Yesu, mbəy madakal pes ma ata zazak
6
A pes ma ata zazak wende aka,
Yesu ey madarlaŋw anta ege,
əy zlaŋha aka ta ŋ la səkan wende aka maa əy kayaɓa,
alkamarəyª.
Cemey,
madarlaŋw anta ege wese əy ŋga ha alkamarəy wese,
əy səlamaw,
əy ɓamaw.
2 A təwse ca,
Farəysa ege vedəye əy kegəreta,
əy zlepetene,
əy ŋgaya:
«Hune la səkan maa kwakwas ŋtakwaw kápal taf ŋ la askwaw a pes ma ata zazak ca,
ŋ vay?»
3 Aya,
Yesu a zenetene,
a ŋgaya:
«Hune kéjəŋge ŋ leŋter ma ŋ ɗerewel a Gazlavay ata səkan maa Dawuda a la a pes wende aka askwaw vaw?
Ata vah anta ca,
metes kájata ata Dawuda ey hejəye anta ege,
cemey,
səkan ta zam ara tata askwaw.
4 A təwse ca,
Dawuda a dam a ujek Gazlavay,
a ŋta uda peŋ ma kéveleye ŋ Gazlavay.
Aya,
a zamaw,
a veletene ŋ hejəye anta ege wese yam.
A heɗe a heɗe ca,
ma kazam uda anta ca,
mala kwakwas ege gagaha.»
5 Cemey,
a zlepetene zeney,
a ŋgaya:
«Sa,
sa Mba Ɗala,
sa madakal pes ma ata zazak.»
Yesu a rehza ra mamacamac a ɗala wende aka a pes ma ata zazak
6 Aya,
a pes ma ata zazak wende aka zeney,
Yesu a dam a ujek ma ata rak Gazlavay,
a kasasərakzata hejəye.
Heje wende a təwse aka,
ra zam anta kámac anta.
7 Maghwal ma maŋkanaŋkan ege ey Farəysa ege,
əy kénjeye ŋ həbar Yesu,
ketegəre a nerehza ɗala a pes ma ata zazak ka vaw!
Əy mpam ca,
ŋ lem taf ŋ ghemew.
8 Cemey,
Yesu ca,
a kasan səkan maa əy kedeŋza ŋ ŋkwaɓ tata ege.
Aya,
a zlepene ŋ heje maa ra anta kámac anta wese,
a ŋgaya:
«Gwarzam,
deŋ aka a tama hejəye ete ŋghe!»
A təwse ca,
heje wese,
a gwarzam,
a deŋ aka.
9 A dəwze anta,
Yesu a zlepetene ŋ maghwal ma maŋkanaŋkan ege ey Farəysa ege wese,
a ŋgaya:
«Sa kaɗawzahune,
ma ŋtakwaw maŋkanaŋkan ca,
a pal taf ca,
ŋ la vemey?
Ŋ lene taŋtaŋ ŋ ɗala a pes ma ata zazak vaw,
ŋ lene dadawar vaw?
Ŋ rehza ɗala aza ŋ dawar anta vaw,
ŋ yakza ka mamac anta vaw?»
10 A təwse,
a sarzata tewtew tata,
a dəwze anta a zlepene ŋ heje wese,
a ŋgaya:
«Daɗ ra ŋkwa.»
Aya,
a la ana maa Yesu a zlepene wese.
Kəɗe ca,
ra anta lam a lam anta.
11 Cemey,
maghwal ma maŋkanaŋkan ege ey Farəysa ege wese,
unaf kághwaɗata aza mambaza.
Aya,
əy ja səbakw ŋ taba tata,
əy ŋgaya:
«Heje nelene ŋ Yesu ŋghe anta ca,
vemey?»
əy ya.
Yesu a may malaɓ anta ege wam aha gbak
12 Aya,
ata vah ege wese,
Yesu a tev ŋ barla ŋ rak Gazlavay.
A təwse ca,
zaɗaw zaɗaw a karakaw.
13 Ca,
maa mapat kála anta ca,
a yahata madarlaŋw anta ege.
