Wala mce metetekw a velene səkan ŋ Gazlavay
21
Yesu mbəy a ujek kwakwas.
A sar la kəɗe ata zlaŋgal ca,
a gəre hejəye maŋcaɗaŋcaɗ ege əy kakway səlay tata ege ŋ səkan ma ata cak səlay.
2 A təwse,
a gəre wala mce metetekw mambaza wende aka,
a kakway səlay sesey sesey gbak ŋma yam.
3 Aya,
Yesu,
a ŋgaya:
«Sa kazlapahune njenjəwen,
wala mce metetekw ŋghe kával səlay pa ma day aha hejəye vedəye tewtew.
4 Sa zlap ana ebe ŋghe ca,
mavəday hejəye vedəye ŋghe ege tewtew ca,
əy valza səlay tata cekuɗe ende ŋghe ŋ səlay tata medefedef.
Cemey,
wala ŋgha ca,
a metetekw anta tewtew,
kávalza səlay anta ma a kanazam səkan a mbe aza tewtew.»
Yesu a kaghwalza lapəlah ujek kwakwas
5 Hejəye vedəye əy kazlap ata ujek kwakwas,
əy ŋgaya:
«Ujek ŋgha kélemeye tuwah dəydey zlaɓa ŋkəɗaŋ anta ege ma tuwah tuwah leŋ səkan ege maa əy velene ŋ Gazlavay.»
Cemey,
Yesu a zlepetene a ŋgaya:
6 «Vah a nandaha,
səkan ege tewtew maa hune kegəreta ŋghe ege ca,
əy napəlahata,
kaw ŋkəɗaŋ teŋguleŋ a kenemenha ata ŋkəɗaŋ wende askwaw.»
Səkan ege ma kaghwalza laŋtakw manhayak
7 A təwse ca,
əy ɗawza Yesu,
əy ŋgaya:
«Madakal,
səkan anta ege əy nalaha vepey?
Nene nasan vah laŋtakw manhayak anta hwas ca,
ata vemey?»
8 Yesu a zenetene,
a ŋgaya:
«Hune sla ka!
Hejəye əy kaɗaw ŋ baɗzahune.
Sa zlapahune ana ebe ŋghe ca,
mavəday,
hejəye vəram əy nandaha a zlam naka,
aya,
əy nazlap:
“Sa ca,
sa Kərəystu,
vah laŋtakw manhayak hwas!”
Cemey,
hune ɗaw ŋ səbarata səkwaw.
9 Cemey,
ata vah maa hune kezləme zlap ata laɗa gham ege leŋ ata hejəye ma kampam ma asa bay tata ege ca,
hune ɗaw ŋ lalak səkwaw,
mavəday,
səy səkan ŋghe anta ege əy mala tata kwagwa.
Cemey,
ara laŋtakw manhayak a təwse a təwse səkwaw.»
10 Aya,
a zlepetene zeney,
a ŋgaya:
«Hejəye ma a uzam wende,
əy naɗa gham a hejəye ma a uzam wende,
bay hayak wende a naɗa gham a bay hayak wende.
11 Ata la ege vedəye vedəye,
hayak a nahəɓal dakala,
metes a nala dakala,
dawar ege parpar parpar ma kazav,
a nambalata hejəye.
A zeney,
hejəye əy negəre zaɓəla ege vedəye vedəye əy nala mgba ata uzlaf,
aya,
əy nalalak dakala mambaza.
12 «Cemey,
mar səkan ŋghe anta ege tewtew əy nala ca,
əy nambalahune,
əy nasahune gef,
əy nejeɓzahune ŋ jahune guma ŋ ujek ege ma ata rak Gazlavay a Yahudu ege,
əy nanahzahune ŋ daŋgay.
Əy nejeɓzahune a tama bay ege leŋ a tama mambal hayak ege mavəday zlam naka.
13 Səkan ŋghe anta ege tewtew əy nendewzahune,
ndar hune ghwelzekey a tama hejəye.
14 A təwse ca,
hune san ka kadak kadak,
hune ɗaw ŋ lalak səkwaw.
Hune ɗaw ŋ deŋza ata ma maa hune kanazlap ŋ reha səkwaw.
15 Cemey,
sa a ha naka,
sa navalahune ŋkwaɓ ma ata zlap a kəleŋ.
Ana ebe ŋghe,
kaw hejəye ma kaɗaw ŋ gərehune ata nje ege səkwaw,
əy kanala kula ŋ ndavzahune ŋ zlap səkwaw.
16 Kaw ata cehw ey macahw,
kaw zlanahw ege,
kaw van ŋkune ege,
kaw ŋgama ŋkune ege,
əy navalzahune ata laja guma,
əy najata hejəye vedəye aza vəram ŋ taba ŋkune.
17 Hejəye tewtew əy kanaɗawahune səkwaw,
mavəday maa hune ketehzekey zlam.
18 Cemey,
jukwaɗ ha ŋkune kaw teŋguleŋ a kanafətek askwaw.
19 Hune sew gef anta!
Ana ebe ŋghe,
hune nereh ŋkune.»
