Luk 16

Laslaŋgal ma ata mala zlan a werwer

Yesu a zlepetene ŋ madarlaŋw anta ege a laslaŋgal ma, a ŋgaya: «Heje maŋcaɗaŋcaɗ wende aka, mala zlan anta, a kehəberene səkan ma asa ra anta aka. Cemey, hejəye əy ndaha, əy zlepene ŋ heje maŋcaɗaŋcaɗ wese, əy ŋgaya: “Mala zlan ŋkwa a kagayzahwaw səkan ŋkwa ege aza.” 2 A təwse ca, a yaɓa mala zlan anta wese, a zlepene a ŋgaya: “Sa kézləme əy kazlap ma ma kadak səkwaw ata hwa. Ghwelzekey zlan ŋkwa maa hwa la tewtew, mavəday hwa kananja ŋ mala zlan naka zeney askwaw!”

3 «Cemey, mala zlan wese a zlap ŋ ha anta, a ŋgaya: “Sa nalaɓa na ca, vaŋgay? Təwjek naka a negemekey aza ŋ zlan naka. Ŋgalaŋ naka ŋ ɗas askwaw, ŋ rak, hawa a nejekey. 4 Ayaw, na ŋgha ca, sa kasan səkan maa sa kanalaw, ndar hejəye əy lemzekey a wata tata a pes ma təwjek naka kégemekey aza ŋ zlan anta.”

5 «Aya, maa a kédeŋza ana ebe ŋghe ca, a yahata hejəye ma ja duwa ege ara təwjek anta teŋguleŋ teŋguleŋ. A zlepene ŋ ɗala ma mpar, a ŋgaya: “Duwa təwjek naka ata hwa ca, vanay?” 6 A zenene, a ŋgaya: “Mel gajak temere.” A təwse, mala zlan wese a zlepene, a ŋgaya: “Ŋta ɗerewel a duwa ŋkwa, kəcaŋ nja ka, ŋter a heɗe, mel gajak rajaɓan.” 7 A zlepene ŋ heje wende zeney, a ŋgaya: “Hwa yam ca, duwa təwjek naka ata hwa ca, vanay?” A zenene, a ŋgaya: “Ndərey buhu temere jaɓan.” A təwse, a zlepene, a ŋgaya: “Ŋta ɗerewel duwa ŋkwa, ŋter a heɗe, buhu temere ŋfaɗ. Aya, ŋter a ŋterew.” 8 Kaw mala zlan ŋgha anta kála zlan anta a heɗe a heɗe askwaw ca, təwjek anta a nahəmanza, mavəday maa a la zlan anta a werwer. Njenjəwen, hejəye ma a manhayak ma na ŋgha ege ca, əy pa ma la səkan a werwer ŋ taba tata aha hejəye mala Gazlavay ege.»

9 Yesu a zlepetene zeney, a ŋgaya: «Cemey, səkan ma asa ra ŋkune ege ma ŋ manhayak ŋgha ca, hune mbal ŋgama a mbe. Ana ebe ŋghe, mada səkan ma asa ra ŋkune anta ege kəɗaŋ ca, əy nalamzahune ŋ lanja ma kaŋtakw səkwaw mgba ata uzlaf. 10 Ɗala ma la zlan tuwah a səkan ma pəzekw ca, a nala zlan tuwah a səkan ma dakal yam. Ɗala ma la zlan a heɗe a heɗe səkwaw a səkan ma pəzekw ca, a kanala zlan a heɗe a heɗe a səkan ma dakal askwaw yam. 11 Mada hune kála zlan tuwah a səkan ma asa ra ŋkune ege ma ŋ manhayak ŋgha askwaw ca, ma kanavalahune səkan ma asa ra ma taŋtaŋ ca, vayay? 12 Mada hune kála zlan tuwah a səkan ma asa ra mala ɗala askwaw ca, Gazlavay a navalahune səkan ma asa ra maa a ɓahzahune aka vaw? 13 Kaw vayay ma kula ŋ letene zlan ŋ təwjek ege gbak ca, askwaw. Mavəday a nazlap ma dadawar ata wende, a naɗaw wende, askwaw ca, a newenzene ha aka ŋ ma teŋguleŋ, a kenececefza wende səkwaw. Hune kula ŋ səbar Gazlavay leŋ səlay, gbak tata ŋ la anta səkwaw.»

Zlap Yesu ege vedəye vedəye

14 Farəysa ege maa əy zləme ma ŋghe ege tewtew ca, əy ɓas ata Yesu, mavəday əy kaɗaw səlay dəydey. 15 Aya, a zlepetene, a ŋgaya: «Hune hejəye ma kaghwalza ha ŋkune ege a tama hejəye ca, hune hejəye ma taŋtaŋ ege. Cemey, Gazlavay a kasan unaf ŋkune ege. Njəwen, səkan maa hejəye əy kasarza ara səkan ma dakal a tama tata ca, ara Gazlavay ca, taŋtaŋ anta askwaw.

