Luk 17

Laghwal zlap ata gay

Yesu a zlepetene ŋ madarlaŋw anta ege, a ŋgaya: «Kaw vepey, səkan ege ma kanabaɗzata hejəye ŋ la gay ca, aka. Cemey, dadawar a nendewzene ŋ ɗala ma ŋcakwzata hejəye ŋ la gay anta! 2 Ca, zukwan əy mejewene ŋkəɗaŋ ma dakal a ula, əy manahza ŋ ŋtele yam, mamac anta aha maa a kanaŋcakwza ɗala teŋguleŋ ŋ taba hejəye ma lamza ma naka ege aza, ŋ la gay. 3 Hune sla ka kadak kadak!

«Mada zlanahw kála gay ca, ŋgazaw. Mada kája mbahw aza ca, pelzene gay anta aka. 4 Mada a la gay a tama ŋkwa gas ŋsəleɗ ata pes teŋguleŋ, cemey, mada a zenha ara hwa gas ŋsəleɗ anta yam, a zlapahwaw, a ŋgaya: “Mbahw, sa kála gay a tama ŋkwa!” ca, pelzene gay anta aka.»

Laghwal zlap ma ata lamza zlap a Gazlavay

5 A təwse, malaɓ Yesu ege əy zlepene ŋ Bay Madakal, əy ŋgaya: «Veleney ɓarɓar ŋ vas ŋ lamzahwaw a tama a tama.» 6 Aya, a zenetene, a ŋgaya: «Mada hune kélemzekey ŋ unaf ŋkune ege kaw cekuɗe ende ŋghe ana mba venjeh ca, hune kula aza ŋ zlepene ŋ gevde ŋghe: “Daɗ ŋkwa ete ŋghe, nda ŋ ŋgaɓ ha ŋkwa ŋ lakwat ma dakal!” Ca, a netehzahune zlam.»

Zlap ata mala zlan

7 A zeney Yesu a ŋgaya: «Mada ɗala teŋguleŋ ŋ taba ŋkune, maa mala zlan anta a keɗesene, askwaw ca, a kezemzene səkan ege, mada a zenha aka ŋ la ca, təwjek anta, a nezlepene: “Ndaha kəcaŋ ŋ zam uda,” vaw? 8 Kaw askwaw, a nezlepene cemey: “Mbaɗ rəgwac ŋkwa aza, dekey uda, slekey, sa zamɓa aza, sa saɓa səkan aza, amba a dəwze anta hwa zamɓa, hwa saɓa yam.” 9 Mada mala zlan ŋghe a la səkan maa təwjek anta a zlepene wese ca, təwjek anta a nelene wasay mavəday anta vaw? 10 A nja ana mbe, hune yam, mada hune kála səkan ege tewtew ana maa Gazlavay a zlapahune ŋ la ca, hune zlap ca: “Nene mala zlan ege bəse ende ŋghe, mavəday nene la ca, zlan maa Gazlavay a zlepeney ŋ law.”»

Yesu a rehzata fagwalakw ege wam

11 Aya, Yesu a nda ŋ Urusaləyma, a nda ta ŋ ghala ata Samarəya ey Galəyləy. 12 Maa a hwas mbermber ma uzam wende aka, fagwalakw ege wam əy ndaha ŋ ŋgelene ma. Əy gar aka ata gədak. 13 A təwse, əy ɗefene ma a mazlazlay, əy ŋgaya: «Yesu, Madakal, senzeney hahar!» 14 Maa a gəreta ca, a zlepetene, a ŋgaya: «Hune nda ŋ ghwalza kusam ŋkune ege ara mala kwakwas ege.» Maa əy kanda kəɗa a təwse ca, kəɗe əy gəre ca, əy kásaɗ tata.

15 Ɗala teŋguleŋ ŋ taba tata aka, maa a gəre kásaɗ anta ca, a zenha ara Yesu, a kahəmanza Gazlavay ara a mazlazlay. 16 A hwasha ara Yesu, a gəleɓ asa ŋgas anta, mananakw dac ata hayak, aya, a lene wasay. Heje anta ara ɗala Samarəya.

17 Aya, Yesu a ɗawzata hejəye ma a təwse ege, a ŋgaya: «Fagwalakw ege ma saɗ tata ca, tata wam tata, tewtew vaw sa ya? Ca, səy ɗala teŋguleŋ ma zenha ete ŋghe, ma jafaɗ ege əy a katay? 18 Kaw ɗala wende ŋ taba tata kúlakza ŋ zenha ŋ lene wasay ŋ Gazlavay askwaw, səy mbəlam ŋghe vaw?» 19 Aya, a zlepene ŋ ɗala Samarəya wese, a ŋgaya: «Gwarzam, nda, hwa kéreh ŋkwa mavəday maa hwa kélemzekey aza a unaf ŋkwa.»

