Laslaŋgal ma ata ŋtəmek ma fətek anta
15
A pes wende aka hejəye ma cak budaw ege leŋ hejəye vedəye ma la gay ege əy ndaha tewtew tata ara Yesu ŋ tehzene zlam.
2 A təwse ca,
Farəysa ege leŋ maghwal ma maŋkanaŋkan ege,
əy ŋgwaŋgwar ŋ taba tata əy ŋgaya:
«Heje ŋghe ca,
a kalamzata hejəye ma la gay ege leŋ a kazam uda a tata ca,
vaŋgay?»
3 Aya,
Yesu a zlepetene a laslaŋgal ma,
a ŋgaya:
4 «Mada ɗala teŋguleŋ ŋ taba ŋkune,
ŋtəməye anta ege temere aka,
ma pal kéfətekene aza ca,
a kenegeɓzata ma rajafaɗ aha jafaɗ ege aka ata lazam tata,
a nda ŋ mpam aza ma pal ma fətekene aza wese,
ha a ndewzene aza askwaw vaw?
5 Aya,
maa kéndewzene aza ca,
a nasasam.
A netew aza ara ata ula anta,
6 a nda a wata.
Maa a hwasha aza a wata ca,
a yahata ŋgama anta ege ey mesleje anta ege,
a zlepetene,
a ŋgaya:
“Hune ndaha,
ŋ sasamakwaw ŋ la anta,
mavəday sa kéndewzene aza a ŋtəmek naka ma fətek anta wese.”
7 «Sa kazlapahune,
a nja ana mbe,
mada ɗala teŋguleŋ ma la gay kája mbahw aza,
sasam mgba ata uzlaf aka day aha hejəye rajafaɗ aha jafaɗ ma taŋtaŋ ege maa əy kaɗaw laja mbahw zeney səkwaw!»
Laslaŋgal ma ata səlay ma fətek anta
8 Yesu a zlepetene a laslaŋgal ma zeney,
a ŋgaya:
«Wala wende aka,
səlay anta maa əy kayaɓa,
dərakma,ª
wam aka.
Cemey,
ma pal fətek a fətekene aza.
Aya,
a bas kwahwaw ata patarla,
a zlaɗ la ma a ujek,
a mpam kadak kadak ha a ndewzene aza.
9 Mada kéndewzene aza ca,
a nayahata ŋgama anta ege ey mesleje anta ege,
a nezlepetene,
a ŋgaya:
“Hune ndaha ŋ sasamakwaw ŋ la anta,
mavəday sa kéndewzene aza a səlay naka ma fətek anta wese!”
10 Sa kazlapahune,
a nja ana mbe,
malaɓ Gazlavay ege əy nasasam mada ɗala ma la gay teŋguleŋ,
kábawza lanja anta aza.»
Laslaŋgal ma ata mba ma fətek anta
11 Aya,
Yesu a zlap zeney,
a ŋgaya:
«Heje wende aka,
uzəye anta ege gbak.
12 A pes wende aka,
mba ma pa ma pəzekw a zlepene ŋ cen a ŋgaya:
“Vana,
velekey səkan magəva naka maa sa kanazam ujek ŋkwa aza.”
Aya,
cen tata wese,
ɓez a ɓezetene səkan ege ma asa ra anta aza ŋ uzəye anta ege gbak tata.
13 «A dəwze wan ege cekuɗe ende ca,
mba ma pa ma pəzekw wese,
səkam a səkamata səkan magəva anta wese aza tewtew,
amba a nah ma a səlay anta ŋ hayak ma gədak.
A təwse,
a nja ka ŋ la səkan ma kadak səkwaw ege,
a gayza səlay anta wese aza tewtew.
14 Maa káŋtakwza səlay anta aza tewtew ca,
metes ma dakal a laha ŋ hayak wese,
a kelem səkan ŋ zam zeney askwaw.
15 Tel a nda ŋ lene zlan ŋ heje wende ma a təwse.
Heje anta a velene zlan ma ata həbarata galdam ege leŋ ŋ veletene səkan ŋ zam.
16 A ɗawɓa keɗe ca,
ŋ zamɓa səkan maa galdam ege əy kazam wese,
cemey,
kaw ɗala a kepelzene taf ŋ zamaw,
askwaw.
