Əy may hejəye ŋsəleɗ ŋ cekzetene ŋ malaɓ ege
6
Ata vah wese ca, hejəye ma lamza ma mala Yesu ege aza əy kafal a tama a tama. Cemey, ŋ taba tata ca, hejəye ma kazlap ma mala Yunanəyŋkaw ege əy ŋgwaŋgwar ata hejəye ma kazlap ma mala Əybəranəyŋkaw ege, əy ŋgaya: «Weləye mce ege ma ŋ taba ŋcene ege əy kelem ɓez uda tata ata pes ata pes askwaw.» 2 Aya, malaɓ ma wam aha gbak ege wese, əy javata hejəye ma lamza ma mala Yesu ege aza tewtew, əy zlepetene əy ŋgaya: «A ŋcene ca, nene kula ŋ geɓza laghwal zlap Gazlavay aka, ndar nene ŋtezetene uda ŋ hejəye səkwaw. 3 Mavəday anta, zlana ege, hune may mawal ege ŋsəleɗ ŋ taba ŋkune maa hejəye əy kazlap ma ma tuwah ata tata ege, ma ghef a Zəwet ma keweɗ leŋ ma kəleŋ ŋ ha tata ege, ndar nene veletene zlan ma ata ŋtez uda. 4 Cemey, a ŋcene ca, nene narak Gazlavay leŋ nene neghwelzetene zlap Gazlavay gagaha ŋ hejəye.» 5 Zlap anta kéndəremzetene aza ŋ hejəye tewtew. Aya, əy may Etəyen, ɗala ma ghef a lalam ey Zəwet ma keweɗ, Fəyləyp, Parakwarus, Nəykanawr, Təymawn, Parmenas leŋ Nəykawlawus ɗala ma ŋ Antakəya, mbəlam ma kasəbar kwakwas Yahudu ege. 6 A dəwze anta, əy dahata ara malaɓ ege, aya, malaɓ ege əy rak Gazlavay leŋ əy ca ra tata ege ata ha hejəye maa əy mayata ege wese. 7 Aya, zlap Gazlavay a kavas ŋ ŋtez a tama a tama. Hejəye ma lamza ma mala Yesu ege aza əy kafal a tama a tama ŋ Urusaləyma. Mala kwakwas ege vəram əy kalamza ma Yesu.Əy mbal Etəyen
8 Etəyen, a bəzla ey ɓarɓar anta maa Gazlavay a velene, a ghwal zaɓəla ege ey səkan ma kaŋga ŋkwaɓ ege ŋ taba hejəye. 9 A təwse, hejəye ma kanda ŋ ujek ma ata rak Gazlavay mala Yahudu ege maa əy kayaɓa «Mava mapalapal ege» əy kaɗaw ma Etəyen səkwaw. Ŋ taba tata ca, ara Yahudu ege ma ŋ Səyrene ey ŋ Aleksandərəya leŋ Yahudu ege ma ŋ Səyləykəya ey Asəya ma kaja səbakw a Etəyen. 10 Cemey, əy kula ŋ ja səbakw a mbe səkwaw, mavəday a zlap a kəleŋ maa Zəwet ma keweɗ a velene. 11 Mavəday anta, əy ŋteretene səlay ŋ hejəye, ndar əy zla metəwle a heɗe, əy ŋgaya: «Nene kézləme a kazlap ma ma kadak səkwaw ata Musa leŋ ata Gazlavay.» 12 Ana ebe ŋghe, əy ŋkurafzata unaf hejəye madakal dakal ma a tama ege leŋ maghwal ma maŋkanaŋkan ege. A təwse, əy nda, əy ndewzene ŋ Etəyen hwaf ende, əy mbalaw, əy jeɓza a tama lajav ma dakal ma ata ja guma. 13 A təwse, əy data hejəye ma zla metəwle ege, əy zlap, əy ŋgaya: «Heje ŋghe anta ca, ata pes ata pes, a kazlap ma ma kadak səkwaw ata ujek kwakwas ŋtakwaw ma keweɗ leŋ ata ma maŋkanaŋkan mala Musa. 14 Cemey, nene kézləme a kazlap, a ŋgaya: “Yesu ɗala Nasaratu a naghwaramza ujek kwakwas ŋghe aza leŋ a nambaɗ kwakwas maa Musa a ghwalzaheje aza.”» 15 Hejəye tewtew manjanja ata lajav ma dakal ma ata ja guma ege wese, nje tata fəceke ata Etəyen. Əy gəre ca, nje anta a nja ana nje mala malaɓ Gazlavay.