16 «Vah mala ma maŋkanaŋkan mala Musa leŋ ɗerewel mala uzəye ma zlap ma a Gazlavay ege əy kaghwalza zlap a Gazlavay zlezle ha hwas ata vah mala Yuhana mala baptəysma. Mar aka ata vah wese, əy kaghwalza ma Mewe ma Taŋtaŋ a bay mala Gazlavay ata hejəye. Aya, kaw vayay a katal a ɓarɓar anta ŋ dam ŋma.

17 «La ma ata uzlaf ey la ma ata hayak əy naŋtakw tata. Cemey, leŋter ma ŋ ma maŋkanaŋkan a kanaŋtakw askwaw, kaw leŋter kwesleh ende ŋghe ŋma a kanaŋta anta askwaw.

18 «Kaw vayay ma gam wala anta aza, a ca wala matakan ca, a la ca, a ŋta kusam a bəza. A zeney, ɗala ma ca wala maa mawal anta kágamza yam ca, a la ca, a ŋta kusam a bəza.»

Ɗala maŋcaɗaŋcaɗ ey Lazarus

19 Yesu a zlap a laslaŋgal ma zeney, a ŋgaya: «Heje maŋcaɗaŋcaɗ wende aka, a ca rəgwac ata kusam anta ca, ma tuwah tuwah maa səkam anta ege səlay dakala mambaza. Ata pes ata pes, a kasasam, a kazam səkan ma taŋtaŋ. 20 Heje metetekw wende aka, zlam anta Lazarus, mbəlah ata kusam anta tewtew, kéweneye a ma ujek heje maŋcaɗaŋcaɗ anta. 21 Lazarus anta, a kaɗawɓa ŋ gəɗamɓa papas uda ege ma kanah aka ata lazam uda heje maŋcaɗaŋcaɗ wese. Həza ege yam, əy kandaha ŋ nakata mbəlah anta ege wese.

22 «Aya, a pes wende, heje metetekw wese mac a mac anta. A təwse ca, malaɓ Gazlavay ege, əy ndaha, əy ŋtaw, əy jeɓza ara Əybərahəyma. Heje maŋcaɗaŋcaɗ wese yam, mac a mac anta, mpas əy mpas ka. 23 Cemey, heje maŋcaɗaŋcaɗ wese a kasa gef dakala mambaza ŋ taba hejəye mamacamac ege. A təwse, a sar la, kəɗe ca, a gəre Əybərahəyma ata gədak, Lazarus mbəy ara mbe. 24 Aya, heje maŋcaɗaŋcaɗ wese a ɗefene ma ŋ Əybərahəyma, a ŋgaya: “Vana Əybərahəyma, san hahar ata sa, laɓza Lazarus madamza mba ra anta ŋ yam, mezlevekey ata ganana naka, mavəday sa kasa gef dəydey mambaza ŋ kwahwaw ete ŋghe.”

25 «A təwse, Əybərahəyma a zenene, a ŋgaya: “Mba naka, senzene ata vah maa hwa njaha a manhayak, hwa kélem səkan asa ra ŋkwa dakala mambaza. Cemey, Lazarus ca, kásaha gef dakala. Na ŋgha ca, mbəy cakwa ete ŋghe, a kelem ledeɓ unaf, hwa yam, hwa kasa gef. 26 A zeney, la pəɗem ŋ taba ŋcene ey hune. Mada ɗala a kaɗaw ŋ gwarzam ara nene ete ŋghe ŋ nda ara hune ca, taf askwaw. A zeney yam, mada ɗala ma ara hune a kaɗaw ŋ ndaha kəɗe ara nene ete ŋghe yam ca, taf askwaw.” 27 Heje maŋcaɗaŋcaɗ wese a zlepene, a ŋgaya: “Ana ebe ŋghe ca, sa kajahwaw mbahw, vana Əybərahəyma, laɓza Lazarus a wata vana, 28 mavəday, zlana ege jaɓan aka, manda ŋ ghwelzetene səkan ege tewtew, ndar tata, əy ɗaw ŋ ndaha ata la gef ŋghe yam səkwaw.” 29 Aya, Əybərahəyma a zenene, a ŋgaya: “Zlanahw ege ca, səy əy metehzetene zlam ŋ laghwal zlap mala Musa leŋ zlap mala uzəye ma zlap ma a Gazlavay ege.” 30 Heje maŋcaɗaŋcaɗ wese a zenene, a ŋgaya: “Andəwse səkwaw vana Əybərahəyma. Cemey, mada ɗala ma gwarzamha aka ata lamac ma nda ŋ ndewzetene ca, əy nabawza lanja tata aza.” 31 Cemey, Əybərahəyma a zenene, a ŋgaya: “Mada əy kaɗaw ŋ ketehzetene zlam ŋ ata Musa ey uzəye ma zlap ma a Gazlavay ege səkwaw ca, kaw ɗala ma gwarzamha aka ŋ jeɓ ca, əy kenetehzene zlam səkwaw yam.”»