Yesu ey Zakayus
19
Yesu a dam ŋ Yerəykaw,
a nda ta ŋ uzam ŋghe wese.
2 A təwse,
heje wende aka,
zlam anta Zakayus.
Ara madakal macak budaw ege,
kéŋceɗeye dakala.
3 A mpam taf ŋ gəre Yesu ca,
ara vayay,
cemey,
mbəy kula ŋ gəre səkwaw,
mavəday hejəye dəydey,
mbəy def.
4 Aya,
a hey a tama,
a tev ata gevde ŋ gəre Yesu maa a kananda ta a təwse.
5 Maa Yesu a hwasha ata la anta ca,
a sar la kəɗa mgba ata mbe,
a zlepene,
a ŋgaya:
«Zakayus,
tadakwha kəcaŋ,
mavəday a tambaca,
səy sa nda ŋ wan a wata ŋkwa.»
6 A təwse,
a tadakwha kəcaŋ,
a lamza a sasam.
7 Hejəye tewtew maa əy gəre ana ebe ŋghe ca,
əy ŋgwaŋgwar,
əy ŋgaya:
«Gwala!
Heje anta a nda ŋ wan a wata ɗala ma la gay ca,
vaŋgay!»
8 Aya,
Zakayus a deŋ a tama Bay Madakal Yesu,
a zlepene,
a ŋgaya:
«Bay Madakal,
tehzekey zlam,
sa neɓez səkan ma asa ra naka aka ŋ gbak,
sa navalza kəva wende ŋ hejəye metetekw ege.
Mada sa kéŋtene səlay a ɗala aza ata gwaya ca,
sa nezenzene aka həma həma mbe gas ŋfaɗ.»
9 Aya,
Yesu a zenene,
a ŋgaya:
«A tambaca,
Gazlavay kérehzata hejəye ma ŋ ge ŋghe ege aza,
mavəday heje ŋghe anta yam ca,
ara mba dəmas Əybərahəyma,
ɗala ma lamza Gazlavay aza a nuna anta zlezle.
10 Cemey,
sa,
sa Mba Ɗala ca,
sa ndaha ŋ mpam hejəye ma kéfətek tata ege leŋ ŋ rehzata aza.»
Laslaŋgal ma a səlay
11 Hejəye vəram əy ketehzene zlam ŋ Yesu.
Hejəye anta ege əy cakza ca,
bay mala Gazlavay ata hejəye a nandaha a təwse a təwse mavəday mbəy slaɓ ŋ hwas ŋ Urusaləyma.
Aya,
a zlepetene a laslaŋgal ma zeney,
12 a ŋgaya:
«Heje wende aka,
ara ŋseŋ bay.
A nda ŋ hayak ma gədak,
ndar əy ca ŋ bay.
A dəwze anta,
a nezenha aza ŋ hayak anta.
13 Ca,
mar a nanda anta ca,
a yata hejəye wam ŋ taba mala zlan anta ege,
a velene ŋ kaw vayay tata,
səlay bakatar temere temere.
A zlepetene,
a ŋgaya:
“Hune nala fəlew a səlay anta,
ha hwas a pes maa sa kenezenha aza.”
Aya,
tel a nda anta.
14 Cemey,
hejəye ma ŋ hayak anta ege ca,
əy kaɗaw səkwaw.
Aya,
əy laɓzata hejəye a dəwze anta ŋ zlap:
“Nene kaɗaw heje ŋghe a nja ŋ bay ŋcene səkwaw.”
15 «Aya,
maa əy kácaza ŋ bay ca,
a zenha aza ŋ hayak anta.
A yahata mala zlan anta ege maa a veletene səlay wese,
ŋ san səkan maa əy lemew,
ata lala fəlew anta.
16 «Mala zlan ma mpar a ndaha a tama madakal anta,
a zlepene,
a ŋgaya:
“Bay naka,
ŋghe,
sa kélemha səlay bakatar temere temere wam a səlay maa hwa velekey wese.”
