Zlap ata labaw lanja
13
Ata vah wese,
hejəye vedəye ma a təwse ege,
əy zlepene ŋ Yesu,
əy ŋgaya:
«Bay Pəylatu kájata hejəye Galəyləy ege aza ata vah maa əy kala kwakwas,
maa əy kefetene səkan ŋ Gazlavay.
A kəvaɗ mbambaz tata a mbambaz səkan maa əy fatata ege,»
əy ya.
2 Yesu a zenetene,
a ŋgaya:
«Hune deŋza a ha ŋkune ca,
əy jata hejəye Galəyləy anta ege aza ana ebe ŋghe ca,
mavəday əy kála gay pa ma day aha hejəye Galəyləy ege vedəye ma tewtew ege vaw?
3 Sa kazlapahune,
kaw askwaw.
Cemey,
mada hune kábawza lanja ŋkune aza askwaw ca,
hune namac tewtew ŋkune ana tata yam.
4 Akwaw ca,
hune deŋza ata hejəye ma wam aha jamahkaɗ maa ujek malamalam ma jem ma ŋ Səylawam a ghwaramha ata tata wese ca,
əy pa ma la gay aha hejəye vedəye ma tewtew ege ma a Urusaləyma vaw?
5 Sa kazlapahune,
kaw askwaw.
Cemey,
mada hune kábawza lanja ŋkune aza askwaw ca,
hune namac tewtew ŋkune ana tata yam.»
Laslaŋgal ma ata səke ma kambaw səkwaw
6 Yesu a zlepetene a laslaŋgal ma zeney,
a ŋgaya:
«Heje wende aka,
mpe səke kádavha ŋ la anta.
A pes wende aka,
a nda ŋ mbalha mba anta ca,
kélem a heɗe askwaw.
7 Aya,
a zlepene a ɗala ma həbar la anta,
a ŋgaya:
“Ŋghe!
Sarza.
Va mahkaɗ sa kandaha ŋ mpam mba səke ŋghe,
kaw sa kélem askwaw.
Razlza!
A kemper la ka bəse.”
8 Cemey,
a zenene,
a ŋgaya:
“Təwjek naka,
yakza ka a vawaca zeney,
sa nara la aka a səka dərezl,
sa netemzene ŋvarzla.
9 Ketegəre a makuɗa ca,
a nambawaha ka vaw,
mada kámbawaha askwaw zeney ca,
hwa razlza.”»
Yesu a rehza wala ma kadawar a pes ma ata zazak
10 A pes ma ata zazak wende,
Yesu a kasasərakzata hejəye a ujek ma ata rak Gazlavay a Yahudu ege.
11 Wala wende a təwse aka,
zəwet malula kámbalza va wam aha jamahkaɗ.
Zəwet anta kéhweremene kusam aza,
mbəy kula ŋ gar gbar səkwaw.
12 Maa Yesu a gəre wala wese ca,
a yaɓa,
a zlepene,
a ŋgaya:
«Wala,
hwa kéreh ŋkwa ŋ dawar lahwaram ŋkwa.»
13 Ca a ca ra ata wala wese,
a təwse a təwse gbar a gar kadak kadak,
a həmanza Gazlavay.
14 Cemey,
madakal ujek ma ata rak Gazlavay kághwaɗ anta ata Yesu,
mavəday maa a rehza ɗala a pes ma ata zazak.
Aya,
a zlepetene ŋ hejəye,
a ŋgaya:
«Wan ŋkwah aka ŋ la zlan.
Mada hune kaɗaw ŋ reh ŋ dawar ŋkune ege ca,
hune ndaha ata vah ŋghe anta ege.
Cemey,
hune ɗaw ŋ ndaha a pes ma ata zazak səkwaw!»
15 Bay Madakal Yesu a zenene,
a ŋgaya:
«Hune hejəye ma a ganana gbak gbak ŋghe ege,
kaw vayay ŋ taba ŋkune a kapal zla anta,
askwaw ca,
berjeŋ anta ata lazam səkan anta a pes ma ata zazak ŋ jeɓza ŋ sene yam askwaw vaw?
16 Wala ŋseŋ dəmas Əybərahəyma ŋghe,
mbəy asa ra Sayɗanu,
va wam aha jamahkaɗ.
Wala ŋghe anta ca,
sa pal aza a pes ma ata zazak səkwaw ca,
mavəday vemey?»
17 A təwse maa a zenetene zlap ana ebe ŋghe ca,
hawa kájata hejəye ma kaɗa gham a mbe ege wese aza tewtew.
Cemey,
hejəye ma a təwse ege tewtew ca,
əy kasasam ata səkan ege ma taŋtaŋ ege tewtew maa Yesu a lata.
Laslaŋgal ma ata mba venjeh
18 Aya,
Yesu a zlepetene ŋ hejəye zeney,
a ŋgaya:
«Bay mala Gazlavay ata hejəye ca,
a nja ana vemey?
Sa kula ŋ slaŋgal aza a vemey?
19 Bay mala Gazlavay ata hejəye ca,
a nja ana mba venjeh maa ɗala a ŋtaw,
a zlak ka ŋ la anta.
