Luk 24

Yesu a gwarzamha aza ata lamac

Aya, a dəwze pes ma ata zazak, a pes luma buwal beŋ mala mapat, weləye wese ege, əy ŋta mel mpe leŋ mel ma kenjef feŋfeŋ maa əy slata ka ege, ŋ nda a ma jeɓ wese. 2 A təwse, əy ndewzene ŋ beleler ma dakal ma a ma jeɓ kétetəŋgweleye aza ata zlaŋgal. 3 Aya, əy dam ŋ jeɓ anta, cemey, əy kéndewzene ŋ kusam Bay Madakal Yesu askwaw. 4 A təwse ca, ŋkwaɓ kéŋgetene aza, kaw əy kasan səkan maa əy kanala səkwaw. Kəɗe ca, hejəye gbak əy ghwelzetene kusam, rəgwac ma ata kusam tata ege pepeɗek, əy keweɗ tezlezle. 5 A təwse ca, weləye wese ege əy kálalak tata, aya, əy ŋteŋ ha tata ege aka kəɗa ata hayak. Aya, hejəye ma gbak ege wese, əy zlepetene, əy ŋgaya: «Hune nasan ŋ mpam ɗala ma a nje ŋ taba hejəye mamacamac ege ca, vaŋgay? 6 Mbəy ete ŋghe askwaw, kágwarzamha aza ata lamac. Hune senzene ata ma maa a zlapahune ata vah ma mbəy ŋ Galəyləy wese, 7 a ŋgaya: “Səy əy mevelzekey, sa, sa Mba Ɗala aza, asa ra hejəye ma la gay ege, əy mederekey aza ata mpe gafaŋgal. Aya, ata wan mamahkaɗ anta ca, sa nagwarzamha aza ata lamac!”»

8 A təwse ca, əy senzene ata ma ege maa Yesu a zlepetene ege wese. 9 Aya, əy gwarzam aka a ma jeɓ, əy nda ŋ ghwelzetene səkan ma laha ŋghe ege tewtew ŋ malaɓ ma wam aha teŋguleŋ ege leŋ ŋ hejəye vedəye tewtew. 10 Weləye anta ege ca, ara ata Marəyama Magdala, Yawana leŋ Marəyama man Yakuba leŋ weləye vedəye maa əy nda tewtew ege zeney. Aya, əy ghwelzetene ma anta ŋ malaɓ Yesu ege. 11 Cemey, əy sarza ma tata anta ana ma ma bəse, əy kalamza askwaw. 12 Aya, Pəyer perce a gwarzam, a hey a ma jeɓ. A təwse, a ŋteɓ, a sar la ŋma, a gəreɓa ca, səy rəgwac maa əy paɗaza a mbe. Aya, zen a zen anta a wata, ŋkwaɓ anta a kaŋga ata səkan ma laha.

Yesu a ghwelzetene kusam ŋ madarlaŋw anta ege gbak ata taf Emawus

13 Aya, a pes maa Yesu a gwarzamha aza ata lamac ca, madarlaŋw anta ege gbak əy nda ŋ uzam maa əy kayaɓa Emawus. Mbəy gədak a Urusaləyma, səy hwa la ler gbak ata taf ŋ hwas a təwse. 14 Əy kazlap ata səkan ege tewtew ma laha ata wan ŋghe ege wese. 15 Cemey, maa əy kazlap, əy kaja səbakw ŋ taba tata ca, Yesu anta a mbalata ata taf, aya, tel əy nda tewtew. 16 A təwse, əy kegəre Yesu kadak kadak, cemey, səkan wende aka a katakata ka ŋ sanaw. 17 Yesu a ɗawzata, a ŋgaya: «Hune ja səbakw ara ca, ata vemey?» Aya, kusam tata guzaɓ a mecetene aza, əy gar aka.

