Luk 20

Ma velene ɓardakw ŋ Yesu ca, vayay?

A pes wende aka, Yesu a kasasəsarakzata hejəye ŋ ujek kwakwas, a ghwelzetene Ma Mewe ma Taŋtaŋ. Madakal dakal mala kwakwas ege ey maghwal ma maŋkanaŋkan ege zlaɓa hejəye madakal dakal ege ma a tama hejəye əy ndaha, 2 əy ɗawza, əy ŋgaya: «Ghwelzeney, ma zlapahwaw ŋ lata səkan ŋghe anta ege ca, vayay? Ma valahwaw taf ŋ lata ca, vayay?» 3 A təwse, a zenetene, a ŋgaya: «Sa yam, sa naɗawzahune ma teŋguleŋ, hune zenekey zlap. 4 Ma laɓaza Yuhana mala baptəysma ca, vayay? Ara Gazlavay ma laɓaza vaw, hejəye ma laɓaza vaw?»

5 Aya, əy zen zlap ŋ taba tata, əy ŋgaya: «Mada heje zenzene: “Ara Gazlavay ma laɓaza,” a nazlapaheje: “Ca, hune lemzene ma Yuhana anta səkwaw ca, ŋ vay?” 6 Cemey, mada heje zenzene: “Ara hejəye ma laɓaza,” hejəye tewtew əy nakwapaheje a ŋkəɗaŋ, əy najaheje aza, mavəday əy kaca Yuhana aza ca, ara mba ma zlap ma a Gazlavay.» 7 Aya, əy zenene, əy ŋgaya: «Nene kasan ɗala ma laɓaza Yuhana mala baptəysma anta səkwaw,» əy ya. 8 A təwse, Yesu a zlepetene, a ŋgaya: «Sa yam, sa kanaghwalzahune ɗala ma velekey taf ŋ la səkan ŋghe anta ege askwaw.»

Laslaŋgal ma ata hejəye dadawar ma kaɗas ege

9 A dəwze anta Yesu a zlepetene ŋ hejəye a laslaŋgal ma, a ŋgaya: «Heje wende aka, la anta aka, káŋgaɓ mpe ma kambaw mbaw aka vəram ŋma. A valza la anta ka asa ra hejəye ŋ ɗasaw, tel a nda anta ŋ ŋcəwerha, a nja a təwse walaŋ dakala. 10 Maa vah ma ata mbal mba mpe ege wese kála anta ca, a laɓza mala zlan anta wende ara maɗas ege wese ŋ lemene mba mpe magəva anta. Cemey, gazl əy gazl ka, əy gamaw, kaw əy kévelene səkan ara askwaw. 11 Aya, heje la wese a laɓza mala zlan anta wende zeney, gazl gazl əy gazl ka war, əy raɓa, əy gamaw, kaw əy kévelene səkan ara askwaw. 12 Aya, a laɓaza mala zlan anta wende mamahkaɗ anta zeney, mbe yam, ha əy cene mbəlah ka ata kusam, amba əy nahaza a bəza.

13 «A təwse, heje la wese, a ŋgaya: “Sa nalaɓa na ŋgha ca, vaŋgay? Sa nalaɓza mba naka maa sa kaɗaw dəydey, mbe ca, əy netehzene zlam.” Aya, a dəwze anta ca, a laɓza mba anta wese. 14 Cemey, maa maɗas ege əy gəre mba anta wese, a kandaha ca, əy zlap ŋ taba tata, əy ŋgaya: “Heje ŋghe ca, ara mazam ujek, ŋ jakwaw aza, ndar la a njaheje ka ŋ heje.” 15 Aya, maa mba wese a hwasha aza ca, əy njew aza kəɗa ŋ bəza, əy jaza.»

Cemey, Yesu a ɗawzata hejəye ma a təwse ege, a ŋgaya: «Na ŋgha ca, heje la anta a neletene ŋ maɗas ege wese vemey? 16 Ayaw, sa kazlapahune, heje la anta a nandaha, a najata aza, a navalza la anta wese aka asa ra hejəye matakan ege.» Maa hejəye əy zləme zlap Yesu wese ca, əy ŋgaya: «Kaw a ɗaw ŋ laha ana ebe ŋghe səkwaw!» 17 Cemey, a sarzata kadak kadak, a zlepetene, a ŋgaya: «Mada hune kaɗaw a laha ana ebe ŋghe səkwaw ca, ma Gazlavay meŋtereŋter ŋ ɗerewel anta, a ŋgaya:

