Yesu mbəy a tama Pəylatu
23
Aya,
madakal dakal mala Yahudu ege tewtew əy gwarzam ŋ la anta,
əy jeɓza Yesu ara bay Pəylatu,
ɗala Rawma ma kazam bay ata hayak Yahudəya.
2 A təwse ca,
əy ŋkəɗawaw,
əy ŋgaya:
«Nene ndewzene ŋ heje ŋghe,
a kegeyzeney hayak ŋcene aza,
a kezlepetene ŋ hejəye,
əy ɗaw ŋ cekene budaw ŋ bay Rawma səkwaw.
A zeney,
a ŋgaya,
mbe ca,
ara Kərəystu,
ɗala maa Gazlavay a laɓaza ŋ rehzata hejəye,
ara bay.»
3 A təwse ca,
Pəylatu a ɗawza,
a ŋgaya:
«Hwa ca,
hwa bay mala Yahudu ege njəwen vaw?»
A təwse ca,
a zenzene,
a ŋgaya:
«Ana maa hwa zlap.»
4 Pəylatu a zlepetene ŋ madakal dakal mala kwakwas ege leŋ ŋ hejəye tewtew,
a ŋgaya:
«Kaw sa kéndew ata gay a heɗe ŋ mbalaw,
askwaw.»
5 Cemey,
əy vas ca,
əy ŋgaya:
«A kepewzata hejəye ŋ la car leŋ ŋ zlap ma ma kadak səkwaw ata bay ege ta ŋ laghwal zlap anta.
A maraza aka ŋ hayak Galəyləy,
a ndaha ta ŋ Yahudəya tewtew,
na ŋgha kándaha aza hwas ete ŋghe.»
Yesu mbəy a tama Həyrudus
6 Cemey,
maa Pəylatu a zləme Yesu a ndaha aka ta ŋ Galəyləy ca,
a ɗawzata hejəye,
a ŋgaya:
«Heje ŋghe anta ca,
ara ɗala Galəyləy vaw?»
7 Maa a zləme Yesu a ndaha aka ŋ Galəyləy,
hayak maa bay Həyrudus a kazam bay a heɗe ca,
a leɓzene,
mavəday ata vah anta ege wese ca,
mbəy ŋ Urusaləyma a təwse yam.
8 Aya,
maa Həyrudus a gəre Yesu ca,
a sasam dakala mambaza,
mavəday,
zlezle a kezləme ma maa əy kazlap a heɗe,
mavəday anta,
a kaɗaw ŋ ŋgel ma a mbe.
A kedeŋza ŋ gəre Yesu maa a kanala zaɓəla.
9 A təwse ca,
bay Həyrudus wese a ɗawza ata ma ege vedəye vedəye vəram.
Cemey,
kaw Yesu a kezenene ŋma askwaw.
10 Madakal dakal mala kwakwas ege leŋ maghwal ma maŋkanaŋkan ege,
əy təwse.
Əy vas ŋ ŋkəɗawza Yesu a mazlazlay.
11 Bay Həyrudus ey sawje anta ege,
əy ɓas a heɗe,
əy raɓa.
Aya,
bay Həyrudus a cene rəgwac ma tuwah ata kusam,
a zenza ka ara bay Pəylatu zeney.
12 Zlezle ca,
ata bay Həyrudus ey bay Pəylatu əy kaŋgəlay nje səkwaw keɗe,
cemey,
a pes wese ca,
əy kábaw tata a ŋgama ege.
Yesu kéghemeye ŋ ja
13 Aya,
maa Həyrudus kézenza Yesu aza ara bay Pəylatu ca,
Pəylatu anta a ɓecata madakal dakal mala kwakwas ege,
madakal dakal ma a tama hejəye leŋ hejəye vedəye ma a təwse ege.
14 A zlepetene,
a ŋgaya:
«Hune dekey heje ŋghe,
hune zlepekey huney,
“A kegeyzeney hayak ŋcene aza.”
Cemey,
sa káɗawza a tama ŋkune ete ŋghe,
kaw sa kéndew gay a heɗe ana maa hune ŋkəɗaw askwaw.
15 Bay Həyrudus yam,
kaw kéndew gay a heɗe askwaw,
amba a zenaza aka ara heje.
Njenjəwen,
heje ŋghe ca,
kaw kála gay ma ata ja aza,
askwaw.
16 Mavəday anta,
sa naŋtawaw,
a dəwze anta,
sa napalza aka.»
[
17 Ata va kaw vekey,
gwaygwaya Paska a kajaha ca,
bay Pəylatu a kepeletene ɗala teŋguleŋ aka a daŋgay.]
18 Cemey,
hejəye tewtew əy ja ula a mazlazlay,
əy ŋgaya:
«Jeney heje ŋghe aza,
peleney Barabas aka!»