A may wam aha gbak ŋ taba tata amba a cetene zlam malaɓ ege.
14 A may ca:
Səymawn,
a cene zlam anta Pəyer ey zlaŋgan Andəyre,
Yakuba ey Yuhana,
Fəyləyp ey Bartawlawme,
15 Mata ey Tawmas,
Yakuba mba Alfa,
Səymawn (ɗala ma kampam taf ŋ rehzata hejəye anta ege asa ra hejəye maa əy kaɗaw ŋ gəreta ata nje ege səkwaw),
16 Yahuda mba Yakuba ey Yahuda Əyskarəyawt,
ɗala ma kanavalza Yesu ŋ jaw.
Yesu a keghwelzetene zlap a Gazlavay ŋ hejəye
17 Aya,
Yesu a tadakwha aza ata barla zlaɓa malaɓ anta ege wese.
A gar aka ata varvara ma paɗay paɗay,
ata la maa madarlaŋw anta ege vəram əy a təwse zlaɓa hejəye vedəye vəram,
əy ndaha aka ta ŋ hayak Yahudəya,
ta ŋ uzam Urusaləyma.
Hejəye vedəye yam,
əy ndaha aka ta ŋ uzam Təyrus ey ŋ uzam Səydawn,
uzam ma a ma lakwat ege.
18 Əy ndaha ca,
ŋ tehzene zlam ŋ Yesu.
A zeney,
əy ndaha ca,
ndar Yesu a rehzata aza ŋ dawar tata ege.
Cemey,
ŋ taba hejəye anta ege wese ca,
vedəye maa zəwet malula kámbalata aza aka.
A zeney,
Yesu a gamata zəwet malula ma ŋ ha tata ege aza.
19 A təwse ca,
hejəye tewtew əy kampam taf ŋ gesɓa ra tata ege a heɗe yam,
mavəday ɓarɓar a kadamha ŋ kusam anta,
a kerehzata aza ŋ dawar tata ege tewtew.
Zlap ata zəhay a Gazlavay leŋ ata dadawar ma kanandaha ata hejəye
20 A dəwze maa Yesu a rehzata hejəye aza ŋ dawar tata ege wese ca,
a sarzata madarlaŋw anta ege,
a zlepetene,
a ŋgaya:
«Hune metetekw ege,
zəhay a Gazlavay mbəy ata hune,
mavəday bay mala Gazlavay kéveleye ŋ hune.
21 Hune maa metes a kajahune na ŋgha ege,
zəhay a Gazlavay mbəy ata hune,
mavəday Gazlavay a nahəraɗzahune a səkan ta zam dakala mambaza.
Hune ma kahan na ŋgha ege,
zəhay a Gazlavay mbəy ata hune,
mavəday,
hune nasasam,
hune naɓas!
22 «Mada hejəye əy kaɗawahune səkwaw,
əy kececefzahune səkwaw,
əy kazlap ma ma dadawar ata hune mavəday sa,
sa Mba Ɗala ca,
zəhay a Gazlavay mbəy ata hune.
23 Ata vah anta wese ca,
hune mber,
hune sasam dakala mambaza,
mavəday Gazlavay a naŋtarahune ruraɓ ŋkune mgba ata uzlaf ara mbe.
Ayaw,
jeje tata ege əy setene gef ŋ uzəye ma zlap ma a Gazlavay ma a nuna anta ege ana ebe ŋghe.
24 Cemey,
hune hejəye maŋcaɗaŋcaɗ ege,
dadawar a nandaha ata hune,
mavəday hune kélem zəhay ŋkune aza tew.
25 Hune ma həraɗ na ŋgha ege,
dadawar a nandaha ata hune,
mavəday metes a najahune.
Hune ma kaɓas na ŋgha ege,
dadawar a nandaha ata hune,
mavəday hune nahan,
hune nejejekw.
26 «Hune hejəye maa əy kahəmanzahune na ŋgha ege,
dadawar a nandaha ata hune.
Jeje tata ege əy həmanzata uzəye ma zlap ma a metəwle ege a nuna anta ana ebe ŋghe.»