“Ŋkəɗaŋ maa malam ujek ege

əy nahza aza ata zlaŋgal ca,

mbe ara ŋkəɗaŋ ma pa ma tuwah aha vedəye,”

ma ŋgha anta ca, a ɗaw ŋ zlap ca, vaŋgay? 18 Kaw vayay ma ndav ata ŋkəɗaŋ ŋgha anta ca, a nebərezene kusam anta aza. Mada ŋkəɗaŋ anta a nah ata ɗala ca, a nemeskweɗ ka.» 19 Ayaw, maghwal ma maŋkanaŋkan ege ey madakal dakal mala kwakwas ege wese, əy kasan Yesu a zlap a laslaŋgal ma ŋghe anta ca, ata tata. Əy ɗaw ŋ mbal a təwse a təwse, cemey, əy kálalak tata ata hejəye.

Lacak budaw ŋ bay Rawma

20 Aya, maghwal ma maŋkanaŋkan ege ey madakal dakal mala kwakwas ege, əy mar ŋ həbar Yesu ŋ zlap anta ege. Əy laɓzata hejəye ara mbe ŋ həbar zlap ege ma ŋ pakam anta. Hejəye anta ege əy ca ha tata ege ka ana tata hejəye ma taŋtaŋ ege. Əy ndaha ara Yesu a werwer tata ŋ zləme ma maa a kanagayaha ege ŋ zlap anta ege, ndar əy lem taf ŋ valza ŋ mambal hayak ma mbəy zlaɓa ɓarɓar ata hejəye. 21 Əy ɗawza, əy ŋgaya: «Madakal, nene kasan ca, ma maa hwa kazlapata ey maa hwa kaghwalzata ŋghe ege tewtew ca, əy a heɗe a heɗe. Hwa kasarzata hejəye tewtew tata, tata ma teŋguleŋ a tama ŋkwa. A zeney, hwa kasasərakzata hejəye ŋ nja ana maa Gazlavay a kaɗaw njenjəwen. 22 Ana ebe ŋghe, zlepeney, ma maŋkanaŋkan ŋcene ca, a kapal taf ŋ cekene budaw ŋ bay hayak Rawma vaw, askwaw vaw?»

23 Cemey, Yesu kásan werwer tata aza, aya, a zlepetene, a ŋgaya: 24 «Hune ghwelzekey səlay anta teŋguleŋ may! Fawtaw ma a heɗe ŋghe ca, a vayay? Zlam ma kéŋtereye a heɗe ŋghe ca, a vecey?» A təwse, əy zenene, əy ŋgaya: «Mala bay Rawma.» 25 Aya, Yesu a zenetene, a ŋgaya: «Mada ana ebe ŋghe ca, səkan mala bay Rawma, hune velene ŋ bay Rawma, səkan mala Gazlavay, hune velene ŋ Gazlavay.» 26 A təwse ca, kaw əy kélem ma maa ata mbalaw, ŋ zlap anta ege wese tewtew askwaw. Cemey, maa Yesu a zenetene ana ebe ŋghe wese ca, əy kédeŋ ŋkwaɓ dakala ata ma anta, aya, əy nja ka tete.

Laɗaw ata lagwarzamha hejəye ata lamac

27 Aya, hejəye vedəye ŋ taba Sadukəy ege, əy ndaha mbermber ara Yesu. Ara hejəye ma kedeŋza ca, hejəye mamacamac ege ca, əy kanagwarzamha aza ata lamac tata askwaw. Əy ɗawza, əy ŋgaya: 28 «Madakal, Musa kéŋterene ka a ma maŋkanaŋkan, zlezle a ŋgaya: “Mada ɗala maa zlaŋgan káca wala aza aka, mada zlaŋgan anta kámac anta, kaw əy kámbawha uzəye a wala anta askwaw ca, səy zlaŋgan wese maŋta wala mce wese, ndar əy mbewene uzəye ŋ zlaŋgan ma mac anta wese.” 29 Ayaw, hejəye vedəye aka, əy ata zlaŋgan tata, tata ŋsəleɗ. Zlaŋgan tata ma dakal káca wala, kámac anta, kaw əy kámbawha uzəye a wala anta askwaw. 30 Zlaŋgan magbak anta a ŋta wala mce wese, a caw, mac a mac anta, kaw əy kámbawha uzəye askwaw yam. 31 A dəwze anta, zlaŋgan tata mamahkaɗ tata, a ŋta wala wese zeney, mac a mac anta, kaw əy kámbawha askwaw war. Ana ebe ŋghe, tata ŋsəleɗ tata, əy káca wala wese aza, əy kámac tata ŋsəleɗ tata, kaw əy kámbawha uzəye a mbe askwaw. 32 A dəwze tata, wala wese mac a mac anta yam. 33 Cemey, ana ebe ŋghe ca, a pes maa hejəye əy kanagwarzamha aza ata lamac ca, wala ŋgha anta a nala ŋ wala eze a vecey? Mavəday, tata ŋsəleɗ tata tewtew əy káŋta aza ŋ wala.»

