Luk 18

Laslaŋgal ma ata wala ma mawal anta kémecene aza ey maja guma

Yesu a zlepetene ŋ madarlaŋw anta ege, a laslaŋgal ma ŋ ghwelzetene səy əy marak Gazlavay ata pes ata pes, əy ɗaw ŋ ŋtəɓal səkwaw. 2 A zlepetene, a ŋgaya: «Maja guma ŋ uzam wende aka, a kalalak ata Gazlavay səkwaw, a kezləmzene zlam ŋ kaw vayay səkwaw. 3 Wala maa mawal anta kémecene aza ŋ uzam anta a təwse aka yam, a kandaha ata pes ata pes ara mbe, a kezlepene a ŋgaya: “Jekey guma naka aza a ɗala maa nene kaŋgəlay nje a mbe səkwaw.” 4 Wala anta a kanda ata pes ata pes, walaŋ dakala, cemey, maja guma wese a kalamza ŋ jene guma anta anta səkwaw. Aya, a dəwze anta a deŋza ŋ ha anta a ŋgaya: “Kaw sa kalalak ata Gazlavay səkwaw, kaw sa ketehzetene zlam ŋ hejəye səkwaw ca, 5 cemey, ana maa wala ŋgha a kesleɗekey ha ca, sa nejene guma anta aza, ndar a ɗaw ŋ ndaha ŋ sleɗekey ha zeney səkwaw.”»

6 A zeney, Bay Madakal Yesu a ŋgaya: «Hune teh zlam kadak kadak ata zlap maja guma ma dadawar ŋgha! 7 Ayaw, mada maja guma ma dadawar ŋgha, kéjene guma wala ŋgha aza ca, mada ana ebe ŋghe ca, Gazlavay a keneletene səkan a heɗe a heɗe ŋ hejəye anta maa a mayata ege, mada əy keɗefene ma a zaɗaw ey a pes səkwaw vaw? A nanja aka səpek ŋ ndaha ŋ cekzetene vaw? 8 Sa kazlapahune, a necekzetene kəcaŋ. Cemey, sa, sa Mba Ɗala, maa sa kenezenha ŋ manhayak ca, sa nendew ata hejəye ma lemzekey aza ege vaw?»

Laslaŋgal ma ata ɗala Farəysa ey ɗala ma cak budaw

9 Hejəye vedəye əy kasarza ha tata ege ca, tata ma taŋtaŋ ege a tama Gazlavay, a zeney, əy sarzata hejəye vedəye ca, ana mala gay ege. Aya, Yesu a zlepetene a laslaŋgal ma ata hejəye ŋghe ege, a ŋgaya: 10 «Hejəye vedəye gbak aka, əy tev a ujek kwakwas ŋ rakha Gazlavay. Heje ma teŋguleŋ, ara ɗala Farəysa, heje wende, ara macak budaw.

11 «Maa əy a ujek kwakwas wese ca, ɗala Farəysa a deŋ, a rak Gazlavay ŋ unaf anta, a ŋgaya: “Gazlavay, sa lahwaw wasay mavəday sa nja ana hejəye vedəye səkwaw. Tata ca, ara ŋhel ege, hejəye dadawar ege leŋ hejəye ma kaŋta kusam ege a bəza. A zeney, sa lahwaw wasay mavəday sa nja ana heje ma cak budaw ŋghe səkwaw. 12 Sa kaŋta pes gbak ata luma teŋguleŋ, sa kazam səkan askwaw, sa kavalahwaw səkan teŋguleŋ ŋ wam ŋ səkan naka ege tewtew maa sa kelemew.” 13 Ɗala ma cak budaw a deŋ ata gədak, kaw kédeŋza ŋ sar la kəɗa mgba ata uzlaf askwaw. Cemey, a ja maɗaɗa anta mavəday gay anta ege, a ŋgaya: “Gazlavay, san hahar ata sa, sa ɗala ma la gay.”»