17 A təwse,
a zenene,
a ŋgaya:
“Kadak,
hwa ɗala mala zlan ma taŋtaŋ,
hwa kála zlan tuwah a səkan ma pəzekw.
Mavəday anta,
sa kacahwaw ŋ mambal uzam ege wam.”
18 «Mala zlan magbak a ndaha a tama madakal anta,
a zlepene,
a ŋgaya:
“Bay naka,
ŋghe,
sa kélemha səlay bakatar temere temere jaɓan a səlay maa hwa velekey wese.”
19 A zenene,
a ŋgaya:
“Kadak,
hwa yam,
sa kacahwaw ŋ mambal uzam ege jaɓan.”
20 «Aya,
mala zlan wende zeney,
a ndaha a tama madakal anta,
a zlepene,
a ŋgaya:
“Bay naka,
ŋghe səlay ŋkwa maa hwa velekey wese,
sa kápaɗ ka ŋ maslaga,
sa káɓahza ka,
21 mavəday,
sa kálalak naka ata hwa.
Hwa ca,
hwa ɗala ma unaf anta ɓarɓar ma kasan hahar ata ɗala səkwaw.
Hwa nja ana ɗala ma kaŋta səkan maa káca ka askwaw,
ma kepet səkan maa kázlak askwaw.”
22 Aya,
madakal anta wese,
a zenene,
a ŋgaya:
“Hwa mala zlan ma kadak səkwaw.
Sa neghemahwaw ata zlap ŋkwa ŋghe ege.
Mada hwa kesenekey,
sa ɗala ma unaf anta ɓarɓar ma kasan hahar ata ɗala səkwaw,
sa kaŋta səkan maa sa káca ka askwaw,
sa kepet səkan maa sa kázlak askwaw ca,
23 hwa velene səlay naka anta ka ŋ ɗala ŋ la fəlew a mbe səkwaw vemey?
Mada sa kézenha aza ca,
sa nalamaza səlay naka,
a yam a heɗe.”
24 «Aya,
madakal wese,
a zlepetene ŋ hejəye ma a təwse ege,
a ŋgaya:
“Hune ŋtene səlay ma ara mbe wese aza,
hune velene ŋ heje maa səlay bakatar temere temere wam ara mbe wese.”
25 A təwse ca,
hejəye wese ege,
əy zlepene,
əy ŋgaya:
“Bay ŋcene,
heje anta ca,
səlay bakatar temere temere wam ara mbe aka tew ca!”
26 Cemey,
madakal wese,
a zenetene,
a ŋgaya:
“Njenjəwen,
sa kazlapahune,
ɗala ma səkan anta aka,
əy nevelene a heɗe zeney,
cemey,
a ɗala ma səkan anta cekuɗe ende ŋghe ca,
əy neŋtene kaw ma cekuɗe anta aza.
27 A hejəye ma kaɗaw ŋ gərekey ege ata nje səkwaw,
ma káɗaw sa la ŋ bay tata səkwaw wese ca,
hune data ete ŋghe,
hune jata aza a tama naka.”»
Yesu a nda ŋ Urusaləyma
28 A dəwze zlap ŋghe ege,
Yesu a nda kəɗe ŋ Urusaləyma,
hejəye əy kasəbar ara a dəwze.
29 Maa mbəy slaɓ ŋ hwas ata kəva Baytəyfajəy ey Baytanəya mbermber a barla Jaytun ca,
a laɓzata madarlaŋw anta ege gbak a tama,
30 a zlepetene,
a ŋgaya:
«Hune nda ŋ kəva ma a tama ŋkune ŋghe.
Mada hune hwas ŋ kəva anta ca,
hune nendewzene ŋ mba berjeŋ kéjeweye,
maa kaw ɗala kétev a heɗe askwaw.
Hune palaza,
hune daza ete ŋghe.