19 Əy kánahza Barabas anta a ujek daŋgay ca,
mavəday mbəy ma gwarzamzata hejəye ŋ ɓam pakam a uzam leŋ maa a ja ŋkəɗeh.
20 A təwse ca,
a zlepetene ŋ hejəye zeney,
mavəday a ɗaw ŋ palza Yesu aka.
21 Cemey,
əy ja ula a mazlazlay,
əy ŋgaya:
«Dar ka ata mpe gafaŋgal,
dar ka ata mpe gafaŋgal!»
22 Aya,
a zlepetene mamahkaɗ anta,
a ŋgaya:
«Heje anta a laha gay vekey?
Kaw sa kéndew gay a heɗe ma ata jaza askwaw.
Mavəday anta,
sa naŋtawaw,
a dəwze anta,
sa napalza aka.»
23 Cemey,
əy vas ŋ ja ula a mazlazlay,
əy zlepene ŋ Pəylatu ŋ dar Yesu aka ata mpe gafaŋgal.
A təwse ca,
laja ula tata anta day aha Pəylatu.
24 Aya,
a lemzetene ma tata,
a letene ana maa əy ɗawza anta.
25 A peletene ɗala maa əy kaɗaw wese aka.
Əy kánahza Barabas anta ŋ daŋgay ca,
mavəday mbəy ma gwarzamzata hejəye ŋ ɓam pakam ŋ uzam leŋ maa a ja ŋkəɗeh.
Cemey,
Pəylatu anta a veletene Yesu ŋ Yahudu ege ndar əy lene səkan ana maa əy kaɗawaw.
Yesu kédereye ata mpe gafaŋgal
26 Aya,
maa əy kejeɓza Yesu ŋ nda ŋ daraza ka ata mpe gafaŋgal wese ca,
əy ŋgel ma a heje ma ŋ Səyrene wende aka,
zlam anta Səymawn,
a ndaha aka a damaw.
A təwse,
sawje ege əy mbalaw,
əy cene mpe gafaŋgal ndar a tew ara,
a dəwze Yesu.
27 Hejəye vəram əy kanda a səka.
Ŋ taba tata ca,
weləye vəram əy kaŋga ha tata ege ka a lahan.
28 Cemey,
Yesu a bawaha kəɗe aha tata,
a zlepetene,
a ŋgaya:
«Weləye ma ŋ Urusaləyma ege,
hune henekey səkwaw,
cemey,
hune hanɓa ha ŋkune ege ey uzəye ŋkune ege!
29 Njenjəwen,
vah a nandaha maa hejəye əy nazlap:
“Zəhay ŋ weləye ndel ege,
ŋ weləye maa kaw əy kámbawha uzəye askwaw leŋ maa uzəye əy kásaha wa tata ege askwaw!”
30 A təwse ca,
hejəye əy nezlepetene ŋ barla ege:
“Hune ghwaramha ata nene!”
leŋ ŋ dawan ege:
“Hune mpeseney aza!”
31 Cemey,
mada əy kébesene kwahwaw ata mpe ma ndendeɓek ca,
mpe maŋhwalaŋhwal ca,
ma kenendewzene vemey?»
32 A təwse ca,
əy data ŋhel ege gbak ŋ jata aza zlaɓa Yesu.
33 Aya,
maa əy hwas ata la maa əy kayaɓa «Kerŋgesl ha» ca,
əy darata ka ata mpe gafaŋgal ege zlaɓa ŋhel ma gbak ege wese.
Wende ata mpe matakan kəɗe ata kəva ra zam anta,
wende ata mpe matakan kəɗa ata kəva ra gula anta.
34 A təwse ca,
Yesu a rak Gazlavay ata hejəye ŋghe anta ege,
a ŋgaya:
«Vana,
pelzetene gay tata aka,
mavəday əy kasan səkan maa əy kala səkwaw.»
Aya,
ɓez əy ɓez rəgwac anta aza a laja caca.
35 Hejəye əy kégereye a təwse,
əy kasarza səkan ma kala.
Madakal dakal a Yahudu ege,
əy ɓas a heɗe,
əy ŋgaya:
«Hejəye vedəye ca,
kérehzata aza.
Ca,
mada ara Kərəystu,
ɗala maa Gazlavay a laɓaza ŋ rehzata hejəye ca,
merehza ha anta aza may!»
36 Sawje ege yam əy ɓas a heɗe,
əy zen mbermber ara mbe,
əy velene yam mba mpe ma kwəycacaŋ ŋ saw,
əy zlepene,
əy ŋgaya:
37 «Mada hwa bay mala Yahudu ege ca,
rehza ha ŋkwa aza eze.»