A təwse,
a davha,
a gal a mpe ma dakal.
Aya,
vəgem ege əy ndaha,
əy ba ujek tata ege ka ata zləram anta ege.»
Laslaŋgal ma ata səkan ma kahafza uda peŋ
20 Yesu a zlepetene zeney,
a ŋgaya:
«Sa kula ŋ slaŋgal bay mala Gazlavay ata hejəye ca,
a vemey?
21 A nja ana səkan ma kahafza uda peŋ maa wala a ŋta cekuɗe ende ŋghe,
a kəvaɗ a ŋfa dakala ma ata da uda peŋ ŋ hafza tewtew.»
Ladam ŋ bay mala Gazlavay ata hejəye
22 Yesu a nda kəɗa a Urusaləyma.
A nda ta ŋ uzam ege leŋ ta ŋ kəva ege,
a kasasərakzata hejəye.
23 A təwse,
heje wende a ɗawza Yesu,
a ŋgaya:
«Bay Madakal,
Gazlavay a nereh aha ŋ gay ca,
hejəye cekuɗe ende ŋghe vaw?»
Aya,
a zenetene zlap ŋ hejəye ma a təwse ege tewtew a ŋgaya:
24 «Hune tal ŋ dam ta ma ujek ma lez ŋ bay mala Gazlavay ata hejəye.
Njenjəwen sa kazlapahune,
hejəye vəram əy nampam taf ŋ dam ŋma,
cemey,
əy kanala kula ŋ dam səkwaw.
25 «Ayaw,
a pes maa heje ujek kágwarzamha aza,
kámpak ma ujek anta aza ca,
hune ca,
hune mgba ka a bəza.
A təwse,
hune naɗaf ma a ma ujek,
hune nezlepene,
huney:
“Bay Madakal,
zlerzeney ma ujek!”
A nezenahune,
a ŋgaya:
“Sa kasanahune səkwaw,
hune nda aka a katay”?
26 Cemey,
hune nezenene,
huney:
“Heje kázam səkan ŋ la anta leŋ heje kása səkan ŋ la anta.
Hwa késesərekzeney zlap Gazlavay ata taf ege ma ŋ uzam ŋcene.”
27 A nezenahune,
a ŋgaya:
“Sa kasanahune səkwaw,
hune nda aka a katay?
Hune kese ŋkune gədak a sa,
hune hejəye tewtew ma kala dadawar ege!”
28 Cemey,
a təwse,
hune negəreta ata Əybərahəyma,
Əysəyaku leŋ Yakubu zlaɓa uzəye ma zlap ma a Gazlavay ege tewtew ŋ bay mala Gazlavay ata hejəye.
Hune nahan,
hune naɓam zləɗeŋ ŋkune ege,
mavəday hune ca,
hune kéneheye a bəza!
29 A təwse ca,
hejəye əy nandaha aka ta ŋ kəva ege vedəye vedəye ma a manhayak.
Aya,
əy nanja ŋ bay mala Gazlavay ata hejəye ŋ ja gwaygwaya.
30 Cemey,
hejəye ma a tama ma na ŋgha ege,
əy nezen tata a dəwze.
Hejəye ma a dəwze ma na ŋgha ege,
əy nanda tata a tama!»
Yesu mbəy ata taf ma ata nda ŋ Urusaləyma
31 Aya,
a vah wese,
Farəysa ege vedəye,
əy ndaha ara Yesu,
əy zlepene,
əy ŋgaya:
«Kese ete,
nda ŋkwa ata la matakan,
mavəday bay Həyrudus a kampamahwaw ŋ jahwaw aza!»
32 A zenetene,
a ŋgaya:
«Hune nda ŋ zlepene ŋ mbəygaª anta ca:
“Ŋghe!
Sa kagam zəwet malula ege,
sa kerehzata hejəye ma kadawar ege a tambaca,
a mpat,
aya,
ata wan mamahkaɗ anta ca,
sa namaɗza zlan naka.”
33 Ana zlap ca,
səy sa səbar taf naka a tambaca,
a mpat leŋ a vagumtaɗ.
Mavəday mba ma zlap ma a Gazlavay ca,
a kamac ŋ hayak matakan səkwaw,
səy a Urusaləyma.»
34 A dəwze anta,
Yesu a ŋgaya:
«Hune hejəye ma a Urusaləymaª ege!
Hune hejəye ma a Urusaləyma ege!
Hune kájata uzəye ma zlap ma a Gazlavay ege aza,
hune káŋgwafata uzəye ma zlap ma a Gazlavay ege a ŋkəɗaŋ.
Sa kámpam ŋ ɓecahune a tama naka a gas vəram,
ana man gamtak ma keɓecata uzəye anta ege asa papa anta.
Cemey,
hune káɗaw səkwaw.
35 Ayaw,
hune zləme ka,
Gazlavay a nadaɗ ra anta aza ata ha ŋkune,
ujek kwakwas ŋkune a nabaw anta a ŋkef.
Cemey,
sa kazlapahune:
hune kenezen ŋ gərekey zeney askwaw,
səy ata vah maa hune kanazlap:
“Bəzla Gazlavay manja ata ɗala ma kandaha a zlam anta!”»