14 Yesu a zlepetene zeney, a ŋgaya: «Sa kazlapahune, heje ma cak budaw ŋghe wese ca, a nda a wata ca, Gazlavay kácaza a ɗala ma la zlan a heɗe a heɗe. Cemey, ɗala Farəysa ca, ara ɗala ma taŋtaŋ a tama anta səkwaw. Hune san aka, kaw vayay ma ca ha anta aza ŋ ɗala ma dakal ca, Gazlavay a nabawza ŋ ɗala ma vəzekw. Cemey, kaw vayay ma kawanza ha anta aka ca, Gazlavay a nagalza ŋ ɗala ma dakal.»

Yesu a kecetene bəzla ŋ uzəye ma pəzekw pəzekw ege

15 Hejəye əy dene uzəye ma pəzekw pəzekw ege ŋ Yesu ndar a ca ra ata tata, ŋ bəzletene. Maa madarlaŋw anta ege əy gəre hejəye ma kadata uzəye tata ege wese ca, əy gulakzata. 16 Cemey, Yesu a zlepetene ŋ cen uzəye wese ege ŋ data ara mbe. Aya, a zlepetene a madarlaŋw anta ege, a ŋgaya: «Hune yakzata uzəye ma pəzekw pəzekw ege aka, əy mandaha ara sa! Hune takata aka səkwaw, mavəday bay mala Gazlavay ca, mbey ata hejəye ŋseŋ ma da tata ege. 17 Sa kazlapahune njenjəwen, ɗala ma kalamza bay mala Gazlavay ata hejəye, ana mba ma pəzekw askwaw ca, a kanala kula ŋ dam ŋma səkwaw.»

Ɗala maŋcaɗaŋcaɗ a ɗawza Yesu

18 Ɗala ma dakal mala Yahudu ege wende, a ɗawza Yesu, a ŋgaya: «Madakal ma taŋtaŋ, sa nala ŋ lem səfan ma kaŋtakw səkwaw ca, vemey?» 19 Aya, Yesu a zenene, a ŋgaya: «Hwa yekey a ma taŋtaŋ ca, ŋ vay? Ɗala ma taŋtaŋ ca, səy Gazlavay teŋguleŋ anta. 20 Hwa kasan ma maŋkanaŋkan ege səkwaw vaw? Hwa ɗaw ŋ ŋta kusam a bəza səkwaw, hwa ɗaw ŋ ja ŋkəɗeh səkwaw, hwa ɗaw ŋ ŋhel səkwaw, hwa ɗaw ŋ zla metəwle ata ɗala səkwaw, teh zlam ata cehw ey macahw.» 21 Aya, heje wese a zenene, a ŋgaya: «Ma maŋkanaŋkan ŋghe anta ege tewtew, sa káhəbarata aza mara aka maa sa darlaŋw.» 22 A dəwze maa Yesu a zləme zlap anta ŋghe ca, a zlepene, a ŋgaya: «Səkan teŋguleŋ kémenahwaw ŋ la zeney. Səkamata səkan ŋkwa ege aza tewtew, ŋtezetene səlay anta ŋ hejəye metetekw ege. Mada hwa kala ana ebe ŋghe, hwa nelem səkan ma pa ma day mgba ara Gazlavay. Mada hwa kávalza səlay ŋkwa aza ŋ metetekw ege, ndaha, səberekey.» 23 Cemey, maa heje wese a zləme zlap a Yesu ca, guzaɓ a jene kusam aza tewtew mavəday kéŋceɗeye mambaza.

24 Maa Yesu a gəre zlap anta kéjene kusam aza tewtew ca, a ŋgaya: «A neletene ndeɓndeɓ ŋ hejəye maŋcaɗaŋcaɗ ege ŋ dam ŋ bay mala Gazlavay ata hejəye. 25 Ayaw, a nelene pa ma kefkef ŋ ŋgaluba ŋ dam ta ŋ uley batal aha ɗala maŋcaɗaŋcaɗ ŋ dam ŋ bay mala Gazlavay ata hejəye.»

