Luk 22

Madakal dakal ege əy jav ma tata ŋ mbal Yesu

Gwaygwaya uda peŋ maa əy kelene səkan ma ata hafza aka ŋma askwaw, maa əy kayaɓa Paska, slaɓ ŋ hwasha. 2 Madakal dakal mala kwakwas ege ey maghwal ma maŋkanaŋkan ege əy mpam taf ŋ ja Yesu aza, cemey, əy kalalak ata hejəye.

Yahuda a valza Yesu ŋ madakal dakal ege

3 A dəwze anta, Sayɗanu a dam ŋ unaf Yahuda maa əy kayaɓa Əyskarəyawt. Ara ɗala ma teŋguleŋ ŋ taba malaɓ Yesu ege ma wam aha gbak. 4 Aya, Yahuda a nda ara madakal dakal mala kwakwas ege ey madakal dakal mahəbar ujek kwakwas ege ŋ zen zlap ata werwer ma a keneveletene Yesu ŋ mbalaw. 5 A təwse ca, madakal dakal ege wese əy sasam dakala mambaza. Əy zlepene əy ŋgaya: «Mada hwa kévelene aza ca, nene navalahwaw səlay». 6 Aya, Yahuda wese, a lamza ma tata, a mpam taf ŋ veletene Yesu ŋ mbalaw, kaw hejəye əy ɗaw ŋ san səkwaw.

Lasla uda gwaygwaya Paska

7 Pes gwaygwaya uda peŋ maa əy kelene səkan ma ata hafza aka ŋma askwaw a hwasha. Ara pes maa hejəye əy kafat uzəye ŋtəməye ŋ ja gwaygwaya Paska. 8 Aya, Yesu a laɓzata ata Pəyer ey Yuhana, a zlepetene, a ŋgaya: «Hune nda ŋ slaheje la ey uda gwaygwaya Paska ka ndar heje zamakwaw.» 9 A təwse, əy ɗawza, əy ŋgaya: «Hwa ɗaw nene nda ŋ slaza ca, a katay?» 10 Yesu a zenetene, a ŋgaya: «Hune teh zlam, hune nda, mada hune kanadam ŋ Urusaləyma ca, hune neŋgel ma a ɗala wende aka a ketew yam a dugwazl. Hune səbar a wata maa a kanadam ŋma. 11 Aya, hune zlepene ŋ heje ujek anta ca, “Bay ŋcene, a ŋgaya: Ujek maa sa kanazam uda gwaygwaya Paska ŋma a madarlaŋw naka ege ca, mbəy a katay?” 12 Cemey, a naghwalzahune ujek ma dakal wende aka, ma mgba ata ha ujek. Səkan ege tewtew ma ata ja gwaygwaya əy késleye ŋma. Hune slaheje uda gwaygwaya Paska ka, ŋma.» 13 A təwse, tel əy nda, əy ndewzetene a səkan ege tewtew ana maa Yesu a zlepetene wese. Aya, sla əy slaza uda gwaygwaya Paska wese ka.

Yesu a zam uda gwaygwaya Paska ma maɗ

14 Aya, maa la kála anta tete ma ata zam uda gwaygwaya Paska wese ca, Yesu a nda a ujek maslasla wese, a nja ŋ zam uda ey malaɓ anta ege. 15 A zlepetene, a ŋgaya: «Sa kaɗawza mambaza ŋ zam uda gwaygwaya Paska ŋgha a hune mar sa nasa gef. 16 Cemey, sa kazlapahune, kaw sa kanazam uda gwaygwaya Paska anta zeney askwaw, səy ata vah maa bay mala Gazlavay ata hejəye mahwasha aza. Ata vah wese ca, labara gwaygwaya Paska anta a ghwalha aza njenjəwen.»

17 A dəwze anta, a ŋta mavaw ŋ tekeɗ, a lene wasay ŋ Gazlavay, a ŋgaya: «Hune lamza mavaw ma ŋ tekeɗ ŋghe, hune sa tewtew ŋkune. 18 Ayaw, sa kazlapahune njenjəwen, mar aka ma na ŋgha, kaw sa kanasa mavaw anta zeney askwaw, səy ata vah maa bay mala Gazlavay ata hejəye mahwasha aza».