17 Aya,
a ulakza ata lanja anta ma a təwse,
a ŋgaya:
“Mala zlan a vana ege tewtew əy kazam səkan həraɗ,
ha əy kula ŋ ŋtakwza səkwaw.
Cemey,
sa ca,
sa kamac ata metes ete ŋghe!
18 Zukwan ca,
sa nda ŋ ndewzene ŋ vana.
Cemey,
sa nezlepene ca,
sa ya:
Vana,
sa kála gay a tama Gazlavay leŋ a tama ŋkwa.
19 Na ŋgha ca,
sa káhwas hwa yekey a mba ŋkwa zeney səkwaw.
Cemey,
serzekey ana ɗala teŋguleŋ ŋ taba mala zlan ŋkwa ege.”
20 Aya,
zen a zenha aza a wata ara cen.
«Maa a kandaha aka ata gədak ca,
cen gəre a gəre aza,
hahar kája aza a heɗe dakala.
A hey ŋ ŋgelene ma ata taf,
səkaw a səkawaw,
a lamza a sasam.
21 Aya,
mba wese a zlepene,
a ŋgaya:
“Vana,
sa kála gay a tama Gazlavay leŋ a tama ŋkwa.
Na ŋgha ca,
sa káhwas hwa yekey a mba ŋkwa zeney səkwaw.”
22 Cemey,
cen mba wese a zlepetene ŋ mala zlan anta ege,
a ŋgaya:
“Kəcaŋ!
Hune da rəgwac ma cap ma pa ma tuwah,
hune cene ata kusam.
Hune da des mba ra,
hune cene ata mba ra anta.
Hune da ŋte,
hune cene ata ŋgas.
23 Hune mbal aza mba velŋgeɗ maa heje gapakwaw aka wese,
hune fataw,
ŋ zamakwaw,
ŋ jakwaw gwaygwaya a sasam,
24 mavəday mba naka ŋgha a nja ana mba ma kámac anta,
cemey,
kágwarzamha aza,
a nja ana mba ma kéfətek anta,
cemey,
sa kéndewzene aza!”
A təwse ca,
əy mar ŋ ja gwaygwaya a sasam.
25 «Maa əy kaja gwaygwaya wese ca,
mba anta ma dakal,
a kala zlan ŋ la.
Maa a kezenha,
mbəy slaɓ ŋ hwas a wata ca,
a zləme pakam ey kaŋgaŋ gwaygwaya ma kaja.
26 A təwse ca,
a yaha ɗala teŋguleŋ ŋ taba mala zlan ege,
a ɗawza a ŋgaya:
“Ma ndewha a wata ca,
vemey?”
27 Mala zlan wese a zenene,
a ŋgaya:
“Zlanahw kézenha aza,
amba cehw a fat mba velŋgeɗ maa heje gapakwaw aka wese,
mavəday kéndewzene aza a mba anta,
mbəy werwer.”
28 Aya,
mba ma dakal wese,
unaf a ghwaɗaw,
a kaɗaw ŋ dam a ge səkwaw.
A təwse ca,
cen wese,
a ndaha a ləbeɗew ŋ dam a ujek.
29 A zenene ŋ cen a ŋgaya:
“Vana,
ŋghe,
va vəram sa kalahwaw zlan,
sa ketehzahwaw zlam,
cemey,
hwa kévelekey kaw mba heceke teŋguleŋ ŋ ja gwaygwaya a ŋgama naka ege askwaw.
30 Cemey,
mba ŋkwa ŋghe a zenha,
kágayaza səlay ŋkwa aza tewtew ata laŋta kusam a bəza.
Ca,
ŋ mbe ca,
hwa fetene mba velŋgeɗ maa heje gapakwaw aka wese karba vaw!”
31 A təwse ca,
cen a zenene,
a ŋgaya:
“Mba naka,
hwa ca,
kaw vepey hwa ara sa,
səkan ma asa ra naka tewtew ca,
mala ŋkwa.
32 Cemey,
səy heje jakwaw gwaygwaya,
heje sasam,
mavəday zlanahw ŋgha ca,
a nja ana mba ma kámac anta,
cemey,
kágwarzamha aza,
a nja ana mba ma kéfətek anta,
cemey sa kéndewzene aza!”»