26 A təwse ca, hejəye ma ketehzene zlam ege əy zlepene, əy ŋgaya: «Mada ana ebe ŋghe ca, ma kenereh vayay?» 27 Yesu a zenetene, a ŋgaya: «Səkan ma kala ara hejəye səkwaw ca, a kala ara Gazlavay.» 28 Aya, Pəyer a zlepene a Yesu, a ŋgaya: «Teh zlam! Ŋcene ca, nene kégeɓzata səkan ŋcene ege aka tewtew, ŋ səbarahwaw.» 29 Yesu a zlepetene, a ŋgaya: «Njenjəwen sa kazlapahune, kaw vayay ma geɓza wata anta aka, askwaw ca, wala anta, zlaŋgan ege, mambaw mbe ege, askwaw ca, uzəye anta ege mavəday bay mala Gazlavay ata hejəye ca, 30 a nelem səkan pa ma day ata vah ma na ŋgha. A zeney, a dəwze laŋtakw manhayak ca, a nelem səfan ma kaŋtakw səkwaw.»

Yesu a ghwalza mamahkaɗ anta, lamac anta leŋ lagwarzamha aza anta ŋ jeɓ

31 Aya, Yesu a yahata malaɓ anta ege wam aha gbak ara mbe, a zlepetene, a ŋgaya: «Hune teh zlam! Na ŋgha ca, heje kanda kəɗe ŋ Urusaləyma. Səkan ege tewtew maa uzəye ma zlap ma a Gazlavay ege ma zlezle əy ŋter ata sa, sa Mba Ɗala ca, əy nala tata a təwse. 32 Cemey, əy navalza asa ra mbəlam ege, əy naɓas ata mbe, əy naraɓa, əy neŋtefene mejəkəne ata mbe, 33 əy naŋtaw a lakwatay. A dəwze anta, əy najaza. Aya, ata wan mamahkaɗ anta ca, a nagwarzamha aza ŋ jeɓ.»

34 Cemey, malaɓ Yesu ege ca, kaw əy kézləme zlap anta askwaw. Ara tata ca, zlap anta kéɓeheye, əy kasan səkan maa Yesu a kaɗaw ŋ zlap səkwaw.

Yesu a rehza ɗala ulaf

35 Aya, maa Yesu slaɓ ŋ hwas ŋ uzam Yerəykaw ca, ulaf wende aka, kénjeye a ma taf, a karak. 36 Maa a zləme hejəye vəram əy kaɓam pakam, əy kanda ata taf ca, a ɗawzata, a ŋgaya: «Ma laha vemey?» 37 Aya, hejəye wese ege əy zenene, əy ŋgaya: «Ara Yesu ɗala Nasaratu ma kanda.» 38 Maa ulaf wese, a zləme ana ebe ŋghe ca, a ja ula a mazlazlay, a ŋgaya: «Yesu, mba Dawuda, mbahw, senzekey hahar!»

39 A təwse ca, hejəye ma kanda a tama ege, əy gulakza: «Nja ka tete,» əy ya. Cemey, a vas ŋ ja ula a mazlazlay, a ŋgaya: «Yesu, mba Dawuda, mbahw senzekey hahar!»

40 Aya, Yesu gar a gar aka, a zlepetene ŋ hejəye ŋ dene ulaf wese. Maa ulaf a hwasha ara mbe, Yesu a ɗawza, a ŋgaya: 41 «Səkan maa hwa kaɗaw sa lahwaw ca, vemey?» A zenene, a ŋgaya: «Bay Madakal, sa ɗawɓa ca, nje naka mazlar, ndar sa gəreɓa la zeney!» 42 Aya, Yesu a zenene, a ŋgaya: «Nje ŋkwa mazlar, ndar hwa gəreɓa la zeney. Hwa kéreh ŋkwa mavəday maa hwa kélemzekey aza a unaf ŋkwa.» 43 A təwse a təwse ca, nje ulaf wese zlar a zlar anta, a gəre la. Aya, a səbar Yesu, a kahəmanza Gazlavay ara. Maa əy gəre səkan ma laha ŋghe anta ca, hejəye tewtew əy həmanza Gazlavay yam.