19 A zeney, a ŋta uda peŋ, a lene wasay ŋ Gazlavay, a dəwze anta, a ŋga aka, a veletene ŋ malaɓ anta ege wese, a zlepetene, a ŋgaya: «Ebe ŋghe, ara kusam naka ma kéveleye mavəday hune. Hune la ana ebe ŋghe ŋ senzekey.» 20 A dəwze maa uda kézemeye aza, a ŋta mavaw ŋ tekeɗ, a ŋgaya: «Mavaw ŋgha, ara laŋkan ma mewe ma taŋtaŋ maa Gazlavay a kanala ta ŋ mbambaz naka ma kanazahaha mavəday hune.

21 «Cemey, mbəy cakwa, hune sarza ɗala ma kenevelzekey ŋ mbelekey, nene kazam uda ŋ la anta. 22 Njenjəwen, sa, sa Mba Ɗala, sa namac ana maa Gazlavay a ɗawaw. Cemey, gef ma dakal mambaza a nendewzene ŋ ɗala ma kenevelzekey!» 23 Maa malaɓ ege əy zləme ana ebe ŋghe ca, əy ɗawza ha tata ege, əy ŋgaya: «Ɗala ma kanala səkan ma da ebe ŋghe ŋ taba ŋtakwaw ca, vayay?» əy ya.

Ɗala ma pa ma dakal ŋ taba malaɓ ege ca, vayay?

24 Aya, malaɓ Yesu ege əy ja səbakw ŋ taba tata ŋ san madakal ŋ taba tata ca, vayay? 25 Yesu a zlepetene, a ŋgaya: «Bay ma ŋ hayak ege, əy kazam bay a ɓarɓar ata hejəye. Madakal dakal ege ma a tama hejəye yam, əy ɗaw ca, hejəye əy həmanzata, əy yata a hejəye ma kala zlan ma taŋtaŋ ege. 26 Cemey, hune ca, hune ɗaw ŋ la ana ebe ŋghe səkwaw. Ɗala ma pa ma dakal ŋ taba ŋkune ca, səy mabawza ha anta aza ana mba ma pa ma pəzekw ŋ taba ŋkune. Madakal ma a tama yam ca, səy manja ana mala zlan. 27 Cemey, ŋ taba ata ɗala ma kazam uda ey ma da uda ca, ma pa ma dakal tata ca, vayay? Ɗala ma kazam uda vaw? Ɗala ma da uda vaw? Madakal ca, ara ɗala ma kazam uda. Cemey, sa ca, sa ŋ taba ŋkune ana mala zlan. 28 Hune ca, hune hejəye ma kávalza ha ŋkune ege aza ŋ nja ara sa ata pes ata pes ata vah maa sa kasa gef. 29 Sa yam, sa valahune ɓarɓar ŋ zam bay ana maa vana a velekey yam, 30 ndar heje zamakwaw səkan leŋ heje sakwaw səkan ŋ la anta ŋ lazam bay naka. Hune nanja ata lanja bay ege ŋ jetene guma ŋ ŋseŋ Əysərayela ege wam aha gbak.»

Yesu ey Səymawn Pəyer

31 Bay Madakal Yesu a zlepene ŋ Səymawn Pəyer, a ŋgaya: «Səymawn, Səymawn, Sayɗanu kélem taf aza ara Gazlavay ŋ mbeŋahune ana maa ɗala a kembeŋ ndərey ŋ ɓezata ata yam ndərey ey zlambahw. 32 Cemey, sa kárak Gazlavay aza mavəday hwa ndar hwa ɗaw ŋ yakza ŋ lemzekey səkwaw. Aya, a pes maa hwa kézenha aza ara sa ca, veletene ɓarɓar ŋ zlanahw ege yam.» 33 Pəyer a zlepene ŋ Yesu, a ŋgaya: «Bay Madakal, sa kávalza ha naka aza ŋ nda a hwa kaw ŋ ujek daŋgay, kaw ata lamac.» 34 Yesu a zenene, a ŋgaya: «Pəyer, sa kazlapahwaw, a tambaca, mar gamzakw a naja ula ca, hwa nazlap gas mahkaɗ, hwa kesenekey səkwaw, hwa kesenekey səkwaw.»