34 A zenetene, a ŋgaya: «A manhayak ŋgha ca, mawal ege əy kaŋta weləye, weləye əy kaŋta mawal ege. 35 Cemey, a dəwze lamac ca, mawal ege ey weləye maa Gazlavay a sarzata tata tete ŋ gwarzamha aza ata lamac leŋ ŋ lem lanja ma kaŋtakw səkwaw ca, mawal a kanaŋta wala askwaw, weləye əy kanaŋta mawal askwaw. 36 A təwse ca, əy kanamac zeney askwaw, əy nanja ana malaɓ a Gazlavay ege. Əy kála tata ŋ uzəye a Gazlavay ege, mavəday əy kágwarzamha aza ata lamac tata.

37 «Cemey, Musa kázlap zlezle njenjəwen, hejəye mamacamac ege əy nagwarzamha aza ata lamac tata. Maa Musa a kaslap labara mala kwahwaw ma kaŋkəɗaw daba jəkeɗ ca, a yaɓa Gazlavay Madakal a “Gazlavay a Əybərahəyma, Gazlavay a Əysəyaku leŋ Gazlavay a Yakubu.”» 38 A zeney, Yesu a ŋgaya: «Ara Gazlavay ca, hejəye mamacamac ey hejəye ma a nje ege ca, tata tewtew tata ca, əy a nje, mavəday, Gazlavay ca, ara Gazlavay mala hejəye mamacamac ege səkwaw, cemey, ara Gazlavay mala hejəye ma a nje ege.» 39 A təwse ca, maghwal ma maŋkanaŋkan ege vedəye əy zlepene ŋ Yesu, əy ŋgaya: «Madakal, hwa zlapaha a heɗe a heɗe.» 40 Aya, hejəye əy kalalak tata ŋ ɗawza ata ma vedəye zeney.

Kərəystu ara Madakal Dawuda ca, vaŋgay?

41 A təwse, Yesu a ɗawzata hejəye, a ŋgaya: «Hejəye əy nasan ŋ zlap Kərəystu, ɗala maa Gazlavay a laɓaza ŋ rehzata hejəye ca, ara mba dəmas Dawuda ca, vaŋgay? 42 Cemey, Dawuda a ha anta a zlap ŋ ɗerewel Jabura, a ŋgaya:

“Bay Gazlavay Madakal a zlepene ŋ Bay Madakal naka, a ŋgaya:

Ndaha, nja ka ata ra zam naka, ndar mama zam bay ata hejəye,

43 ha hwas ata pes maa sa macata hejəye ma kaɗaw ŋ gərehwaw ata nje ege səkwaw aza, asa ŋgas ŋkwa.”

44 Cemey, mada Dawuda a yaɓa Kərəystu a “Bay Madakal” ca, Kərəystu anta a nasan ŋ la ŋ mba dəmas Dawuda zeney ca, vaŋgay?»

Yesu a ŋgazata madarlaŋw anta ege ŋ sla ka ata maghwal ma maŋkanaŋkan ege

45 Aya, maa hejəye tewtew əy ketehzene zlam ŋ Yesu ca, a zlepetene ŋ madarlaŋw anta ege, a ŋgaya: 46 «Hune sla ka ata maghwal ma maŋkanaŋkan ege, ma kaɗaw ŋ tawar a rəgwac ma cap ata kusam ege. Əy ɗaw hejəye əy zlepzetene a lawan ha ata lanja ma ŋ hubakw. Ŋ ujek ma ata rak Gazlavay ca, əy may lanja ma taŋtaŋ ege a tama. A pes ma ata zam uda gwaygwaya ca, əy may lanja ma mpar a tama. 47 A zeney, əy kepəresletene səkan mala weləye mce ege aza tewtew, cemey, mada əy karak Gazlavay ca, əy nja səpek ata larak anta ndar hejəye əy zlap ca, tata hejəye ma taŋtaŋ ege. Mavəday anta, Gazlavay, a nesetene gef pa ma day aha hejəye vedəye.»