31 Cemey,
mada ɗala a ɗawzahune,
a ŋgaya:
“Hune pal ŋ vay?”
əy ca,
hune zenene ca:
“Bay Madakal ma kaɗawaw.”»
32 Aya,
madarlaŋw ma gbak ege wese,
əy nda,
əy ndewzetene a səkan ege tewtew ana maa Yesu a zlepetene.
33 Maa əy kapal mba berjeŋ wese ca,
hejəye a mba berjeŋ anta ege əy ɗawzata,
əy ŋgaya:
«Hune pal mba berjeŋ anta ŋ vay?»
34 Əy zenetene,
əy ŋgaya:
«Ara Bay Madakal ma kaɗawaw.»
35 Aya,
əy daza mba berjeŋ wese ara Yesu,
əy bəlek rəgwac tata ege,
əy tevza Yesu a heɗe.
36 Maa Yesu a kanda ca,
hejəye əy kebəlekene rəgwac ara ata taf a tama a tama.
37 Maa Yesu mbəy slaɓ ŋ hwas ŋ Urusaləyma ta ŋ taf ma tadakwha aka ŋ barla Jaytun,
cemey,
madarlaŋw anta ege tewtew əy kasasam dakala.
A təwse,
əy mar ŋ həmanza Gazlavay Madakal a mazlazlay,
mavəday zaɓəla ege tewtew maa əy gəreta.
38 Əy ŋgaya:
«A ɗaw bəzla Gazlavay manja ata bay ma kandaha a zlam anta!
A ɗaw Gazlavay malaɓaza zəhay anta.
A ɗaw hejəye əy mahəmanza ɓardakw a Gazlavay ma mgba ata uzlaf!»
39 Farəysa ege vedəye ŋ taba hejəye a təwse aka.
Əy zlepene ŋ Yesu,
əy ŋgaya:
«Madakal,
zlepetene ŋ madarlaŋw ŋkwa ege əy manja ka tete!»
40 Cemey,
Yesu a zenetene,
a ŋgaya:
«Sa kazlapahune,
mada əy kánja ka tete ca,
kaw ŋkəɗaŋ ege əy naja ula!»
Yesu a han mavəday hejəye ma ŋ Urusaləyma ege
41 Maa Yesu mbəy mbermber a Urusaləyma ca,
a sarza uzam anta,
a han mavəday səkan ma kenendewzetene ŋ hejəye ma ŋma ege.
42 A ŋgaya:
«Hune hejəye ma ŋ Urusaləyma ege,
sa kaɗaw keɗe hune lem taf ma ata lem zəhay aza a tambaca.
Cemey,
na ŋgha ca,
taf anta káɓahahune aza,
hune kanala kula ŋ gəre zeney səkwaw.
43 Vah maa hejəye ma kaɗaw ŋ gərehune ege ata nje səkwaw,
a nandaha,
əy nahacahune a gulam,
əy naŋgacahune kaw ta ŋ kəva ege vekey vekey tewtew.
44 Əy napəlah uzam ŋkune aza,
kaw ŋkəɗaŋ a kenemenha ata ŋkəɗaŋ askwaw.
Əy nabazlahune,
hune zlaɓa uzəye ŋkune ege tewtew,
mavəday hune kásan vah maa Gazlavay a ndaha ŋ cakzahune səkwaw.»
Yesu mbəy a ujek kwakwas
45 Aya,
Yesu a dam ŋ ujek kwakwas.
A təwse ca,
hejəye ma kala fəlew ege ŋma aka.
A gamata hejəye ma kala fəlew anta ege,
46 a zlepetene,
a ŋgaya:
«Kéŋtereye ŋ ɗerewel a Gazlavay,
Gazlavay a ŋgaya:
“Ujek naka ca,
ara ujek maa hejəye əy kenerekekey ŋma.”
Cemey,
hune bawza aza ŋ bədam ŋhel ege!»