Hune sla ka ata gef ma kanadaha

35 A dəwze anta, Yesu a zlepetene ŋ malaɓ anta ege, a ŋgaya: «A pes maa sa laɓzahune kaw a səlay asa ra askwaw, kaw a bakatar askwaw, kaw a ŋte askwaw wese ca, hune kámay səkan wende a təwse aka vaw?» Əy zenene, əy ŋgaya: «Kaw askwaw!» 36 Aya, a zlepetene, a ŋgaya: «Cemey, na ŋgha ca, ɗala maa səlay anta aka, maŋtaɓa ara asa ra, ɗala ma bakatar anta aka, maŋtaɓa ara. Ɗala ma ŋgezle masalam anta askwaw yam, masəkam rəgwac anta aza, masəkamaɓa aza eze. 37 Cemey, sa kazlapahune, ma meŋtereŋter ŋ ɗerewel a Gazlavay ata sa, maa a ŋgaya: “Kéŋgeɗeye ŋ taba hejəye ma ja ŋkəɗeh ege” wese ca, səy mala anta. Njenjəwen, ma meŋtereŋter ata sa a nala.» 38 Malaɓ anta ege wese, əy zlepene, əy ŋgaya: «Bay Madakal, ŋghe ŋgezle masalam ege gbak aka.» Cemey, Yesu a zenetene a ŋgaya: «Ga tew.»

Yesu a rak Gazlavay ata barla Jaytun

39 Aya, Yesu a damha aza ŋ uzam Urusaləyma, a nda ana ma a mpat a mpat ŋ barla Jaytun. Malaɓ anta ege əy səbaraw. 40 Maa a hwas a təwse ca, a zlepetene, a ŋgaya: «Hune rak Gazlavay, ndar səkan ma dadawar a ɗaw ŋ baɗzahune ŋ la gay səkwaw.» 41 Aya, a zen anta kəɗe ata zlaŋgal cekuɗe ende, mada ɗala a kwap ŋkəɗaŋ ca, a hwas anta ata la anta. A təwse ca, a gəleɓ, a rak Gazlavay, a ŋgaya: 42 «Vana! Mada hwa kaɗaw ca, hwa kula ŋ gam gef maa sa kanasa ŋgha aza gədak a sa. A mbe anta tewtew ca, hwa ɗaw ŋ la ana maa sa kaɗaw səkwaw, cemey, la ana maa hwa kaɗawaw.»

43 [A təwse, malaɓ Gazlavay, a tadakwha aka mgba ata uzlaf, a velene ɓarɓar. 44 A mbe anta tewtew ca, unaf Yesu kázla anta mambaza, a rak Gazlavay dakala ha ruraɓ ma ata kusam anta a zlavha ata hayak ana mbambaz ma kazlav.]

45 A dəwze maa kárak Gazlavay aza, aya, a gwarzam, a nda kəɗe ara malaɓ anta ege. A ndewzetene ca, əy káwan tata mavəday əy ŋtəɓal dəydey mambaza ata ledeŋ ŋkwaɓ. 46 A təwse, a zlepetene, a ŋgaya: «Hune wan vemey! Hune gwarzam, hune rak Gazlavay ndar səkan ma dadawar a ɗaw ŋ baɗzahune ŋ la gay səkwaw.»

Əy mbal Yesu

47 Maa Yesu káŋtakwza zlap anta kwagwa səkwaw ca, hejəye vəram əy ndaha zlaɓa Yahuda, ɗala teŋguleŋ ma ŋ taba malaɓ anta ege ma wam aha gbak ege wese. Yahuda anta, mbəy a tama tata. A zenha mbermber ara Yesu, ndar a səkawaw ana ma ŋ zlepzene. 48 Cemey, Yesu a zlepene, a ŋgaya: «Yahuda, hwa nevelzekey sa, sa Mba Ɗala ca, a lasəkaw vaw?» 49 Aya, maa hejəye ma a həzlar Yesu ege əy gəre səkan ŋgha ca, əy ɗawza, əy ŋgaya: «Bay Madakal, nene ɗa gham a hejəye ŋghe anta ege a ŋgezle masalam ŋcene ege vaw?» 50 A təwse ca, ɗala teŋguleŋ ŋ taba tata, a bal mala zlan mala bay kwakwas, razl a rezlene zlam kəva zam anta aza. 51 Cemey, Yesu a ŋgaya: «Ga! Hune yakza laɗa gham aka.» Aya, a ca ra anta ata zlam heje wese, paɗ zlam anta a paɗ anta.