18 A təwse ca, madarlaŋw wende maa əy kayaɓa Kəyləyawpas a zenene, a ŋgaya: «Hwa ca, hwa mbəlakw ŋ Urusaləyma vaw? Hwa kasan səkan ma laha ata vah ŋghe ege səkwaw vaw?» 19 A ɗawzata, a ŋgaya: «Ma laha anta ca, vemey?» Əy zenene, əy ŋgaya: «Ma ma ndewzene ŋ Yesu, ɗala Nasaratu. Ara mba ma zlap ma a Bay Gazlavay Madakal. Kághwalza ɓarɓar anta ta ŋ zlan anta ege ey zlap anta ege a tama Gazlavay leŋ a tama hejəye tewtew. 20 Cemey, madakal dakal mala kwakwas ŋtakwaw ege ey madakal dakal ŋtakwaw ege ma a tama, əy kávalza aza ŋ Rawma ege ŋ jene guma ŋ jaw. Əy kádar ka ata mpe gafaŋgal. 21 Nene ulakza ca, ara mbe ma kenerehzata hejəye Əysərayela ege ŋ gef tata ege. Cemey, a tambaca wan mamahkaɗ anta, maa səkan anta ege əy laha.

22 «A zeney, weləye vedəye ma ŋ taba ŋcene ege əy káwal beŋ mala mapat ŋghe, a ma jeɓ. Əy kéŋgeney ŋkwaɓ aza. 23 Cemey, əy kéndewzene ŋ kusam Yesu anta askwaw. Əy zenha əy ghwelzeney, əy ŋgaya: “Malaɓ Gazlavay ege əy kéghwelzeney kusam, əy zlepeney, əy ŋgaya: Yesu mbəy a nje.” 24 Aya, hejəye ŋcene ege vedəye zeney, əy kánda a ma jeɓ anta yam. A təwse ca, əy ndewzetene a səkan ege tewtew ana maa weləye wese ege əy ghwelzeney wese. Cemey, Yesu ca, əy kégəre askwaw.»

25 Aya, Yesu a zlepetene, a ŋgaya: «Hune hejəye maa ŋkwaɓ ŋ ha ege askwaw ŋghe! Hune hejəye maa unaf ŋkune ege əy kanja səpek ŋ lamza ma maa uzəye ma zlap ma a Gazlavay ege əy ghwalza tewtew! 26 Hune kasan səy Kərəystu ɗala maa Gazlavay a laɓaza ŋ rehzata hejəye, masa gef aza ŋ səkan ŋghe anta ege tewtew kwagwa, amba Gazlavay a velene ɓardakw anta səkwaw vaw?» 27 Ca, a ghwelzetene ma mazlapazlap ata ha anta ege tewtew ŋ leŋter ma ŋ ɗerewel a Gazlavay. A maraza aka ŋ ɗerewel mala Musa, a dəwze anta, ŋ ɗerewel mala uzəye ma zlap ma a Gazlavay ege tewtew.

28 Aya, maa əy slaɓ ŋ hwas ŋ uzam maa əy kanda ŋma wese ca, Yesu a la ana maa a geɓzata aka, a nda anta a tama. 29 Cemey, əy tak ka, əy ŋgaya: «Nja ka ara nene ete ŋghe, mavəday pes slaɓ ŋ ndav, zaɗaw slaɓ ŋ ndaha tew,» əy ya. A təwse, a zenha, əy dam tewtew tata a ujek. 30 Əy nja tewtew ata lazam səkan. Aya, Yesu kpaŋ a ŋta uda peŋ, a lene wasay ŋ Bay Gazlavay. A dəwze anta, a ŋga ka, ŋtez a ŋtezetene. 31 Səkan ma takata ka ŋ san Yesu wese, aka zeney askwaw, aya, san əy sanza. A təwse a təwse, əy kegəre a həzlar tata zeney askwaw. 32 Əy zlap ŋ taba tata, əy ŋgaya: «Maa a kazlapamaw ata taf leŋ maa a kaghwalzamaw leŋter ege ma ŋ ɗerewel a Gazlavay wese ca, unaf ŋtamaw ege əy kázla tata ata sasam askwaw vaw?»

33 A təwse, əy gwarzam, əy zen ŋ Urusaləyma. Əy ndewzetene ŋ malaɓ ege ma wam aha teŋguleŋ leŋ hejəye tata ege vedəye, əy kéɓeceye. 34 Hejəye tewtew əy zlepetene ŋ madarlaŋw ma gbak ŋghe ege wese, əy ŋgaya: «Njenjəwen Bay Madakal kágwarzamha aza ata lamac, kéghwelzene kusam ŋ Səymawn!» 35 Aya, madarlaŋw ma gbak ege wese, əy ghwelzetene səkan ma ndewzetene ata taf wese yam. A zeney, əy ghwelzetene, əy ŋgaya: «Nene san Yesu ca, maa a kéŋtez uda peŋ.»