Ɗaw hejəye maa əy kaɗaw ŋ gərehwaw ata nje ege səkwaw
27 Aya,
Yesu a zlap zeney,
a ŋgaya:
«Cemey,
sa kazlapahune,
hune ma ketehzekey zlam ege:
hune ɗawata hejəye ma kaɗaw ŋ gərehune ata nje ege səkwaw.
Hejəye ma kaɗawahune ege səkwaw ca,
hune letene taŋtaŋ.
28 Hune bəzletene ma ma taŋtaŋ ŋ hejəye ma kagayzahune ege,
hune rak Gazlavay mavəday hejəye ma kasahune gef ege.
29 Mada ɗala a gazlahwaw ŋ ɓughwam ca,
bewzene kəva ɓughwam wende zeney.
Mada ɗala a ŋtahwaw garawal ŋkwa aza ca,
geɓzene maŋta ma a səka aza zeney.
30 Velene səkan ŋ kaw vayay ma ɗawzahwaw.
Mada ɗala káŋtahwaw səkan ŋkwa aza cemey,
hwa ɗaw ŋ ɗawza səkwaw.
31 Ana ebe ŋghe,
hune letene səkan ma taŋtaŋ ŋ hejəye,
maa kəɗe,
hune kaɗaw əy lahune taŋtaŋ anta,
ana mbe yam.
32 «Cemey,
mada hune ɗaw hejəye ma kaɗawahune ege gagaha ca,
Gazlavay a nahəmanzahune mavəday anta vaw?
Kaw askwaw!
Kaw hejəye mala gay ege yam ca,
əy kaɗaw hejəye ma kaɗawata ege.
33 Mada hune letene taŋtaŋ ŋ hejəye ma kalahune taŋtaŋ ege gagaha ca,
Gazlavay a nahəmanzahune mavəday anta vaw?
Kaw askwaw!
Kaw hejəye mala gay ege yam ca,
əy kalaw,
andəwse yam.
34 Ayaw,
mada hune jetene duwa səlay ŋ hejəye maa hune kasanata ege,
kulakw əy nezenehune səkan ŋkune aza ca,
Gazlavay a nahəmanzahune mavəday anta vaw?
Kaw askwaw!
Kaw hejəye mala gay ege əy kejetene duwa səlay ŋ hejəye mala gay ege,
ndar əy zenetene ka ana mbe.
35 A heɗe a heɗe ca,
hejəye ma kaɗaw ŋ gərehune ata nje ege səkwaw ca,
hune ɗawata,
hune letene taŋtaŋ.
Cemey,
hejəye ma hune kasanata,
əy kanala kula ŋ zenahune səkan ŋkune ege aka səkwaw ca,
hune jetene duwa.
Mada hune kala ana ebe ŋghe ca,
Bay Gazlavay Madakal a naŋtarahune ruraɓ ŋkune aka,
hune nala ŋkune ŋ uzəye anta ege.
Mavəday mbe ca,
ara ɗala ma taŋtaŋ.
A kaɗawata hejəye ma kasan ŋ lene wasay ege səkwaw ey hejəye dadawar ege.
36 Hune letene taŋtaŋ ŋ hejəye ana maa cehw ŋkune Gazlavay a keletene taŋtaŋ ŋ hejəye.»
Hune ghemata hejəye səkwaw
37 Yesu a zlepetene zeney,
a ŋgaya:
«Hune ghemata hejəye səkwaw,
Gazlavay yam,
kaw a keneghemahune ata gay ŋkune ege askwaw.
Hune ndavzata hejəye ŋ guma səkwaw,
Gazlavay a kanandavzahune ŋ guma askwaw yam.
Hune pelzetene gay a hejəye ka,
aya,
Gazlavay a palzahune gay ŋkune ege ka yam.
38 Hune veletene səkan ŋ hejəye,
cemey,
Gazlavay a navalahune ana mbe yam.
A nazahzahune səkan ma taŋtaŋ dakala mambaza majajakajajak ghef ŋ bakatar ŋkune ma dakal,
ha a zaha ata hayak!
Cemey,
Gazlavay a naslaŋgalahune səkan ana maa hune sleŋgeletene səkan ŋ hejəye yam!»
