Luk 12

Yesu a cetene ŋkwaɓ ŋ ha madarlaŋw anta ege

Maa ata Yesu əy kaja səbakw əy ata Farəysa ege leŋ maghwal ma maŋkanaŋkan ege wese ca, hejəye bəlakw ege əy kéɓecha ara Yesu. Hejəye anta ege əy kadak ŋgas ata ŋgas tata ege ŋ taba tata mavəday tata vəram dəydey. Yesu a zlepetene a madarlaŋw anta ege kwagwa, a ŋgaya: «Hune sla ka ata səkan ma kahafza uda peŋ a Farəysa ege, ana zlap ca, hune sla ka ata Farəysa ege, hejəye ma a ganana gbak gbak ege. 2 Səkan ege tewtew maa hejəye əy ɓahzata ka ege ca, əy naghwalha aza ŋ varvara. Ma ege tewtew maa hejəye əy kazlapata ŋ taba tata gbak gbak ka ca, hejəye tewtew əy nasanata aza. 3 Cemey, ma ege tewtew maa hune kanazlapata ŋ kuzle zaɗaw ŋghe ca, əy nezləmeta aza a pes. Ma ege tewtew maa hune kenesesekwetene ŋ zlam hejəye a ujek mampakampak ca, pakam anta a naɓamha ta mgba ata ha ujek.»

Ma kadak ŋ lalak a heɗe ca, vayay?

4 Yesu a zlepetene, a ŋgaya: «Ŋgama naka ege, hune lalak ata hejəye ma kaja hejəye ege səkwaw, mavəday a dəwze anta ca, əy kula ŋ laɓa səkan ma pa ma day wende zeney askwaw. 5 Cemey, sa naghwalzahune ɗala maa hune nalalak a heɗe: hune lalak ata Gazlavay, mbe ca, mbəy kula ŋ jahune aza, a dəwze anta mbəy kula ŋ nahzahune aza ata la ma ata sa gef. Ayaw, sa kazlapahune, ata mbe ana maa hune nalalak.

6 «Ɗala kula ŋ səkam uzəye vəgem ege jaɓan a səlay gbak səkwaw vaw? Cemey, Gazlavay ca, a kasanata vəgem anta ege teŋguleŋ teŋguleŋ tewtew tata. 7 Hune yam, kaw jukwaɗ ha ŋkune ege, əy kéŋgeɗeye teŋguleŋ teŋguleŋ. Hune lalak səkwaw. Cemey, hune ca, Gazlavay a kaɗawahune day aha uzəye vəgem ege vəram.»

Lazlap ma ma taŋtaŋ ata Yesu a tama hejəye

8 Yesu a zlepetene zeney, a ŋgaya: «Sa kazlapahune, kaw vayay ma kazlap a tama hejəye, mbe, ara ɗala naka ca, sa, sa Mba Ɗala sa nazlap a tama malaɓ Gazlavay ege ca, ara ɗala naka yam. 9 Cemey, kaw vayay ma zlap a tama hejəye, a kesenekey səkwaw ca, sa, sa Mba Ɗala, sa nazlap a tama malaɓ Gazlavay ege ca, sa kasan səkwaw yam.

10 «Kaw vayay ma zlap ma dadawar ata sa, sa Mba Ɗala ca, gay anta a pal anta. Cemey, kaw vayay ma zlap ma dadawar ata Zəwet Gazlavay ma keweɗ ca, gay anta a kanapal səkwaw.

11 «Mada əy kejeɓzahune ata laja guma a ujek ma ata rak Gazlavay Yahudu ege, akwaw ca, a tama bay ege leŋ a tama hejəye ma dakal dakal ege ŋ ghemahune ca, hune ɗaw ŋ deŋza ca, hune nereha vaŋgay leŋ hune nazlap vaŋgay səkwaw, 12 mavəday, Zəwet Gazlavay ma keweɗ a naghwalzahune ma maa hune kanazlap ata vah anta.»