Zlap ata pes maa Mba Ɗala a nezenha

20 A pes wende aka, Farəysa ege əy ɗawza Yesu, əy ŋgaya: «Bay mala Gazlavay ata hejəye a nandaha ca, vepey?» əy ya. A təwse, a zenetene, a ŋgaya: «Bay mala Gazlavay ata hejəye a nandaha ca, ana səkan maa heje kegəre səkwaw. 21 Əy kanazlap ene: “Mbəy cakwa ete ŋghe!” askwaw ca: “Mbəy caw eŋge ŋghe!” ca, əy kula ŋ zlap ana mbe səkwaw. Cemey, hune san aka, bay mala Gazlavay ata hejəye mbəy ŋ taba ŋkune.»

22 Aya, Yesu a zlepetene ŋ madarlaŋw anta ege, a ŋgaya: «Vah a nandaha maa hune naɗaw ŋ gəre sa, sa Mba Ɗala kaw pes teŋguleŋ, cemey, hune kenegərekey askwaw. 23 Əy nazlapahune: “Mbəy cakwa ete ŋghe!” askwaw ca: “Mbəy caw eŋge ŋghe!” Cemey, hune ɗaw ŋ nda a təwse səkwaw, hune ɗaw ŋ ɓərazl ŋ hey a təwse səkwaw. 24 Vah maa sa, sa Mba Ɗala sa kanandaha ca, sa nanja ana van ma kazam, ma keweɗ la mgba ata uzlaf ey la ma ata hayak tewtew. 25 Cemey, səy sa ma sa gef aza dakala kwagwa. A zeney, hejəye ma na ŋgha ege, əy mececefzekey səkwaw aza.

26 «Vah maa sa, sa Mba Ɗala sa kanandaha ca, səkan ege əy nala ana səkan ma laha ege ata vah a Nuhu. 27 Ata vah anta wese ca, hejəye əy kazam səkan, əy kasa səkan, əy kaca weləye, əy kavalzata heldəməye tata ege asa mawal, ha hwas a pes maa Nuhu a dam anta ŋ kwambawal. A dəwze anta van a ɗaha dakala mambaza ghef ata hayak, fətek a fətekzata hejəye aza tewtew.

28 «A zeney, vah anta a nanja ana vah a Ludu: hejəye əy kazam səkan leŋ əy kasa səkan, əy kasəkamha səkan ege leŋ əy kasəkamata səkan tata ege aza, əy kazlak səkan ege leŋ əy kalam ujek ege. 29 Cemey, a pes maa Ludu a yakza uzam Sawdawma aka ca, Gazlavay káɗaha kwahwaw ey lagwada kwahwaw mgba ata uzlaf ana van ma kaɗa, kéfətekzata hejəye wese ege aza tewtew. 30 A nala ana mbe, a pes maa sa, sa Mba Ɗala sa kanaghwalaza kusam naka.

31 «A vah wese, ɗala ma mbəy a bəza ca, a ɗaw ŋ dam a ujek ŋ kwarata səkan anta ege aza səkwaw. Mada ɗala a kala zlan ŋ la ca, a ɗaw ŋ zenha a wata səkwaw. 32 Hune senzene ata səkan ma ndewzene ŋ wala Ludu! 33 Kaw vayay, ma mpam ŋ rehza ha anta aza ca, a nefətekza aza. Cemey, ɗala ma fətekza ha anta aza ca, a nendewzene aza. 34 Sa kazlapahune, a zaɗaw wese anta ca, mada hejəye gbak əy kéweneye ata lawan teŋguleŋ ca, teŋguleŋ kéŋteye, wende kéyekeye. 35 Mada weləye gbak əy kesəken ata ŋvan teŋguleŋ ca, teŋguleŋ kéŋteye, wende kéyekeye. [ 36 Mada hejəye gbak əy kala zlan ŋ la ca, teŋguleŋ kéŋteye, wende kéyekeye.»]

37 A təwse, madarlaŋw anta ege əy ɗawza, əy ŋgaya: «A nala ca, a katay Bay Madakal?» Aya, a zenetene, a ŋgaya: «Ata la maa səkan kámac aka ca, gwadarak ege əy ɓec a təwse.»