39 A dəwze anta,
Yesu a zlepetene a laslaŋgal ma zeney,
a ŋgaya:
«Ulaf kula ŋ njew ulaf wende səkwaw.
Mada ulaf a njew ulaf wende ca,
tata gbak tata,
əy nandav ŋ uley.
40 A zeney,
ɗala ma kasasərak ca,
kula ŋ san səkan aza day aha masasərak anta səkwaw.
Cemey,
mada ɗala anta,
kásasərak aza a heɗe a heɗe kəɗaŋ ca,
a nanja ana heje masasərak aza wese.»
41 Aya,
Yesu a zlepetene a laslaŋgal ma matakan zeney,
a ŋgaya:
«Hwa kula ŋ gəre mba ŋkusaf ma ŋ nje zlanahw ca,
hwa kula ŋ gəre mpe ma ŋ nje ŋkwa səkwaw ca,
vaŋgay?
42 Ca,
hwa san ŋ zlepene ŋ zlanahw,
“Zlana,
kwagwa sa daɗahwaw mba ŋkusaf ma ŋ nje ŋkwa aza”,
ca,
mpe ma dakal ŋ nje ŋkwa aka,
hwa kula ŋ gəre səkwaw ca,
vaŋgay?
Hwa ɗala ma a ganana gbak ŋgha,
daɗ aza mpe ma ŋ nje ŋkwa aza mpar,
ndar hwa gəre la kadak kadak ŋ daɗ aza mba ŋkusaf ma ŋ nje a zlanahw.»
Laslaŋgal ma ata mpe ma kambaw mba ma taŋtaŋ ey ma kadak səkwaw
43 Yesu a zlepetene zeney,
a ŋgaya:
«Njenjəwen,
mpe ma taŋtaŋ ca,
a kambaw mba ma kadak səkwaw,
askwaw.
Mpe ma kadak səkwaw yam ca,
a kambaw mba ma taŋtaŋ səkwaw yam.
44 Cemey,
kaw mpe vekey ca,
a nasan ca,
ata mba anta.
Əy kambal mba səke ata mpe jəkeɗ askwaw.
Əy kambal mba mpe mavaw ata mpe maŋgartataw askwaw.
45 Ɗala ma taŋtaŋ ca,
a ghwalha səkan ma tuwah ŋ unaf anta ma taŋtaŋ.
Cemey,
ɗala dadawar ca,
a ghwalha səkan dadawar ŋ unaf anta ma kadak səkwaw.
Njenjəwen,
ma maa ɗala a kazlap aza ta ŋ pakam anta ca,
a ghwalza səkan ege ma ghef ŋ unaf anta.»
Laslaŋgal ma ata ujek ege gbak
46 Yesu a zlepetene zeney,
a ŋgaya:
«Hune yekey “Bay Madakal,
Bay Madakal”,
cemey,
hune kala səkan maa sa kazlapahune askwaw ca,
ŋ vay?
47 Kaw vayay ma kandaha ara sa,
ma kezləme zlap naka ey ma kala səkan ana maa sa zlap anta ca,
sa naghwalzahune heje anta ca,
a nja ana vayay.
48 Cemey,
heje anta a nja ana ɗala ma lam ujek anta,
a ra uley ndaw ujek anta pəɗem hwas ata kefe.
Aya,
a ca ndaw ujek anta a heɗe.
Pes maa van káɗaha ca,
zlazlar a da yam hwas ata ujek anta,
təwlek a təwlekew.
A mbe anta tewtew ca,
kághwaramza askwaw,
mavəday ndaw ujek anta kéceye ata kefe.
49 Cemey,
ɗala ma kezləme zlap naka,
a kala səkan ana maa sa zlap anta askwaw ca,
a nja ana ɗala ma lam ujek anta ata hayak,
kaw kára uley leŋ kádar ndaw ujek anta aka a ŋkəɗaŋ askwaw.
Aya,
a pes maa van káɗaha ca,
zlazlar a da yam hwas a heɗe ca,
balhaɗay a ghwaram anta tewtew.»