Laslaŋgal ma ata ɗala maŋcaɗaŋcaɗ maa ŋkwaɓ ŋ ha askwaw

13 Aya, ɗala wende aka ŋ taba hejəye ma ɓecha ege wese, a zlepene a Yesu, a ŋgaya: «Madakal, zlepene ŋ zlana ma dakal ca, meɓezeney səkan ege maa nene zam ujek vana ŋcene aza.» 14 Cemey, Yesu a zenene, a ŋgaya: «Ŋgama naka, ma cekey ka ŋ zla ma ma ŋ taba ŋkune, akwaw ca, ŋ ɓezahune səkan ŋkune ege ca, vayay?» 15 A dəwze anta, a zlepetene ŋ hejəye tewtew, a ŋgaya: «Hune sla ka! Hune ɗaw ŋ mpam səkan ma asa ra aza mambaza səkwaw. Cemey, kaw ɗala mbəy zlaɓa səkan asa ra anta dakala ca, a kananja mavəday anta kaw vepey askwaw.»

16 Aya, a zlepetene a laslaŋgal ma ŋghe, a ŋgaya: «Heje maŋcaɗaŋcaɗ wende aka, la anta ege əy kélene səkan dakala mambaza. 17 Ana ebe ŋghe, heje anta a deŋza ŋ ha anta, a ŋgaya: “La ma ata cata səkan ege ma jamha ŋ la naka ŋghe ege parham! Sa nala na ŋgha ca, vaŋgay?” 18 A dəwze anta a zlap ŋ ha anta zeney, a ŋgaya: “Ayaw, sa kasan səkan maa sa kanalaw. Galaɓa, sa ŋgwafata tərgwa naka ege aza tewtew, sa lam ma pa ma dakal dakal ege, sa zahza ndərey naka leŋ səkan naka ege vedəye tewtew ŋ tərgwa anta ege. 19 Aya, sa nazlap ŋ sa, sa ya, səkan ma asa ra naka ege əy kanatuwaɗ askwaw, əy nala va vəram. Sa nazazak, sa nazam səkan leŋ sa nasa səkan, sa nasasam.” 20 Cemey, Gazlavay a zlepene, a ŋgaya: “Hwa gaɗaŋ! A zaɗaw ŋgha, hwa namac. Ayaw eze, səkan ŋkwa ege tewtew maa hwa ɓecata ka ŋghe ege ca, hwa ɓecetene ka ŋ vayay?”» 21 A zeney, Yesu a ŋgaya: «A nendewzene ŋ ɗala ma ɓec səkan aka dakala a mbe, ana ebe ŋghe. Cemey, ara Gazlavay ca, ara ɗala metetekw.»

Gazlavay ma kaval səkan ege tewtew

22 A dəwze anta, Yesu a zlepetene ŋ madarlaŋw anta ege, a ŋgaya: «Mavəday anta, sa kazlapahune, hune ɗaw ŋ ŋga ŋkwaɓ ata lanja ŋkune səkwaw, ata səkan ta zam səkwaw leŋ ata rəgwac ma ata ca ata kusam ŋkune səkwaw. 23 Sa zlapahune ana ebe ŋghe ca, mavəday lanja ŋkune pa ma day aha səkan ta zam, kusam ŋkune yam pa ma day aha rəgwac. 24 Hune sarzata vəgem ege may. Əy kazləka səkan askwaw, əy kepetha səkan askwaw, əy kaɓah səkan aka askwaw, tərgwa tata askwaw. Cemey, Gazlavay a kezemetene səkan! Hune ca, lanja ŋkune pa day aha vəgem ege, səkwaw vaw! 25 Ma kula ŋ taba ŋkune, a ledeŋ ŋkwaɓ anta ŋ falza wan lanja anta a manhayak kaw cekuɗe ende ŋghe ca, vayay? 26 Mada hune kula ŋ la səkan kaw cekuɗe ende səkwaw ca, hune deŋ ŋkwaɓ ata səkan ege vedəye ŋ vay?

27 «Hune sarza fafan mpe ege ma a damaw may. Əy kala zlan askwaw, əy kaja rəgwac askwaw! Cemey, sa kazlapahune, kaw bay Suleymanu, a səkan ma asa ra anta tewtew, kaw káca rəgwac ma tuwah ana fafan mpe damaw askwaw. 28 Ara Gazlavay ma kafafanzata ŋkusaf ege a tambaca, cemey, a mapat ca, əy ŋkəɗawata ŋ kwahwaw. Hune ma lemzekey ŋ unaf ŋkune ege səkwaw ŋghe, Gazlavay mbəy kula ŋ cahune rəgwac ma pa ma tuwah aha fafan anta ege. 29 Ana ebe ŋghe, ŋkwaɓ ŋkune ege əy ɗaw ŋ ŋga ata pes ata pes ata səkan ma ata zam ey səkan ma ata sa səkwaw. 30 Ma kampam səkan ŋghe anta ege ca, ara hejəye ma a manhayak ma kasan Gazlavay səkwaw ege. Cemey, ŋkune ca, cehw ŋkune, Gazlavay a kasanaw, hune kaɗaw səkan ŋghe anta ege. 31 Zukwan ca, hune mpam bay mala Gazlavay ata hejəye mpar, a dəwze anta Gazlavay a navalahune səkan ege vedəye vedəye a heɗe zeney.»

