenha ana maa hune gəre maa a nda anta kəɗe mgba ata uzlaf wese,» əy ya.
Lajav malaɓ ege
12 Aya, malaɓ ege wese, əy tadakwha aza ata dahwam maa əy kayaɓa, «barla Jaytun». Əy zen ŋ Urusaləyma. Barla Jaytun anta ca, mbəy mbermber a Urusaləyma, a la anta kəylawmeter teŋguleŋ. 13 Maa əy hwasha aza ŋ Urusaləyma wese ca, əy dam a ujek ma mgba ata ha ujek, ata lajav tata ana ma a mpat a mpat. Ara ata: Pəyer, Yuhana, Yakuba, Andəyre, Fəyləyp, Tawmas, Bartawlawme, Mata, Yakuba mba Alfa, Səymawn, ɗala ma mpam zəhay hejəye anta ege leŋ Yahuda mba Yakuba. 14 Ca, əy kajav ata pes ata pes tewtew tata ŋ rak Gazlavay a unaf teŋguleŋ. Əy jav ca, zlaɓa weləye vedəye vedəye, zlaɓa Marəyama man Yesu leŋ zlaŋgan Yesu ege.
Əy ca ɗala matakan a uley Yahuda Əyskarəyawt
15 Cemey, a pes wende aka ata vah wese ege, hejəye ma lamza ma mala Yesu ege aza əy kéɓeceye, əy la tata temere a ragbak ege. A təwse, Pəyer a gwarzam ŋ taba tata, a zlepetene, a ŋgaya: 16 «Zlana ege, ana maa kéŋtereye ŋ ɗerewel a Gazlavay, ata Yahuda Əyskarəyawt ca, mala anta ana mbe njenjəwen. Dawuda kázlap a ma anta a ɓarɓar Zəwet ma keweɗ a heɗe, ara Yahuda ma ghwelzetene taf ŋ hejəye ma mbal Yesu ege. 17 Yahuda anta ca, ara malaɓ ŋ taba ŋtakwaw, kélem ŋ la zlan Gazlavay, ara nene.» 18 Cemey, Yahuda anta kásəkam la aza a səlay anta maa əy velene ata zlan ma dadawar maa a la wese. Ŋ la wese, a ndav a tama a tama, dəmas anta pəzakw a pəzakw anta, ha ghele ege əy kəɗapaza aza tewtew. 19 Hejəye ma ŋ Urusaləyma ege tewtew əy kézləme ma anta aza. Mavəday anta, əy cene zlam ŋ la anta a ma tata, “Hakeldama”, ana zlap ca, “La mbambaz”. 20 Cemey, Pəyer a zen ŋ zlap zeney, a ŋgaya: «Ŋghe ma meŋtereŋter ŋ ɗerewel Jabura, a ŋgaya:
“Ujek anta mabaw anta a ŋkef,
ɗala a ɗaw ŋ nja ŋma səkwaw.”
A zeney, kéŋtereye ende ŋghe:
“Səy ɗala matakan mala zlan a uley anta.”
21 Hejəye ma caheje ma ege ata pes ata pes ata vah maa Bay Madakal Yesu mbəy a tama ŋtakwaw, 22 mar aka ata vah maa Yuhana a banaw, a yam baptəysma, ha hwas a pes maa Gazlavay a ŋta aza mgba ata uzlaf wese, səy ɗala teŋguleŋ ŋ taba tata majavha a həzlar heje ŋ ghwal ma ata lagwarzamha anta ata lamac,» a ya.
23 A dəwze zlap mala Pəyer ca, əy ŋta hejəye gbak, ara ata Yusufu maa əy kayaɓa, Barsabas, həman anta Yustus ey Matəyas. 24 A dəwze anta, tata tewtew əy rak Gazlavay, əy ŋgaya: «Bay Madakal, ara hwa ma kasan unaf hejəye tewtew. Ghwelzeney ɗala maa hwa may teŋguleŋ ŋ taba hejəye ma gbak ŋghe ege, 25 ndar heje anta a nja a uley Yahuda, ŋ la zlan a malaɓ ege maa a geɓza aka ŋ nda anta ata la ma késleye mavəday anta.» 26 Aya, əy la cacaª ŋ may ɗala teŋguleŋ ŋ taba hejəye ma gbak ege wese. A təwse, caca anta a ghwalaha Matəyas. Aya, a javha a həzlar malaɓ ege ma wam aha teŋguleŋ ege wese.