Yesu a zlap ata Urusaləyma ma kanapəlah anta
20 A zeney,
Yesu a zlepetene ŋ madarlaŋw anta ege,
a ŋgaya:
«Mada hune kégəre sawje ege mala hayak hejəye ma kaɗaw ŋ gəre Urusaləyma ata nje səkwaw,
əy kédərezl aza ŋ ɗa gham ca,
hune san ka,
uzam anta slaɓ ŋ pəlah.
21 A təwse ca,
hejəye ma ŋ Yahudəya ege əy mehey ŋ ɓah ŋ barla,
hejəye ma ŋ Urusaləyma ege əy madamha aza ŋma,
hejəye ma ata kəva ma a mazlam ege əy ɗaw ŋ dam ŋ uzam anta səkwaw.
22 Sa zlap ana ebe ŋghe ca,
mavəday,
ata pes wese ege ca,
Gazlavay a nesetene gef ŋ hejəye anta ege,
ndar,
səkan meŋtereŋter ege tewtew ŋ ɗerewel a Gazlavay,
əy la tata.
23 Ata vah anta wese ca,
gef a nadaha dakala mambaza ata weləye ma a dəmas ege ey weləye maa uzəye ma asa ra tata ege əy kasa wa,
mavəday hejəye ma ŋ hayak ŋghe anta ege əy nasa gef dakala.
Unaf Gazlavay a naghwaɗ dakala ata tata.
24 Cemey,
hejəye ma kaɗaw ŋ gəreta ata nje ege səkwaw,
əy najata hejəye vedəye aza a ŋgezle masalam,
hejəye vedəye zeney,
əy nejeɓzata ŋ hayak ege vedəye vedəye a mava ege.
Ana ebe ŋghe,
mbəlam ma kasan Gazlavay səkwaw ege,
əy napəlah Urusaləyma aza,
ha hwas ata laŋtakw vah tata.»
Mba Ɗala a nezenha
25 A zeney,
Yesu a ŋgaya:
«Ata vah wese ca,
hejəye əy nalalak dakala mambaza,
əy nedeŋ ŋkwaɓ dakala mavəday ŋtəra ey pes əy najaɓ tata,
gamzla ege əy nabaw tata.
Hejəye ma ŋ hayak ege tewtew,
əy nalalak mavəday larav latatəŋgwal yam ŋ lakwat ma dakal.
26 Hejəye əy nulak ŋkwaɓ dakala ata dadawar ma kanalaha ata manhayak tewtew,
əy nalalak tata mambaza,
əy namac mavəday ɓarɓar ege ma ata uzlaf əy nahəɓal.
27 A təwse,
hejəye əy negərekey sa,
sa Mba Ɗala sa kandaha ŋ mahwabakw a ɓarɓar leŋ a ɓardakw naka.
28 Cemey,
mada səkan ŋghe anta ege,
əy kámar aza ŋ la ca,
hune gar aka kadak kadak,
hune lem ɓarɓar,
mavəday sa,
sa mereh hune,
sa slaɓ ŋ ndaha.»
Laslaŋgal ma ata səke
29 A dəwze anta,
Yesu a zlepetene ŋ madarlaŋw anta ege a laslaŋgal ma,
a ŋgaya:
«Hune sarza səke leŋ mpe ege vedəye may.
30 Mada mpe ŋghe anta ege əy kaja vejeɗ tew ca,
hune kasan ca,
la slaɓ ŋ nda a damaw ŋ zləka.
31 A nja ana mbe yam,
mada hune kégəre səkan ege əy kala ana maa sa zlapahune ŋghe ca,
hune san ka,
bay mala Gazlavay ata hejəye slaɓ ŋ ndaha.
32 Sa kazlapahune njenjəwen,
mar səkan ŋghe anta ege tewtew əy nalata ca,
hejəye ma na ŋgha ege əy kanamac tata tewtew askwaw.
33 La ma ata uzlaf ey la ma ata hayak əy natuwaɗ,
cemey,
zlap naka ege ca,
əy kanatuwaɗ kaw vepey askwaw.»
Hune sla ka ata lezenha mala Yesu
34 A zeney,
Yesu a ŋgaya:
«Hune sla ka ata lanja ŋkune ege kadak kadak!
Hune ɗaw ŋ palza ha ŋkune ege ka tewtew ŋ zam səkan ege səkwaw,
ŋ sa səkan ege ha ŋ ŋhwaz səkwaw leŋ ŋ ulak ŋkwaɓ dəydey ata səkan ege ma ŋ manhayak ŋghe səkwaw.
Cemey,
hune ɗaw ŋ palza ha ŋkune ege ka tewtew ŋ səkan ŋghe anta ege səkwaw,
mavəday hune kasan pes maa sa,
sa Mba Ɗala maa sa kanandaha səkwaw.
A nendewzahune hwaf ende ŋghe,
35 ana taba ma kambal ŋkəlef ŋ yam,
pes anta a nendewzetene ŋ hejəye tewtew ma ata hayak ege.
36 Sa kazlapahune,
hune ɗaw ŋ wan ŋkune səkwaw,
hune rak Gazlavay ata pes ata pes kaw vepey,
ndar hune lem ɓarɓar ŋ reh ata səkan ŋghe ege tewtew ma kanalaha leŋ ŋ deŋ a tama naka,
sa,
sa Mba Ɗala.»
Yesu mbəy ŋ Urusaləyma