32 Yesu a zlepetene a madarlaŋw anta ege, a ŋgaya: «Hune lalak səkwaw, hune ca, hune vəram askwaw ana ŋtəməye ma əy kəcer ege ende ŋghe, cemey, cehw ŋkune Gazlavay, mbəy ma ɗaw ŋ valahune səkan ma tuwah tuwah ege ŋ bay anta. 33 Hune səkamata səkan ŋkune ege aza, hune ŋtezetene səlay anta ŋ hejəye metetekw ege. Hune mpam ŋ ɓec səkan ege ma asa ra mgba ata uzlaf ara Gazlavay, ata la maa əy kanatuwaɗ tata askwaw leŋ əy kanagay tata askwaw. Mavəday a təwse ca, ŋhel ege əy kula ŋ ŋtata aza askwaw, kaw səkan ege ana tepe əy kula ŋ gayzata aza askwaw. 34 Ayaw, ata la ma səkan ma asa ra ŋkune ege əy kéɓeheye ca, unaf ŋkune mbəy a təwse yam.»

Zlap ata lasla kusam

35 Yesu a zlepetene a madarlaŋw anta ege, a ŋgaya: «Hune sla ka kadak kadak ŋ lene zlan a təwjek ŋkune. Patarla ŋkune ege əy meweɗ la kaw hune ɗaw maczata aza səkwaw. 36 Hune yam, hune la ana madarlaŋw ege maa əy kahəbar təwjek tata maa a kenezenha aka ŋ gwaygwaya laca dəma. Mada káhwasha aza ca, a naɗaf ma a ma ujek, madarlaŋw anta ege wese əy nezlerzene ma ujek. 37 Mada təwjek tata a zenha, a ndewzetene əy késleye kadak kadak, əy kelene zlan ca, əy nelem zəhay. Sa kazlapahune njenjəwen, a naca rəgwac ma ata la zlan ata kusam, a nayata, a nanjazata ka, a neveletene səkan ŋ zam. 38 Mada a zenha kaw ŋ taba zaɗaw, kaw day mapat, a ndewzetene əy késleye ca, əy nelem zəhay!»

39 Yesu a zlepetene a ŋgaya: «Hune zləme ma ŋgha kadak kadak, mada heje ujek a kasan vah maa ŋhel a nandaha a wata anta ca, a nasla ka, a kanayakza ŋhel anta ka ŋ ŋgwaf ujek anta askwaw. 40 Hune yam, hune sla ka kadak kadak mavəday sa, sa Mba Ɗala, sa nandaha ata vah maa hune kedeŋza askwaw.»

Mala zlan ma taŋtaŋ ey mala zlan dadawar

41 Pəyer a ŋgaya: «Bay Madakal Yesu, hwa zlap a laslaŋgal ma ŋgha ca, ŋ nene gagaha vaw, ŋ hejəye tewtew vaw?»

42 A təwse ca, Yesu a zenene, a ŋgaya: «Mala zlan ma taŋtaŋ ma ŋkwaɓ ŋ ha ca vayay? Ara ɗala maa təwjek anta a velene hejəye ma la zlan ege aka tewtew asa ra anta, ŋ sar la ata tata leŋ ŋ veletene səkan ta zam mada la kála anta tete ŋ zam uda. 43 Mada təwjek anta a zenha a wata, a ndewzene a kala zlan a heɗe a heɗe ca, mala zlan wese a nelem zəhay. 44 Ana ebe ŋghe, njenjəwen sa kazlapahune, təwjek anta a nepelzene səkan anta ege ka tewtew asa ra anta. 45 Cemey, mada mala zlan wese a deŋza ŋ ha anta a ŋgaya: “Təwjek naka a kenezenha kəcaŋ askwaw”. A təwse, a nja ka ŋ gazlata mawal ma la zlan ege ey weləye ma la zlan ege wese. A zam səkan, a sa səkan, a ŋhwaz anta. 46 Aya, təwjek anta wese a nezenha a pes ma kédeŋza askwaw, kaw a kasan ler anta səkwaw. A təwse ca, təwjek anta a nagam mala zlan wese aza, a nesene gef dakala, ana maa əy kesetene gef ŋ hejəye ma lamza zlap a Gazlavay ege səkwaw.