38 Əy kéŋter ka ata papalam,
əy kádar ka mgba ata ha a mpe gafaŋgal maa əy dar Yesu ka a heɗe wese,
əy ŋgaya:
«Heje ŋghe,
ara bay Yahudu ege,»
əy ya.
39 Ɗala teŋguleŋ ŋ taba ŋhel ma gbak ege madaradar ata mpe gafaŋgal a həzlar wese,
a raɓa Yesu,
a ŋgaya:
«Hwa zlap hwa ya,
hwa Kərəystu,
ɗala maa Gazlavay a laɓaza ŋ rehzata hejəye.
Ca,
rehza ha ŋkwa aza,
hwa rehzeney aza yam!»
40 Cemey,
ŋhel wende wese,
a ghemew,
a ŋgaya:
«Hwa yam,
hwa kédereye ana mbe.
Hwa kalalak ata Gazlavay səkwaw vaw?
41 Ŋtəmaw ca,
əy daramaw a heɗe a heɗe.
Guma ŋtəmaw tete ata zlan ŋtəmaw ege ma kadak səkwaw maa mama lata.
Cemey,
mbe ca,
kála gay kaw askwaw.»
42 Aya,
a zlepene,
a ŋgaya:
«Yesu,
ata vah maa hwa kanandaha ŋ zam bay ŋkwa ca,
hwa senzekey yam.»
43 A təwse,
Yesu a zenene,
a ŋgaya:
«Sa kazlapahwaw,
njenjəwen,
a tambaca ŋgha,
mama nanja gbak ŋtəmaw ŋ lanja ma tuwah mgba ata uzlaf.»
Lamac Yesu
44-45 Aya,
maa pes slaɓ ŋ la wereywerey ca,
kuzle ɓek a jaɓ la ma ata hayak aza tewtew ha hwas ata ler mahkaɗ mala mackwahw,
pes kéjeɓeye.
Cemey,
maslaga ma tampas ma kedeh la ŋ ujek kwakwas a slah anta,
a ɓez aka ŋ gbak.
46 Aya,
Yesu a ja ula a mazlazlay,
a ŋgaya:
«Vana,
sa kapalza zəwet naka aka asa ra ŋkwa.»
A dəwze maa a zlap ma ŋgha ege ca,
mac a mac anta.
47 Cemey,
maa madakal sawje ege mala Rawma ma a təwse wese,
a gəre səkan ŋghe ege tewtew ma laha ana ebe ŋghe ca,
a həmanza Gazlavay,
a ŋgaya:
«Njenjəwen,
heje ŋghe ca,
ara ɗala ma taŋtaŋ!»
48 Hejəye vəram əy kéɓecha ŋ sar səkan ma kala ata la anta.
A dəwze maa əy gəre səkan ma laha anta ca,
əy zen tata,
əy kaja ma unaf tata ege ara mavəday əy kághwaɗ tata.
49 A təwse ca,
ŋgama Yesu ege tewtew ey weləye ma səbaraza aka ŋ Galəyləy,
əy gar ata gədak ŋ sarza səkan ma kala.
Lampas Yesu
50-51 Heje wende aka,
zlam anta Yusufu,
ɗala ma ŋ uzam Arəymatəya ŋ hayak Yahudəya.
Heje anta mbəy kadak a tama Gazlavay,
a kaŋkap landaha a bay mala Gazlavay ata hejəye.
Ara ɗala ma ŋ taba madakal dakal ma a tama Yahudu ege.
Cemey,
kálamza lulak ŋkwaɓ leŋ səkan maa əy law,
askwaw.
52 Maa Yesu a mac anta ca,
Yusufu a nda ara Pəylatu,
a ɗawza mce Yesu ŋ mpas ka.
53 Aya,
a tadakw aza mce Yesu aza ata mpe gafaŋgal.
A paɗ a maslaga ma pepeɗek,
a wanza aka ŋ jeɓ marara ŋ kefe maa kaw əy kámpas ɗala ŋma askwaw.
54 Pes wese anta ca,
ara pes ma ata sla səkan mala pes ma ata zazak.
Pes ma ata zazak anta ca,
a mar mala mackwahw anta,
maa pes a kandav.
55 Aya,
weləye ma səbaraza Yesu aka ŋ Galəyləy wese ege,
əy ndaha tewtew ey ata Yusufu anta.
Əy sar la ŋ jeɓ,
əy gəre maa əy wanza kusam Yesu ca,
vaŋgay.
56 A dəwze anta,
əy zen tata a wata ŋ slaha mel mpe leŋ mel ma kenjef feŋfeŋ ŋ kwecene ata kusam Yesu.
Cemey,
əy zazak a pes ma ata zazak ana maa laŋkan ma mala Musa a zlap.