Yesu a rehza ɗala ma kadawar a pes ma ata zazak
14
A pes ma ata zazak wende aka,
Yesu a dam a wata ɗala teŋguleŋ ŋ taba madakal dakal a Farəysa ege,
ŋ zam uda.
Hejəye ma a təwse ege əy kakwar nje ata mbe kadak kadak ŋ həbar səkan ma a kanalaw.
2 A təwse,
heje wende aka,
maa dawar kéhefene kusam aza,
kégereye a tama anta.
3 Aya,
Yesu a zlepetene ŋ maghwal ma maŋkanaŋkan ege leŋ ŋ Farəysa ege,
a ŋgaya:
«Kwakwas ŋtakwaw a kapal taf ŋ rehza ɗala ma kadawar a pes ma ata zazak vaw,
a kapal taf səkwaw vaw?»
4 Cemey,
hejəye wese ege,
əy kézenene zlap askwaw.
Aya,
a ca ra anta ata heje ma kadawar wese,
reh a rehza aza ŋ dawar anta,
a zlepene ŋ nda anta a wata.
5 A zeney,
a zlepetene a maghwal ma maŋkanaŋkan ege wese leŋ ŋ Farəysa ege wese,
a ŋgaya:
«Mada ɗala teŋguleŋ ŋ taba ŋkune,
ma mba anta,
askwaw ca,
zla anta kándav anta ŋ uley yam a pes ma ata zazak ca,
a kanadaza aza kəcaŋ a bəza askwaw vaw?»
6 Cemey,
kaw əy kula ŋ zenene ma ŋ zlap anta ŋghe wese səkwaw war.
Yesu a ŋgazata hejəye ŋ may la ma ata nja a dəwze
7 Yesu a gəre ca,
hejəye maa əy yahata ŋ zam uda ege wese ca,
əy may lanja ma taŋtaŋ ege a tama.
Aya,
a ŋgazata hejəye wese ege tewtew,
a ŋgaya:
8 «Mada ɗala káyahwaw aza ŋ ja gwaygwaya laca dəma ca,
hwa ɗaw ŋ may lanja ma taŋtaŋ a tama səkwaw.
Ketegəre heje anta káyaha ɗala ma pa ma day aha hwa aka.
9 Ana ebe ŋghe ca,
heje ma yaha hune gbak ŋkune wese a nazlapahwaw,
a ŋgaya:
“Gwarzam!
Yekzene lanja ŋghe ka ŋ heje ŋghe.”
Cemey,
hawa a najahwaw ŋ nda ŋ nja ata lanja ma a dəwze.
10 Cemey,
mada ɗala káyahwaw aza ca,
nda ŋ nja ka ata lanja ma a dəwze.
Aya,
heje ma yahwaw wese a ndaha,
a zlapahwaw,
a ŋgaya:
“Ŋgama naka,
nda ŋ nja a tama ata lanja ma pa ma tuwah.”
Ana ebe ŋghe,
a nabawzahwaw aza ŋ ɗala ma dakal a tama hejəye tewtew ma hune kazam uda ŋ la anta ege wese.
11 Mavəday anta,
kaw vayay ma mpam ŋ galza ha anta aza ŋ ɗala ma dakal ca,
Gazlavay a nezenza ŋ ɗala ma vəzekw.
Kaw vayay ma mpam ŋ zenza ha anta aza ŋ ɗala ma vəzekw ca,
Gazlavay a nagalza ŋ ɗala ma dakal.»
12 A dəwze anta,
Yesu a zlepene ŋ ɗala ma yaɓa wese,
a ŋgaya:
«Mada hwa kada uda gwaygwaya ca,
hwa ɗaw ŋ yahata ŋgama ŋkwa ege səkwaw,
kaw zlanahw ege səkwaw,
kaw van ŋkwa ege səkwaw,
kaw mesleje ŋkwa ege maŋcaɗaŋcaɗ ege səkwaw.
Hwa ɗaw ŋ yahata səkwaw mavəday,
tata yam,
əy nayahwaw ana mbe yam.
Əy naŋtarahwaw səkan ma hwa veletene wese.
13 Cemey,
mada hwa kada uda gwaygwaya ca,
yahata hejəye metetekw ege,
hejəye ma halɓaya ege,
hejəye ma a ŋgas gwesleleŋ ege leŋ ulaf ege.
14 Aya,
bəzla Gazlavay a nja ata hwa,
mavəday əy kanala kula ŋ ŋtarahwaw səkan maa hwa letene anta səkwaw.
Cemey,
Gazlavay a naŋtarahwaw səkan ŋkwa anta ka ata vah maa hejəye ma taŋtaŋ ege a tama Gazlavay,
əy kanagwarzamha aza ata lamac tata.»
Laslaŋgal ma ata hejəye mayaya a gwaygwaya
15 Maa hejəye mayaya ege,
əy zləme ma ŋghe ege wese ca,
ɗala teŋguleŋ ŋ taba tata,
a zlepene a Yesu,
a ŋgaya:
«Bəzla Gazlavay a nanja ata ɗala ma kanazam uda anta ŋ bay mala Gazlavay ata hejəye!»
16 A təwse ca,
Yesu a zenene a laslaŋgal ma ŋghe,
a ŋgaya:
«Heje wende aka,
kála gwaygwaya a səkan ta zam dakala,
aya,
a yaha hejəye vəram a wata anta.