Yesu a ghwelzetene kusam ŋ madarlaŋw anta ege

36 Ca, maa madarlaŋw ma gbak ege wese əy kazlap kwagwa ca, Yesu a ndaha ŋ taba tata, a zlepetene, a ŋgaya: «Zəhay a Gazlavay manja ata hune!» 37 A təwse ca, ŋgəzleŋ kájata aza, əy kálalak tata dakala, əy kanana, əy ulakza ca, ara zaɓəla ma ndewzetene.

38 Cemey, Yesu a zlepetene, a ŋgaya: «Hune lalak ca, mavəday vemey? Hune ulak ŋkwaɓ gbak gbak ŋ unaf ŋkune ca, mavəday vemey? 39 Hune sarza ra naka ege ey ŋgas naka ege, ara sa anta! Hune teteɓzekey, hune serzekey kadak kadak, ndar hune san njenjəwen ara sa. Zaɓəla ca, kaw zley, kaw kerŋgesl a heɗe ana maa hune kegərekey ŋghe askwaw.» 40 Aya, maa a kezlepetene ana ebe ŋghe ca, a ghwelzetene ra anta ege ey ŋgas anta ege. 41 Madarlaŋw wese ege əy kasasam dakala, ŋkwaɓ tata a kaŋga. Kaw əy kula ŋ lamza ma anta kwagwa səkwaw. Aya, Yesu a ɗawzata, a ŋgaya: «Səkan ta zam ara hune ete ŋghe aka vaw?» 42 A təwse ca, əy velene ŋkəlef mamsawamsaw. 43 A ŋtaw, a zam ata nje tata a təwse.

44 A dəwze anta a zlepetene, a ŋgaya: «Ata vah maa heje tewtew ŋ la anta kwagwa wese ca, sa kághwalzahune aza, səy ma meŋtereŋter ege tewtew ata sa ŋ ɗerewel laŋkan ma mala Musa, ŋ ɗerewel uzəye ma zlap ma a Gazlavay ege leŋ ŋ Jabura, mala anta!» 45 A təwse, a zlerzetene ŋkwaɓ ŋ san ma meŋtereŋter ege ŋ ɗerewel a Gazlavay. 46 A zlepetene, a ŋgaya: «Kéŋtereye ŋ ɗerewel a Gazlavay ana ebe ŋghe: “Kərəystu a nasa gef, a namac, a dəwze anta a nagwarzamha aza ata lamac ata wan mamahkaɗ anta.” 47 Əy neghwelzetene zlap a zlam anta ŋ hejəye tewtew ma a manhayak ege, a namar aka ŋ Urusaləyma, əy nazlap, əy ŋgaya: “Hune bawza lanja ŋkune ege aza, ndar Gazlavay a palzahune gay ŋkune ege aka”. 48 Ara hune ma keneghwelzetene səkan ege maa hune gəreta ŋghe ege ŋ hejəye. 49 Sa ca, sa nalaɓahune Zəwet ma keweɗ maa vana a zlap ŋ valahune wese. Aya, hune ca, hune nja ka ŋ uzam Urusaləyma ha hwas ata vah ma ɓarɓar a Gazlavay a nandaha aza ata hune.»

Gazlavay a ŋta Yesu aza mgba ata uzlaf

50 A dəwze anta, Yesu a jeɓzata madarlaŋw anta ege wese mbermber a həzlar uzam Baytanəya. A təwse, a kafza ra anta mgba ata ha tata, a bəzletene. 51 Maa a kebəzletene wese ca, yak a yakzata aka, Gazlavay a ŋta aza mgba ata uzlaf ara mbe. 52 A təwse ca, madarlaŋw anta ege wese əy gəleɓene, əy həmanza. A dəwze anta, əy zen tata ŋ Urusaləyma, əy kasasam ara dakala mambaza. 53 Ata pes ata pes, əy a ujek kwakwas, əy kahəmanza Gazlavay.