52 A dəwze anta, Yesu a zlepetene ŋ madakal dakal mala kwakwas ege leŋ ŋ madakal dakal mahəbar ujek kwakwas ege zlaɓa msəra ege ma ndaha ŋ mbalaw ege, a ŋgaya: «Hune ndaha a ŋgezle masalam ege leŋ a zlambay ege ŋ mbelekey ca, sa heje ŋhel vaw? 53 Maa sa ŋ taba ŋkune ata pes ata pes a ujek kwakwas, kaw hune kampam ŋ mbelekey askwaw. Cemey, na ŋgha ca, ara vah ŋkune, a zeney, ara pes mala bay malula ma kanala ɓarɓar anta ŋ kuzle.»

Pəyer a ŋgaya, a kasan Yesu səkwaw

54 A dəwze maa əy kámbal Yesu aza ca, aya, əy njewew, əy jeɓza a wata bay kwakwas. Pəyer a kasəbarata ata gədak. 55 A təwse, əy kábas kwahwaw aka ata varvara ge. Hejəye əy kénjeye a meɗeɗe, aya, Pəyer a ndaha, a nja ka ŋ taba tata. 56 Aya, haldəma mala zlan a wata bay kwakwas wese, a gəre Pəyer kénjeye a ma kwahwaw. A sarza kadak kadak, a ŋgaya: «Heje ŋghe ca, əy kanja a Yesu!» 57 Cemey, Pəyer a zenene, a ŋgaya: «Həla, kaw sa kasan heje ŋghe səkwaw.» 58 A dəwze anta cekuɗe, heje wende a gəre Pəyer zeney, a zlepene, a ŋgaya: «Hwa yam ca, hwa ɗala ma ŋ taba ata Yesu anta!» Cemey, a zenene, a ŋgaya: «Kay! Kaw sa ŋ taba tata askwaw.» 59 A dəwze ler teŋguleŋ, heje wende zeney, a zlap a mazlazlay, a ŋgaya: «Njenjəwen, heje ŋghe ca, əy kanja a mbe, mavəday ara ɗala Galəyləy.» 60 Cemey, Pəyer a zenene, a ŋgaya: «Kay! Sa kasan ma maa hwa kaɗaw ŋ zlap ŋgha səkwaw.»

A təwse a təwse maa káŋtakwza zlap kwagwa səkwaw ca, gamzakw a ja ula. 61 Aya, Bay Madakal Yesu a bawha kəɗe aha Pəyer, a sarza kadak kadak. A təwse ca, Pəyer a senzene ata ma maa Yesu a zlepene wese: «Mar gamzakw a naja ula a tambaca ca, hwa nazlap gas mahkaɗ, hwa kesenekey səkwaw, hwa kesenekey səkwaw.» 62 Aya, a damha aza a bəza, a han dakala mambaza.

Əy raɓa Yesu, əy gazlaw

63-64 Hejəye ma həbar Yesu ege əy ɓas a heɗe. Əy depene nje anta aka, əy gazlaw, aya, əy ɗawza, əy ŋgaya: «Mada hwa ma zlap ma a Gazlavay ca, ghwelzeney heje ma gazlahwaw ŋgha.» 65 Aya, əy zlepene ma ege vedəye vedəye vəram, ma ata raɓa.

Yesu mbəy a tama maja guma ege

66 Maa mapat kála anta ca, madakal dakal ma a tama Yahudu ege, madakal dakal mala kwakwas ege leŋ maghwal ma maŋkanaŋkan ege, əy jav. Aya, əy zlepetene ŋ mahəbar Yesu ege wese, ŋ daza ata laja guma tata. 67 A təwse ca, əy ɗawza, əy ŋgaya: «Hwa ca, hwa Kərəystu, ɗala maa Gazlavay a laɓaza ŋ rehzata hejəye vaw? Zlepeney!» Cemey, Yesu a zenetene, a ŋgaya: «Mada sa zlapahune sa Kərəystu, hune kanalamza askwaw, 68 mada sa ɗawzahune yam, hune kenezenekey zlap ŋma askwaw. 69 Cemey, mar aka na ŋgha, sa, sa Mba Ɗala, sa nanja ata ra zam Bay Gazlavay Madakal.» 70 Aya, hejəye tewtew əy zlepene, əy ŋgaya: «Hwa ca, hwa Mba Gazlavay aza vaw?» A zenetene, a ŋgaya: «Ayaw, njəwen ana maa hune zlap, sa Mba Gazlavay.» 71 A təwse, əy ŋgaya: «Na ca, heje kézləme aza a ha ŋtakwaw a ma anta, heje mpam ɗala ŋ ghwalzaheje ma zeney vekey!»