17 Maa la kála anta a tete ŋ zam uda ca,
a laɓza mala zlan anta ŋ zlepetene ŋ hejəye mayaya ege wese,
a ŋgaya:
“Hune ndaha na na ŋgha!
Səkan ege tewtew əy késleye aza.”
18 Aya,
əy ja mbahw teŋguleŋ teŋguleŋ tata tewtew.
Heje ma mpar a zlepene ŋ mala zlan wese,
a ŋgaya:
“Mbahw,
pelzekey,
sa kanala kula ŋ nda səkwaw.
Sa kásəkamha la ata vah ŋghe,
səy sa nda ŋ saraza.”
19 Heje wende a zlepene,
a ŋgaya:
“Mbahw,
pelzekey,
sa kásəkamaha zləye wam,
əy kéɓezeye gbak gbak,
ŋ la zlan.”
20 Heje wende a zlepene zeney,
a ŋgaya:
“Sa,
sa kanala kula ŋ nda səkwaw,
mavəday,
sa mawal dəma.”
21 «Aya,
mala zlan wese a zenha a wata,
a zenzene ma a hejəye wese ege tewtew ŋ təwjek anta wese.
Aya,
unaf a ghwaɗaw,
a zlepene a mala zlan anta wese,
a ŋgaya:
“Nda kəcaŋ ŋ hubakw ma a uzam ege leŋ ŋ taf ma a uzam ege.
Dekey metetekw ege,
hejəye ma halɓaya ege,
ulaf ege leŋ ma a ŋgas gwesleleŋ ege,
ete ŋghe!”
22 A dəwze anta cekuɗe ende ŋghe ca,
mala zlan wese a zenha a zlepene,
a ŋgaya:
“Təwjek naka,
sa káyahata aza ana maa hwa zlepekey wese,
ca,
la kémenha zeney war.”
23 Təwjek anta wese a zlepene,
a ŋgaya:
“Nda ŋ taf ma a uzam ege leŋ ta mazlam la ege,
ŋcakwata hejəye ma hwa ndewzetene a təwse ege kulakw əy madamha,
wata naka meghef a hejəye!
24 Cemey,
sa kazlapahune,
kaw ɗala teŋguleŋ ŋ taba hejəye mayaya ma mpar ege wese,
ma kanazam uda naka anta askwaw.”»
Ɗala a nala a madarlaŋw Yesu ca, vaŋgay?
25 A dəwze anta,
Yesu əy kanda tewtew ey hejəye vəram ata taf.
A təwse,
pəla a bawha tama kəɗe aha tata,
a zlepetene,
a ŋgaya:
26 «Mada ɗala a kaɗaw ŋ səberekey ca,
səy a ɗewekey day aha ata cen ey maman,
day aha ata wala anta ey uzəye anta ege,
day aha ata zlaŋgan mawal ege ey heldəməye,
day aha ha anta.
Askwaw ca,
heje anta a kanala kula ŋ la a madarlaŋw naka səkwaw.
27 Kaw vayay ma kula ŋ sew gef ma kanandaha a heɗe mavəday maa a səberekey askwaw ca,
mbəy kula ŋ la a madarlaŋw naka səkwaw.
28 «Mada ɗala ŋ taba ŋkune,
a kaɗaw ŋ lam ujek ma dakal ca,
səy a ulakza aza kwagwa,
ujek anta a naŋta ca,
səlay vanay?
A dəwze anta,
a sarza səlay ma asa ra anta a hwas anta ŋ maɗza zlan anta vaw?
29 Mada səlay ma asa ra anta parham ŋ maɗza ujek anta ca,
cemey,
kámar ŋ ca ndaŋw ujek anta aza,
a dəwze anta mbəy kula ŋ maɗza səkwaw ca,
hejəye ma kanagəre ujek wese ege ca,
əy naɓas a heɗe,
30 əy ŋgaya:
“Heje ŋghe kámar ŋ lam ujek anta aza,
cemey,
mbəy kula ŋ maɗza səkwaw.”
31 «Askwaw ca,
bay vekey,
mada a kaɗaw ŋ nda ŋ ɗa gham a bay wende ca,
a kanulakza aza kwagwa,
mada mbəy kula ŋ nda a hejəye bəlakw wam ŋ ŋgelene ma a bay wende ma kanandaha ŋ hacaw,
a hejəye bəlakw ragbak askwaw vaw?
32 Mada a sarza mbəy kula səkwaw ca,
a laɓzata malaɓ anta ege ara bay wende wese ŋ jene mbahw,
maa mbəy gədak kwagwa ndar əy nja ka a zəhay.
33 Ana ebe ŋghe,
mada kaw vayay ŋ taba ŋkune kégeɓza səkan ma asa ra anta ege ka tewtew leŋ hejəye anta ege askwaw ca,
mbəy kula ŋ la a madarlaŋw naka səkwaw.»
Zlap ata mabanban ma kadak səkwaw
34 Yesu a zlepetene,
a ŋgaya:
«Ayaw,
mabanban ca,
ara səkan ma taŋtaŋ.
Cemey,
mada mabanban anta barbar a zeney askwaw ca,
heje nala ŋ zenaza barbar anta zeney ca,
vaŋgay?
35 Mabanban anta kadak zeney səkwaw.
Kaw ŋ tamza ŋ la,
kaw ŋ hwaɓ la ca,
kadak zeney səkwaw.
Əy nazlaɗaza,
əy natamza a bəza.
Ɗala ma zlam a heɗe ŋ zləme aka ca,
mezləme ma ŋghe kadak kadak!»