47 «Mada mala zlan ma kasan səkan maa təwjek anta a kaɗawaw, cemey, kásla kusam anta ka askwaw, a kala səkan maa təwjek anta a kaɗaw səkwaw ca, heje anta a nelem ja dakala. 48 Cemey, mada a kasan səkan maa təwjek anta a kaɗaw səkwaw, kála gay tete ma ata lem ja ca, a nelem ja cekuɗe ende. Ɗala maa əy velene səkan dakala, əy naɗawza a səkan dakala yam, cemey, ɗala maa əy kégeɓzene səkan aka asa ra anta dakala, əy naɗawza pa ma day zeney.»

Zlap ata hejəye ma neɓez kusam mavəday Yesu

49 Yesu a ŋgaya: «Sa ndaha ca, ŋ ca kwahwaw ata manhayak. Sa ɗaw ca, kwahwaw anta mabas na ŋgha! 50 Səy əy mesekey gef dakala hwas ata lamac. Ŋkwaɓ naka a kaŋga hwas a pes ma gef anta a naŋtakw. 51 Hune deŋza sa ndaha ca, sa daha zəhay a manhayak vaw? Kaw askwaw! Cemey, hejəye əy neɓez kusam ata lanja tata ege mavəday sa. 52 Mar aka na ŋgha, mada hejəye jaɓan əy a ge teŋguleŋ, əy neɓez kusam tata aza ata lanja tata ege. Hejəye ma mahkaɗ ege əy naga ata hejəye ma gbak ege, hejəye ma gbak ege yam əy naga ata hejəye ma mahkaɗ ege. 53 Ata cen mbaw əy neɓez kusam aza a mba anta, mbaw, əy neɓez kusam aza a cen. Man haldəma, əy neɓez kusam aza a həla anta, haldəma əy neɓez kusam aza a maman. Man mawal əy neɓez kusam aza a wala mba anta, wala mbaw, əy neɓez kusam aza a man mawal.»

Zlap ata lasan səkan ma kanalaha

54 Aya, Yesu a zlepetene ŋ hejəye tewtew zeney, a ŋgaya: «Mada hune kegəre van a kabaha ta ata landav pes, hune kazlap ca, huney: “Van a naɗaha”. Ca, a kala ana maa hune zlap anta. 55 Mada tatəɗam a jaha aka ta uza asa ndaŋw ca, hune kazlap, huney: “Ruraɓ a nala”. Ca, a kala ana maa hune zlap anta. 56 Hune hejəye ma a ganana gbak gbak ege, hune kasan ŋ ɓez səkan ma kala ata hayak leŋ ma kala mgba ata uzlaf ca, hune kula ŋ san səkan ma kala na ŋgha səkwaw ca, mavəday vemey?»

Hune lamza unaf ŋkune ege ka a hejəye maa hune gulak a tata ege

57 Yesu a zlepetene ŋ hejəye zeney, a ŋgaya: «Hune a ha ŋkune, hune san səkan ma kadak ŋ la yam səkwaw ca, ŋ vay? 58 Cemey, mada ɗala maa hune gulakha a mbe káŋkəɗawahwaw aza, hune kanda ata taf a mbe ŋ ja guma ara ɗala ma ja guma ca, jene mbahw ŋ lamza ma anta ka. Akwaw ca, a nejeɓzahwaw a tama maja guma, maja guma anta yam a navalzahwaw asa ra sawje ege, əy nanahzahwaw ŋ daŋgay. 59 Cemey, njenjəwen sa kazlapahwaw, əy kanapalahwaw ka ŋ daŋgay wese askwaw, səy hwa ma ŋtar səlay maa əy zlahwaw ŋ ŋtar wese aza tewtew.»